2 Ịtọpa 32 - IWE ỌNỊNỊ

Anasiriya nịnị ệ za Anijerusarẹmị nịnị ziizi

¹ Ịrẹma avaba ịsa ọnị Ihezekaya sị ịzẹyịza mẹ̀ ịnị ụmẹ ọnọọ, Isenakeribi ohinọyị Anasiriya ộ kụ́ ịrẹkụ na rị ẹtẹ Ijuda. Ộ kụ́ isoja kara ẹkụra ẹbanyị-ẹbanyị ana jị ọvọ kara, dị ọ mẹ̀ ọda ka ẹ̀ chata ọvọ ngụ ẹkụra ẹnẹẹ nị.

² Ịjị Ihezekaya re ka Isenakeribi ê si ka ọnị ọ kụ́ ịrẹkụ ngụ Ijerusarẹmị,

³ dị Ihezekaya hị́ ọdọvịdị ẹkụra nịnị ọnịrị ọga isoja nịnị ka ẹnịnị e gu oze enyi ana zị ịrẹma ẹkụra ngụ eehi. Dị ẹnịnị vavọọ gụ ọ ụvọ nị.

⁴ Ọkọnị anọrụ ệ kwẹẹtẹ di e gu avaba oze ọnị enyiī zi si ịnị ẹkụra ọnọọ nị. Dị ẹ ka, “sị ẹ vẹ dị ohinọyị Anasiriya ée ve tu enyi?”

⁵ Dị ohinọyị Ihezekaya tenyi avaba ịzị ọvọ ya wu, dị ọ dà irehi ọgọdọ rụrụ ana va ẹkụra chire nị. Ịrẹma ẹnẹnị dị ọ tụra ọvọ ọsa kara ana vịdị jẹẹ, dị ọ rẹ tenyi aha ana va sị ụkata yị ẹkụra eyi ịzị ọyị hụrẹ vẹ ịnị Ijerusarẹmị ọkụkụ. Ộ rẹ mẹ ọda ka ê tu ọha ọnịrị ogonto rụrụ hi ẹtẹ.

⁶ Ộ nyị ọga isoja nịnị ene si eyi pe aza, dị a hị́ avaba aza gụ ịnị oreere ana gụrị oze ọbanyị, dị ọ tụ́ wa ọtụtụrụma nị.

⁷ Dị ọ kà, ẹnịnị ẹ̀ vị ayị, asị ẹ̀ hí angwa ohinọyị Anasiriya a vị isoja ẹnịnị vụrụ-vụrụ agụvị ka ẹnị ẹ nyị ụkata huna wa nị.

⁸ Ụkọrọ ọchẹngụ kẹnẹ ẹ nyị nị, ama Ẹnẹyịmavara ana vị Ohomorihi ẹnịnị vaa gụ ẹnị ụvọ dị ọọ kụ ịrẹkụ yị ẹnị. Ịrẹyị ohinọyị ọnọnị ộ hụ wa ayị vị.

⁹ Ịrẹma anị, ụmẹ ọnọọ Isenakeribi ọnịrị isoja anị ệ kara ẹkụra Irakisi, dị ộ tụ ụtụ hi Ihezekaya ọnịrị Anijuda ana ya pe Ijerusarẹmị nị.

¹⁰ Ộ kà ọnị Isenakeribi ana vị ohinọyị isiriya aa họ̀ wa ka ịsị ẹ sị eyi tụra dị ẹ hi Ijerusarẹmị ịrẹma ọnị ẹnị raà kara ẹkụra ọnọọ?

¹¹ Ộ kà, Ihezekaya vi ene vene wa ka Ẹnẹyịmavara Ohomorihi ẹnịnị vaa dọ̀ wa ha hụụnị ụvọ anị. Ụngwẹ ọnịrị onyi ọ vaa wụ̀ wa ha nị.

