2 Ịtọpa 30 - IWE ỌNỊNỊ

Ẹngwotenyi eche ọyịparahu

¹ Ihezekaya ộ tụ́ hị́ avaba Anisirẹrị ọnịrị Anijuda, dị ọ rẹ chẹrẹ iwe tụ́ hị́ Anihuremi ọnịrị Anịmanasẹ nịnị nị ọ ka ẹnịnị ẹ ve ịnị irehi Ẹnẹyịmavara Ohomorihi Ijerusarẹmị va rị eche ọyịparahu.

² Ohinọyị Ihezekaya ọnịrị ohi nịnị ne beri avaba ịragụ ệ gẹ Ijerusarẹmị dị ẹ geeyi ẹnị mẹ mẹ va rị eche ọyịparahu ịnị ụhwẹ ọhụva ịrayị.

³ Ẹnịnị ẹ yị ana zụ rị eche ọnọnị ịrayị-ịrayị agụvị ka ohirẹsụ irehi Ohomorihi nịnị ana sị ẹngụ ẹnịnị tụ́ irenyi ẹ yị rụrụ: Avọọ aza ẹnẹ ẹ yị rẹ vana kụ́ ẹngụ gụ Ijerusarẹmị.

⁴ Eyi ohinọyị ọnịrị aza ê hine tụ́ ini eto ọnọọ

⁵ avọọ, di a hị́ avaba Anisirẹrị saka-saka, hụrẹ ẹtẹ Ịdaanị eyi ẹbẹẹba huu na ngụ Ịbẹẹsẹba ana ya eyi ụvẹtẹ. Ohinọyị kà a ẹnịnị ẹ kụ́ ẹngụ gụ Ijerusarẹmị dị ẹ̀ rị eche ọyịparahu ọnọọ anka ọda Ẹnẹyịmavara mẹ̀ kà a. Ụrụrụ aza ana rị eche ọnọọ vị ẹnẹmẹhị ọnị ẹ yị vịdị nyị ẹngụ anị da.

⁶ Iwe ọnị ohinọyị ọnịrị ọdọvịdị anị nịnị mẹ̀ ọda ka ọnụtụ nịnị ẹ ga ịnị avaba ẹtẹ Anisirẹrị ọnịrị Ijuda vị ana a chẹrẹ tụ́ kà a, “Ẹnịnị Anisirẹrị ana ha hụụnị ụvọ ẹvaya ohinọyị Anisiriya nịnị. Varẹma vẹ ịdị Ẹnẹyịmavara ana vị Ohomorihi Abụrahamị, Ayiziiki, ọnịrị Isirẹrị agụvị ọ varẹma ka awụ nịnị vẹ.

⁷ Asị ẹ mẹ̀ ebira ohiku ẹnịnị ọnịrị avaba anda ẹnịnị Anisirẹrị ẹnẹ ẹ yị mẹ̀ ịzẹyịza ka Ẹnẹyịmavara Ohomorihi ẹnịnị na. Anka ụ me re wa, Ohomorihi vị ana nyayịnẹ sị ụya rị wa ẹtẹẹtẹrẹ.

⁸ Asị ẹ mẹ̀ ịrẹsụ ọkatẹngụ anka aza ẹnẹẹ ama ẹ ka ịrẹsụ hi yị Ẹnẹyịmavara. Ẹnịnị ẹ vẹ ịnị irehi Ohomorihi ana ya Ijerusarẹmị ọnị Ẹnẹyịmavara, Ohomorihi ẹnịnị nyị tụ́ irenyi yị ẹngụ anị pooro. Ẹnịnị àa hẹkẹ ẹ ịzọọ, ọ yị yaa du ayị hi wa.

⁹ Ẹnịnị ẹ̀ẹ va ka Ẹnẹyịmavara vẹ, avaba aza ana za anda ẹnịnị ọrịhị nọ ẹkụra ọsa vaa vayị ẹnịnị, dị ẹ̀ hụrẹ wa ụvọ vẹ eehi ẹnịnị. Ẹnẹyịmavara ana vị Ohomorihi awụ nịnị vị anaā vayị ọza, dị ọọ̄ ngụ ayị ọza nị. Ẹnịnị ẹ̀ẹ vaka a vẹ, ọ vaa dọ wa.”

¹⁰ Ọnụtụ ẹnẹẹ ẹ ngụ avaba ẹkụra ene hi ịnị ẹtẹ Ehwireemi, ọnịrị Ịmanasẹ huu na ngụ ẹtẹ Izeburuni oze eyi ẹbẹẹba. Ama aza vị anaa nyị wa unyi dị ẹ yaa mẹ̀ wa isiya.

¹¹ Ama â nyị aza ẹnyị hụrẹ ịrẹsụ Aza ọnịrị Ịmanasẹ ne beri Izeburuni ana dọ ka ẹnị aa nọ Ijerusarẹmị.

¹² Ohomorihi ộ sị ụvọ kanyị Anijuda nịnị ayị, dị ọ mẹ ka ẹ vayị bẹ, dị ẹ dọ ka ẹnị aa saasa ọda ọnị ohinọyị ọnịrị ọdọvịdị anị nịnị mẹ̀.

 rị eche ọyịparahu

¹³ Ịzẹyịza ịnị ụhwẹ ọhụva ọnọọ, dị ọkọnị aza hara na rị eche ịbụrẹdị ẹnẹ ẹ yị nyị owu Ijerusarẹmị nị.

