2 Ohinọyị 18 - IWE ỌNỊNỊ

Ịrẹyị Ihezekaya ohinọyị Íjuda

¹ Ịnị ana tụ ọ ịrayị ọhụta ọnị Ihoseya ozi Era rị ohinọyị Ísirẹrị. Ihezekaya ozi Ahazi ộ rị ohinọyị Íjuda.

² Ozi ịrayị ohurẹẹhị ọ vị̀ dị ọ rị ohinọyị nị. Ijerusarẹmị ọ́ ya mẹ ohinọyị anị ịrayị ohurịhịịna nị. Ịrẹha ọnyị anị ọ rị Abija ozi Ịzakaraya nị.

³ Ihezekaya ộ hama ebira Idevidi, ohiku anị, dị ọ mẹ̀ ịsa ene hine Ẹnẹyịmavara ẹtẹẹtẹrẹ nị.

⁴ Avaba ịzị aza anaā hẹkẹ orii yaa mẹ ori, vị oni o du ha saka-saka; di o wu ọhẹ ẹnẹ ẹ sị ịrẹta mẹ jẹẹ nị. Uyi Asẹra ori ọnẹẹ ẹnịnị vị ọnị ọ gara ha. Â nyị ẹ́wụ́ ọnị Imosiisi sị enyusẹ mẹ vị ọnị ọ rẹ gara ha. Ẹwụ ọnọọ aā hị́ Inehusitanị nị. Va ngụ ụmẹ ọnọọ, Anisirẹrị nịnị vị anaa rị eturare ịraa yị ẹ́wụ́ ọnọọ.

⁵ Ihezekaya ộ sị ayị tụra Ẹnẹyịmavara Ohomorihi Anisirẹrị nịnị. Anijuda nịnị ẹ yị vana nyị ohinọyị anka Ihezekaya. Ộ vị ana vịdị rị tụ ọ, ọ̀ọ vị ana vana rị ịrẹma anị.

⁶ Ộ sị ịzẹyịza saasa Ẹnẹyịmavara, ẹ nyị ụmẹ ọnị ọ sị mẹ akamawụ hi ọ. Ama ộ tangwa saasa ọda ọnị Ẹnẹyịmavara mẹ yị Imosiisi.

⁷ Avọọ, Ẹnẹyịmavara ộ ya pe e aha tụra aha ọnị ọ nọ; di o zee yọ ịnị avaba ịsa ọnị ọ mẹ nị. Ộ dọ ẹngụ anị hụrẹ ụvọ ohinọyị Ásiriya; ẹ yị vana dọ ka ọnị ọ̀ sị ịrẹsụ yọ.

⁸ Ộ kụ́ ịrẹkụ tu Anihwirisiti nịnị, dị ọ nyị ẹbẹẹba ẹnịnị hụrẹ ẹkụra ẹnịnị ene weyi hu na ngụ ana banyị hu. Ộ nyị ẹbẹẹba Igaza ọnịrị avaba ẹtẹ ana kara a.

⁹ Ịnị ana tụ ịrayị ọhụna ọnị Ihezekaya rị ohinọyị, ọnọọ ọ rẹ tụ ịrayị ọhụhịmba ọnị Ihoseya rị ohinọyị Isirẹrị nị. Isamenaseri ohinọyị Asiriya ộ kụ́ ịrẹkụ nọ Isirẹrị, dị isoja anị họ̀ kara Ịsamarịya nị.

¹⁰ Ịnị ana tụ ọ ịrayị ọhụta ẹnẹ ẹ vavọọ na ta kara Ịsamarịya, dị ụvọ ẹnịnị ku Ịsamarịya nị. Ụmẹ ọnọọ ọ gụ ịrayị ịhịnọnyị ọnị Ihezekaya rị ohinọyị nị; dị ọ vị ịrayị ịhịịna ọnị Ihoseya rị ohinọyị nị.

¹¹ Ohinọyị Ásiriya ộ za Anisirẹrị nịnị ọrịhị ne hi Asiriya. Ộ kụ aza ẹnyị ẹnịnị na ra hi ẹkụra ana aā hị́ Ịhara; ẹnyị vị ọnị ọ kụ ne hi ọ̀ gụrị Irehu Ịhabọ ana ya ịnị ẹtẹ Igozanị; dị ọ kụ ẹnyị ne hi ẹkụra ene hi ẹtẹ Imediya nị.

¹² Â maanị mẹ Ịsamarịya agụvị ka Anisirẹrị nịnị ẹ yị saasa ịrẹyị Ẹnẹyịmavara Ohomorihi ẹnịnị. Ama ẹnịnị ệ jịnẹ oto ẹnẹ ẹnịrị Ohomorihi hị́ yị ẹngụ; ẹnịnị ẹ yị saasa ọda oni Imosiisi, ozi ahụ Ẹnẹyịmavara sị yị wa. Ẹnịnị ẹ yị dọ ka ẹnị ẹ̀ wụ́ ịrẹyị anị, dị ẹ̀ hyakụ va saasa a.

