1 Ịsamụwẹrị 9 - IWE ỌNỊNỊ

Ịsọọrụ ô ne tu Ịsamụwẹrị

¹ Ụmẹ ọnya yà ịzọọ â nyị ọza ọbanyị ọnya aanị, Anịbẹnjamịnị ọ vị nị, di eyi yẹ ẹ ẹtẹẹtẹrẹ nị. Ịrẹha ọnọrụ ọnọọ ọ rị Ikisi nị. Ikisi ọnọọ vị ozi Abiyẹrị. Abiyẹrị ọnị rẹ vị ozi Izerọ. Ada Izerọ ọ rị Ibekora nị. Ibekora ọnị rẹ vị ozi Apiya.

² Ikisi ọnọọ ộ ma ozi ọnọrụ ọnya ana aā hị́ Ịsọọrụ. Ịsọọrụ ộ ta jẹẹ ịnị ọmụha nyị aza ana gọdọ tụ̀ ọ ịnị avaba Anisirẹrị. Ọnị ộ sị ẹhụụ ịza dà a vahịrẹ gọdọ huna avaba aza ana vọ.

³ Ikisi ada Ịsọọrụ ộ nyị ịkẹrịkẹtẹ ẹnyị aanị ene vu. Dị Ikisi va hị́ Ịsọọrụ dị ọ ka ọ̀ sị ozida ẹnịnị ọnya tụra ẹngụ di è ne sì ịkẹrịkẹtẹ ẹnẹẹ vẹ.

⁴ Ịzẹyịza dị ẹ kwẹẹtẹ dị ẹ zị oze ẹkụra Ehwireemi ana yà ịnị ataba, dị ẹ vavọọ zị ọ na ngụ okokooro ịzị aā hị́ Isarisa nị. Ẹnịnị e yi re ịkẹrịkẹtẹ ẹnẹẹ. Dị ẹnịnị na, dị ẹ rẹ nọ ịnị ẹtẹ Ịsọọrụ nịnị rẹ zi oze ẹtẹ Anịbẹnjamịnị na para hu nị, di è yi rị re ịkẹrịkẹtẹ ẹnẹẹ nị.

⁵ Ịjị ẹ na sị ngụ ẹkụra Izuhwi, dị Ịsọọrụ va hị́ ozida ọnị ọnịrị zị dị ọ ka ọ̀ vẹ ẹnị ẹ̀ varẹma, ka ada anị ọ zụ sị ayị hụụnị ịrẹyị ịkẹrịkẹtẹ dị ahịka ịrẹyị ẹnịnị ọ kụkụ jị ọ areyi nị.

⁶ Di ozida ọnị ọnịrị Ịsọọrụ zị aanị hị́ Ịsọọrụ dị ọ ka ọ́ọ́ yẹ ka â nyị ọza Ohomorihi ọnya ịnị ẹkụra ọnọnị. Ọ kà aza ệ sị ụbanyị yọ ẹtẹẹtẹrẹ, ka avaba ịrẹyị ọnị ộ kà, avọọ ọ mẹ̀ raa yịị yà nị. Ozida ọnọọ ka Ịsọọrụ ẹ̀ vẹ dị ẹnị ẹ̀ nọ ịzọọ, ka ọ zụ hụ ọ dị ọ kà a yị ẹnị oze ana a vọrọ ka ẹnị ẹ̀ zị.

⁷ Dị Ịsọọrụ tụ́ ozida ọnọọ ohi dị ọ ka ẹnị ẹ̀ẹ na ịzọọ, dị ẹnị vaa sị naa yị ọza ọnọọ? Ọ kà ịsọyịrị ẹnị ẹnị za ộ ta, ẹnị ẹ yị kụkụ nyị ịsa ana vọrọ ka ẹnị ẹ̀ sị na yị ọza Ohomorihi ọnọọ. Di o re họ̀ use ka áá nyị ịsị ẹnị kụkụ nyị nị.

⁸ Di ozida ọnọọ rẹ tụ Ịsọọrụ ohi ka ọnị ộ nyị ẹkẹhị chee aanị. Ọ kà ọnị aa sị yi ọza Ohomorihi ọnọọ, dị ọ̀ kà a yị ẹnị oze ana a vọrọ ka ẹnị ẹ̀ zị.

