2 Ịsamụwẹrị 11 - IWE ỌNỊNỊ

Ịrẹyị Idevidi ọnịrị Ịbatịsẹba

¹ Ịrayị mẹ̀ rẹ sị gẹ, o si tù ụmẹ oni ohinọyị nịnịị̄ sịị naa kụ̀ ịrẹkụ. Di Idevidi tụ́ Ijowabi ọnịrị aza ohinọyị ne beri avaba isoja Anisirẹrị ka ẹ̀ nọ ịrẹkụ Anamọnị nịnị, dị ẹ wụ̀ wa nị. Di isoja Anisirẹrị nịnị kụ́ na kara ẹkụra Ịraba nị. Idevidi ọnị yà Ijerusarẹmị ịjọnọọ.

² Ini oruva ẹkụhị ọnya di Idevidi ohinọyị kwẹẹtẹ hụụnị ịbẹẹdị anị, dị ọ hịrẹ nọ ịrẹsụ írehi anị, dị aa zị ụsẹ ịzọọ nị. Ọ mẹ̀ vavọọ yà ịrẹsụ irehi anị, di o re ka ọnẹẹ ọnọọ, ô zoza pooro ee.

³ Di Idevidi tụ́ ne họ̀ use ọnẹẹ ọnọọ nị. Dị a va ụtụ va kà yọ ka Ịbatịsẹba ana vị ozi Eriyami yọ nị. Ọva anị ọ vị Uriya ana vị Anihiti nị.

⁴ Di Idevidi tụ́ na hị́ Ịbatịsẹba, dị o ve tù ọọ nị. Dị Idevidi za a dị ọnịrị ọ sị sụ̀ nị. Ịnị ụmẹ ọnọọ Ịbatịsẹba vị anaa za ido ụnị ana aā mẹ ịrẹma ịsa ụhwẹ ọnyẹnẹẹ. Ịjị ọnịrị ẹ vavọọ sị mẹ, di Ịbatịsẹba si hu aa nọ eehi anị nị.

⁵ Ọnẹẹ ọnọọ véè zyẹẹ, dị ọ tụ́ na kà a yị Idevidi ka oni ee zyẹẹ oo.

⁶ Di Idevidi tụ́ hi Ijowabi dị ọ ka ọ̀ hị́ Uriya Anihiti va yị ọnị nị. Ịzẹyịza di Ijowabi ka Uriya ò ve ne tù Idevidi nị.

⁷ Uriya o ne si tù Idevidi. Di Idevidi họ̀ ọ dị ọ ka, “Ijowabi ọ́ọ́ dahi? Isoja ana vọ ẹ́ẹ́ dahi? Ịrẹkụ mẹmẹ yà kẹ?”

⁸ Di Idevidi rẹ ka, “Ne chi ini eehi awụ dị wa tụ̀ ụhwọ.” Di Uriya hụụnị eehi ịdị ohinọyị nị. Di ohinọyị kụ́ ịsa tù ka à sị na mẹ Uriya ẹyịza nị.

⁹ Dị ahịka enoze irehi ohinọyị Uriya sú pè avaba ezi ahụ Idevidi ọga anị nị. Uriya ọ yị nọ ini eehi anị.

¹⁰ Di a va kà a yị Idevidi ka Uriya ọ yị nọ ini eehi anị ộ! Di Idevidi hị́ Uriya dị ọ ka, “Ụsẹ ọnị ụ zị vẹ ô noze. Sị ẹ vẹ di wè yi chi nọ ini eehi awụ?”

¹¹ Di Uriya tụ́ ohi dị ọ ka, “Apoti Ohomorihi ọnịrị Anisirẹrị ne beri Anijuda hi Isukutu. Ijowabi ọga amị ọnịrị ezi ahụ awụ ana vọ hị́ ịnị ajẹngụ ịnị ụnọmị. Taarụ, ẹmáá nyayịnẹ nọ ini eehi amị dị ma naa rị di mee hú dị ma rẹ na hụtụ pè ose emi? Taarụ, mâ sị ịrẹsụ awụ vị onivenu ka mẹ yị nyayịnẹ vavọọ mẹ.”

¹² Di Idevidi ka Uriya ọ̀ yà ịzọọ mẹ ẹkụhị ọnya tụ́ ọ nị. Ọ kà ụhwọọ dị ọnị tụ́ ọ varẹma. Di Uriya yà Ijerusarẹmị ịhị ọnọọ ọnịrị eyinẹhẹ anị nị.

¹³ Di Idevidi hị́ ọ dị ọnịrị ọ rị ịsa, di e hí eche nị. Idevidi ộ mẹ̀ ka Uriya ò hú eche dị ọ̀ọ mẹrị ọ. Oruva di Uriya rẹ na sụ́ ịnị ụvẹnẹ anị beri ezi ahụ ohinọyị nị. Ọ yị nọ ini eehi anị na sụ.