Anisiriya nịnị ee woo hi Ijerusarẹmị

¹³ Ịnị ana tụ ịrayị ẹwụrẹna ọnị Ihezekaya rị ohinọyị, Isenakeribi, ohinọyị Asiriya, ộ kụ́ ịrẹkụ tu ẹkụra-ẹkụra ana a jị ọvọ kara ịnị ẹtẹ Ijuda, dị ọ nyị ẹbẹẹba ẹnịnị nị.

¹⁴ Óhinọyị Asiriya mẹ̀ yà ịzị aā hị́ Irakisi, Ihezekaya, ohinọyị Íjudaa ộ tụ́ ne tu ọ ka: Ọnị ộ yẹ ka ịsa ọnị mẹ̀ ẹ yị vọrọ, aarịhịnị, ọ̀ za ịrẹkụ jẹẹ, ịsa ọ̀ọ ka oni ò sí kẹnẹ, oni vee sí ọ. Ohinọyị Ásiriya ộ tụ na kà a yị Ihezekaya ka, ọ̀ sị isiriva ikirogirami akawụ-akawụ oze ẹẹhị ọnịrị igooru ikirogirami akahị va yị ọnị.

¹⁵ Ihezekaya ộ kụ́ avaba isiriva ana a kụ tẹ ini Irehi Ohomorihi ọnịrị ini irehi ohinọyị naa yọ.

¹⁶ Ộ rẹ hụ̀ avaba igooru ene e si ku oze irehi Ohomorihi beri ọnị ọnị ụvọta si kụ ihweremi oze, dị ọ kụ avaba anị na yị Isenakeribi nị.

Isenakeribi ô chere Anijerusarẹmị angwa

¹⁷ Ohinọyị ộ tụ isoja tatarata hụrẹ Irakisi ka ẹ̀ kụ́ ịrẹkụ nọ Ijerusarẹmị. Ọdọvịdị anụkọrọ anị ẹẹta ene hụ ọ tụ ka ẹ̀ kụ isoja ẹnẹẹ na nị. Ịjị ẹ na sị ngụ Ijerusarẹmị, dị ẹnịnị ne hi oze ịzị aza anaā mẹ ịtaa hi nị. Ini orosi ene enyi ini imisi ẹbẹẹba sìi zị e hi nị.

¹⁸ Ẹ́nịnị mẹ̀ tụ́ na hị́ Ihezekaya, dị ahịka ọnụkọrọ anị ẹẹta ẹnẹnị e ve tu wa nị: Eriyakimi ana si eyi pe irehi ohinọyị, Ịsẹbina ana vị ọchẹrịsa ini ikootu, ọnịrị Ijowa ozi Asahwi; ọnị o si eyi pe avaba ịsa aa chẹrẹ tịtẹ nị.

¹⁹ Ọnyara ịnị ọdọvịdị Anasiriya nịnị ộ kà a yị aza Ihezekaya ẹnẹnị ka, ohinọyị Asiriya ka ọnị ee sì ka ọnị ọ̀ yẹ ịsị Ihezekaya maanị sị ayị tụra.

²⁰ Ẹ ka: Ú wéé ro o ka ịrẹka irenu kẹnẹ ộ hwọọ kụ ịrẹkụ nị? Ẹnị u si eyi tụra, di u wee hiraa hi Asiriya?

²¹ Anijipiti ọnị u si eyi tụra aanị, vị ana vaa sị mẹẹ anka ọza ọ̀ọ sị ẹpọmọ ene si che mẹ okutẹ avọọ. Vị ẹngụ okutẹ ọnọọ vee che, dị ọ jị ngụ wụ ụvọ nị. Avọọ ohinọyị Ijipiti mẹ̀ yà yị ọza ana si eyi tụra a nị.

²² Ọdọvịdị Anisiriya ẹnẹnị rẹ ka: Wàa ka Ẹnẹyịmavara Ohomorihi awụ nịnị ụ si eyi tụra nị, aanị ka ẹ yị vị ọnị Ihezekaya wú ụta ịsọvọ anị ha, dị ọ kà a yị Anijuda ọnị Ijerusarẹmị nịnị ka, ịnị ụta ịsọvọ ene hi tụ Ijerusarẹmị kẹnẹ a vọrọ ka ẹnịnị ẹẹ mẹ ahẹkẹ nị.

²³ Ẹ ka, ẹnịnị ẹ̀ vẹ booro aanị di è sì ịsa vaa da ịpẹ yị ohinọyị Ásiriya, ọga ẹnịnị. Ẹnịnị èe zụ re aza akawụ-akawụ oze ẹẹva, ana zụ tụra umaata akawụ-akawụ oze ẹẹva, ẹnị vavọọ vaa sị ọpa umaata ẹnẹẹ yị wa.

²⁴ Ẹ ka, aza Ihezekaya ẹ yị zụ dụ ọdọvịdị isoja ẹnịnị ana hịmị hu varẹma, ama di e si eyi tụra Anijipiti ka ẹ̀ kụ ịkẹkẹ ịrẹkụ ọnịrị aza anaā sịị umaata kụ̀ ịrẹkụ vaa yị ẹnị nị.

