Ahẹ Ụgama 72 - IWE ỌNỊNỊ

Aduwa ana a mẹ yị Ohinọyị (Ahẹ ana a jị yị Isoromọnị).

¹ Ohomorihi, navọ kwogwo wa va sị ịzẹyịza yị ohinọyị dị ọ̀ vaa sịị mẹ̀ ọkarẹyị.

² Navọ kwogwo ọ̀ọ sị ịzẹyịzaa mẹ ohinọyị anị, dị asị o sima ọkarẹyị mẹ yị aza ana aa rị ụya.

³ Navọ ò ve zoza yị avaba aza ene hi ini ẹtẹ awụ, dị ahịka ịzẹyịza avaba aza aa mẹ nị.

⁴ Navọ asị ohinọyị mẹ̀ ọkarẹyị akụvị yị onosiye nịnị. Navọ ahịka vị ohinọyị aa gụ oniruwa ụvọ, di ò hú anayịchama nịnị ẹtẹ nị.

⁵ Navọ ohinọyị ò ve kú orubo ẹtẹẹtẹrẹ, dị ahịka irima anị ẹ vị vaa rị ohinọyị pooro nị. Èee rị re ọyị ọnịrị ụhwẹ, ahịka ẹnị ẹ vị vaa rị ohinọyị nị.

⁶ Ohomorihi ọ̀ navọ ohinọyị ọ̀ va sị ẹngụ aza hunẹnẹ anka orihi mẹ̀ẹ zụ̀ dọ ọ sị ẹtẹ hunẹnẹ avọọ.

⁷ Ụmẹ ohinọyị ọ̀ vị ụmẹ ana avaba aza vaa sị mẹ ịzẹyịza dị ahịka vi ee zozaa yị avaba aza pooro dị ẹhẹ ọ̀ kara ụ̀pa nị.

⁸ Ọnị ọ vaa vị ohinọyị avaba aha nị. Ọnị ọ vaa nyị ẹtẹ huu hụrẹ Okuha Iyuhwireti na ngụ ọzarẹyịrẹsụ ẹtẹ nị.

⁹ Aza ana ra hi ịnị ẹtẹ ọpaapara vaa vẹ vee kú ẹtẹẹ kụ́ ohinọyị, dị ọnịvị anị maanị ee muna eteesu.

¹⁰ Ohinọyị Anitasisi ọnịrị ohinọyị ene hi ẹkụra huu vaa kụ́ ịsa vaa mẹ ohinọyị ẹyịza. Ohinọyị Anarabi ọnịrị ohinọyị Anetiyopiya rẹ vaa kụ́ ịsaa vaa yọ.

¹¹ Avaba ohinọyị vi ene vee kú ẹtẹẹ yị ohinọyị ayị ọnọnị, dị avaba anẹhẹ aa hẹkẹ ẹ.

¹² Oniruwa ọnịrị aza ana aa sị ụyaa rị dị ẹ̀ yị nyị ọnọgụvọ ene nowu na za a vi ọnị ọ vaa dọ ọ tụ́.

¹³ Ọ vaa vayị oniruwa ọnịrị ọkụmị dị ọ dọ oniruwa tụ́ ka asị o sú.

¹⁴ Ohinọyị vaa dọ waa tụ́ hụụnị ụvọ ọza ana aa mẹ ẹvaya yị wa, dị aa chamayị yị wa. Ohinọyị ọ yị vaa sị ịrẹyị ẹnịnị tụ́ ụvọha vụrụ-vụrụ.

¹⁵ Ohinọyị ò kú orubo ọcha, ò kú orubo ẹya, Anarabi vị ana vaa kụ́ igooru vaa mẹ̀ ẹ ẹyịza Aza vị ana vaa mẹ̀ aduwa yọ pooro vi o vee zee yọ pooro ịnị ẹhẹ anị nị.

¹⁶ Ohomorihi ọ̀ navọ ịsa ịnị aarẹ ọ̀ mẹ gwẹẹtẹ ịnị ẹtẹ ọnọọ. Aarẹ ana a dà hi ịnị avaba ataba ẹ mẹ̀ ịsa ẹtẹẹtẹrẹ. Ịsa ịnị ẹnịnị ẹ̀ mẹ anka ẹtẹ Ịrẹbanọnị mẹ̀ẹ mẹ̀ ịsa avọọ. Aza ẹ̀ rụrụ hi ịnị ẹkụra anka avị mẹ̀ chị hi ịnị aarẹ avọọ.

¹⁷ Ohomorihi, navọ kwogwo asị ịrẹha ohinọyị vú pàá. Navọ àa tịị tamayị anị pooro zịna. Navọ ahịka vị anẹhẹ vaa kà a ka ò zee yị ẹnị anka o mè zee yị ohinọyị nị. Dị ẹ̀ rẹẹ mẹ̀ aduwa ka ò zee yị ohinọyị.

¹⁸ Ẹnẹyịmavara, ana vị Ohomorihi Anisirẹrị, yâ kụ́ wụ avọ. Ẹwụ nya kẹnẹ ọ maanị mẹ ịrẹyị ẹbanyị-ẹbanyị nị.

¹⁹ Ẹwụ ana maanị nyị ụbanyị, ị vaa kụ́ wụ avọ pooro nị. Ụbanyị awụ vi ene vee chì avaba ẹhẹ ẹngụ. Aamị, mị ka Aamị.

²⁰ Ịzẹnị aduwa oni Idevidi Ozi Ijeese mẹ ta tụ́ nị.