⁹ Ịnị ụmẹ ọnọọ, ọnịsẹ nịnị vị ana aā hị́ orẹtẹ. Ọza ọ̀ọ ka ọnị ee nee họ̀ use ịrẹyị hụụnị ụvọ Ohomorihi, dị ọ ka à nọ ịda orẹtẹ.

¹⁰ Dị Ịsọọrụ va ohi yọ ka ịrẹyị anị oo zoza. Dị ọ ka ọ̀ vẹ dị ẹnị ẹ̀ẹ na. Ịzẹyịza di e si hu aa nọ ịnị ẹkụra ịzị ọza Ohomorihi ọnọọ yà nị.

¹¹ Ẹ́ maà hịrẹ ataba naa ngụ ịnị ẹkụra ọnọọ, dị ẹ na gẹrị ezi anẹẹ ẹnyị aanị ana aa naa dà enyi nị. Dị ẹ họ̀ ezi anẹẹ ẹnẹẹ use ka oretẹ wáá yà ịnị ẹkụra ọnọọ nị.

¹² Di ezi anẹẹ ẹnẹẹ tụ́ ohi dị ẹ ka orẹtẹ yà ịnị ẹkụra ẹnịnị ịzọọ. Ẹ ka vị ọ maanị tụ́ ọvịdị Ịsọọrụ nịnị chee va ngụ ịnị ẹkụra nị. Ẹnịnị ẹ̀ wụsẹẹ dụ ọ na. Dị ẹ rẹ kà anẹkụra ẹnịnị aa mẹ̀ ịsọvọ ịhị ọnọọ aha ịsọvọ.

¹³ Ama ẹnịnị e yi vee nyima ịsọyịrị di orẹtẹ ọnọọ ọ va na ngụ ịzọọ. Ẹ ka orẹtẹ vaa mẹ̀ aduwa tụ́ ịnị ịsa dị aza ana a hị́ vẹ ẹ̀ va rị ọ. Dị ẹ rẹ ka Ịsọọrụ nịnị ẹ̀ẹ na sị ngụ ịnị ẹkụra kẹnẹ, e vee re e dị ọ va nọ aha ịsọvọ na rị ịsa. Dị ẹ rẹ ka Ịsọọrụ nịnị ọ wụsẹẹ na booro aanị ka e vee re e dị ọ va na aha ịsọvọ nị.

¹⁴ Dị Ịsọọrụ nịnị sị hu aa nọ ịnị ẹkụra nị. Ẹ́ màa ngụ ịnị ẹkụra kẹnẹ, di e re ka Ịsamụwẹrị ọnị raa hịrẹẹ vẹ, ọ maà nọ aha ịsọvọ nị.

¹⁵ Ịjị ọ sị vọ ụhwọọ ọnị Ịsọọrụ nịnị aa vaa ngụ ịnị ẹkụra, Ẹnẹyịmavara ộ vịdị raà sị ịrẹyị ọnọọ zụ̀ Ịsamụwẹrị.

¹⁶ Ẹnẹyịmavara ộ vịdị sị ọ kà yị Ịsamụwẹrị ka ụmẹ aanị ụhwọ, ọnị vaa tụ́ ọmụha ọnya aanị hị́ ọ. Ọ kà Ịbẹnjamịnị ọ vaa hụrẹẹ vẹ nị. Ọ kà ọza ọnọọ ọ̀ọ vẹ, dị Ịsamụwẹrị ọ̀ nyị ọ dị ọ kụkụ vị ọdọvịdị Anisirẹrị ana vị aza Ohomorihi. Ẹnẹyịmavara kà ọza ọnọọ ọ vaa dọ Anisirẹrị aza anịị hụụnị ụvọ Anihwirisiti nịnị nị. Ohomorihi ka oni ô re aza anị maà rị ụya, ọnị ọ rẹ wụ́ e mèe nowu ka ọnị ọ̀ ba ẹnị owu.

¹⁷ Ịsamụwẹrị mè re Ịsọọrụ dị Ẹnẹyịmavara kà ọza ọnị ọnị aa kà ọ vị ọnọọ nị. Ọ kà ọnị ọ vaa vị ohinọyị aza ọnị Ohomorihi nị.

¹⁸ Ịsamụwẹrị aa va naa ngụ ini oze ẹkụra dị Ịsọọrụ ne tù ọ nị, dị ọ ka aarịhịnị Ịsamụwẹrị ọ̀ kà a yị ọnị ịzị irehi orẹtẹ ọ̀ọ́ yà.