¹² Áa vị Ihezekaya ô wu irehi ọnịrị ụta ịsọvọ Ẹnẹyịmavara va ha, dị ộ ka yị Anijuda ọnịrị Anijerusarẹmị nịnị ka ẹẹ hẹkẹ ẹ, dị ẹẹ rị eturare ịra ịnị ụta ọnyara.

¹³ Aanị ka ẹnịnị ẹ yị yẹ ịsị ọnịrị ohiku anị nini mẹ̀ anẹkụra ana vọ nịnị? Áá nyị ori anẹkụra ọnyọọnyị ana dọ wa ha hụụnị ụvọ ohinọyị Anasiriya.

¹⁴ Áá nyị ụmẹ ọnị ori anẹkụra ẹnẹẹ sị dọ wa ha hụụnị ụvọ ẹnịnị? Ịsị ẹ va mẹ ka e ro o ka ori ẹnịị vaa dọ wa ha?

¹⁵ Agụvị avọọ, booro anị, asị ẹ zẹẹ ka Ihezekaya o vene wa, a vị ọ kụ wa nyee eyi. Asị ẹ sị ayị tụra a. E yị nyị ori anẹkụra ọnyọọnyị ana zụ dọ wa hụụnị ụvọ ohinọyị Anasiriya. Agụvị avọọ ẹnịnị ẹ yẹ ka ori ẹnịnị ọnọọ ẹ yị zụ dọ wa ha.

¹⁶ Avọọ Isenakeribi mẹẹ kà ene tu ọ irenu kẹnẹ hi Ẹnẹyịmavara Ohomorihi ọnịrị Ihezekaya ozi ahụ anị nị.

¹⁷ Iwe ọnị Isenakeribi chẹrẹ vị ọnị ọ sị kụ Ẹnẹyịmavara Ohomorihi Anisirẹrị ụhụ. Ộ kà ori anẹkụra ana vọ ẹ yị zụ dọ wa ha hụụnị ụvọ anị, ori Ihezekaya ẹ yị vaa zụ dọ aza anị ha hụụnị ụvọ anị.

¹⁸ Dị ọdọvịdị Anasiriya nịnị ẹnẹẹ sị ẹkụra Ihiburu ka ịrẹyị na owu tụ ẹba agụvị o chire aza ana ya ụtọ ọvọ ẹkụra angwa nị. Ê ro ka ọsọnị vaa mẹ ka ẹnị ẹ za wa tụrẹ-tụrẹ.

¹⁹ Ẹnịnị ệ kà ịrẹyị Ohomorihi Ijerusarẹmị ịnị oze ọnị ẹ zịị ka ịrẹyị ori anẹkụra ana vọ ọnị ọza sị ụvọta anị mẹ avọọ.

Ẹngwọzị ọnịrị usu Isenakeribi

²⁰ Dị Ihezekaya ọnịrị Ayịsaya ọnịsẹ ana vị ozi Amozi mẹ̀ aduwa, di e sụ ùnè, dị ẹ da ịpẹ ka Ohomorihi ọ gụ ẹnị ụvọ nị.

²¹ Ịzẹyịza, dị Ohomorihi tụ́ anggẹẹrị ana na wụ̀ isoja ọnịrị ọdọvịdị Anasiriya nịnị ha nị. Ịjị Isenakeribi vavọọ re e, dị ọ sị ụhị-ụhị varẹma na eehi anị nị. Ẹkụhị ọnya, ọ mẹ ya ịnị irehi ori anị, dị ezi anị ẹnyị sị ụhwọ, dị ẹ wụ̀ ọ nị.

²² Aanị Ẹnẹyịmavara mẹmẹ dọ ohinọyị Ihezekaya ọnịrị avaba Anijerusarẹmị nịnị ha hụụnị ụvọ Isenakeribi ọnịrị ọnịvị ẹnịnị ana vọ nị. Dị Ohomorihi mẹ ka ẹnịnị ệ nyị ẹngwọọrọ beri anẹkụra nịnị ana ra gụrị wa.

