1 Ịtọpa 11 - IWE ỌNỊNỊ

Idevidi ộ rị ohinọyị Isirẹrị ọnịrị Ijuda

¹ Avaba Anisirẹrị ệ kụ ẹngụ gụ, dị e ne tu Idevidi ẹtẹ Ihebirọnị nị. Dị ẹ kà a yọ ka, ẹnịrị ọ vị anda ẹngụ nị.

² Ẹ ka ịyẹẹyẹ ọnị Ịsọọrụ hyakụ vị ohinọyị ẹnịnị, Idevidi ọọ̄ dọ ọvịdị ẹnị Anisirẹrị nọ ịrẹkụ nị; dị Ẹnẹyịmavara Ohomorihi anị kà a yọ ka ọ vaa dọ ọvịdị aza anị, dị ọ vị ohinọyị ẹnịnị nị.

³ Ẹ ka agụvị avọọ ẹnị azọkụ-azọkụ Anisirẹrị ve tu ohinọyị Idevidi Ihebirọnị nị. Idevidi ọnịrị wa ệ hị́ eku yị ẹngụ Ihebirọnị ọvịdị Ẹnẹyịmavara, dị ẹnịnị vị angwẹ orivi hi Idevidi ịrẹsụ, dị ẹ sị ọ rị ohinọyị Isirẹrị, anka Ẹnẹyịmavara mẹ vịdị kà a ka Ịsamụwẹrị ọ̀ kà a nị.

Idevidi ộ dọ Ijerusarẹmị

⁴ Idevidi ọnịrị avaba Anisirẹrị ệ kụ́ ịrẹkụ nọ Ijerusarẹmị. Ijebusi â hị́ ọ ịjọnọọ nị. Anijebusi nịnị ẹyị ra ịzọọ ụmẹ avọọ nị.

⁵ Anịjebusi nịnị ệ kà a yị Idevidi ka é yi yee re oze ngụ Ijerusarẹmị ịnẹ nị. Ama Idevidi ộ dọ wa ịzị ẹẹ̄ tẹ̀ẹ hi; ịzọọ ọ vana vị ẹkụra ọnị Idevidi yà nị.

⁶ Idevidi ộ kà a yị Anisirẹrị ka, ọnịpaapa ana àa wụ Anijebusi ọnya, ọ vaa vị ọdọvịdị isoja anị nị. Ijowabi ozi Izeruya ọ va vị ọnịpaapa ana mẹẹ nị, dị a sị ọ mẹ ohirẹsụ isoja nịnị nị.

⁷ Ịzị áa tẹ aanị Idevidi ra nị; agụvị avọọ, dị á kụkụ aa hị́ ịzọọ ẹkụra Idevidi nị.

⁸ Idevidi ộ jị ọvọ kara avaba ẹkụra ọnọọ hụrị ịzị aā hị́ Imiro, dị Ijowabi ọnị tenyi avaba ịzị ẹ vọ ịnị ẹkụra ọnọọ nị.

⁹ Idevidi vị ana vanaa nyị ụbanyị hu avọ hu avọ, agụvị Ẹnẹyịmavara Ochẹtẹẹngụ ộ yà à ịrẹma.

Ẹnị Isoja Idevidi ọkọọka ẹẹta

¹⁰ Aza ẹnẹnị ẹ vị ọkọọka ini isoja Idevidi nị. Ẹnịrị Anisirẹrị ana vọ ẹ gụ Idevidi ụvọ ka ọ̀ vara ohinọyị anka Ẹnẹyịmavara mẹ̀ vịdị kà a nị. Ẹnị ẹ mẹ ka ohinọyị Idevidi ọ̀ nyị ụkata ụmẹ anị nị.

¹¹ Ọnịpaapa ịnị ẹnịnị ọ vị Ijasobimi ana vị Anihakimoni nị. Ọnị ọ vị ọdọvịdị ẹnị ẹyịta nị. Ộ sị ọha pe aza ẹnị ịrẹkẹẹchẹhị kụ́ ịrẹkụ ụpẹ ọnya, dị ọ wụ̀ avaba ẹnịnị nị.

