1 Anịkọrịntị 6 - IWE ỌNỊNỊ

Ẹ yị vọrọ ka ọdọwụ nịnị ẹ̀ẹ hị́ ẹngụụ ịrẹka

¹ Àa nyị ọza awụ nịnị ọnị ọnịrị ọdọwụ ọsa nyị ịrẹyị, ọ́ọ́ vọrọ ka ọ̀ sị ọ nọ ikootu ịdị aza ẹnẹ ẹ̀ yị vị Anikirisiti? Sị ẹ vẹ dị ẹ̀ẹ ma kụ́ ẹngụ ẹnịnị nọ ịdị aza Ohomorihi?

² Aanị ka wẹ yị vana yẹ nịnị ka aza Ohomorihi ẹ vaa mẹ̀ ọkarẹyị anẹhẹ nị? Ẹwụ nịnị ana vaa mẹ̀ ọkarẹyị anẹhẹ, wẹ́ yị va zụ mẹ̀ ọkarẹyị ịrẹyị eweyi-eweyi nịnị kẹnẹẹ?

³ Mee ro ka wẹ́ yị vana yẹ nịnị ka ẹyaa vaa mẹ̀ ọkarẹyị anggẹẹrị nịnị nị? Sị ẹ kụkụ va yà ịnị ịsa ẹhẹ ọnọnị ọnị yẹ̀ yị zụ mẹ̀ ọkarẹyị anị?

⁴ Agụvị avọọ, wàa vavọọ re ịrẹyị nịnị, asị ụ zẹẹ ka ahịka aza ẹnẹ ẹ̀ yị nyị ịsị ẹ zụ kà tụ́ ịnị ịrẹyị ịragụ Ohomorihi, ọ̀ mẹ ọkarẹyị anị yị wụ nịnị nị.

⁵ Ho! Ụhị ọ mā nyị wụ nịnịị? Ẹ yị daba nyị ọyẹrẹyị ọnya ịnị ẹngụ awụ nịnị ana zụ mẹ̀ ọkarẹyị yị ọdọwụ ẹẹva?

⁶ Ọdọwụ aa sị ọdọwụ ọsaa nọ ikootu, dị aza ẹnẹ ẹ̀ yị dọ wụ aa mẹ̀ ọkarẹyị yị wa.

⁷ Ẹngụ ọnị ụ waa kụ́ụ nọ ikootu nịnị, ọ́ọ sị zụ ka wa raà sị ahị jị ọchị nyee nịnị. Àa vị ọza o sì wu ịrẹyị dị ụ sị ẹngụ dọ ọ nị, ọ́ọ vana dahi. Wàa rẹ dọ ka ọza ọ̀ mẹ wụ rị, ọ́ọ dahi.

⁸ Ama ẹwụ nịnị ụvọta ọ hyakụ ee sì ẹngụ ịrẹyị, dị ụ raa mẹ ẹngụụ rị nịnị ịnị ụmẹ ana ahịka ọdọwụ ụ vị nịnị nị.

⁹ Máa yẹ ka wáa yẹ nịnị kaakara ka ọza ẹnẹ ẹ̀ yị nyị ịzẹyịza, ọ yị vaa ngụ ịzị Ohomorihi yà aa mẹ ịjọva. Asị ụ vene ẹngụ awụ nịnị oo! Ọmụnọ nịnị ọnịrị aza ana aa hẹkẹ ori, beri ọsẹrẹka nịnị ọnịrị ọnọrụ nịnị anaā nọ ịdị ọnọrụ ọsa anka ọnẹẹ avọọ,

¹⁰ beri oyi nịnị ọnịrị eneyọhụrẹ beri ohweche ahaahara nịnị ọnịrị aza eneē du ọza ịrẹsụ beri aza anaā sịị ụkataa dọ ọza ịsa, ẹ yị vaa ngụ ịzị Ohomorihi yà aa mẹ ịjọva.