¹⁴ Dị ẹnịnị kụ́ avaba ụta ịsọvọ ọnịrị ana aā sị rị eturare ịra hụrẹ Ijerusarẹmị na va ha ana a hị́ Ikidironi.

¹⁵ Ịhị ẹ tụ́ ọ ẹkụhị ẹwụrẹna ịnị ụhwẹ ọnọọ, dị ẹ wụ̀ atẹmẹ mẹ̀ ịsọvọ eche ọyịparahu nị. Ụhị vị ana nyị aza ẹnyị ịnị ohirẹsụ irehi Ohomorihi ọnịrị Anireevi ẹnẹ ẹ yị vịdị za ido. Obobooro ọnọọ, ẹnịnị mẹ̀ ido ana sị wa tụ́ irenyi yị Ohomorihi, dị ẹ va zụ mẹ̀ ịsọvọ anaā rị ịra ịnị irehi Ohomorihi nị.

¹⁶ Dị ọzọza ya udi anka ọda Imosiisi ọza Ohomorihi mẹ̀ kà a. Anireevi nịnị ệ sị yị ohirẹsụ irehi Ohomorihi ene che sẹ ịrẹsụ ụta ịsọvọ nị.

¹⁷ Ka aza ọrụrụ-ọrụrụ ẹ yị za ido, ẹnịnị ẹ yị zụ wụ̀ atẹmẹ eche ọyịparahu. Avọọ dị Anireevi nịnị mẹ̀ yị wa, dị ẹ sị atẹmẹ ẹnẹẹ tụ́ irenyi yị Ẹnẹyịmavara nị.

¹⁸ Avọọ, aza ọrụrụ-ọrụrụ ana hụrị ịrẹsụ Ehwireemi, Ịmanasẹ, Iisaka ọnịrị Izeburuni ẹ yị zụ rị eche ọnọọ a mẹ vọrọ agụvị ka ẹnịnị ẹ yị za ido anaā sịị wa tụ́ irenyi. Avọọ di ohinọyị Ihezekaya maanị mẹ̀ aduwa yị wa nị:

¹⁹ Ọ kà Ẹnẹyịmavara Ohomorihi ohiku ẹnịnị ọ̀ vagu avaba aza ana sị ayị ọnya hẹkẹ ẹ, ẹnẹ ẹ yị za ido.

²⁰ Dị Ẹnẹyịmavara va ohi yị Ihezekaya ka ọnị ọ raà vagu wa. Ẹ yị nyị ịsị ọnị vaa mẹ̀ wa.

²¹ Ẹkụhị ịhịmba aza ana gụ Ijerusarẹmị vavọọ rị eche Ụbụrẹẹdị ẹnẹ ẹ yị nyị owu, dị ayị ẹnịnị hine ẹtẹẹtẹrẹ nị. Eyinị-eyinị, dị ohirẹsụ irehi Ohomorihi ọnịrị Anireevi nịnị sị avaba ụkata ẹnẹ ẹ nyị jị́ ahẹ ga Ẹnẹyịmavara nị.

²² Ihezekaya ộ ga Anireevi nịnị agụvị ẹ mẹmẹ ku aza mẹ̀ ahẹkẹ ẹtẹẹrẹ. Ịnị ẹkụhị ịhịmba ẹnẹẹ ệ mẹ̀ ịsọvọ ọrụrụ-ọrụrụ ẹnẹ ẹ sị ga Ẹnẹyịmavara ana vị Ohomorihi ohiku ẹnịnị.

Aza Ohomorihi ệ rị eche ọhụva.

²³ Avaba ẹnịnị ana gụ ịzọọ ệ geeyi ka ẹnị aa varẹma rị eche yị ẹngụ ẹnịnị ẹkụhị ịhịmba ọsa. Dị ẹ sị ayohine rị ọ nị.

²⁴ Ohinọyị Ihezekaya ộ sị ụnọ akahị (1,000) ọnịrị atẹmẹ akahị-akahị oze ịhịmba (7,000) yị aza ana a wụ̀ dị ẹ rị ọ. Ọdọvịdị nịnị ẹnị ẹ rẹ sị ụnọ akahị (1,000) beri atẹmẹ akahị-akahị oze ẹẹwụ yị wa. Ohirẹsụ irehi Ohomorihi ọrụrụ-ọrụrụ ệ mẹ ido ana sị wa tụ́ irenyi yị Ẹnẹyịmavara nị.

²⁵ Ayị ọzọza vi ene ee hine; avaba Anijuda, ọnịrị ohirẹsụ irehi Ohomorihi Anireevi nịnị ne beri Anisirẹrị ọnịrị azọga ana va ra ịnị akakana ẹnịnị.

²⁶ Avaba Ijerusarẹmị vị ana sụ́ ịrẹyị, ọzọza maa jẹ agụvị ka ẹ yị nyị eche ana maanị rị daa hụrẹ ụmẹ ọnị Isoromọnị ozi Idevidi sị vị ohinọyị.

²⁷ Dị ohirẹsụ irehi Ohomorihi ọnịrị Anireevi mẹ̀ aduwa ka Ẹnẹyịmavara ọ mẹ ka oze yị wa. Dị Ohomorihi ya ịneku dị wa aduwa ẹnịnị dị ịsọvọ ẹnịnị dọ̀ ọ rị nị.