2 Anịkọrịntị 1 - IWE ỌNỊNỊ

Ụkụ

¹ Ẹma vị Ịpọọrụ nị, Ohomorihi ô sì ọọ ka ma vị ozirẹma Ijeesu oni Ohomorihi nyị mẹ ohinọyị ka ọ̀ dọ yị ha. Ẹmịrị Itimoti ẹnẹbẹnị ayị aa chẹrẹ iwe ọnọnịị tụ́ụ hi wu nịnị anịragụ Ohomorihi ene hi Ịkọrịntị beri avaba aa Ohomorihi ene hi ẹtẹ Akaya nị.

² Ohomorihi Ada ayị ọnịrị Ijeesu Ananyị yị oni Ohomorihi nyị mẹ ohinọyị ka ọ̀ dọ yị ha ẹ̀ mẹ̀ ọyịza ọnịrị ẹngwọọrọ yị wụ nịnị!

Ịpọọrụ ộ kụ́ Ohomorihi avọ

³ À vẹ yaa kụ́ Ohomorihi avọ, ana vị Ada Ijeesu Ananyị yị oni Ohomorihi nyị mẹ ohinọyị ka ọ̀ dọ yị ha. Ọnị ọ vị Ada ana aa vayị ọza nị. Ọnị ọ rẹ vị Ohomorihi eneē hunẹnẹ ọza ayị nị.

⁴ Ohomorihi ee hunẹnẹ yị ayị ịnị avaba ụyọrị ayị, agụvị ẹ̀ ya rẹ zụụ sị ayohunẹnẹ oni Ohomorihi sị yị, dị ya sịị yị aza ana àa rị ụya.

⁵ Anka ị mẹ̀ nyị tụ́ ịnị ụya ọrụrụ-ọrụrụ ọnị Ikirisiti rị, avọọ ọza ọnọọ mè ree hunẹnẹ yị ayị ẹtẹẹtẹrẹ nị.

⁶ Yàaa rị ụya, yaà rị ọọ agụvị ayị awụ nịnị ọ zụ nẹtẹ, dị à dọ wụ nịnị há hụụnị ụyọrị ọyaanị. Ayị ayị òo ve hunẹnẹ, agụvị ayị ẹwụ nịnị ò re hunẹnẹ yọ nị. Ọnị ọ mẹ ka wa zụ sị ẹngụ dọ ẹngụ ụyọrị ẹnẹ ẹyị raa rị nị.

⁷ Yẹ yị jị wụ nịnị ịrẹka vụrụ-vụrụ. Yâ yẹ ka ụ mẹ nyị tụ́ ịnị ụya ọnị yaa rị nịnị, avọọ ụ mẹ rẹ vaa nyịị tụ́ ịnị ayị ayị ene vee hunẹnẹ nịnị nị.

⁸ Ẹwụ nịnị ẹyịnyara amị, yee sì ka ya kà a wụ nịnị ịrẹyị ene tù yi ẹkụra Esiya. Ịrẹyị ene tù yi ô chì yi ẹngụ pooro, ne tù ka ya kụkụ raà hụrẹ eyi ka yee wusu.

⁹ Ye si o ro ka a sị ọkarẹyị isu mẹẹ yị da. Ama ọsọnị vị ana mẹ ka à sị kụkụ sị ayị tụra ẹngụ ayị, ama ya sị ayị tụra Ohomorihi anaā ha okuu hụụnị isu.

¹⁰ Ohomorihi ộ dọ yị hụrị ụvọ isu ene si tù yi gede-gede. Ọ rẹ vaa dọ yịị há. Yâ sị ayị tụra a ka ọ vaa dọ yịị há.

¹¹ Ẹwụ nịnị ọ̀ rẹẹ sị aduwaa gụ yị ụvọ, dị Ohomorihi ọ̀ dọ aduwa ọnị aza ọrụrụ-ọrụrụ mẹ, dị aza ọrụrụ-ọrụrụ ẹ̀ zụụ ga Ohomorihi agụvị ayị ini oze ịsa ọnị ọ mẹ yị.