¹² Eriyaza ozi Idodo ọ và tụra a ịnị ẹnị ẹyịta nị. Ozi Aaho ọ vị nị.

¹³ Ộ saasa Idevidi ne pe Anihwirisiti nịnị kụ̀ ịrẹkụ ịzị aā hị́ Ipasi-Idamimi. Ộ yà ịnị aarẹ ịzị a kụ́ ibaari hi dị Anisirẹrị nịnị ee zwè.

¹⁴ Ama dị ọnịrị aza anị jẹẹ ịnị akakana aarẹ ọnọọ, dị o pe Anihwirisiti nịnị kụ ịrẹkụ nị; dị Ẹnẹyịmavara mẹ ka è huna Anihwirisiti nịnị ẹtẹẹtẹrẹ nị.

¹⁵ Ẹkụhị ọnya, ẹnị ẹẹta ịnị ẹnị isoja ohurẹẹwụ ana aā dọ ọvịdị ẹnịnị, ệ nọ ịrẹsụ ịda ịzị Idevidi yà, ọ̀ sị gụrị ụtẹha. Ụmẹ avọọ â nyị isoja Anihwirisiti nịnị ana jị udi tụ inozi Irehwayimi.

¹⁶ Ụmẹ avọọ gẹdẹ-gẹdẹ, Idevidi yà ịnị ataba ịzị ọ tẹ̀, dị á nyị Anihwirisiti ene ne hi Ịbẹtịrẹhẹmị nị.

¹⁷ Eyi eehi aa tụra Idevidi, dị ọ ka, àa yẹ oni ò re ọza na dà enyi hụụnị ịkangga ana ya oze ọbanyị ana na ngụ Ịbẹtịrẹhẹmị va yị ọnị.

¹⁸ Dị ẹnị isoja ọkọọka ẹyịta ẹnịnị sị ụkata-ụkata ha udi Anihwirisiti nịnị ịnẹ na parahu, dị ẹ dà enyi hụụnị ịkangga ọnọọ va yị Idevidi nị. Ama Idevidi ô yi ka oni e yi hú; dị ọ sị mẹ̀ ịsọvọ yị Ẹnẹyịmavara, dị ọ và a hi ẹtẹ nị.

¹⁹ Idevidi ka, oni e yi zụ hú ẹngụ enyi ọnọnị, agụvị ka vị́ ọ sị mẹẹ anka aza ẹnẹnị ana sị ịrẹsụ dọ isu avọọ nị. Agụvị avọọ, dị o yi ka oni e yi hú ọ nị. Ịsa ọnị isoja ọkọọka ẹyịta ẹnẹnị sị ayọvị mẹ yị.

Isoja ohurẹẹwụ

²⁰ Ijowabi ộ nyị ọyịnyara ọnya ana aā hị́ Abisayi, ọnị ọ vị ọdọvịdị isoja ohurẹẹwụ ẹnẹnị nị. Ộ sị ọha pe isoja ịrẹkẹẹchẹhị kụ́ ịrẹkụ, dị ọ wụ̀ wa nị. Ịsị ẹ sị ọ ngụrẹyị ịnị akakana ẹnị isoja ohurẹẹwụ ẹnẹẹ ọ vị ọnọọ nị.

²¹ Ọnị ọ ngụrẹyị hu ịnị ẹnị isoja ohurẹẹwụ ẹnẹẹ nị, ẹnị ọ vara ọdọvịdị ẹnịnị nị. Ama ẹ yị ngụrẹyị anka ẹnị ọkọọka ẹyịta ọsa.

²² Â nyị ọnọrụ ọnya ana aā hị́ Ịbẹnaya, ozi Ijehoyada; hụrị ẹtẹ Ikabizeeri. Isoja ene eyi yẹ ọ vị nị. Ịsa ọrụrụ ọ sị ayọvị mẹ nị. Ộ wụ̀ isoja Animowabi ẹẹva. Â nyị ụmẹ ọnị ọ sị ngụ ụsị ụmẹ ẹtẹ ohunẹnẹ obobooro, dị ọ na wụ idu nị.