¹⁹ Dị Ịsamụwẹrị kà ọnị ọ vị oretẹ ọnọọ nị. Dị Ịsamụwẹrị rẹ ka ọ̀ tụ́ ọvịdị anị dị ọ̀ọ nọ aha ịsọvọọ zi ọnị, ka ọnịrị wa ọ vaa rị ịsa ajịnị nị. Ẹnẹnẹ eyinẹhẹ anị ọnị vaa sị ohi avaba ịrẹyị ọnị Ịsọọrụ ee ro ịnị ayị anị yọ, dị ọnị navọ wa ka ẹẹ na.

²⁰ Dị Ịsamụwẹrị rẹ ka asị o kuku ro ịrẹyị ịkẹrịkẹtẹ ẹnẹẹ ene vu ajịnọgwẹẹta, ka a sị wa re. Dị Ịsamụwẹrị ka Ịsọọrụ ọ́ọ́ yẹ ka ọnị aneehi ada anị Anisirẹrị maanị ee sì nị?

²¹ Di Ịsọọrụ tụ́ ohi ka, “Ho! wáá yẹ ka Anịbẹnjamịnị mị vị nị. Ịrẹsụ ayị o weyi hu keekere ịnị avaba Anisirẹrị nọ! Ovwoovu amị o re ve weyi hu ini avaba ovwoovu Ịbẹnjamịnị nị. Ụ mẹmẹ zụ ka ẹngụ ịrẹyị ẹnẹnịị mị?”

²² Dị Ịsamụwẹrị sị Ịsọọrụ ọnịrị ozi ahụ anị na ngụ aku ọgana ini eehi ịzị ọzọgaā hi aa vaa rị ịsa. Ịzọọ dọ azọga ẹhụụ ohurẹẹwụ avọọ. Dị ahịka Ịsọọrụ a ka ọ̀ yaayịtẹ udi ọzọkụ nị.

²³ Dị Ịsamụwẹrị hị́ ọza ana aā mẹ̀ ịsa ka ọ kụ uye ọnị ọnị vịdị kà a ka ọ̀ sị tụ́ irenyi vẹ nị.

²⁴ Ịzẹyịza dị ọza ọnọọ sị usi uye vẹ dị ọ sị va yị Ịsọọrụ nị. Dị Ịsamụwẹrị hị́ Ịsọọrụ dị ọ ka uye ana a sị tẹ ẹ ọ vị ọnọọ nị. Ịsamụwẹrị ka ọ̀ọ rị ọ, ka ụmẹ ọnị ọnị hụrẹ kà a ka ọnị aa kụ́ ọzọgaa vẹ ịnị ịsọvọ ọnọọ ọnị hụrẹ sị tẹ ẹ nị. Dị Ịsọọrụ ọnịrị Ịsamụwẹrị rị ịsa ịhị ọnọọ nị.

Ịsamụwẹrị Ộ nyị Ịsọọrụ ka ọ̀ vị ohinọyị

²⁵ Ẹ mẹ̀ raà hụrẹ aha ịsọvọ ọnọọ chi vẹ, dị Ịsamụwẹrị ọnịrị Ịsọọrụ nọ ịrẹsụ irehi dị ẹ naa kà ịrẹyị nị.

²⁶ Eyi mẹ̀ sị nị, dị ẹ sị ha nị. Dị Ịsamụwẹrị hị́ Ịsọọrụ ana sụ ịrẹsụ irehi dị ọ ka ò tenyi ẹngụ dị ọnị ọ̀ sị ọ na tụ́ nị. Ịjị Ịsọọrụ sị ẹngụ tenyi, dị ọnịrị Ịsamụwẹrị kwẹẹtẹ dị ẹ jịnẹ dị ẹ yaa na nị.

²⁷ E mèe chii naa ngụ ụtọ ẹkụra, dị Ịsamụwẹrị ka Ịsọọrụ ọ̀ kà a yị ozida ọnọọ ka ọ̀ọ na zi ẹnị nị. Di ozida ọnọọ aa naa zi wa nị. Dị Ịsamụwẹrị va kà a yị Ịsọọrụ ka ọnị ọ̀ jẹẹ chee dị ọnị ọ̀ kà yọ ụtụ oni Ohomorihi tụ́ hị́ ọ nị.