ᒫᑯᓯᐅᑉ ᐊᒡᓚᖏᑦ 12 - Aglait Ijjurnaittut

Uainiliksamik Piruqsiivingmik Kamajit Ajjiutitauningit

¹ Jiisusiup ajuriqtuqpait ajjiujutigut, uqarluni: “Taissumani angutitaqalauqpuq piruqsiivingmini piruqsiaksanik kanngaqsuijumik, itiqsaliurluni uainit itsijaqtauviksanganik, tavvani igluliuqpuq puqtujumik qaujisarviksamik, piruqsiivik atuqtautippaa kamajiuniaqtunut, pijariirami nunaup asianut aullaqpuq.

² Piruqtunik uainiksanik katiqsivik nalliutingmat, pijiminik tilisivuq piruqsiivingmik kamajiutitaminut, taanna aiksiqullugu piruqtuvinit ilanginnik pititaujumalluni.

³ Piruqsiivilirijut taanna tiguvaat aanniqsirlugulu, utiqtippaat sunamigluunniit naksaqtinnagu.

⁴ Piruqsiivingmigli piqutilik tilisikkanniqpuq pijiminik, taakkua piruqsiivilirijut aanniqpaat niaquagut, mitautigillugu aullaqtippaat.

⁵ Piruqsiiviqutilik tilisikkanniqpuq pijimik asianik, piruqsiivilirijut taanna tuquppaat; asingillu amisut taimailiuqattaqpait, ilangit aanniqsirlugit ilangillu tuqullugit.

⁶ Piruqsiiviqutilik tilijaksatuaqaliqpuq irnirminik nagligimmariktaminik; kingulliqpautillugulu irnini tiligivaa taakkununga, uqarluni, ‘Irnira iliraginiaqpaat.’

⁷ Piruqsiivilirijut immingnut uqaqatigiiliqput, ‘Taanna tavva kingurngujjijuksaq; atii, tuqulaurlavut, taassuma kingurngutijaksangit pitaariniarattigut.’

⁸ Tavva tiguvaat tuqullugu, timinga igippaat piruqsiiviup silataanut.

⁹ “Qanurli tavva piruqsiiviqutilik pilaaliqpa? Tikittumaaqpuq piruqsiivilirijit tuqutsaqturlugit, piruqsiivik asinginnut kamagijauqulirumaaqpaa.

¹⁰ Una uqalimaaqsimanngilasiuk Guutiup uqausinginni? ‘Ujarak igluliuqtinit narrugijaujuq, Taanna pillariuniqpaulluni tiriqquuliqpuq;

¹¹ Tamanna Ataniup pinialauqpaa, Saqqijaarninga uvattinnut takuminaqturjuuvuq!’”

¹² Taakkua Jiisusi tigujumagaluaqpaat, inugasagjuanigli kappiasukput, malugusuliramik tamatumunga ajjiujumut uqausiunirmingnik; taimaimmat qimakpait asianualirlutik.

Apiqqusiq Taaksiijariaqarmangaarmik

¹³ Paarisit ilangit Iruutasiullu maliktingita ilangit Jiisusimuaqujauvut, apiqsurlugu naluliqtinnasuarumallugu.

¹⁴ Taakkua Jiisusimuaramik uqaqput, “Ajuriqtuiji qaujimagatta sulijumik uqaqattaravit, inuit isumangit sivuuraginagit sulitsiaqtumik uqaqpakkavit; inuit qanuittuuninginnik kamaginnginnavigit, ajuriqtuqattaravigit sulijumik Guutiup piniaqtauqujanginnik. Uqautilauqtigut, piqujattinnut akiraqtuqpaat, taaksiijarutinik tunisiqattarutta Siisarimut uvvalu tunisiqattariaqanngilagut?”

¹⁵ Jiisusiup pingitsiqsurasuarningit qaujimagamigit uqautivait, “Sungmat uvannik uukturasuaqpisi? Kiinaujaq qaitaulaurli, takulaurlagu.”

¹⁶ Kiinaujamik tunisivigivaat. Jiisusiup apirivait, “Kinaup kiinannguanga, kialu atinga?” Taakkua kiuvaat, “Angajuqqaarjuap Siisariup.”

¹⁷ Tavva Jiisusiup uqautivait, “Angajuqqaarjuaq Siisari tunisivigisiuk, pinginnik, Guutilu tunisivigilugu pinginnik.” Taakkua Jiisusiup kiujjutinganik kamavigjuaqput.

Tuqungajunit Makinniugajaqtumik Apiqsuutit

¹⁸ Kinguningagut Saajjusit upakpaat, taakkua inungnik tuqungajunit makivviksaqannginniraivaktut, Jiisusimuaqput apirillugu uqaqput,

¹⁹ “Ajuriqtuiji, Muusisiup piqujaqtaaqtilauqpaatigut, ‘Angut nulialik tuqukpat qiturngaqtaalaurani, tavva nukangata uiggarniq nuliaqtaarijaksarivaa taakkuak qiturngaqtaaqullugik, qiturngangit tuqulauqtumut qiturngarijauniraqtauqullugit.’

²⁰ Taissumani nukariiktaqalauqpuq angutinik 7-nik; angajuktliqpaaq nulianikpuq, qiturngaqtaalauranilu tuquvuq.

²¹ Tavva nukangata arnaq nuliaqtaarivaa, taannattauq tuqugivuq qiturngaqtaalaurani; nukangata pingajungat taimaatsainnaq pigivuq.

²² Taakkua nukariit 7 taassuminga arnamik nulianilauqput, tamarmik qiturngaqtaalauratik tuqulauqput. Kingulliqpaullunili arnaq tuqugivuq.

