1 Itimoti 2 - IWE ỌNỊNỊ

A mẹmẹ vọrọ ka àa mẹ ahẹkẹ ịnị ịragụ Ohomorihi

¹ Tụ́ ọvịdị da, maa dá ịpẹ ka aza ẹ̀ẹ mẹ̀ aduwa ẹtẹẹtẹrẹ, ẹ̀ẹ mẹ ịpọda agụvị avaba aza, dị ẹ̀ rẹẹ kụ́ Ohomorihi avọọ yị avaba aza!

² Ẹ̀ẹ mẹ̀ aduwaa yị ohinọyị nịnị ọnịrị aza ana nyị ọda! Ọnọọ vaa mẹ ka ya zụ nyị ebira hẹẹ, dị yaa mẹ ẹhẹ ẹngwọọrọ, dị yaa mẹ mẹ̀ ebira oni Ohomorihi sì dị ọ rẹ vọrọ ini oze tụra oze.

³ Ẹngụ ọnọọ óo zoza, o re zé Ohomorihi Ọdọzaha ayị eyi.

⁴ Ohomorihi ee sì ka ọnị ọ̀ dọ avaba aza há, dị ẹ̀ zụ yẹ ịzẹyịza.

⁵ Ohomorihi vị ọnya. Ọza ịnya ọ rẹ yà ịnị akakana aza ọnịrị Ohomorihi nị; ọza ọnọọ ọ vị Ijeesu Ikirisiti nị.

⁶ Ijeesu ọnọọ ọ sị ẹngụ anị yị avaba aza, dị ọ hị́ wa varẹma nị. Ini oze avọọ, ịnị ụmẹ ana vọrọ, Ohomorihi ộ sị zụ̀ ka oni ee sì ka ọnị ọ̀ dọ avaba aza há.

⁷ Agụvị avọọ Óhomorihi nyị mị ka ma vị odeyi, dị maa kà enube ọyịzaa yị aza nị. Dị ma rẹẹ sịị zụ̀ anẹhẹ ka ẹ̀ sị ayị tụra Ohomorihi, dị ẹ̀ rẹẹ mẹ ịzẹyịza. Me yi cheeche, ịzẹyịza m maa kà nị.

⁸ Mee sì ka avaba aha anọrụ ẹ̀ẹ mẹ̀ aduwa; ẹ̀ sị ayị ọnịnị sị ụvọ tụ́ ẹba, dị asị a nyị ọyịkụ ọnịrị ahankata ịnị ayị ẹnịnị!

⁹ Mi ree sì ka anẹẹ nịnị ẹ̀ẹ kụ́ ẹhwị ẹnya, anka ọ mẹ̀ vọrọ tụra ọnyẹnẹẹ, dị ẹ̀ sị eyi pe ẹngụ ẹnịnị ịnị anị. Asị ẹ rẹ̀ mẹ ọvị ahaahara, ẹhụụ ẹyị ọkajuwa oyigu, àa vị igooru ọnịrị uweyi ọkatarihi ọyịhara hi ẹngụ, ọnịrị achị ẹbanyị-ẹbanyị!

¹⁰ Ama ẹnịnị ẹ̀ẹ mẹ̀ ịsa ozoza; ọnọọ ọ vị ọvị ana vọrọ tụra anyẹnẹẹ ana ka ẹnị aa mẹ̀ ebira ene zé Ohomorihi eyi nị.

¹¹ Anyẹnẹẹ ẹ̀ kà ẹngụ ẹnịnị chí, dị ẹ̀ tangwaa kọsẹ!

¹² Mẹ yị dọ ka anyẹnẹẹ ẹẹ zụ̀ anọrụụ ịsa, dị ẹ̀ rẹẹ mẹ ọdaa yị anọrụ nịnị. Ẹnịnị ẹ̀ sị ụvọ za irenu ẹnịnị!

¹³ Adamị Óhomorihi vịdị mẹ, dị ọ va mẹ Iivi nị.

¹⁴ Ayị rẹ vị Adamị e vịdị vene, ose anị e vịdị vene, dị ọ jịnẹ ọda Ohomorihi nị.

¹⁵ Ama ányẹnẹẹ màa ma ozi, ẹ̀ẹ yaa yịị sị ayịị tụra Ohomorihi, dị e re yee sì ịrẹyị ọza, dị ẹyaa mẹ̀ ebira ọnịnị dị ẹ rẹ sị ụvọ za ẹngụ ẹnịnị nị, Ohomorihi vaa dọ waa há.