2 Anịkọrịntị 9 - IWE ỌNỊNỊ

Tenyi ẹyịza awụ nịnị tịtẹ dị ma vavẹ

¹ Ịnị ka àa mẹ ọgụvọọ yị aza Ohomorihi, ẹ yị kụkụ nyị ka maa chẹrẹ iwe anịị tụ́ụ hi wu nịnị.

² Mâ yẹ ka wee sì ka wa mẹ ọgụvọ nịnị. Mâ hyakụ sị ịrẹyị awụ nịnị wo oto yị Animasedoniya. Mâ kà a yị wa ka hụrẹ ayẹnẹ ánda ayị ene hi Akaya hụrẹ ee sì ka ẹnị ẹ̀ mẹ ọgụvọ nị. Ụ mẹmẹ sị ayị sị ọọ nịnị, ọ raà mẹ ka aza ọrụrụ-ọrụrụ ẹnị ẹ̀ rẹ sị ayị sị ọọ.

³ Maa tụ́ anda ayị ẹnẹnịị hi wu nịnị, agụvị asị oto ọnị mị sị wụ nịnị wo ịnị ịrẹyị ọnọnị, va na vị osusu. Re ka wa sị ẹngụ tenyi nịnị, anka m mẹ̀ kà a yị wa.

⁴ È yị vị avọọ, Animasedoniya ẹ̀ẹ na saasa mị vẹ, dị e ve tù ka we yi tenyi ẹngụ nịnị nị, ụhị vaa daa nyị yị kẹnẹ ka yâ vavọọ sị ayị tụra wụ nịnị. Asị a hyakụ kụkụ kà ụhị ana rẹ vaa nyị ẹwụ nịnị.

⁵ Agụvị avọọ mee roo ka ộ vọrọ, dị mị dá ịpẹ yị anda ayị ẹnẹnị ka ẹ̀ dọ ọvịdị amị vẹ ịdị awụ nịnị, dị ẹnịnị è ve tenyi ịsị ụ ka waa sịị mẹ ọgụvọ nịnị tịtẹ. Tenyi ọọ tịtẹ nịnị! Ọnọọ vaa sị zụ̀ ka ẹwụ nịnị ụvọta ọ sị ayị awụ nịnị sị ọọ ka waa mẹ ọgụvọ nịnị nị, ẹ yị vị a sị ụkata za wụ nịnị.

Ohomorihi ộ sị ịsa yị ka ẹ yà rẹ sị yị aza

⁶ Ịsị maa kà yị ka: ọza ene èe chire ịsa chee, ịsa chee o re vee ree há nị; ama ọza ene èe chire ịsa ọrụrụ, o re vee re ịsa ọrụrụ há nị.

⁷ Ịsa ọzọza òo ro tụ́ ịnị ayị, ọ̀ vavọọ sị ọọ vẹ! Agụvị ka ọza ana sị ayohine sị ịsa vẹ Óhomorihiī sì ịrẹyị anị nị.

⁸ Ohomorihi ọ zụ sị ịsa wụ nịnị huna ọpa oni u sì nịnị. Dị ịsa ọnọọ aa hụ wụ nịnị ini oze tụra oze, dị ọ hyakụ aa vọ ẹtẹ ọnị ụ zụ sị mẹ̀ ịsa ozoza nịnị.

⁹ Avọọ a mẹ̀ vịdị chẹrẹẹ tụ́ ini Iwe Ohomorihi nị, ka, “Ộ gara ịsa hi ẹtẹ, ộ hara ịsa yị onosiye nịnị ẹtẹẹtẹrẹ, ayamva anị vị ana jẹẹ pooro zịna-zịna.”

¹⁰ Ohomorihi anaā sịị ịsa ọyịnaa yị ọkụrịkụ, dị ọ rẹẹ̄ sị ịsọyịrịị yị ọza, ọ rẹ vaa sị ịsa ọyịnaa wụ nịnị, di u we chire e nịnị. Ọ rẹ vaa mẹ ka ọ̀ hụ, dị ẹ̀ nyị ẹtụtụ ẹtẹẹtẹrẹ, agụvị ka wẹ yị sị ụvọ kú oku nịnị vụrụ-vụrụ.

¹¹ Ọ vaa mẹ ka wa nyị ịsa nịnị ẹtẹẹtẹrẹ, dị ụ wa nyị ịsụ ụ vaa sị mẹ ẹyịza nịnị ịnị ụmẹ tụra ụmẹ. Dị aza ẹ̀ va zụụ kụ́ Ohomorihi avọ agụvị ịsa ọnị ụ sị yị ka ya sị na yị wa nịnị.

¹² Ẹyịza ọnị ụ mẹ nịnị aanị, ẹ yị vị ịsị aza Ohomorihi ẹ̀ yị nyị kẹnẹ ụ sị yị wa. Ama ọ rẹ vaa mẹ ka aza ẹ̀ẹ kụ́ Ohomorihi avọ ẹtẹẹtẹrẹ.

¹³ Ịsa ẹnẹ ẹyịza ọnị ụ mẹ nịnị sị tụ́ ẹhẹ, vaa mẹ ka aza ẹ̀ẹ sị igirimaa yị Ohomorihi, agụvị ka wáa nyị ịzẹyịza tụ́ ini enube ọyịza Ikirisiti ọnị ụ ka wâ dọ nịnị, ọnịrị ka wẹ yị sị ụvọ kú oku nịnị, ẹwụrị wa ne beri avaba aza ana vọ aa gà ịsa ọnị ụ nyị nịnị.

¹⁴ Eyi awụ aa tụra wa, ẹ rẹ yaa mẹ̀ aduwaa wụ nịnị ẹtẹẹtẹrẹ agụvị ayamva ọbanyị oni Ohomorihi sị wụ nịnị.

¹⁵ À vẹ ya kụ́ Ohomorihi avọ agụvị ẹyịza ọbanyị anị ọnị ọza ọ̀ yị zụ sị irenu kà!