1 Anịkọrịntị 9 - IWE ỌNỊNỊ

Ịrẹyị ezirẹma Ijeesu nịnị

¹ Ẹ yị nyị ịsị ẹ za mị ka asị mị mẹ̀ ịsa ene zé mi eyi. Ụ wáá ka wẹ yị yẹ nịnị ka ezirẹma Ijeesu mị vị nị? Mâ sị eyi amị ọnọnị re Ijeesu Ananyị yị. Ẹwụ nịnị ụvọta vị ụkọrọ ụvọ amị ọnị maa mẹẹ yị Ananyị yị.

² Aza ana vọ ẹ̀ẹ daka ka ẹnị ẹ yị dọ ka ezirẹma Ijeesu mị vị nị, mâ yẹ kaakara ka ẹwụ nịnị ộ dọ ka ezirẹma Ijeesu mị vị nị. Ẹma sị wụ nịnị vẹ ịdị Ananyị yị, dị ẹwụrị ọọ va vị ọnya nịnị nị. Ọnọọ ộ sị zụ̀ ka ezirẹma Ijeesu mị vị nị.

³ Yị aza ana aa jị ịvịị mị, ohi ọnị mị sị yị wa ọ vị ọnọnị nị:

⁴ Yaa mẹ̀ ụkọrọ, u wéé ro ka ẹ yị vọrọ ka yaa kà a ka wa sị ịsọyịrị yị nịnị nị?

⁵ Ẹ yị nyị ịsa ana za mị ka asị mị nyị ọnẹẹ ana dọ wụ́, dị ọ̀ọ saasa mịị zị. Avọọ Ézirẹma Ijeesu ana vọ ọnịrị ẹyịnyara Ananyị yị beri Ipita mẹ̀ mẹ nị.

⁶ Ịnị avaba Ézirẹma Ijeesu, ẹmịrị Ịbanabasị kẹnẹ ọ́ọ́ vọrọ ka ọ̀ọ mẹ̀ ụkọrọ ọnị yaa rị nị?

⁷ Áá nyị isoja eneē sí ẹngụ anị ụta? Wéé re ọkụrịkụ ẹnẹ ẹ̀ yị mā rị ịsa ịnị aarẹ anị da? Ẹ yị rẹ nyị ọza anaā pá ịsụpa ẹnẹ ẹ̀ yị mā rị ịsị ẹ hụụnị anị vẹ.

⁸ Ịrẹyị ọnị mị kà avọọ, ayị vị ariro ọza kẹnẹ m maa kà. Ọda oni Ohomorihi mẹ, ọ rẹ vavọọ kà bẹẹ.

⁹ Áa chẹrẹ ẹ tụ́ ịnị ọda oni Ohomorihi sị yị Imosiisi ka, “Imaaru ana aa sịị mẹ̀ ụkọrọ ịnị aarẹ, ayị vọrọ ka à sụ́ ọọ irenu.” U wéé ro ka ịrẹyị imaaru kẹnẹ Óhomorihi aa kà nị?

¹⁰ Vụrụ-vụrụ, agụvị ayị ọ vavọọ sị kà a nị. Ụvọ ayị a vavọọ chẹrẹ ẹ nị. Yâ vavọọ yẹ, agụvị ka ọza ana dà aarẹ, di o chire ịsa tụ́ ọọ aa tụra eyi ka ọnị vee re ọgụ ịnị anị. Ọza ana raa mẹ̀ ịsa ịnị aarẹ, ọnị vị ana rẹẹ̄ tụra eyi ka áa nyị ịsị ọnị rẹ vaa dọ.

¹¹ Ya raà kà ịrẹyị Ohomorihi yị wụ nịnị. Aanịka ọ yị yaanị vọrọ ka ịsị ụ wàa nyị nịnị, ẹyịrị ẹwụ nịnị ò dudu gà a?

¹² Wâ dọ nịnị ka ịsị ụ wàa nyị, ẹwụrị aza ana vọ ẹ̀ gà a nịnị. Ẹyị a vana vọrọ ka wa vịdị gà ịsị ụ wàa nyị tù nịnị nị. Ịsa ẹnẹẹ ệ vọrọ tụra yị, ama yẹ yị va kà ka wa sị yị nịnị. Ama yâ sị ẹngụ dọ avaba ịsa, agụvị ka ye yi sì ka ịsọnyị-ịsọnyị ọ̀ dọ enube ọyịza Ikirisiti oze.

¹³ Ụ wáá ka wẹ yị yẹ ka ọza ana aa mẹ̀ ụkọrọ ini irehi Ohomorihi vị anaā rị ịnị ịsa ana àa sị vẹ ini irehi Ohomorihi nị? Wa rẹ yẹ nịnị ka aza ana a nyị ka ẹ̀ẹ sị ịsa ịsọvọọ mẹ ịsọvọọ yị Ohomorihi vị ana rẹẹ̄ rị ịnị ịsa ịsọvọ ẹnẹẹ.

¹⁴ Avọọ gẹdẹ-gẹdẹ ọ mẹ̀ rẹ vị yị aza anaā kà enube ọyịza nị. Ananyị yị ộ mẹ̀ ẹ ọda ka ẹnịnị ẹ̀ẹ rị ịnị ịsa ana hụụnị enube ọyịza vẹ.