²⁵ Ẹ ka: ẹ̀ yị vị Ẹnẹyịmavara anaa mẹ ọgụvọ yị ẹnị, ẹnị ẹ yị yaanị zụ kụ́ ịrẹkụ ee vee vú Ijuda ẹtẹ. Ẹnẹyịmavara ụvọta ọ kà a ka ẹnị ẹ̀ vẹ Ijuda, dị ẹnị è ve vu ọ ẹtẹ nị.

²⁶ Dị Eriyakimi, Ịsẹbina, ọnịrị Ijowa va kà a yị ọdọvịdị Anisiriya nịnị ẹnẹnị ka, ẹẹ kà ẹkụra Anaaramuu yị ka ẹnị ẹẹ wụ. Asị ẹ kà ẹkụra Ihiburu, agụvị ka aza ene hi ịrẹsụ ọvọ ee be atọ.

²⁷ Dị ọnya tu wa ohi ka, ẹ yị vị ẹnịrị Ihezekaya kẹnẹ ohinọyị ẹnịnị ka ẹnị ẹ̀ va kà ụtụ ọnọnịị yị. Avaba aza ana yaatụ hi ịrẹsụ ọvọ aanị a tụ́ ọnị hi nị. Ẹnịnị vaa rị ịhyẹrẹ ẹnịnị, dị e hú eehenyi ẹnịnị. Avọọ ẹwụ nịnị mẹ̀ rẹ vaa mẹ nị.

²⁸ Dị ọdọvịdị ọnọnị kwẹẹtẹ, dị ọ sị ẹkụra Ihiburu nowu dị ọ ka, “Be atọ ịrẹyị ọnị ohinọyị Asiriya aa kà a wụ nịnị o.

²⁹ Aa kà wụ nịnị ọ̀nọ̀ ka, à sị ụ zẹẹ ka Ihezekaya ò vene wu nịnị o. Ihezekaya ẹ yị zụ dọ wụ nịnị ha o.

³⁰ Àsị u dọ ọ̀ọ ka wa sị ayị tụra Ẹnẹyịmavara nịnị. Àsị u ro o ka Ẹnẹyịmavara vaa dọ wụ nịnị ha, dị a sị ụ re ro o ka ọ vaa za isoja Asiriya jẹẹ ka à sị ẹ za ẹkụra awụ nịnị.

³¹ Àsị u wụ́ ịrẹyị Ihezekaya nịnị; ohinọyị Ásiriya ka wa jịnẹ tụ ẹhẹ vẹ, dị wa hụrẹ ẹngụ awụ nịnị ụvọ yị ọnị. Ọ vaa navọ wụ nịnị ka waa rị ẹtụtụ ọchị ịvayịnị ọnịrị ihwigi awụ nịnị; di u wee hú enyi ini iruku awụ nịnị.

³² Ọ vavọọ vaa navọ wụ nịnị pooro naa ngụ Ịjị ohinọyị ọ̀ọ raa kụ wụ nịnị ne hi ẹtẹ ana si mẹẹ anka ẹtẹ awụ nịnị. Ịzọọ aa nyị ụbazị ịvayịnị ọnị ụ vaa sị mẹ eche nịnị, ọnịrị ayị ọnị ụ vaa sị mẹ ịbụrẹdị nịnị. Ẹtẹ ọnọọ ộ nyị ọchị orivi, angwẹ orivi, ọnịrị ẹhụ. Wàa mẹ ịsị ọ kà nịnị, we yi vee su, ama ụ vaa yara nịnị. Àsị u zẹẹ ka Ihezekaya ọ̀ kụ wụ nịnị nyeeyi, di u wee ro ka Ẹnẹyịmavara vaa dọ wụ nịnịị ha.

³³ Áá nyị ori anẹkụra ọnyọọnyị ana dọ ẹtẹ ẹnịnị ha hụụnị ụvọ ohinọyị Ásiriya da?

³⁴ Ịzị ori Ihamati ọnịrị Aripadi nini hi booro aanị? Ịzị ori Isehwaveyimi, Ihena ọnịrị ori Iva nini hi? Ẹ́ẹ́ va zụ dọ Ịsamarịya ha?

³⁵ Ẹnẹ ọ̀ vị ini ori ẹkụra ẹnẹnị ana dọ ẹtẹ ẹnịnị ha hụụnị ụvọ ohinọyị Asiriya da, di u we vee ro o nịnị ka Ẹnẹyịmavara vaa dọ Ijerusarẹmị ha hụrẹ ẹyị ụvọ?”

³⁶ Aza Ihezekaya ê chiriji, ẹnịnị e yi tụ́ ohi ọnyọọnyị agụvị ka Ihezekaya ọ vịdị sị ọ kà yị wa ka à sị e tụ́ ohi.

³⁷ Ayị Eriyakimi, Ịsẹbina, ọnịrị Ijowa o si du, dị ẹ na awuru hi ẹngụ ẹnịnị ẹngụ nị. Ê ne tu Ihezekaya, dị ẹ kà a yọ, avaba ịrẹyị ọnị aza ohinọyị Asiriya kà nị.