1 Ịtọpa 19 - IWE ỌNỊNỊ

Idevidi ộ nyị ẹbẹẹba Anamọnị ọnị Anisiriya nịnị

¹ Â nyị ụmẹ ọnya, ọnị Inahasi ohinọyị Ámoni sị su. Dị a sị ozi anị Ihanuni dọ ọ ịrẹsụ ka ọ̀ vị ohinọyị nị.

² Ohinọyị Idevidi ộ kà a ka, â vọrọ ka ọnị ọ̀ mẹ ọyịza hi Ihanuni ozi Inahasi, agụvị ka ada anị ộ vịdị mẹ ọyịza hi ọnị. Dị Idevidi va tụ aza ka ẹ̀ na kụ́ ọ nyarị ọ nị. Ịjị aza Idevidi ve tu Ihanuni, ịnị ẹtẹ Amọnị ka ẹnị ẹ va kụ́ ọ nyarị ọ,

³ dị, ẹnị ọdọvịdị Anamọnị nịnị kà a yị Ihanuni, ohinọyị ẹnịnị ka ví ó ro ka vị Idevidi vavọọ sị ụbanyị yị ada anị, ọnị ọ́ sị tụ aza ẹnẹnị ka ẹ̀ va kụ́ ọ nyarị ọ nị? Ẹ ka, heyiye de! Vị Idevidi tụ aza ka è wèrè ve re ẹtẹ tịtẹ dị ọnị ọ va kụ́ ịrẹkụ va rị ọ nị.

⁴ Ihanuni ộ za aza oni Idevidi tụ ụtụ aanị dị ọ̀ kụ́ wa ịrẹwa, dị ọ dà wa ịta ịpa iruvo ẹnịnị, dị ọ dụ wa nị.

⁵ Ọ sị wa dụ, ama ẹnịnị ẹ yị nyayịnẹ va nọ eehi agụvị ụhị aa nyị wa. Ịjị Idevidi wụ ịsị ana mẹ, dị ọ tụ na kà a yị aza ọnị ọ́ tụ ụtụ aanị ka ẹnịnị ẹ̀ yà Ijeriko pooro dị ịrẹwa ẹnịnị è hi, dị ẹ̀ va vavẹ nị.

⁶ Ohinọyị Ihanuni ọnịrị avaba Anamọnị ệ yẹ ka ẹnị ẹ raà hị́ Idevidi ịrẹkụ tu ẹngụ ẹnịnị. Dị ẹnịnị sị isiriva ikirogirami akahị-akahị oze ẹwụrịhịmba (100), dị ẹ sị na dọ ụkẹkẹ ịrẹkụ ọnịrị aza anaā sịị ụkẹkẹ ịrẹkụụ kụ̀ ịrẹkụ hụrẹ ẹtẹ Imesopotamiya nị. Ẹ́ rẹ haya aza ọnịrị ẹnya hụrẹ ịzị aā hị́ Imaaka ọnịrị Izoba ịnị ẹtẹ Isiriya.

⁷ Ụkẹẹkẹ ịrẹkụ ẹnẹ ẹ na dọ vị akawụ-akawụ oze ẹwụrịhịnọnyị (32,000). Dị ẹnịrị isoja ọnị ohinọyị ẹtẹ Imaaka kụ ka ẹ̀ va ịnị ọgụvọ vẹ, dị ẹ va jị udi tụ ọ̀ sị gụrị ịzị aā hị́ Imedeba nị. Anamọnị nịnị ẹnị ệ rẹ kwẹẹtẹ hụrị udi ẹnịnị, dị e tenyi ẹngụ ịrẹkụ nị.

⁸ Ịjị Idevidi wụ́ avaba ịsa ana aa na, dị ọ ka Ijowabi ọnịrị avaba isoja anị ẹẹ kwẹẹtẹ nị.