¹¹ Ẹngụ ebira ẹnẹẹ aza ẹnyị awụ nịnịị̄ vịdịị mẹ nị. Ama Ohomorihi ọ sị ịvị awụ nịnị nyịna kwooze, ọ sị wụ nịnị nyị ka wa vị aza ọnịnị anị. Ini oze ịrẹha Ijeesu Ikirisiti Ananyị yị ọnịrị Ụhwẹ Ọnịnị, ọ raà jị ịhị yị wụ nịnị.

Waa sị ẹngụ awụ nịnịị sị ụbanyịị yị Ohomorihi

¹² Ẹ yị nyị ịsị ẹ za mị ka asị mị mẹ ịsị e zé mi eyi, ama ẹ yị vị avaba ịsa ọ zụ mẹ ọgụvọ yị mị. Ẹ yị nyị ịsị ẹ za mị ka asị mị mẹ ịsị e zé mi eyi, ama me yi sì ka à nyị ịsị e za mị ọrịhị.

¹³ Aza ẹnyị ẹ zụ aa kà a ka: Áa mẹ̀ ịsọyịrị yị izinẹ, dị a rẹ mẹ izinẹ yị ịsọyịrị nị. Ịzẹyịza ọnọọ vị nị Ama Ohomorihi vaa mẹ ka ịsọyịrị ọnịrị izinẹ ẹ̀ ta. Ohomorihi ọ yị mẹ ọchẹngụ ọza yị ọza ka ọ̀ sịị sẹ̀ ịrẹkaa zị. Ama Ohomorihi vị ana mẹ ẹngụ ọza yị ọza ka ọ sịị hẹkẹ ọnị, dị Ananyị yị ọnị raa tẹsị ẹngụ ọza nị.

¹⁴ Ohomorihi ọ raà ha Ananyị yị kwẹẹtẹ hụụnị isu, avọọ ọ mẹ rẹ vaa sị ụkata anịị ha ẹyịị kwẹẹtẹ hụụnị isu nị.

¹⁵ Wáá yẹ ka ẹngụ ẹwụ nịnị rẹ vị ọchẹngụ Ikirisiti? Máá zụ sị ọchẹngụ Ikirisiti dị ma rẹ na vàa hura ọchẹngụ ọsẹrẹka? Asị Ohomorihi zẹẹ!

¹⁶ Mee ro ka wẹ yị yẹ nịnị ka ọza ọnị ọnịrị ọsẹrẹka ọ̀ọ sị và hura ka ọnịrị ọ kụkụ vị ọnya? Agụvị ka áa chẹrẹ tụ́ ini Iwe Ohomorihi ka: Ẹnị ẹyịva vaa vara ẹngụ ọnya.

¹⁷ Ama ọza ọnị ọnịrị Ananyị yị ọ̀ọ sị vabẹ, ayị ọnya ẹ kụkụ nyị avọọ nị.

¹⁸ Hụụnị ịrẹkọyịsẹ nịnị! Avaba ịvị ana vọ ọnị ọzaā mẹ, o mē si du ẹngụ anị ẹngụ. Ama ọza ana sẹ̀ ịrẹka, vị ana mẹ ịvị ọnọọ hi ẹngụ anị ụvọta.

¹⁹ Aanị ka wẹ yị yẹ nịnị ka ẹngụ awụ nịnị ọ vị irehi Ohomorihi ịzị Ụhwẹ Ọnịnị yà nị? Ụhwẹ Ọnịnị ọnọọ vị ana ra ịnịnẹ awụ nịnị; ịdị Ohomorihi ọ hụrẹ vẹ nị. Ẹ yị vị ẹwụ nịnị ọ nyị ẹngụ awụ.

²⁰ Ohomorihi ọ sị wụ nịnịị hị́, ọ sị ụta sí; agụvị avọọ wa kụkụụ sị ẹngụ awụ nịnịị sị ụbanyịị yị Ohomorihi.