Ahẹ Ụgama 52 - IWE ỌNỊNỊ

Ịsị e vee tù aza edivi (Ahẹ Idevidi ana a sị sị ịrẹyọyẹ kọ ọza)

¹ Sị ẹ vẹ dị waa sị ebira odivi wo oto ẹwụ ene ro ka wâ nyị ụkata? Sị ẹ vẹ dị ụ maanị ee wo oto pooro wáá yẹ ka wa sị tẹ ini eyi Ohomorihi?

² Waa gẹ eyi ọza ka we re oze wụ ọ Ịrẹyị irenu awụ ô divi, ọ zụ wụ̀ ọza.

³ Ebira odivi kẹnẹ u sì ịrẹyị anị nị we yi sì ịrẹyị ebira ọyịza Avọọ u mè ree sì ka wee cheeche nị we mē sì ka waa kà ịzẹyịza.

⁴ Onireche ụ vị nị, ịrẹyị ana vaa kụ́ ọ kata ọza ẹngụ kẹnẹ ụụ̄ kà nị.

⁵ Ohomorihi vị ana vaa sị wụụ hụụnị ajẹngụ awụ dị ọ mẹ ka awụ ọ̀ ta ịnị ẹhẹ pàá.

⁶ Aza ana aa mẹ̀ ebira ana vọrọ ini eyi Ohomorihi vavọọ vee ree dị angwa hí ẹnị ịnyẹmba Ẹnịnị vee nyị wu nịnị unyi dị ẹ ka,

⁷ wéē re aza ana ka ẹnị e yi che ayị za Ohomorihi Wéē re aza ana sị ayị tụra ogu ẹnịnị, dị ẹ yaa wụ̀ azaa ha ka ẹnị ẹ̀ zụ nyị ụkata hu avọọ.

⁸ Ama ẹmị vị ana sị mẹẹ anka ọchị ana aā hị́ orivi ana aā tụ́ pooro avọọ Avọọ m mẹ̀ vaa yà ini irehi Ohomorihi, dị ẹhẹ amị ee zoza nị Ohomorihi vi ene ee sì ịrẹyị ọza pooro zịna-zịna Ọnọọ mị sị ayị tụra nị.

⁹ Ohomorihi, mị vaa kụ́ wụ avọ pooro agụvị ịsa ọnị ụ mẹ mị vaa kà a éyi aza awụ ka ịsa ọnị ụ mẹ ô zoza.