Sị ẹ vẹ dị Ịpọọrụ ọ̀ yị va nọ Ịkọrịntị

¹² Yâ yẹ ịnị ayị ịzẹyịza ka ebira ayị ịnị ẹhẹ ọnọnị ọnịrị ịsị yee pe wu nịnịị mẹ, ka ayị ọnya beri ebira Ohomorihi ị yaa sịị mẹ̀ ẹ nị. Ayamva Ohomorihi ọ mẹ ka ya vavọọ mẹ nị. Ẹ yị vị ịrẹyọyẹ ọza kẹnẹ ọ vị. Agụvị avọọ ị yaa sịị jẹ nị.

¹³ Ẹ yị nyị ịsa ọnị ị chẹrẹ ọnị ụ wẹ̀ yị zụ kà, dụ wa rẹ yẹẹ nịnị. Mâ yẹ kaakara ka ụ vaa sị avaba ayị awụ nịnịị dọ yị,

¹⁴ anka ụ mẹ̀ vịdị dọ yị chee nịnị. Ịhị Ijeesu Ananyị yị ọ̀ọ vẹ, dụ wa zụụ jẹ agụvị ayị, anka ẹ́yị mẹ̀ raa jẹ agụvị awụ nịnị.

¹⁵ Mâ maanị yẹ ịsa ẹnẹnị ẹtẹẹtẹrẹ, agụvị avọọ mi vịdị roo ka maa vaa vẹ ịda awụ nịnị, dị ịnẹ awụ nịnị ò re oze hine gụ ụpẹ ẹẹva nị.

¹⁶ Mê ro ka maa ha hee wu nịnị, màaa nọ Imasedoniya ọnịrị màa rẹ hụụ ịzọọ aa vaa vẹ, dụ wa zụ mẹ ọgụvọ mị nịnị ka ma zụ nọ Ijudiya.

¹⁷ Wéé ro ka mẹyị yẹ ịsị maa mẹ̀ nịnị, m mẹ̀ vịdị vavọọ roo? U wéé ro ka ịsị mi ro ka vi mi roo kẹnẹ anka ọza avọọ nị, dị maa kà a ka hịịn, dị ma rẹ kà a ka eyiye?

¹⁸ Mâ sị Ohomorihi ana vị ọnịzẹyịza tẹ ivenu ka ịrẹyị ọnị mị kà wụ nịnị, ọyị vị ịrẹyị hịịn, eyiye.

¹⁹ Ijeesu Ikirisiti ana vị Ozi Ohomorihi ẹnẹ ẹmịrị Isirivanọsị beri Itimoti kà ịrẹyị anịị wụ nịnị, ayị vị ọza hịịn eyiye ọ vị. Ọ̀ọ kà a ka “hịịn”, “hịịn” ọ vị nị.

²⁰ Agụvị avọọ avaba ịsa oni Ohomorihi kà a ka ayị zụ nyị ka ọnị ọyị vaa mẹ, Ijeesu ọ vị hịịn tụ́ ịnị ịsa ẹnẹẹ nị. Agụvị avọọ ịị̄ kà a ka “Aamị” ini oze anị nị, dị yaa sị ụbanyịị yị Ohomorihi.

²¹ Ohomorihi ọ mẹ ka ẹyịrị ẹwụ nịnị ọ̀ jẹẹ geri-geri, dị ẹyịrị Ikirisiti sị vị ọnya nị. Ohomorihi ọ rẹ sị yị tụ́ irenyi yị ẹngụ anị nị.

²² Ohomorihi ọ raà sị apọtẹrẹwa tụ́ ọọ ka ọnị ọ nyị yị nị. Ọ raà sị Ụhwẹ Ohomorihi tụ́ ịnị ayị ayị, ana mẹ ka ya yẹ ka ịsa ana vọ ọnị ọ kà ọnị vaa sịị yị avọọ, ayị zụ nyị ka ọ yị vaa sịị yị.

²³ Mâ sị Ohomorihi tẹ ivenu, ọ rẹ yẹ ayị amị. Agụvị ma rẹ sị oze tụ́ ọọ wụ nịnị, m mẹẹ̀yị sị vavẹ Ịkọrịntị nị.

²⁴ Ye yi sì ka ya sị ụkata za wụ nịnị ka wa dọ ịsa ọnọnị wụ́ nịnị. Ama yee pe wu nịnịị mẹ̀ ụkọrọ ka ịnẹ awụ nịnị ò hine, agụvị ka wâ jẹẹ geri-geri ịnị ẹdọwụ awụ nịnị.