¹⁴ Ịnị ẹnẹnẹ viri-viri di Idevidi chẹrẹ iwe ana aa sịị tụ́ hi Ijowabi nị. Ịjị ọ sị ọ chẹrẹ, dị ọ sị tụ́ Uriya nị.

¹⁵ Idevidi ộ chịrẹ iwe ka, “Sị Uriya tụ́ eyi ọvịdị ịrẹkụ ana ngụra, dị wa và hụrị ịrẹma anị nịnị dị à và ịsa hị́ ọ ẹngụ di ò sú.”

¹⁶ Ijowabi mẹ̀ raà kụ́ isoja kara ẹkụra ọnọọ, dị ọ sị ịzị ẹ katẹngụ hu yi Uriya nị. Ộ yẹ ka aza ene hi eyi ọnọọ ệ nyị ụkata ẹtẹẹtẹrẹ.

¹⁷ Dị anẹkụra ẹnẹẹ jịnẹ hi ẹhẹ, dị ẹnịrị Ijowabi nịnị gẹ ịrẹkụ nị. Aza ẹnẹẹ ẹ sị aza Idevidi hu ẹtẹ dị ẹ hyakụ wụ Uriya ana vị Anihiti nị.

¹⁸ Di Ijowabi tụ́ ka à na kà a yị Idevidi avaba ịsị ẹ mẹ éyi ịrẹkụ nị.

¹⁹ Di Ijowabi ka ọnụtụ ọnọọ ọ̀ọ sị ụtụ anị kà ta anka ịrẹkụ mẹ̀ zị, yi ohinọyị,

²⁰ ohinọyị vaa kụ́ ayị, dị ọ ka sị ẹ ve dị a vavọọ gụrị aza ẹnẹẹ a màa kụ̀ ịrẹkụ? Ọ kà o re vee họ̀ use ka aanị ka ẹnị ẹ yị yẹ ka e vee hi ịrẹsụ ọvọ di eyee ne ọpa.

²¹ Ijowabi re ka ohinọyị vaa kà a ka, ẹnị ẹ́ẹ́ yẹ ọza ana wụ Abimẹrẹkị ozi Ijerubeseti. Dị ọ ka ẹnị ẹ́ẹ́ yẹ ka ọnyẹnẹẹ ọ yà ịrẹsụ ọvọ di o zina ịrẹta ọkụsa na nya a di o su Ítebezi nị? Dị ọ rẹ ka sị ẹ vẹ dị ụ vavọọ gụrị ọvọ nịnị? Di Ijowabi ka ohinọyị ọ̀ọ maanị họ̀ use, di ụ kà a yọ ka ozi ahụ anị Uriya Anihiti ọnị ộ hyakụ re wusu bẹẹ.

²² Di ọnụtụ ọnọọ si hu, dị ọ na kà a yi Idevidi avaba ụtụ oni Ijowabi tụ́ ọ nị.

²³ Ịjị o tù ịda Idevidi dị ọ ka, “Taarụ, aza ẹnẹẹ e si huna ayị. Ệ jịnẹ ve tù yị ịnị ụnọmị dị ị dụ wa na ngụ enoze ẹkụra nị.

²⁴ Dị ẹnịnị ana kụ́ ọkịta hi ịrẹsụ ọvọ di eyee ne ọpaa hi yi, dị aza ẹnyị ayị wusu nị. Ozi ahụ awụ Uriya Anihiti ọnị ọ rẹ hyakụ wusu bẹẹ.”

²⁵ Di Idevidi tụ́ ọnụtụ ọnọọ ohi dị ọ ka ọ̀ kà a yi Ijowabi ka asị o du ayị. Ọ kà ọza ọ mā yẹ ọza ene vee sú ịnị ịrẹkụ. Dị ọ rẹ ka ẹ̀ dà pè ẹkụra ọnọọ dị ẹ wụ̀ wa và ha. Ọ kà ọ̀ vavọọ kà a yi Ijowabi dị ọ sị tụ́ ọ ọtụtụrụma.

²⁶ Óse Uriya mẹ̀ wụ́ ka ọva anị ô wusu, dị ọ jị òrèrè anị nị.

²⁷ Ịjị ọ sị orere anị jị ta, dị Idevidi tụ́ ka à na sị ọ va tụ́ ini eehi anị nị. Di Idevidi kụkụ nyị ọ, dị ọ ma ozi ọnọrụ ọnya yọ nị. Ama ịsa oni Idevidi mẹ avọọ ộ kụ́ Ẹnẹyịmavara ayị.