Ahẹ Ụgama 145 - IWE ỌNỊNỊ

Ahẹ ana a jị gono Ohomorihi (Ahẹ Idevidi ana a jị gono Ohomorihi)

¹ Ohomorihi amị ana vị ohinọyị, mị vaa sị ụbanyịị wụ. Mị vaa kụ́ wụ avọ pooro zịna-zịna nị.

² Eyinị-eyinị mị va kụ́ wụ avọ, dị maa sị ụbanyịị wụ pooro nị.

³ Ẹnẹyịmavara vị ana nyayịnẹ nyị ụbanyị. Avọọ a mẹ̀ rẹ vọrọ ka àa kụ́ ọ avọ nị, nyị ọza ana ka ọnị ộ yẹ ịzị ọ nyị ụbanyị ne tù.

⁴ Anụmẹ ẹnyị vị ana vaa kụ́ wụ avọ naa gẹrị anụmẹ ọsa agụvị ụkọrọ ọnị ụ mẹ. Ẹnịnị vị ana vaa kà ịta mā ta pa ọnị ụ mẹ.

⁵ Ẹnịnị vaa kà ịrẹkụkụ ụbanyị awụ, di e yee ro ịrẹyị ụkọrọ ẹbanyị-ẹbanyị ọnị ụ mẹ.

⁶ Ẹ vaa kà a ụ mẹmẹ sị ụkata mẹ̀ ụkọrọ ịvọpa. Ịta mā ta pa ọnị ụ mẹ vị ọnị mị vaa kà a zụ̀ aza.

⁷ Avaba ịsa ozoza ọnị waa mẹẹ yị aza vị ẹnị ẹnịnị vaa sị jị ahẹ.

⁸ Ẹnẹyịmavara vị ana aā vayị ọza ẹtẹẹtẹrẹ.

⁹ Ẹnẹyịmavara vị ana aa mẹ̀ ịsa ozozaa yị avaba aza. Avaba ọza ọnị ọ mẹ vị ọnị ọọ̄ vayị anị.

¹⁰ Ẹnẹyịmavara, avaba ịsa ọnị ụ mẹ vị ana vaa kụ́ wụ avọ. Aza awụ vị ana vaa sị ụbanyịị wụ.

¹¹ Ẹnịnị vaa ka a ụ mẹmẹ aa sị ụbanyịị mẹ ohinọyị, dị ẹ yaa kà ịrẹkụkụ ụkata ọnị ụ nyị.

¹² Ọnọnị ọ vaa mẹ ka avaba aza ẹ̀ yẹ ụkọrọ ẹbanyị-ẹbanyị ọnị ụ mẹ ọnịrị ụbanyị ọnị waa sịị mẹ ohinọyị.

¹³ Ẹnẹyịmavara, ẹwa vị ohinọyị pooro zịna-zịna nị. Avọọ ụ mẹ vaa mịị mẹ ohinọyị pooro nị. (Ịsa ẹnị Ẹnẹyịmavara ọ̀ọ ka ọnị vaa mẹ, ẹ yị zụ nyị ka ọ yị mẹ̀ ẹ. Vị ọ nyayịnẹ sì ịrẹyị avaba ịsa ọnị ọ tụ́ nị.)

¹⁴ Ẹnẹyịmavara ọọ̄ sị aza ana aa hyẹdụụ kwẹẹtẹ nị, ọnị ọọ̄ mẹ ọgụvọọ yị aza ọnị ẹngụkata si chì ẹngụ nị.

¹⁵ Avaba aza vị ana kụ́ eyi pè wụ, dị waa sị ịsọyịrị ẹnị Aza ana aa mẹ ịzẹyịza vaa jẹẹ pè e.

¹⁶ Ịsa vị ọnị waa sịị yị wa, dị ịnẹ há ọzọza.

¹⁷ Avaba ịsa ẹnị Ẹnẹyịmavara ọ̀ọ mẹ vị ịsa ana vọrọ. Ô sì ịrẹyị avaba ịsa ọnị ọ tụ́.

¹⁸ Ẹnẹyịmavara ộ gụrị avaba aza ana sị ayị ọnya nowu na za a.

¹⁹ Ịsị aza ene hí angwa anị ee sì vị ọnị ọọ̄ sịị yị wa. Ọọ̄ wụ́ ịpẹ ẹnịnị, dị ọ dọ wa tụ́.

²⁰ Ẹnẹyịmavara vi ene ee sere avaba aza ene sì ịrẹyị anị. Ama avaba aza ana aa mẹ̀ ebira odivi vị ọnị ọ vaa wụụ ha.

²¹ Mị vaa kụ́ Ẹnẹyịmavara avọ pooro nị. Ẹwụ nịnị avaba ịsa ọnị ọ tụ́, waa kụ́ ọ avọ nịnị pooro zịna-zịna.