2 Ịtọpa 29 - IWE ỌNỊNỊ

Ihezekaya ộ vị ohinọyị

¹ Â nyị ọnọrụ ọnya aanị ana a hị́ Ihezekaya. Ịrayị ohurẹẹhị, ọ vị dị ọ vị ohinọyị Ijuda dị ọ mẹ̀ ẹ ịrayị ohurịhịịna Ijerusarẹmị nị. Ọnyị anị Abija vị ozi Ịzakaraya.

² Ộ saasa ebira ọyịza Idevidi ana vị ohiku anị ộ mẹ̀ ebira ene hine Ẹnẹyịmavara ayị.

Ộ tenyi Irehi Ohomorihi ene ê du ẹngụ

³ Ịnị ụhwẹ ịpaapa ịnị ịrayị ọnị Ihezekaya rị ohinọyị ộ na oze ana na ngụ irehi Ẹnẹyịmavara, dị ô tenyi wa nị.

⁴ Ihezekaya ộ hị́ ohirẹsụ Irehi Ohomorihi nịnị ọnịrị Anireevi nịnị gụ ịnị ohweje ana ya eyi ịzị ọyịị̄ zịị hụrẹ vẹ ịnị Irehi Ohomorihi.

⁵ Dị ọ kà a yị wa ka, Anireevi nịnị ẹ́ sị ẹngụ ẹnịnị tụ́ irenyi, dị ẹ mẹ irehi Ẹnẹyịmavara ana vị Ohomorihi ohiku ọnịnị. Ẹnịnị ẹ kụ́ avaba ịsa ana zụ́ du aha ọnịnị ẹngụ jịnẹ kwooze hụ́ ịnị anị.

⁶ Ọ kà ohiku ẹnịnị ệ yị mẹ̀ ịzẹyịza ka Ẹnẹyịmavara ana vị Ohomorihi ẹnịnị na. Ịsa ọnị ẹ mẹ̀ ô du Ẹnẹyịmavara ẹtẹẹtẹrẹ. Ẹnịnị ệ yi ọ tịtẹ, dị ẹ varẹma ka irehi anị nị.

⁷ Ẹnịnị ệ gu oze hi irehi Ohomorihi, dị ịra ịrakotupa ene hi ịzọọ mi nị. Dị ẹnịnị ẹ̀ yị kụkụ rị eturare ịra ịzọọ, a vị dị ẹ rị ịsa ịsọvọ ịra ịnị irehi Ohomorihi Anisirẹrị.

⁸ Ẹnẹyịmavara vị ana nyayịnẹ du ayị hí Anijuda ọnịrị Anijerusarẹmị nịnị. Ịsị ọnị ọ mẹ̀ wa vi ene hi ọzọza angwa, dị ahị za wa. Ẹnịnị ẹ yẹ ọsọnị ẹtẹẹtẹrẹ.

⁹ Ihezekaya kà a ada ẹnịnị vị ana a wụ̀ eyi ịrẹkụ, dị a za ese ọnịrị ezi ẹnịnị ọrịhị ịrẹkụ nị.

¹⁰ Ộ kà a booro aanị, ọnị ọ raà tenyi ẹngụ ka ọnị o tenyi eku hị́ yị Ẹnẹyịmavara Ohomorihi Anisirẹrị agụvị asị ọ kụkụ vavọọ kụ ayị hi ẹnị.

¹¹ Ọ kà asị ẹnịnị ezi anị kụkụ sị ụvọ ụhwẹgẹ za ụkọrọ ẹnịnị. Ẹnẹyịmavara ọ raà nyị wa ka ẹnịnị ẹ jẹẹ ọvịdị anịị mẹ̀ ụkọrọ, dị ẹ kụ́ aza hẹkẹ ọnị, dị ẹẹ mẹ̀ ịsọvọ yị ọnị.

