2 Ịtọpa 2 - IWE ỌNỊNỊ

Isoromọnị ô tenyi ẹngụ ka ọnị aa dà irehi Ohomorihi

¹ Â nyị ụmẹ ọnya aanị ọnị Isoromọnị ana vị ohinọyị Anisirẹrị ro ka avọrọ ka ọnị ọ dà irehi Ẹnẹyịmavara ọnịrị irehi ohinọyị yị ẹngụ anị.

² Agụvị avọọ ộ kụ́ anọrụ akahị-akahị oze ẹtarẹwụ (70,000) ka ẹnịnị ẹ beri ọnị za ẹnya ọrata-ọrata, dị anọrụ akahị-akahị oze ẹbẹẹva ẹ ha ịrẹta hụụnị ịrẹsụ ataba, dị anọrụ akahị-akahị oze ẹẹta tụra akata e si eyi pe anụkọrọ.

³ Avọọ, Isoromọnị mẹ rẹ tụ́ ụtụ ne tu Ihurami ana vị ohinọyị Ịtaya ka ọ ha ọchị Isida va yị ọnị anka ọ mẹ vịdị ha ọchị yị ada anị Idevidi ọnị ọ sị dà irehi yị ẹngụ.

⁴ Isoromọnị ka ọnị a vaa dà irehi yị Ẹnẹyịmavara Ohomorihi. Irehi ọnọọ vị ana vị aha ịzị a vaa rị eturare ana dagụ ozoza ịra hi Ẹnẹyịmavara, dị aa kụ́ ụbụrẹẹdị ịsọvọ hi ịrẹsụ ụta ịzọọ. Dị aa rẹ mẹ̀ ịsọvọ ana aā rị ịra ẹnẹnẹ ọnịrị oruva eyinị-eyinị ọnịrị avaba ẹkụhị ụhwọtụ, beri eche ụhwẹ ọwọọwa ọnịrị avaba eche ọnị Ẹnẹyịmavara Ohomorihi nyị ka aa rị. Ọsọnị ọ vị ọda ọnị Ẹnẹyịmavara nyị ka aa mẹ pooro nị.

⁵ Ọ kà irehi Ohomorihi ọnọnị vaa banyị ẹtẹẹtẹrẹ agụvị ka Ohomorihi o hụụnị ori ọnyọọnyị nị.

⁶ Ama ẹnẹ zụ dà irehi ene rere ọ? Ẹbẹẹba kere-kere ẹ yị hyakụ dọ ọ ya, ẹnẹ va zụ dà irehi yọ, ẹ vị ka a dà aha ịzị a vaa mẹ̀ ịsọvọ yọ?

⁷ Isoromọnị ka Ihurami ana vị ohinọyị Anitaya ọ kụ anụkọrọ ana yara tụ́ igooru, isiriva, ọnịrị enyusẹ ana vọ va yị ọnị. Ọ rẹ kụ aza ana yara mẹ achị ịrẹdọ ovivi, uvuru, ọnịrị enyi achị ana vọ va yị ọnị. Anụkọrọ ẹnẹẹ vaa va ụvọ beri anụkọrọ ọnị Idevidi nyị ene hi Ijuda ọnịrị Ijerusarẹmị.

⁸ Ọ kà ọnị ọ yẹ ka Ihurami ohinọyị Anitaya ọ̀ nyị anụkọrọ ana yara ma ọchị ịnị iruku Ịrẹbanọnị. Agụvị avọọ, ọ dà ọvọọvọrọ ọchị Isida, ịsayịpụrẹsị ọnịrị ijunipa va yị ọnị. Ọ kà ọnị aa tụ́ anụkọrọ anị ka ẹ na gụ wa ụvọ

⁹ agụvị ka ọnị vee si ọchị ọrụrụ ọnị ọnị aa sị dá irehi ọbanyị ana va nyị ụbanyị ẹtẹẹtẹrẹ.

¹⁰ Isoromọnị ka ọnị vaa sị yị aza ana ha ọchị ihwiti ọnịrị ibaari ịtọnị akawụ-akawụ, ne beri eche ọnịrị angwẹ orivi irita 200,000.

¹¹ Ihirami ohinọyị Ịtaya ộ chẹrẹ ohi anị tụ́ hi Isoromọnị. Ọ kà agụvị ka Ẹnẹyịmavara o sì ịrẹyị aza anị ọ sị ọ mẹ̀ ohinọyị aza anị nị.

¹² Ọ kà ọnị ọ kụ Ẹnẹyịmavara Ohomorihi Anisirẹrị ana tụ́ ẹbẹẹba ọnịrị ẹtẹ avọọ. Ọnị ọ sị ozi ana yẹ ịrẹyị yị Idevidi ana mẹ̀ eto ka ọnị o dà irehi yị Ẹnẹyịmavara ọnịrị irehi ohinọyị yị ẹngụ.

¹³ Avọọ, ọnị aa tụ́ ọga ana yẹ eyi ụkọrọ enyusẹ ẹtẹẹtẹrẹ ana a hị́ Ihurami vaa yọ.

¹⁴ Ọnyị Ihurami ọnọnị vị ịrẹsụ Ịdaanị, dị ada anị vị Anitaya. Ọ yara sị igooru, isiriva, ọswẹ ọnịrị enyusẹ ne beri ọchị mẹ̀ ịsa irenyi-irenyi. Avọọ ọ mẹ rẹ yara mẹ̀ achị ịrẹdọ irenyi-irenyi nị. Ọ rẹ yara bẹ ịsa irenyi-irenyi ene e jị uwe anị yọ. Ọ kà Isoromọnị ọ̀ navọ ọnịrị anụkọrọ anị ne beri anụkọrọ ada anị ee dudu mẹ̀ ụkọrọ vaabẹ.

¹⁵ Iharumi ka Isoromọnị ọ kụkụ sị ihwiti ibaari, eche ọnịrị angwẹ orivi ọnị ọ ka tụ́ va yị ẹnị.

¹⁶ Ọ kà ẹnị vaa dà ọchị tụra ọchị ọnị ee si hụrẹ ataba Ịrẹbanọnị dị ẹnị kụ wa vẹ Ịjọpa ịzị enyi vaa kụ́ wa ve tu ọ Ijerusarẹmị.

Isoromọnị ô nyima irehi Ohomorihi aa dà

¹⁷ Isoromọnị ohinọyị ô za avaba azọga ana ra hi ịnị ẹtẹ Isirẹrị ịrịka anka ada anị mẹ vịdị mẹ̀. Avaba aza ana za ịrịka vị 153,600.

¹⁸ Ô nyị aza ẹnị 70,000 ana a kụ́ ẹnya, dị aza 80,000 ana ha ịrẹta ịnị ataba, dị ẹnị 3,600 sị eyi pè anụkọrọ agụvị ụkọrọ ọ vị mẹ nị.