²³ Ộ rẹ wụ Anijipiti ọnya aanị. Anijipiti ọnọọ ộ hụ ẹtẹẹtẹrẹ. Ộ gọdọ ẹ̀hụ imita ẹẹva avọọ. Ọha ọnị ọ sị rị ụvọ ộ dẹngụ ẹtẹẹtẹrẹ. Ọkụkụ Ịbẹnaya sị pe e kụ́ ịrẹkụ, dị ọ dọ ọ ọha anị, dị ọ sị wụ ọ nị.

²⁴ Ịsa ẹnẹnị Ịbẹnaya sị ayọvị mẹ nị. Ọnyara ọ vị ịnị isoja ohurẹẹwụ ẹnẹẹ nị.

²⁵ Ịrẹyị ọnịnya vị irenyi ịnị ẹnị ohurẹẹwụ ẹnẹẹ, ama ẹ́ yị ngụrẹyị anka ẹnị ọkọọka ẹyịta ọsa. Ọnị Idevidi sị mẹ ọdọvịdị aza ene ee sere ọnị nị.

²⁶ Aza ẹnẹnị ẹ vị ohi-ohi isoja Idevidi nị: Asahẹrị, ọyịnyara Ijowabi, Erihanani ozi Idodo ana vị Anịbẹtịrẹhẹmị,

²⁷ Isamoti ana vị Aniharodi,

²⁸ Iherezi ana vị Aniperoni, Iira ozi Ikeesi ana vị Anitekowa.

²⁹ Abiyezeri ana vị Ananatotu, Isibekayi ana vị Anihusa, Irayi ana vị Anahohi.

³⁰ Imaharayi ana vị Aninetohwa, Ịhẹrẹdị ozi Ibaana, ana vị Aninetohwa.

³¹ Itayi ozi Iribayi, Anigibiya ọ vị nị, dị ọ vị ozi Ịbẹnjamịnị nị.

³² Ịbẹnaya ana vị Anipiratoni; Ihurayị hụrị okuha Ịgaasị, Abiyẹrị ana vị Anaribati.

³³ Azimaveti ana vị Anibaharumi; Eriyaba hụrị Isaariboni

³⁴ Ihasemi ana vị Anigizoni; Ijonatani ozi Isagee, ana vị Anịhararị.

³⁵ Ahiyami ozi Iisaka, Anịhararị ọnị rẹ vị nị. Erihwari ozi Ọọ

³⁶ Ihehwẹrị ana vị Animecherati; Ahija ana vị Aniperoni.

³⁷ Iheziro ana vị Anikamẹrị, Inaarayi ozi Ezibayi,

³⁸ Ijowẹrị ọyịnyara Ịnatanị, Imibiha ozi Ihagiri,

³⁹ Ịzẹrẹkị ana vị Anamọnị, Inaharayi ana vị Anibeeroti, ọza anaā za ẹnya ịrẹkụụ gụ Ijowabi ozi Izeruya nị.

⁴⁰ Iira ana vị Anitiri, Igarebi ana vị Anitiri;

⁴¹ Uriya ana vị Anihiti; Izabadi ozi Ahirayi.

⁴² Adina ozi Isiza, ovwoovu Irubẹnị ọ chị hụrẹ nị, ọdọvịdị ọ vị ini ezi Irubẹnị nị, beri aza ẹnị ohurẹẹwụ ọsa.

⁴³ Ihanani ozi Imaaka, ọnịrị Ijosahwati ana vị Animitina,

⁴⁴ Uziya ana vị Anasiterati; Ịsama ọnịrị Ijeyẹrị; ẹnịnị ị ezi Ihotami ana vị Anaroyeri,

⁴⁵ Ijediyayeri ozi Isimiri, ọnịrị Ijoha ọyịnyara anị; ẹnịnị vị Anitiizi.

⁴⁶ Eriyẹrị ana vị Animahavi, ọnịrị Ijeribayi, vaka Ijosaviya; ẹnịnị vị ezi Erinaamị. Itima ana vị Animowabi.

⁴⁷ Eriyẹrị, Ọbẹdị, ọnịrị Ịjaasiyeri hụrị Izoba.