1 Ịsamụwẹrị 11 - IWE ỌNỊNỊ

Ịsọọrụ ọ na dọ Anijabesi tụ́

¹ Â nyị ọnọrụ ọnya aanị ana aā hị́ Inahasi. Anẹkụra Amọnị ọ vị nị. Ẹkụhị ọnya dị ọ kụ́ ịrẹkụ ne tù Anijabesi Anigiriyadi nị. Dị avaba anọrụ Anijabesi dá ịpẹ yọ dị ẹ ka, “Aarịhịnị wàa dọ ka we yi vee pè yịị kụ̀ ịrẹkụ, yâ dọ ka wa vị ohinọyị ayị”.

² Di Inahasi Anamọrị ọnọọ tụ́ ohi dị ọ ka, “Ịsa ọnya kẹnẹ ụ zụ mẹ̀ nịnị dị asị mi pè wu nịnị kụ̀ ịrẹkụ nị. Jẹẹ ma tụ̀ eyi ụvọrị awụ nịnị, dị ma sị mẹ̀ ụhị nyị Anisirẹrị.”

³ Dị ọdọvịdị Anijabesi tụ́ Inahasi ohi ka ọ̀ sị ẹkụhị ịhịmba yị ẹnị, dị ẹnị ẹ sị kà enube anị ịnị avaba ẹtẹ Isirẹrị. Ẹ kà ẹ yị nyị ọza ana zụ dọ ẹnị tụ́, dị ẹnị hụrẹ ẹngụ ẹnịnị ụvọ yị Inahasi.

⁴ Ịjị ọnụtụ ana a tụ́ va ngụ Igibiya Ịsọọrụ, dị ẹ maanị kà ịrẹyị ọnọọ yị aza ẹnẹẹ, dị avaba ẹnịnị ee nowu nyamaa kẹnẹ nị.

⁵ Ẹ mẹ̀ vavọọ a tịị tụ́ orere booboro, di e vene re ka Ịsọọrụ ọnị ộ và ịsụpa anị hi ọvịdị hụụnị aarẹ aa vẹ nị. Dị Ịsọọrụ kà, “Aza ẹnẹnị mè rẹ? Sị ẹ vẹ dị ẹ maanị ee sú ùnè?” Dị aza ẹnẹẹ rẹ kà a yọ ịrẹyị anị Anijabesi va kà nị.

⁶ Ịjị Ịsọọrụ maanị wụ́ ịrẹyị ẹnẹẹ, dị Ụhwẹ Ohomorihi sị ụkata yọ, dị ayị nyayịnẹ kụ́ ọ ẹtẹẹtẹrẹ nị.

⁷ Dị Ịsọọrụ sị imaaru ẹẹva, dị ọ wụ̀ ọ dị ọ vọ ọ chẹkẹ-chẹkẹ, dị ọ kà ọnụtụ nịnị ẹ kụ ọ ngụ avaba ẹtẹ Isirẹrị zịịzị nị. Ọ kà, “Ọza tụra ọza ẹnẹ ẹ̀ yị saasa Ịsamụwẹrị ọnịrị Ịsọọrụ nọ ịrẹkụ vị ana vaa sẹ̀ chẹkẹ-chẹkẹ anka uye imaaru ẹnịnị. Ẹnẹyịmavara ộ mẹ̀ ka aza ẹnẹẹ è hí angwa, dị avaba ẹnịnị dudu jịnẹ hi ẹhẹ nị.”

⁸ Ịsọọrụ mẹ̀ wara aza ẹnẹẹ gụ ịzị aā hị́ Ibezeki, anọrụ Anisirẹrị ene hi ịzọọ vị ẹnị akawụ-akawụ oze ẹchẹhị tụra ẹvarẹwụ (300,000), dị Anijuda ẹnị vị akawụ-akawụ oze ẹwụrẹhị nị (30,000).

⁹ Dị aza ẹnẹẹ kà a yị ọnụtụ a na tụ́ hụrẹ Ijabesi vẹ, dị ẹ ka ẹ̀ kà a yị Anijabesi Anigiriyadi ka à nee tù ụmẹ ọọdụ ụhwọọ, a vaa dọ waa tụ́. Ịjị ọnụtụ ẹnẹẹ maanị na kà a yị Anijabesi Anigiriyadi, dị ẹ yaa jẹ kẹnẹ nị.

¹⁰ Ịzẹyịza dị ọnụtụ ẹnẹẹ na, dị ẹ na kà a yị Anamọrị dị ẹ ka, “Ị vaa sị ẹngụ ayịị va wụ nịnị ụhwọ, dị wa mẹ yị ọ̀ọ mẹ̀ zee wu eyi nịnị.”

¹¹ Ẹnẹnẹ viri-viri eyinẹhẹ anị, dị Ịsọọrụ kụ́ aza anị dị ọ ga wa hi oze ẹẹta nị. Dị ẹnịnị zwe na ngụ ịzị Anamọrị hi, dị ẹ wụ Anamọrị pooro dị ụmẹ ọọdụ tù nị. Anamọrị ana vọ vị ana a gara zizi; kụkụ nyị aza ẹnịnị ana vọ gụ ẹẹva tụ́ aha ọnya.

A varẹma sị ahụ Ịsọọrụ hị́ ẹtẹ anka ohinọyị

¹² Dị Anisirẹrị kà a yị Ịsamụwẹrị dị ẹ ka ene ee họ̀ use ịhyọọ ka aanị ka Ịsọọrụ aa vaa vị ohinọyị ayị nị? Ẹ ka à kụ́ aza ẹnẹẹ vẹ ka ẹnị aa wụ̀ wa.

¹³ Dị Ịsọọrụ ka asị a nyị ọza ana a wụ̀ ajịnị, agụvị ka ajịnị Ẹnẹyịmavara dọ Anisirẹrị tụ́ nị.

¹⁴ Dị Ịsamụwẹrị va hị́ Anisirẹrị dị ọ ka ẹ̀ vẹ ẹnị ẹ̀ nọ Igirigari dị ẹnị ẹ̀ na sị ahụ ohinọyị tenyi hi ẹtẹ.

¹⁵ Ịzẹyịza dị avaba aza ẹnẹẹ nọ Igirigari dị ẹ na yà eyi Ẹnẹyịmavara, dị e tenyi ahụ Ịsọọrụ si hi ẹtẹ ka ọnị ọ vị ohinọyị nị. Dị ẹnịnị yà ịzọọ dị ẹ mẹ̀ ịsọvọ yị Ẹnẹyịmavara kà avaba aza ẹ̀ nyị ẹngwọọrọ nị. Dị Ịsọọrụ ọnịrị Anisirẹrị nịnị nyayịnẹ rị eche ịrẹyị ọnọọ nị.