2 Ịtọpa 6 - IWE ỌNỊNỊ

Isoromọnị ộ kà ịrẹyị yị Anisirẹrị

¹ Ịjị ọnị ẹtẹ vavọọ sị za ku, dị Isoromọnị kà a Ẹnẹyịmavara ọ nyị ka ọnị aa ra ịnị eguhi ruma-ruma nị.

² Ama booro aanị, ọnị ọ raà dà irehi ọbanyị ozoza yị Ẹnẹyịmavara kà ọ vị irehi anị pooro zịna-zịna.

³ Dị Isoromọnị vara eyi ka ịragụ Anisirẹrị anaa jẹẹ, dị ộ mẹ̀ aduwa yị wa nị.

⁴ Ọ kà ọnị ộ kụ́ Ẹnẹyịmavara, Ohomorihi Anisirẹrị avọ agụvị ka ộ mẹ̀ ịsa ọnị ộ kà yị ada anị Idevidi. Ẹnẹyịmavara kà a,

⁵ hụrị ụmẹ ọnị ọnị sị kụ aza anị jịnẹ hụrẹ Ijipiti, ọnị ẹ yị nyị ẹkụra ọnị ọnị nyị ka a dà irehi tụ́ yị ọnị. Ọnị ẹ yị rẹẹ̀ nyị ọza ọnyọọnyị ka ọ vị ohinọyị yị Anisirẹrị nịnị.

⁶ Ama booro aanị, ọnị ọ raà nyị Ijerusarẹmị ka ọ vị ịzị a vaa yaa hẹkẹ ọnị. Avọọ ọnị mẹ rẹẹ̀ nyị Idevidi ka ọ vị ohinọyị Anisirẹrị nị.

⁷ Isoromọnị kà a, ada anị Idevidi ộ mẹ̀ eto ka ọnị ọ dà irehi yị Ẹnẹyịmavara ana vị Ohomorihi Anisirẹrị.

⁸ Dị Ẹnẹyịmavara sị ohi yọ kà ô zoza ka ada anị o si ka ọnị ọ dà irehi yị ọnị.

⁹ Ama ọ yị vaa dà a. Ozi anị ụvọta ọ vaa dà irehi anị nị.

¹⁰ Isoromọnị kà a Ẹnẹyịmavara ọ raà mẹ̀ ịsa ọnị o wo oto anị. Ọnị ọ kụkụ vị ohinọyị tụ́ udi ada anị. Ọnị ò raà dà irehi ịzị a vaa ya hẹkẹ Ẹnẹyịmavara ana vị ohinọyị Anisirẹrị nịnị.

¹¹ Dị ọnị rẹ raà sị apoti oto ọnị Ẹnẹyịmavara sị hị́ eku yị Anisirẹrị nị. Ịrẹta ẹẹva oto ọnọọ ọ ya ịnị ịnẹ apoti ọnọọ nị.

Aduwa ọnị Isoromọnị mẹ̀

¹² Eyi aza ana gụ, Isoromọnị jẹẹ ọvịdị ụta ịsọvọ Ẹnẹyịmavara dị ọ va ụvọ hịrẹ mẹ̀ aduwa nị.

¹³ Isoromọnị ộ vịdị ra sị enyusẹ mẹ ụta ana gọdọ ẹtẹ ahụ ịhịmba rị ẹjịjị, dị ọ rẹ gana ahụ ịhịmba rị ẹjịjị, dị ọ nẹba ahụ ẹẹna rị ẹjịjị. Ụta ọnọnị vị ọnị ọ sị tụ́ ịnị akakana ohweje eyi ẹhẹ ana gụrị ụta ịsọvọ. Isoromọnị ộ hịrẹ ụta ọnọọ, dị ọ va eyi ka ụta ịsọvọ ọvịdị ịragụ ana ya ịrẹma anị, dị ọ va ụvọ hịrẹ, di o ku ẹtẹ,

¹⁴ dị ọ mẹ̀ aduwa, dị ọ kà a Ẹnẹyịmavara Ohomorihi Anisirẹrị ọ nyị ẹbẹẹba ọnịrị ẹtẹ nị. Ẹ yị nyị ori ana ya anka ọnị, ộ saasa ịsa oni o wo oto anị yị aza anị, di o sì ịrẹyị aza ana sị avaba ayị ẹnịnị saasa ịrẹyị anị nị.