¹⁵ Mị yaanị re oze họ̀ use ịsa ẹnẹnị, ama me yi sì ka me họ̀ use anị. Ẹ yị rẹ vị agụvị mee re ịsaa dọ, mị sị sị aa chẹrẹ iwe ọnọnị. Ọ̀ọ sị kà ọnị ọza va naa dọ mị ịsị maa sịị mẹ ụbanyị, mèe vene sú, ộ dahi.

¹⁶ Ịzẹyịza, maa kà enube ọyịza, ama ẹ yị nyị ịsị mị zụ sị mẹ eyi ịnị anị, agụvị ka me yi zụ yi ka mẹ yị mẹ̀ ẹ. Àa vị ka mẹ yị kà enube ọyịza, ma sị dà!

¹⁷ Àa vị ẹmị kẹnẹ ọ sị ayị amị sị ọọ ka maa mẹ̀ ẹ nị, mị yaanị ee họ̀ use ka èe sí mi ụta. Ama ẹ yị va vị ẹmị kẹnẹ ọ nyị ụkọrọ ọnọọ yị ẹngụ amị. Ohomorihi ọ mẹ ọda ụkọrọ ọnọọ, dị ọ sị ọọ chire mi ụvọ nị.

¹⁸ Sị ẹ va vị ọgụ ẹmị? Ọgụ amị ọ vị ka: Maa kà enube ọyịza, ama mẹ yị kà a ka ọza ọ̀ sị ịsọnyị-ịsọnyịị mị. Mẹ yị kà ka maa dọ ịsị ọza anaā kà enube ọyịzaā dọ.

¹⁹ Ẹ yị nyị ọza ana nyị ọda amị; ama mâ sị ẹngụ amị vị ozi ahụ avaba aza, agụvị ma zụ mẹ ka aza ọrụrụ-ọrụrụ ẹ̀ va dọ Ijeesu Ikirisiti wụ́.

²⁰ Màa yà ịdị Aniju, dị maa mẹ̀ ebira Aniju, agụvị ma zụ mẹ ka ẹ̀ va dọ Ijeesu Ohinọyị oni Ohomorihi nyị ka ọ̀ dọ yị há wụ́. Mèe tù ịdị aza ana aa mẹ ẹhẹ ẹnịnị anka ọda Imosiisi, dị ẹmị raa mẹ anka ẹnịnị, agụvị dị ma zụ mẹ ka ẹ̀ va dọ Ijeesu Ohinọyị oni Ohomorihi nyị ka ọ̀ dọ yị há wụ́. Ama ẹmị ẹyị kụkụ daka yà ịnị ụvọ ọda kẹnẹ.

²¹ Mèe tù ịdị aza ẹnẹ ẹ̀ yị mā mẹ ẹhẹ ẹnịnị anka ọda Imosiisi, dị mị raà mẹ ebiraa véné wa, agụvị dị ma rẹ zụ mẹ ka ẹ̀ dọ Ijeesu Ohinọyị oni Ohomorihi nyị ka ọ̀ dọ yị há wụ́. Ẹ yị vị ka mị sị eyi wụ ọda Ohomorihi nị, ama ịnị ụvọ ọda Ijeesu Ohinọyị oni Ohomorihi nyị ka ọ̀ dọ yị há mị kụkụ yà nị.

²² Mèe re tù ịdị aza ẹnẹ ẹdọwụ ẹnịnị ẹ̀ yị vavọọ katẹngụ, dị mị sị ẹngụ amị tụ́ udi ẹnịnị, agụvị ma zụ mẹ ka ẹ̀ dọ Ijeesu Ohinọyị oni Ohomorihi nyị ka ọ̀ dọ yị há wụ́ hu avọọ. Udi tụra udi oni mèe ne tù ọza, dị mị rẹ sị ẹngụ amị tụ́ udi ọnọọ. Mị vavọọ aa mẹ ịsị màa zụ mẹ, ka ịsavọọ ma zụ mẹ ka à dọ aza ẹnyị há.

²³ Avaba ịsa ẹnẹẹ vị ọnị maa mẹ̀ agụvị enube ọyịza, dị ma zụ nyị tụ́ ịnị ịsa ọyịza ene enube ọyịzaā sịị yị ọza.

²⁴ Wâ yẹ nịnị ka àa ka è ne zwe echi, ọzọza vee zwe, ama ọza ịnyara ọ vaa yịị sị ịsa ọdọvịdị nị. Waa vavọọ sị avaba ụkata awụ nịnị zwe echi, agụvị wa dọ ịsa ọnịpaapa nịnị.

²⁵ Avaba aza eneē zwe echi vị eneē tenyi ẹngụ ẹnịnị ẹtẹẹtẹrẹ ini oze tụra oze. Ẹnịnị vavọọ aa mẹ ka ẹnị ẹ̀ zụ dọ ịsa ọnịpaapa, ana hi ka o vee du. Ama ịsị ẹyị vaa dọ, o mē du.

²⁶ Ẹ yị vị mee zwe echi huuru kẹnẹ; ịzị echi amị vaa taa tụ́, mị sị ịrẹsụ kà nị. Mẹ yị kụ̀ ọsẹ hi ịnị ahị osusu kẹnẹ.

²⁷ Maa sị ẹngụ amịị dọ avaba ụya, maa sị ụvọọ za ẹngụ amị, agụvị asị ọ na sị vị ka ẹmị ana aa kà enube ọyịzaa yị ọza, áamị ọ̀ sị vị osusu.