¹² Ịjị ịrẹyị ọnọnị ta Ihezekaya kà, dị Anireevi ẹnẹnị kwẹẹtẹ obobooro ọnọọ na mẹ̀ ụkọrọ nị. Ẹnị ẹnẹẹ ẹ vị; Imahati ozi Amazayị ọnịrị Ijowẹrị ozi Azariya, ịnị ezi Ikohati, Ikisi ozi Abidi ọnịrị Azariya ozi Ijeharereri hụrị ovwoovu Imerari, Ijowa ozi Izima ọnịrị Edẹnị ozi Ijowa hụrị ovwoovu Igerisoni,

¹³ Isimiri ọnịrị Ijeyẹrị hụrị ovwoovu Erizahwani; ezi Asahwi, Ịzakaraya, Imataniya,

¹⁴ Ijehiyẹrị ọnịrị Isimeyi hụrị ovwoovu Ihemani, Isemaya ọnịrị Uziyẹrị hụrị ovwoovu Ijedutuni.

¹⁵ Aza ẹnịnị ẹ kụ́ anda ẹnịnị Anireevi gụ, dị ẹ sị wa tụ́ irenyi yị Ohomorihi nị. Dị ẹ saasa ịrẹyị ọnị ohinọyị ka anka Ẹnẹyịmavara mẹ sị ọda zụ wa a mẹmẹ vọrọ ka ee tenyi irehi anị.

¹⁶ Ohirẹsụ irehi Ohomorihi ệ ngụ ịnị ịnẹ irehi Ẹnẹyịmavara na za ido anị. Dị ẹ kụ́ ịsa enyisi ene e re hụụnị irehi Ẹnẹyịmavara va tụ́ ịnị ohweje, dị Anireevi nịnị kụ́ wa na va ha Ikidironi nị.

¹⁷ Ẹnịnị e nyima oyi mẹ̀ ụkọrọ ịnị ẹkụhị ịpaapa ịnị ụhwẹ ịpaapa, ịhyẹgwịhịnta anị ẹ sị ẹtẹ tenyi va ngụ ajẹhẹ irehi Ẹnẹyịmavara. Dị ẹ rẹ sị ẹkụhị ịhịnta ọsa sị irehi Ẹnẹyịmavara tụ́ irenyi nị. Ẹnịnị ẹ mẹ ta ịnị ẹkụhị ana tụ́ ọ ẹkụhị ẹwụrịhịnọnyị ịnị ụhwẹ ọnọọ nị.

¹⁸ Anireevi ẹnẹẹ ệ na kà enube yị ohinọyị ka ẹnị e re tenyi avaba irehi Ẹnẹyịmavara; ụta ịsọvọ ana aā rị ịra, avaba ẹnya ene hi ịzọọ ne beri iteburu Ụbụrẹẹdị ọnịrị avaba ẹnya anị.

¹⁹ Ẹnịnị ẹ raà kụ avaba ẹnya ọnị Ahazi vịdị kụ́ hụụnị irehi Ohomorihi ịnị ụmẹ ọnị ẹ yị sị mẹ ịzẹyịza ka Ohomorihi na. Ẹ raà kụ́ wa tụ irenyi yi Ohomorihi, dị ẹ kụ́ wa tụ ọvịdị ụta Ẹnẹyịmavara.

Ahẹkẹ ịnị irehi Ẹnẹyịmavara

²⁰ Obobooro ọnọọ, Ihezekaya kwẹẹtẹ dị ọ hị́ avaba ọdọvịdị Ijerusarẹmị, dị ẹ nọ ini irehi Ẹnẹyịmavara nị.

²¹ Ẹnịnị ệ sị ụnọ ịhịmba, ịdẹba ịhịmba, atẹmẹ ịhịmba, ịdẹ ịhịmba ka a sị mẹ̀ ịsọvọ yị avaba ẹtẹ, irehi Ohomorihi, ọnịrị Ijuda. Dị Ihezekaya mẹ ọda yị ohirẹsụ irehi Ohomorihi ana vị ezi Eerọnị ka ẹ kụ uye ẹnẹẹ mẹ̀ ịsọvọ ịrẹsụ ụta Ẹnẹyịmavara.

²² Dị ẹ wụ̀ avaba ụnọ ọnịrị atẹmẹ ẹnẹẹ dị ohirẹsụ irehi Ohomorihi sị anị ne che sẹ ụta.

