1 Ịjọọnụ 3 - IWE ỌNỊNỊ

Ẹnẹ vị ezi Ohomorihi?

¹ A! Wee re! Ohomorihi ộ da sì ịrẹyị ayị kẹnẹ ne tù ka aa hị́ yị ezi Anị. Ịzẹyịza ezi Ohomorihi ị vị nị. Anẹhẹ ẹ́ yị yẹ ka ezi Ohomorihi ị vị nị, agụvị ka ẹnịnị ẹ́ yị yẹ Ohomorihi Ada ayị.

² Ẹwụ nịnị ẹyịnyara amị oni mi sì, booro aanị ya sị vị ezi Ohomorihi; ama yẹẹ̀ yị yẹ ị mẹ vaa yà. Yáa yẹ ka ịhị Ikirisiti ọ̀ọ vavẹ, ị vaa yà anka ọnị mẹ rẹ yà, agụvị ka i vee re gedebee anka ọ mẹ yà.

³ Avaba aza ana nyị ẹngụ ọyịtureyi ọnọnị, aa mẹ̀ ebira ọnịnị anka Ikirisiti mẹ̀ rẹ nị nị.

⁴ Ọza ana àaā mẹ ịvị, vị aa jịnẹ ọda Ohomorihi avọọ nị; agụvị ka ịvị ọ vị ka ọza ọ̀ jịnẹ ọda Ohomorihi nị.

⁵ Wáa yẹ nịnị ka Ijeesu Ikirisiti vị ana vẹ ẹhẹ, agụvị dị ọ̀ va dị yị hụụnị ịvị. Wáa yẹ nịnị ka ọnị ẹ yị nyị ịvị vụrụ-vụrụ.

⁶ Ọza ọnị ọnịrị Ikirisiti ọ̀ọ sị vabẹ, ọ yị mā kụkụ mẹ ịvị. Ọza ana àaā yịị mẹ ịvị, ọ̀ yị hyakụ yẹ ẹ vụrụ-vụrụ.

⁷ Ẹwụ nịnị ezi emi, asị ụ zẹẹ ka à nyị ọza ene vene wu nịnị! Ọza ana àaā mẹ ịzẹyịza, ọnịrẹyịzẹyịza ọ vị nị, anka Ikirisiti ọnị mẹ̀ rẹ vị ọnịrẹyịzẹyịza.

⁸ Ama ọza ana àa mẹ ịvị, ozi Echu ọ vị nị, agụvị ka Echu vị anaā mẹ ịvị dị a va yẹ ka aa mẹ ẹhẹ. Agụvị avọọ Ozi Ohomorihi vẹ ẹhẹ ka oni ò ve vú ụkọrọ Echu ẹtẹ nị.

⁹ Ọza àa vị ozi Ohomorihi, ọ yị mā kụkụ mẹ ịvị, agụvị ka ebira Ohomorihi yà ịnị ayị anị. Ẹ yị nyẹngụ aa mẹ ịvị agụvị ka Ohomorihi ọ vị Ada anị nị.

¹⁰ Ịsị ẹẹ̄ sị ọza ana vị ozi Ohomorihi ọnịrị ọza ana vị ozi Echuu zụ̀ yị: Ọza ẹnẹ ẹ̀ yị mẹ ịzẹyịza ọnịrị ọza ene è yi sì ịrẹyị ọnọhụva anị ẹ́ yị vị ozi Ohomorihi.

Ohomorihi kà yee sì ịrẹyị ẹngụ

¹¹ Enube ọnị ụ vịdị sị wụ́ nịnị hụrị ụmọrụmọ yị: ka ye sì ịrẹyị ẹngụ.

¹² Asị ị mẹ̀ ebira anka ọza ana aā hị́ Ikeeni. Ikeeni vị ozi Echu, dị ọ za ọyịnyara anị dị ọ wụ̀ ọ nị. Sị ẹ vẹ dị ọ wụ̀ ọ? Agụvị ka avaba ịsa ọnị Ikeeni aa mẹ, vị ịsa edivi; ama ọyịnyara anị vị anaā mẹ ịzẹyịza.

¹³ Ẹwụ nịnị anda ayị, anẹhẹ àaa nyị ịhyẹrẹ awụ nịnị, asị o hí wu nịnị irenu!

¹⁴ Àa vị ẹyị yọ, yáa yẹ ka ya sị jịnẹ hụụnị isu va ngụ ịnị ọyịyara obooro. Ịsị ẹ sị zụ̀ ọ vị ka yée sì ịrẹyị ọdọwụ nịnị. Ọza ene è yi sì ịrẹyị ọdọwụ, ẹẹ̀ yị há hụrị isu ụvọ.

¹⁵ Ọza ana àa kụ ayị ọdọwụ, ọwọza ọ vị nị. Wáa yẹ nịnị ka ọwọza ẹ́ yị zụ yara ịdị Ohomorihi pooro zịna-zịna.

¹⁶ Aanị ị mẹmẹ zụ yẹ ịsị aā hị́ ka ọza óo sì ịrẹyị ọza nị: Ikirisiti ọ́ọ hụrẹ ụhwẹ anị ụvọ agụvị ayị. Áa vọrọ ka ẹ yà rẹ hụrẹ ụhwẹ ayịị ụvọ agụvị ọdọwụ nịnị.

¹⁷ À kà a ka ọza ọ́ọ nyị ịsa rị ụvọ, dị o re ọdọwụ ọsa mee re osiye, ama dị ọ sị ụvọ anị kwoku yọ nị, ọza ọnọọ ọ́ọ́ zụ kà a ka oni o sì ịrẹyị Ohomorihi?

¹⁸ Ẹwụ nịnị ezi emi, asị sị irenu kẹnẹ sì ịrẹyị ẹngụ, à vẹ yaa mẹ̀ ịsa ana sị zụ ka ịzẹyịza yee sì ịrẹyị ẹngụ!

Ayọnẹtẹ ọvịdị Ohomorihi.

¹⁹ Ịsị zụ sị yẹ ka ya vị ọnịzẹyịza ọ vị ọnọọ nị, dị ị rẹ nyị ayọnẹtẹ ọvịdị Ohomorihi.

²⁰ Ayị ayị ọ̀ọ yị jị ịvị yị, Ohomorihi o huna ayị ayị nị, ọ́ọ rẹ yẹ avaba ịsa.

²¹ Ẹwụ nịnị anda ayị, ayị ayị ọ̀ọ yị jị ịvị yị, ịjọnọọ ị vaa nyị ọtụtụrụma ọ́vịdị Ohomorihi.

²² Ịsị yèe họ̀ use hụụnị ụvọ anị, ọ raa sịị yị, agụvị ka yaa saasa ọda anị; ị raa mẹ̀ ịsa ene zée eyi.

²³ Ọda ọnị ọ́ mẹ yị yị: ka ya sị ayị tụra Ijeesu Ikirisiti Ozi anị, di ye re sì ịrẹyị ẹngụ. Ọda anị ọ vị ọnọọ nị.

²⁴ Ọza ana àa saasa ọda Ohomorihi, ọnịrị Ohomorihi ọ sị vị ọnya, Ohomorihi ọnịrị ọza ọnọọ ọ sị vabẹ. Ịsị ẹ sị zụ̀ yị gedebee ka ẹyịrị ọ vị ọnya yị: agụvị Ụhwẹ Ọnịnị anị ọnị ọ sị yị.