¹⁵ Ộ raà mẹ̀ ịsa ọnị o wo oto anị yị ada anị Idevidi. Avaba ịrẹyị ọnị ọ kà ộ sẹ ajịnị.

¹⁶ Ọ rẹ wo oto ka ẹ yị vaa nyị ụmẹ ọnya ana ahịka ẹ yi vị anovwoovu Idevidi aa rị ohinọyị Isirẹrị ẹnịnị ẹ̀ẹ sị vụrụ saasa ọda anị anka ọnị.

¹⁷ Isoromọnị ộ dà ịpẹ ka Ẹnẹyịmavara ọ mẹ̀ ịsa ọnị ọ ka yị ozi ahụ anị Idevidi.

¹⁸ Ama ọ́ọ́ vaa ra ịnị akakana aza ịrẹma ọnị avaba ẹbẹẹba ẹ yị dọ ọ ya? Irehi anị ọnị ọ dà aanị wáá vaa dọ ọ ya?

¹⁹ Ọ kà Ẹnẹyịmavara Ohomorihi anị ọ wụ́ aduwa anị dị ọ mẹ̀ ịsa ọnị ọnị aa pa a.

²⁰ O sere irehi anị ọnọnị ọọdụ ọnịrị ịrahụ. Ô wo oto ka ịzọọ a vaa hẹkẹ ọnị nị, avọọ ọ wụ́ aduwa anị ụmẹ tụra ụmẹ ọnị ọnị òo va eyi ka aa mẹ̀ aduwa.

²¹ Ọ navọ ọ wụ́ aduwa anị ọnịrị aza anị Anisirẹrị ịnị ụmẹ ọnị ẹnị ẹ̀ẹ va ka ịzọọ aa mẹ̀ aduwa. Ohomorihi ọ wụ́ aduwa ẹnịnị, dị ọ vagu ẹnị hụrị ẹbẹẹba ini eehi anị chi vẹ.

²² Ụmẹ ọnị àa sị ọza vẹ ịrẹsụ ụta ịnị irehi ọnọnị va hị́ eku dị aa yẹ ọ̀ọ rị ịvị ọnọhụva anị,

²³ navọ Ẹnẹyịmavara wa wụ́ ẹbẹẹba, dị wa mẹ̀ ọkarẹyị sị ụya rị ọza anaa rị ịvị, dị wa jị ịhị yị ọza ẹnẹ ẹ yị rị ịvị.

²⁴ Ụmẹ ọnị ọnịvị ẹ̀ẹ sị huna aza awụ Isirẹrị agụvị ka ẹ raà mẹ̀ ebira hi wu. Ẹnịnị èe ro ịnẹ, dị ẹ va ẹngụ nẹtẹ, dị ẹ vẹ ịnị irehi ọnọnị va pa ẹvagu nị,

²⁵ wụ́ aduwa ẹnịnị hụrẹ ẹbẹẹba dị ụ wa vagu aza awụ, di u waa va wa varẹma vẹ ịnị ẹtẹ ọnị ụ raà sị yị ẹnịrị ohiku ẹnịnị.

²⁶ Wàa za orihi jẹẹ aza awụ ẹ̀ẹ mẹ̀ ebira odivi hi wu. Ẹnịnị èe ro ịnẹ, dị ẹ va eyi ka irehi Ohomorihi, dị ẹ va ẹngụ nẹtẹ, dị ẹ mẹ̀ aduwa,

²⁷ Ẹnẹyịmavara wụ́ aduwa ẹnịnị, dị ụ waa vagu ezi ahụ awụ Anisirẹrị nịnị, dị ụ wa zụ wa ka ẹẹ mẹ̀ ịsa ana vọrọ. Dị ụ wa varẹma zụ̀ orihi tụ́ ịnị ẹtẹ ọnọnị ọnị ụ sị yị aza awụ ka ọ vị ogu ẹnịnị pooro zịna-zịna.

²⁸ Àa nyị ụngwẹ ịnị ẹtẹ, a vị ụkụ, a vị ka ịsa ịnị aarẹ o du ha agụvị ka ahị ịrịịra ộ wara a ha, a vị ka okoni akụvarịva ệ rị ọ.

²⁹ Batọ dị ụ wa wụ́ aduwa ẹnịnị. Àa nyị ịnị aza awụ ọnị ọ zị ẹngụ ka ọnị ọ̀ tana ụvọ hi irehi Ohomorihi dị ọnị ọ mẹ̀ aduwa.

