1 Ịsamụwẹrị 13 - IWE ỌNỊNỊ

Anisirẹrị ọnịrị Anihwirisiti ệ kụ̀ ịrẹkụ

¹ Ịsọọrụ vị ịrayị (ohurẹẹwụ) dị a va sị ọ rị ohinọyị. Ộ mẹ ohinọyị Anisirẹrị mẹ ịrayị (ẹbẹẹva) tụra ẹẹva.

² Dị Ịsọọrụ nyị anọrụ Anisirẹrị ẹnị akawụ rị akahị. Ộ kụ́ ẹnị akawụ pè ẹngụ tụ́ ẹkụra anaā hị́ Imikimasi ịnị ẹtẹ Ịbẹtẹrị ana yà ịnị ataba. Dị ọ navọ aza ẹnị akahị pè Ijonatani tụ́ Igibeya ịnị ẹtẹ Ịbẹnjamịnị nị. Dị Ịsọọrụ ka aza ana vọ ẹ̀ẹ nọ eehi ẹnịnị nị.

³ Ijonatani ộ kụ́ ịrẹkụ na dụ Isoja Anihwirisiti ene hi Ịgẹba dị Anihwirisiti nịnị sị wụ́ nị. Dị Ịsọọrụ ka è hú ọpanyị che avaba ẹtẹ Anisirẹrị na para hu, dị a kà a avaba Anihiburu ẹ̀ wụ́.

⁴ Ịzẹyịza avaba Anisirẹrị ệ wụ́ ka Ịsọọrụ ộ kụ́ ịrẹkụ na dụ isoja Anihwirisiti ene hi udi ọnya. Dị Anihwirisiti kụkụ hụ ụvị avọọ dị ẹ yaa nyị ịhyẹrẹ Anisirẹrị ẹtẹẹtẹrẹ nị. Dị Ịsọọrụ ka avaba Anisirẹrị è ve tù ọnị Igirigari nị.

⁵ Dị Anihwirisiti nịnị kụ́ ẹngụ gụ ka ẹnịrị Anisirẹrị ẹ va kụ̀ ịrẹkụ nị. Isoja Anihwirisiti ana nyị ịkẹkẹ ịrẹkụ oni umaataā tura vị ẹnị akawụ rị akahị. Dị ẹnị anaā sịị ịkẹkẹ ịrẹkụ oni umaataā tura kụ̀ ịrẹkụ ẹnị vị ẹnị akawụ-akawụ oze ẹẹta nị. Isoja ana vọ ẹnị vị otomiroku, ẹ rụrụ anka ààrẹ ụtọ ókū avọọ nị. Dị ẹnịnị hịrẹ nọ Imikimasi di e ne gù ịrẹkụ ẹnịnị tụ́ eyi ọnị ọyịị̄ zịị vẹ ẹkụra Ịbẹtị-Aveni.

⁶ Ịjị Anisirẹrị re ka ịrẹyị ọkatẹngụ ộ vẹ, dị ọnịvị ee vee huna isoja ẹnịnị, di e si zwe na te ịnị ụtẹha ọnịrị ịnị ẹchịchị nị. Aza ẹnyị vị ene zwe na tẹ̀ ịnị anaha ịrẹta ọnịrị imisi.

⁷ Anihiburu ẹnyị vị ana hyakụ zwe nọ akẹnẹ Okuha Ịjọdanị, dị ẹ na ngụ ịnị ẹtẹ Igadi ọnịrị ẹtẹ Anigiriyadi. Ịsọọrụ ọnị yị yà Igirigari Isoja ana yà pèe tụ́ ịzọọ vị ana angwa ee hi dị ẹngụ ẹnịnị aa banyị.

Ịsọọrụ ộ mẹ̀ akamawụ dị Ịsamụwẹrị tụ ohuvọ nị

⁸ Ịsamụwẹrị ộ vịdị sị ọ ka ẹkụhị ịhịmba aa mẹ dị ẹnị ọ̀ vavẹ Igirigari. Dị Ịsọọrụ vavọọ jị jẹẹ zị ọ mẹ ẹkụhị ịhịmba nị. Ẹkụhị ịhịmba ọ sị gụ, ama Ịsamụwẹrị ộ yị vẹ va ngụ Igirigari, di isoja ana yà pè Ịsọọrụ nyima aa garaa hi nị.

⁹ Dị Ịsọọrụ ka à sị ịsa ịsọvọ anaā rị ịra ọnịrị ịsa ịsọvọ ene e duduu rị vẹ nị. Dị Ịsọọrụ ka à mẹ̀ ịsọvọ anaā rị ịra nị.

¹⁰ Ọ mẹ̀ maanị mị mẹ̀ ịsọvọ ọnọọ kẹnẹ dị Ịsamụwẹrị vana vẹ nị. Dị Ịsọọrụ jịnẹ ka ọnị ọ̀ na kụ́ ọ nị.