²³ Dị a kụ́ ịdẹ ne tu Ihezekaya ọnịrị aza ka ẹ sị ụvọ tụra wa ịrẹsụ mẹ̀ ịsọvọ ịvị nị.

²⁴ Ohirẹsụ irehi Ohomorihi nịnị ệ wụ̀ wa, dị sị anị mẹ̀ ịsọvọ ịrẹsụ ụta ka ọ sị ịvị avaba Anisirẹrị nịnị kwooze. Ihezekaya vị ana mẹ ọda ka a mẹ̀ ịsọvọ ọnọnị yị avaba Anisirẹrị.

²⁵ Ịrẹma ịsọvọ ẹnẹnị, Ihezekaya kụ Anireevi ọzọza tụ́ udi anị ini irehi Ohomorihi, dị ọ sị ịchacha eneē hu, igita, ọnịrị ẹnya isohu ana vọ yị wa anka Ẹnẹyịmavara mẹ ka yị Idevidi ọnịrị ọnịsẹ Igadi ọnịrị Ịnatanị nị

²⁶ Anireevi nini ee tenyi ẹngụ ka ene hu ẹnya isohu Idevidi, dị ohirẹsụ irehi Ohomorihi nịnị e hu ịkakanchị.

²⁷ Ihezekaya ộ mẹ̀ ọda ka a rị ịsa ịsọvọ ịra ịrẹsụ ụta. Ịjị aa rị ọ ịra, dịị e nyima aa jị ahẹ gono Ẹnẹyịmavara, dị ịsa ọọ sụrẹyị, di ee hu ịkakanchị,

²⁸ dị avaba ọza ẹẹ hẹkẹ Ẹnẹyịmavara pooro dị a wụ̀ ịsụpa ọdịrẹma.

²⁹ Ịjị avaba ịsọvọ ta mẹ, dị ohinọyị ọnịrị avaba ịragụ ana gụ va ku ẹtẹ aa hẹkẹ Ohomorihi nị.

³⁰ Dị ohinọyị Ihezekaya ọnịrị ọdọvịdị ẹkụra nịnị mẹ̀ ọda ka Anireevi nịnị ẹẹ jị ahẹ ọnị Idevidi ọnịrị Asa jị. Dị ẹ va ku ẹtẹ aa ga Ohomorihi ẹ maa jị ahẹ ẹnẹẹ nị.

³¹ Ihezekaya kà yị Ịragụ ka, booro aanị ana raà sị ẹnị chire Ohomorihi ụvọ aanị, ọzọza ọ sị ịsa ịsọvọ avọ anị vẹ ịnị irehi Ẹnẹyịmavara. Ịzẹyịza, dị ịragụ ana gụ sị ịsọvọ ọnịrị ẹyịza avọ vẹ nị.

³² Ụnọ vị ẹtarẹwụ, ịdẹba vị ẹchẹhị, dị atẹmẹ vị ịrẹka nị.

³³ Avaba uye ana kụ vẹ ana sị mẹ̀ ịsa vị ụnọ akata, ọnịrị atẹmẹ vị akawụrakahị.

³⁴ Ohirẹsụ irehi Ohomorihi ana nọ uye ẹnẹnị ịtụmpa ẹ yị rụrụ agụvị ka aza ẹnyị ẹnịnị e yi mẹ ido ene tenyi wa ẹngụ. Avaba Anireevi nịnị ẹẹ za ido, dị ahịka ẹnị ẹ gụ wa ụvọ pooro dị a nọ uye ana vọ ịtụmpa nị.

³⁵ Ịrẹma uye ọrụrụ-ọrụrụ ana a rị ịra ịrẹsụ ụta, ụ̀hị̀ uye ẹnẹẹ vị ana rẹẹ̀ rị ịra beri uye ana vọ ana a rị ịra. Eche ana kụ va mẹ̀ ịsọvọ vị ana a ka hi ịrẹsụ ụta ịsọvọ. Avọọ, a mẹmẹ nyima aa hẹkẹ Ẹnẹyịmavara ịnị irehi anị nị.

³⁶ Ihezekaya avaba Anijuda vị nyayịnẹ rị eche anị agụvị ka Ohomorihi ộ mẹ̀ ọgụvọ yị wa ka ọ vị mẹ.