2 Ịsamụwẹrị 4 - IWE ỌNỊNỊ

 wụ Isibọsẹtị

¹ Ịjị Isibọsẹtị ozi Ịsọọrụ wụ́ ka a raà wụ̀ Abịna Íhebirọnị, dị ẹngụ anị hi azọnọ. Dị angwa kuku ee hi avaba Anisirẹrị nị.

² Isibọsẹtị ộ nyị aza ẹnị ẹẹva anaā kụ́ azaa kú ẹngụ, dị ẹ kụ́ ịrẹkụ na wụ̀ aza. Ọnya ịnị ẹnịnị ọ rị Ibaana, dị ọsa rị Ịrakabị nị. Ẹnịnị vi ezi Irimoni ana vi ịrẹsụ Anịbẹnjamịnị ana ra Ịbẹẹrọtị.

³ Anịbẹẹrọtị vi ene zwe nọ Igitayimi dị ẹ kụkụ ra ịzọọ hụrẹ ụmẹ ọnọọ ve tù ọyaanị nị. Ọnị ọ mẹ ka a kụkụụ re wa ka Anịbẹnjamịnị ẹ vị nị.

⁴ Òóku Ijonatani ozi Ịsọọrụ ộ ma ozi ọnọrụ ọnya. Ozi ọnọọ vị ịrayị ẹẹhị ịnị ụmẹ ana a hụrẹ Ijezirẹẹrị va kà a ka Ịsọọrụ ọnịrị Ijonatani ê wusu. Dị ọnẹẹ ana si eyi pè e wụsẹ sị ọ ka eni èe zwe nị. Ọnẹẹ ọnọọ màa há eyi, di ozi ọnọọ hyẹdụ ana mẹ ka ahụ anị è sú nị. Ozi ọnọọ kụkụ vị ana vi oswahụ. Ịrẹha anị aā hị́ Imehwibọsẹtị nị.

⁵ Ẹkụhị ọnya, dị Irekabi ọnịrị Ibaana ezi Irimoni ana vị Anịbẹẹrọtị si hu aa nọ ini eehi Isibọsẹtị nị. Dị ahịka ụmẹ ọọdụ gaaga ẹ sị na ngụ ịzọọ nị. É mè tù ịzọọ, di e ne tù ka Isibọsẹtị hụtụ aa kụ́ areyi ọọdụ nị.

⁶ Di Irekabi nịnị ngụ ịnị ịnẹ eehi na, dị ọ sị mẹẹ ka vị ẹ yaa naa ká akụ nị.

⁷ Ụmẹ ẹnị ẹ vavọọ si were ngụ eehi, ara ọ sị Isibọsẹtị dọ tụ́ ịnị ịbẹẹdị anị ini eehi. Ẹ́ mẹ̀ sị ọ wụ, dị ẹ jị ọ ịrẹsụ dị ẹ sị ịrẹsụ anị di e si zwe nị. Avaba ịrahụ ịhị ọnọọ ẹ sị zị ụsẹ, dị ahịka oze Araba ẹ zị nị.

⁸ Irekabi ọnịrị Ibaana ệ sị ịrẹsụ Isibọsẹtị ne tù Idevidi Íhebirọnị. Dị ẹ ka, “Taarụ Ohinọyị, ịrẹsụ Isibọsẹtị ozi Ịsọọrụ ana vị ọnịvị awụ ene ee sì ka ọnị ọ̀ wụ̀ wụ yọ. Taarụ, Ẹnẹyịmavara o reè pè wu sí Ịsọọrụ atọ ajịnị agụvị ịsị ọnịrị ezi anị ka ẹnị aa mẹ wụ.”

⁹ Di Idevidi vạ ohi yị wa dị ọ ka, “Ma sị Ẹnẹyịmavara ana dọ mị há hụụnị avaba akanya hị́ eku.

¹⁰ Â nyị ẹkụhị ọnya ọnị ọza ịnya va kà a mị Izikiragi ka Ịsọọrụ ô wusu. Vi o ro ka enube ọyịza ọnị va kà a mị nị. Ọza ọnọọ vị ẹnị mị za dị mị wụ̀ ọ ịzọọ. Ọgụ ọnị ọ dọ ini enube ọnị ọ va kà ọ vị ọnọọ nị.

¹¹ Ẹwụ nịnị aza edivi ẹ va ngụ ini eehi ne tù aza ẹnẹ ẹ̀ yị nyị ịsị ẹ mẹ̀ wa wụ̀ ọ tụ́ ịnị ịbẹẹdị anị nịnị. Maa họ̀ wụ nịnị oponu anị, dị mị mụ̀ nịnị hụụnị ẹhẹ.”

¹² Di Idevidi ka aza anị ẹ̀ wụ̀ wa nị. Ịzẹyịza dị ẹ wụ̀ wa, dị ẹ dà wa ụvọ ọnịrị ahụ, di e zu ẹngụ ẹnịnị ana vọ gẹ ọchị hí ụtọ okuha Íhebirọnị nị. Dị ẹ sị ịrẹsụ Isibọsẹtị di e ne ne e tụ́ ini ikuta Abịna Ihebirọnị nị.