2 Ịtọpa 4 - IWE ỌNỊNỊ

Ẹnya ene hi ịnị irehi Ohomorihi

¹ Isoromọnị ô sị enyusẹ mẹ ụta ana gọdọ ahụ ohurẹẹwụ, dị ọ rẹ vavọọ gana nị. Dị ọ nẹba ahụ ẹwụrẹhị nị.

² Dị ọ rẹ mẹ̀ ọda ka e tụ́ uruku ọbanyị kooro aanị; uruku ọnọọ ọ nyịnẹ ahụ ịhịmba rị ẹjịjị, dị gana eyi ahụ ẹwụrẹhị, dị o jesi kara ẹngụ anị ọ vị ahụ ẹbẹẹva tụra ẹẹhị.

³ A si enyusẹ tụ́ ịsa ene vene ụnọ dị a sị mẹ̀ uruku ọbanyị ọnọọ ọvị kara a ụtụụtọ nị. Ọrọ ẹẹva a mẹ̀ ẹ nị, dị ẹnyị tụra ọsa ịrẹsụ nị. A maa mẹ̀ uruku ọnọọ a rẹ mẹ̀ ịsa ọvị ẹnẹẹ vaka a nị.

⁴ Uruku ọnọnị vị ana mẹ hi ịrẹma ụnọ enyusẹ ẹwụrẹva ana va eyi ka ẹhẹ. Ẹẹta vị ana va eyi ka ịzị ọyịị̄ zịị vẹ, dị ẹẹta ọsa va eyi ka ịzị ọyịị̄ zịị na ngụ ẹtẹ, dị ẹẹta ọsa va eyi ka eyi oze ẹbẹẹba, dị ẹẹta ana vọ va eyi ka oze eyi ụvẹtẹ.

⁵ Akaha uruku ọnọnị ọọ ratụpọ inchi ẹẹta, dị ụtụụtọ anị sị mẹẹ anka ụtọ ako, dị ọ ya nọ ẹhẹ anka ọchị ododo avọọ nị. Uruku ọnọọ ọ dọ enyi igaruwa akawụ-akawụ oze ẹwụrẹhị.

⁶ Dị Isoromọnị rẹ mẹ ẹnyochiruvọ ẹẹwụ, dị ọ sị ẹẹhị tụ́ eyi ụvọha, dị ẹẹhị ọsa ya eyi ụvọrị nị. Ịnị ẹnya ẹnẹnị aa nyịna ịsa ịsọvọ ana a rị ịra nị. Ohirẹsụ irehi Ohomorihi nịnị kẹnẹ aa nyịna ẹngụ ịnị uruku enyi ọbanyị nị.

⁷ Ịrẹma ọnọọ Isoromọnị sị igooru tụ́ ọchị ịra ẹẹwụ ana a sịị̄ jẹẹ anka a mẹ jị uwe anị. Dị a kụ wa hị́ ịnị irehi Ohomorihi nị. A kụ́ ẹẹhị hi eyi ụvẹtẹ, dị a kụ ẹẹhị ana vọ tụ́ eyi ẹbẹẹba nị.

⁸ Ọ rẹ mẹ iteburu ẹẹwụ ọnị ọ kụ hi ịnị irehi Ohomorihi. Ộ kụ́ ẹẹhị tụ́ eyi ụvọrị, dị kụ́ ana vọ hi eyi ụvọha. Ộ sị igooru mẹ ẹnyochiruvọ ika ẹchẹhị.

⁹ Isoromọnị ộ dà ohweje yị ohirẹsụ irehi Ohomorihi nịnị, dị ọ dà ajẹhẹ anị banyị nị. Dị ọ wụ́ enyusẹ ku ukere oze anị nịnị nị.

¹⁰ Dị ọ sị uruku enyi ọnọọ tụ́ ịnị akakana oze eyi ụvẹtẹ ọnịrị ịzị ọyị zị hụrẹ vẹ.

¹¹ Ihurami ộ jị ụnọkọ ọrụrụ, dị ộ tụ́ ịchọvịrị nịnị ne beri enyochirụvọ ọrụrụ. Avọọ Uhurami mẹ za ụkọrọ ọnị Isoromọnị ohinọyị sị yọ ịnị irehi Ohomorihi.

¹² Ộ jị ohi ẹẹva, dị ọ mẹ akátá ku wa ịrẹsụ, dị o tu ẹba ẹẹva ọnị ọ sị mẹ̀ akata ẹnẹẹ ọvị nị.

¹³ Ộ sị enyusẹ mẹ̀ ẹ vene ẹtụtụ ọchị ana aā hị́ ipomagiranati akava, di ó tò wa ọrọọrọ ẹẹva tụ́ ịnị ẹ̀bà ene zu gẹ ịrẹsụ akata ọhẹ ẹnẹẹ nị.

¹⁴ Dị Uhurami mẹ̀ aha ịzị aa sị ẹnyochiruvọ ẹnẹẹ tụra,

¹⁵ ọnịrị uruku ẹnyị ne beri ụnọ ẹwụrẹva ana ya uruvo anị ana za a.

¹⁶ Avọọ ọ mẹ rẹ mẹ̀ ụnọkọ ọnịrị ịchọvịrị neberi isivi ẹhanyị nịnị. Ihurami-Abi ọ vana sị enyusẹ ibironzi ana a kụ́ eyi mẹ̀ ẹnya ẹnịnị yị Isoromọnị ohinọyị agụvị irehi Ẹnẹyịmavara nị.

¹⁷ Ohinọyị ộ mẹ̀ ọda ka a sị ụmọpa mẹ̀ ịhị ẹnya ẹnẹẹ jẹẹ ịnị inozi Ijodani ana ya ịnị akakana Isukọtị ọnịrị Ịzẹrẹda.

¹⁸ Isoromọnị vị ana nyayịnẹ mẹ̀ ẹnya ẹnịnị rụrụ ọnị ọza ọ̀ yị zụ yẹ ẹhụ ọpa ụrata enyusẹ ibironzi ana a sị mẹ.

¹⁹ Avọọ Isoromọnị mẹ rẹ sị igooru mẹ ẹnya irehi Ohomorihi anka ụta ọnịrị iteburu ọnị aā kụ́ ụbụrẹẹdị ana á sị mẹ̀ ịsọvọ yị Ohomorihi tụ́.

²⁰ Ọchị ịrakotupa ọnịrị ịrakotupa nịnị vị ana sị eyi igooru mẹ̀, dị ịra anị ọọ zẹtẹ ọvịdị aku ọnị apoti oto ya anka a mẹ jị uwe anị.

²¹ Ododo ọnịrị ịrakotupa beri ịrarẹ ozotupa vị igooru-igooru.

²² Ụpẹvẹ ana aā sị mi ịra, ẹnya angwẹ, ẹnya eturare, ẹnya ana aā sị nyị ịra vị ana a sị igooru obooro mẹ̀. Oze ana ná ngụ eehi anka oze ịnị ịnẹ ana ngụ aku apoti oto ọnịrị oze ene hi ajẹhẹ vị ana a rẹ wụ́ igooru ku.