³⁰ Navọ wa wụ́ aduwa ẹnịnị. Be wa atọ ịnị eehi awụ ẹbẹẹba, dị u wa vagu wa. Ẹwụ kẹnẹ ọ yẹ ịsị ẹ vị ariro ọzọza nị. Mẹ̀ ẹhụ ọpa ebira ọzọza hi wa,

³¹ agụvị ẹnịnị ee hí angwa awụ, dị ẹ wụ́ chire wu ịnị avaba ụmẹ ọnị ẹnịnị ẹ sị ra ịnị ẹtẹ ọnị ụ sị yị ohiku ẹnịnị.

³² Ụmẹ ọnị ọzọza ana ra aha onoze ẹ̀ẹ wụ́ ụ mẹmẹ nyị ụkata, dị ụ ngụrẹyị ọnịrị ụ mẹmẹ tenyi ẹngụ ee zi, dị ẹ vaa mẹ̀ aduwa ịnị irehi awụ ọnọnị.

³³ Wụ́ aduwa ọza ọnọọ, dị ụ wa mẹ̀ ịsa ọnị òo họ̀ use anị yọ agụvị avaba anẹhẹ ẹ yẹ wụ, dị ẹ wụ́ chire wụ anka aza Anisirẹrị. Ẹnịnị vaa yẹ ka ịnị irehi ọnọnị a vọrọ ka aa hẹkẹ wụ nị.

³⁴ Wàa mẹ ọda yị aza awụ ka ẹ nọ ịrẹkụ ọnịvị ẹnịnị. Ẹnịnị ẹ̀ẹ mẹ̀ aduwa ịzị ẹ̀ẹ ya, dị ẹ va eyi ka ẹkụra ọnọnị ọnị ụ sị nyị ọnịrị irehi awụ ọnị ọnị dà tụ́ ịzọọ yị wụ,

³⁵ sị ụtọ pe aduwa ẹnịnị. Wụ́ aduwa ẹnịnị hụrẹ ẹbẹẹba, dị ụ wa sị wa nyị ehuna ọnịvị ẹnịnị.

³⁶ Aza awụ ẹ̀ẹ rị ịvị awụ, agụvị ka ẹ yị nyị ọza ẹnẹ ẹ yị ma mẹ̀ ịvị. Wàa kụ́ ayị hi wa, dị ụ hụrẹ wa ụvọ yị ọnịvị ẹnịnị ka ẹ za wa ọrịhị nọ ẹkụra ọsa, ọ̀ọ daka vị ẹkụra ene noze.

³⁷ Wụ́ aduwa aza awụ. Ẹnịnị èe ro ịnẹ ịnị ẹkụra ana za na ngụ, dị ẹ dọ irenu ịvị ọnịrị ebira ọhịmị ẹnịnị, dị ẹ da ịpẹ yị wụ nị, dọ aduwa ẹnịnị kwogwo Ẹnẹyịmavara.

³⁸ Ẹnịnị ẹ̀ẹ sị ịzẹyịza ro ịnẹ ịzọọ, dị ẹ mẹ̀ aduwa yị ẹtẹ ọnịrị ẹkụra ne beri irehi awụ ọnị ọnị da yị wụ nị.

³⁹ Navọ ọ wụ́ aduwa ẹnịnị hụụnị eehi anị ẹbẹẹba, dị ọ vayị ẹnịnị, dị ọ vagu wa ịnị ịvị ẹnẹ mẹ̀.

⁴⁰ Isoromọnị ka Ohomorihi anị ò re ẹnị, dị ọ wụ́ aduwa ọnị ẹnị mẹ ịzọọ.

⁴¹ Ọ kà Ẹnẹyịmavara Ohomorihi ọ̀ kwẹẹtẹ beri apoti oto anị ana vị ịsa ụkata anị, dị ọ ngụ ịnị irehi anị na ya pooro zịna-zịna. Ọ mẹ ka o zee yi ohirẹsụ irehi Ohomorihi ịnị ịsa tụra ịsa, dị ọyịza ọnị aa mẹ̀ yị wa ọ vị ayohine avaba aza anị.

⁴² Ẹnẹyịmavara Ohomorihi ọ navọ asị ọ yi ohinọyị ọnị ọ nyị. Ọ tamayị oyisì ọnị ọ nyị yị ozi ahụ anị Idevidi.