²³ Tuqungajut makippata makivviksaujumaaqtumi, nalliatta taanna arnaq nuliarilaaqpauk? Taakkua qatanngutigiit 7 tamarmik nuliarilaurmajjuk.”

²⁴ Jiisusiup uqautivait, “Imaak pijjutiqaqtlusi tammarassi, Guutiup uqausingit qaujimannginnassiuk ammalu Guutiup pijunnarninga qaujimanagu.

²⁵ Tuqungajulli makikkutik, nulianikpagumaanngilat uinikpanngillutiglu, aingilititut qilangmiittutitut taimaittumaaqput.

²⁶ Tuqungajut makititauninganik uqaqsimajunik aglangni atuaqsilauqsimanngilasii Muusisiup aglanginni uqausiqaqtunik uqpigarmik ikualajumik, tavvani unikkausirmi Guutiup Muusisi uqautilaurmagu, ‘Uvanga Aiprahaam Guutinga, Aisakiullu Guutinga, Jaikuullu Guutinga?’

²⁷ Guuti inuujunut Guutiuvuq, tuqungajulli Guutiginngilaat; taimaimmat tammaqsimallarikpusi.”

Piqujaq Pillariuniqpaujuq

²⁸ Piqujanik ilisaijit ilangat tamatuminga uqaqatigiiktillugit tusaavuq, takugami Jiisusiup Saajjusit kiutsiarmagit, taimaimmat Jiisusimuaqpuq apirillugu, “Nalliat piqujanit tamainnit sivulliqpaujariaqaqpa?”

²⁹ Jiisusiup kiuvaa, “Una tavva sivulliqpaujuq piqujanit, ‘Isarialimiungujusi tusarissi! Ataniq Guutivut, taanna Atanituuvuq.

³⁰ Ataniq Guutisi nagligijaksarivasi uummatissinnut tamainnut, tarnissinnullu tamainnut, isumassinnullu tamainnut, pijunnarnissinnullu tamainnut.’

³¹ Aippangalu imailivuq, ‘Inuuqatisi nagligijaksarivasi nangminiq nagliginiqtut.’ Asinginnik taakkunangat pillariuniqsanik piqujaqtaqanngilaq.”

³² Piqujanik ilisaiji Jiisusimut uqaqpuq, “Ajuriqtuiji, sulitsiaqputit; tamanna sulingmat suurlu uqaravit, Ataniq kisimi atausiungmat, taassuma asianik Guutitaqanngilaq, taannatuaq kisiani.

³³ Inuk Guutimik nagligusuktuksaungmat uummatiminut tamainnut, isumaminullu tamainnut, pijunnarnirminullu tamainnut, inuuqatiminiglu nagligusuktuksaulluni imminik nagliginirmitut, taakkuak pillariuniqsauvuuk tunirrutauqujaujunit uumajuvinirnik tunirrusirvimi, tunirrutauqujausimajunillu tamainnit.”

³⁴ Jiisusiup qaujigamiuk kiggusinga silatujummariungmat, uqautivaa, “Guutiup Ataniuvinganut ungasigunniiqputit.” Tamatuma kinguningagut kinamulluunniit Jiisusi apirijaujumajunniiqpuq.

Misaiasiup Miksaanut Apiqqusiq

³⁵ Jiisusi tuksiarvigjuarmi ajuriqtuilluni, uqaqpuq, “Sungmanikkua piqujanik ilisaijit uqaqpat Christuusi Taivitimut kinguvaarijauniarniraqtlugu?

³⁶ Taiviti anirnirmut ijjurnaittumut isumataaqtitaulluni uqalauqpuq: ‘Ataniq Ataninnut uqaqpuq, “Uvani taliqpinni iksivagit, akiraqtuqtingnik ilisiqqaaqtinnanga itigavit ataanut.”’

³⁷ “Taivitiup Atanirminik taingmagu; qanuq tavva Christuusi Taivitiup kinguvaarigajaqpauk?” Inugasagjuat amisut Jiisusimik naalakput quviasuglutik.

Jiisusiup Ikpigusutsiaqujininga Piqujanik Ilisaijinik

³⁸ Ajuriqturlugit imaak uqaqpuq, “Qaujisatsiarissi piqujanik ilisaijinik, pisukatagumavangmata annuraaqsimalutik takijunik uligjuanik, ikpigijautsiarlutik nilliujjaujumavaglutik niuvirvingni.

³⁹ Juutit ukpirnirmut katimavinganni piuniqpaani iksivautaqarumavut, upinnarniqpaanilu iniqarumavaglutik nirivigjuaqtuqaqtillugu.

⁴⁰ Uiggarniit sangiitturniagarillugit piqutinginnik aatirivakput angirranginnit, kinguningagut takunnaqtaujumallutik takijunik tuksiutiqattaqpait. Taimaimmat sugiaqtauniksangit anginiksaujumaaqput.”

Uiggarniup Tunirrusirninga

⁴¹ Jiisusi tuksiarvigjuap kiinaujairvingata qanigijaanut ingippuq, takunnaalirluni inungnik kiinaujairvingmut iliuqqaijunik. Amisut ajuqsanngittut tunisivut kiinaujanik amisunik.

⁴² Kingurngagulli uiggarniq ajuqsaqtuq tamaunngarivuq, ilisilluni kiinaujaangnik marruungnik mikijukuluungnik.

⁴³ Ilinniaqtini qaiqullugit uqautivait, “Sulijumik uqautivassi, taanna uiggarniq ajuqsaqtuq tunisivuq anginiqpaamik asilimaaminit.

⁴⁴ Asingit tunisivut aturnianngitamingnik ajuqsanngittuugamik; unali arnaq ajuqsaqtuulluni tunisivuq pigijatuaminik, inuujjutiksatuaminiglu.”