²³ Aza ọrụrụ-ọrụrụ ệ vẹ Ijerusarẹmị sị ẹyịza va ya Ẹnẹyịmavara ọnịrị Ihezekaya. Hụrẹ ụmẹ ọnọọ avaba anẹkụra nịnị sị ụbanyị yị Ihezekaya agụvị ịsa ana mẹ nị.

Ụkụ ẹnẹ tu Ihezekaya dị ọ sị vọ che o su

²⁴ Ụmẹ ọnị ẹngụ zị Ihezekaya, dị ọ sị vọ cheeche ô su nị. Ộ mẹ̀ aduwa, dị Ẹnẹyịmavara sị apẹrẹ zụ ọ ka ẹngụ anị vaa nịya.

²⁵ Ka Ihezekaya ộ sị ẹngụ tụ ẹba, ẹ yị kụ̀ Ẹnẹyịmavara avọ ịnị ịsa ọnị ọ mẹ yọ. Agụvị avọọ, Ẹnẹyịmavara sị ụya rị ọnịrị Anijuda beri Anijerusarẹmị rị ụya anị.

²⁶ Ịjị Ihezekaya ọnịrị Anijerusarẹmị ro ịnẹ, dị ẹ ka ẹngụ ẹnịnị chi, dị Ẹnẹyịmavara ẹ yị kụkụ sị ụya rị wa pooro dị Ihezekaya ve su nị.

Ize ọnịrị ụbanyị Ihezekaya

²⁷ Ộ vana zee yị Ihezekaya ẹtẹẹtẹrẹ, dị aza sị ụbanyị yọ nị. Dị ọ da aku rụrụ-rụrụ ọnị ọ kụ́ igooru, isiriva, ịrẹta ozozoza, eturare ohuru-ohuru, ogonto ọnịrị ogu anị avọ hị́.

²⁸ Avọọ ộ mẹrẹ dà ụhwọ ọnị ọ kụ́ akụ, eche, ọnịrị angwẹ orivi hi, dị ọ dà ịja ọnị ọ kụ́ imaaru ọnịrị atẹmẹ anị hi nị.

²⁹ Ịrẹma ịsa ẹnẹnị, Ohomorihi ộ sị atẹmẹ ọnịrị imaaru ne beri ogu ẹnẹmẹhị, dị ọ dà ẹkụra ọrụrụ-ọrụrụ nị.

³⁰ Ohinọyị Ihezekaya ộ gu oze enyi Igihoni, dị ọ tụ́ oze enyi ka o si zị ịnị ụsị oze ịnị ugene Ijerusarẹmị. Avaba ịsavịsavị ọnị ọ mẹ vi ene zee e ụvọ.

³¹ Ụmẹ ọnị ohinọyị Ịbabịrọnị sị tụ́ va họ̀ Ihezekaya use ịrẹyị ịvọpa ana mẹ̀ ịnị ẹtẹ anị. Ohomorihi ộ navọ ka Ihezekaya ộ zama ebira anị re dị ộ yẹ ayị anị.

Usu ohinọyị Ihezekaya

³² Avaba ọnị Ihezekaya mẹ̀ ọnịrị ọ mẹmẹ hẹkẹ Ẹnẹyịmavara vị ana chẹẹ tụ́ ịnị iwe ẹtẹ ọnị Ayịsaya ọnịsẹ ana vị ozi Amozi ọnịvị iwe ịtọpa ohinọyị Anijuda ọnịrị Isirẹrị nịnị.

³³ Ihezekaya me su, di e ne e akẹbẹẹba ịzị eē ne oku ohinọyị nịnị hi nị. Dị avaba Anijuda ọnịrị Ijerusarẹmị nyayịnẹ sị ụbanyị, yị oku anị nị. Ozi anị Ịmanasẹ ộ rị ohinọyị dọ ada anị ịrẹsụ nị.