¹¹ Dị Ịsamụwẹrị kà, “Sị ụ mẹ aanị?” Dị Ịsọọrụ kà, “Mê re ka aza e si nyima aa vaa hụrẹ mị ẹngụ, wệ yị vẹ ịnị ụmẹ ọnị ụ jị. Anihwirisiti ẹnị aa waraa gụ Imikimasi.

¹² Di mi ve ro o ka Anihwirisiti nịnị ẹ nyayịnẹ kụ ịrẹkụ vẹ tù mi Igirigari ịzẹnị. Ệ yị nyị ịsị mị mẹ ka ma sị mẹ ka Ẹnẹyịmavara ọ̀ daba kana eyi amị. Ịsị ẹ vị angwahi ana sị mị na mẹ̀ ịsọvọ anaā rịịra ọ vị ọnọọ nị.”

¹³ Dị Ịsamụwẹrị kà yị Ịsọọrụ ka, “Wáá yẹ ka ebira ụra ụ mẹ̀ aanị nị? We yi si eyi pè ọda ọnị Ẹnẹyịmavara ana vị Ohomorihi awụ mẹ wụ. Wàa yaanị sị eyi pè ọda anị, ẹwụrị ịpa awụ ọ yaanị aa rị Ohinọyị Anisirẹrị pooro nị.

¹⁴ Ama ẹ yị vị ẹwụ ọ kụkụ vaa rị ohinọyị Anisirẹrị pooro nị. Ụ wẹ̀ yị mẹ̀ zẹẹ ka wa sị eyi pe ọda Ẹnẹyịmavara, o reè sì ọza ẹnẹsa ana vaa mẹ ẹngụ ịsa oni o sì. Ọza ọnọọ Ẹnẹyịmavara kụkụ nyị ka ọ̀ vị ọdọvịdị aza anị nị.”

Ahịmị isoja Anisirẹrị

¹⁵ Dị Ịsamụwẹrị hụrẹ Igirigari dị ọ va hịrẹ aa nọ Igibiya ịnị ẹtẹ Ịbẹnjamịnị nị. Dị Ịsọọrụ za aza ana vọ ana yà pè e ịrịka nị. Ẹnịnị vị ẹhụụ akata avọọ.

^16-17 Ịsọọrụ ọnịrị Ijonatani ozi anị ne beri aza ana yà pè e vi ene hi Igibiya ịnị ẹtẹ Ịbẹnjamịnị. Dị Anihwirisiti nịnị ẹnị kụ́ udi tụ́ Imikimasi nị, Di isoja Anihwirisiti gà hi oze ẹẹta, dị ẹ yaa ngụ ọ zị dị ẹ yaa dọ aza ẹnya nị. Oze ọnya vị ana zị oze Opira ọgụrị Isuwari,

¹⁸ dị oze ọsa ẹnị zi oze Ịbẹtị-Ihoroni nị. Oze ọhụta vị ana zi oze ụtọ ẹtẹ ana maanị và eyi kà ini ozi Izeboyimi ana và eyi ka ụnọmị.

¹⁹ Ịnị ụmẹ ọnọọ ẹ yị nyị anịngẹrẹ ikonya ịnị avaba ẹtẹ Isirẹrị. Anihwirisiti nịnị ẹ yị zẹẹ ka ẹ̀ nyị. Ẹ ka Anihiburu ẹ̀ẹ nyị anịngẹrẹ, e ve tù ụhwọ ọnịrị ọha yị wa.

²⁰ Dị ahịka vị avaba Anisirẹrị nịnị aa nọ ịda Anihwirisiti di è ne ne ẹdụ ẹnịnị ọnịrị ọdụba ẹnịnị ne beri ịraga ọnịrị ọ̀kụ́ ẹnịnị.

²¹ Ọpa ẹkẹhị ene ee sii ne ịsa ẹnẹẹ yị. Ọza òo ne ẹdụ àà vị ọdụba di o si ẹkẹhị enyusẹ oweyi ọnya aanị. Ọza èe ne ịraga ọnịrị osi ne beri enyusẹ ọkẹẹkẹrẹ imaaru, di o si ẹkẹhị enyusẹ ẹẹta.

²² Ịhị o si tù ka à kụ̀ ịrẹkụ, avaba isoja ana yà pe Ịsọọrụ ọnịrị Ijonatani ẹ yị nyị ụhwọọ àa vị ọha. Ịsọọrụ ọnịrị Ijonatani oze anị kẹnẹ ẹ nyị ụhwọ ọnịrị ọha nị.

²³ Á nyị isoja Anihwirisiti ẹnyị ana zi oze ịnị ataba Imikimasi na para hu.