⁹ Anamọnị nịnị ệ kwẹẹtẹ ịrẹkụ, dị ẹ na jẹẹ enoze ẹtẹ Ịraba nị. Ịzọọ ọ vị ohyẹtẹ ẹkụra ẹnịnị nị. Ẹnị ohinọyị ana vẹ ịnị ọgụvọ Ihanuni ẹnị ệ re ne tenyi jẹẹ ini orere.

¹⁰ Ijowabi ô re ka a sị ịrẹkụ gu jẹ ee zị ọnị ọvịdị ọnịrị ịrẹma, dị ọ tọ̀ ọkọọka isoja Anisirẹrị ka ẹẹ nọ ịrẹkụ Anisiriya nịnị nị.

¹¹ Ộ kà a yị ọyịnyara anị Abisayi ka ọ̀ vị ọdọvịdị isoja anị ana vọ. Abisayi ọ kụ isoja ẹnẹẹ ka ẹẹ nọ ịrẹkụ Anamọnị nịnị nị.

¹² Ijowabi ộ kà a yọ ka, Ịjị òo re ka ụvọ Anisiriya nịnị aa kara ọnị dị ọ̀ va gụ ọnị ụvọ ọ; àa va vị ọnị o re ka ụvọ Anamọnị nịnị aà kara a nị, ọnị vaa vẹ vaa gụ ọ ụvọ.

¹³ Ijowabi ka Abisayi ọ̀ sị tụ ayọvị, dị ọ̀ vẹ ẹnị ẹ̀ sị ọtụtụrụma kụ̀ ịrẹkụ ọnọnị agụvị anda ẹnịnị ọnịrị agụvị ẹkụra Ohomorihi ẹnịnị Ẹnẹyịmavara òo me yi sì ọ kẹnẹ, ọ̀ vavọọ mẹ̀ ẹ.

¹⁴ Ijowabi ọnịrị isoja anị aà kà a pe Anisiriya nịnị kẹnẹ, dị ẹnịnị và tụ echi nị.

¹⁵ Ịjị Anamọnị nịnị re ka Anisiriya nịnị ee zwè, dị ẹnị re zwè yị Abisayi, dị ẹ varẹma ne hi ịnị ẹkụra ẹnịnị nị.

¹⁶ Anisiriya nịnị ê re ka Anisirẹrị nịnị e reè huna ẹnị, dị ẹ na kụ isoja hụrẹ akaha irehu Iyuhwuretisi, eyi ọnị ọyịị̄ zịị vẹ ịnị ẹtẹ Isiriya nị. Ệ kụ isoja ẹnẹẹ va yị ọnọrụ ana aā hị́ Isobaki. Isobaki ọnọnị ọ vị ọdọvịdị isoja Ihadadeza, ohinọyị ẹtẹ Izoba nị.

¹⁷ Ịjị Idevidi maanị wụ́, ộ kụ isoja Anisirẹrị nịnị, dị ẹ jịnẹ irehu Ijodani nị. Ẹ raà jịnẹ irehu Ijodani, dị ọ ka ẹ̀ và eyi ka Anisiriya nịnị nị. Dị ịrẹkụ nyima ọgọnị nị.

¹⁸ Anisirẹrị nịnị ệ dụ Anisiriya nịnị, dị Idevidi ọnịrị aza anị wụ̀ isoja Anisiriya nịnị, dị Idevidi ọnịrị aza anị wụ̀ isoja Anisiriya nịnị akahị-akahị oze ẹẹta tụra akahị nị (7,000). Ẹnịnị ệ rẹ wụ ọdọvịdị isoja Anisiriya nịnị bẹẹ.

¹⁹ Ịjị ẹnị ohinọyị ọnị Ihadadeza vịdị aa mẹ ohii tụra sị yẹ ka Anisirẹrị nịnị e reè huna ẹnị, dị ẹ na, dị ẹnịnị Idevidi tangwa ne tenyi ịrẹyị ẹnịnị nị. Dị Idevidi kụkụ aa mẹ ohii yị wa nị. Hụrị ụmẹ avọọ Anisiriya nịnị ẹ yị vana dọ ka ẹnị ẹ̀ na mẹ ọgụvọ yị Anamọnị nịnị.