ᒫᑎᐅᓯᐅᑉ ᐊᒡᓚᖏᑦ 5 - Aglait Ijjurnaittut

Jiisusiup Ajuriqtuininga Qaqqaup Qaangani

¹ Jiisusiup inugiakturjuat takugamigit, qaqqaup qaanganuaqpuq, tavvani iksivaqtluni. Ilinniaqtingit avataaniilirmata,

² Jiisusiup ajuriqtuqpait uqarluni:

Sulijumik Quviasungniqatsiarniq

³ “Saimanaqtumiipput anirnikkut ajuqsaqtut; Guutiup Ataniuvinganik piqalirmata.

⁴ Saimanaqtumiipput qiksaanirmut quvviuqtut; Guutiup saimmaqtittumaarmagit.

⁵ Saimanaqtumiipput immingnik angijuruqtinngittut; Guutiup angirutigisimajanginnik nunarjuarmi kingurngujjijumaarmata.

⁶ Saimanaqtumiipput kaaktut imiruktullu nalaaguurnirmik; Guutiup naammaksitinniarmagit pijumajanginnik.

⁷ Saimanaqtumiipput inuuqatimingnik nikagusuktut, Guutimut nikagijaujumarmata.

⁸ Saimanaqtumiipput uummatimigut pasijaujjutiksaqanngittut; Guutimik takujumaarmata.

⁹ Saimanaqtumiipput inuuqatigiitsianngittunik ilagiitsialiqtitsijut; Guutiup qiturngaminik taijumaarmagit.

¹⁰ Saimanaqtumiipput akiraqtuqtaujut nalaaguurniq pillugu; Guutiup Ataniuvinganik piqalirmata.

¹¹ “Saimanaqtumiippusi inuit qanutuinnaq uqarnirlugvigikpasi, akiraqtuqtaugussilu, sulinngittumiglu qanutuinnaq uqarnirluutigijaugussi uvannut maliktiunisi pijjutigillugu.

¹² Quviasugissi sirilusilu, angijumik akiliqtaujumaarassi qilangmi, nalauttaijuttauq taimailiuqtaulaurmata sivunissinni.”

Tariurlu Qaumajurlu

¹³ “Nunarjuap tariurivaasi; tariuq tariungujunniiqpat qanuq tariunngukkanniqtitaujunnaqpa? Sunamut atuutiksaqarunniiqpuq, maniqqamut naavitauluni inungnut tulliragaksauliqpuq.

¹⁴ “Silarjuap qaumanirivaasi; iglugasait qaqqaup qaanganiittut sunatuinnamut taliumatitaujunnanngilat.

¹⁵ Naniruarmik ikitsijuqaqpakpaa qattarmut pusijjutiniaqtaminik; qaummaqqulli ikitausuunguvuq ininganuaqtaulluni, iglumiittulimaat qaummaktitauqullugit.

¹⁶ Taimaaktauq qaummaqutisi inungnut qaumatisiuk, piniatsiarnitsinnik takuqullugit, Ataatasi qilangmiittuq niqtuqtauqullugu.”

Jiisusiup Piqujanik Ajuriqtuijjutiqarninga

¹⁷ “Isumattailigissi Muusisiup piqujanginnik, nalauttaijullu ajuriqtuijjutinginnik aturunniiqtitsijaqturasugilunga; aturunniiqtigiaqtunngilakka, nalautsitittaqtuqpakkali.

¹⁸ Sulijumik uqautivassi, qilak nunarjuarlu nungulauqqaaqtinnagik, piqujait naaningit aaqqigiarutingillu aturunniiqtuqajjaanngilat, tamarmitsiaq nalautsilauqqaaqtinnagit.

¹⁹ Taimaimmat, nalliat piqujait mikinniqpaanganigluunniit atunngittuq, asiminiglu taimaak ajuriqtuiluni, taanna pillariunnginniqpaujumaaqpuq Guutiup Ataniuvingani; taimaaktauq nalliat piqujanik atuqtuq asiminiglu taimaak ajuriqtuiluni, taanna pillariuniqpaujumaaqpuq Guutiup Ataniuvingani.

²⁰ Uqautivassili imaak: Guutiup Ataniuvinganuarunnarniaqpusi, kisiani piqujanik ilisaijinit Paarisinillu atutsiarniqsaugussi Guutiup piniaqtauqujanginnik.”

Jiisusiup Ajuriqtuininga Ninngaumaniq Pillugu

²¹ “Tusaqsimagassi inuit uqaujjausimalaurmata, ‘Pijaarilutit inuaqtuksaunngilatit: pijaariluni inuaqtuq iqqaqtuivingmuaqtauniaqpuq.’

²² Maannali uqautivassi: inuuqatiminut ninngaktuq iqqaqtuivingmuaqtauniaqpuq; inuuqatiminiglu atuutiksaqanginniraijuq taanna Juutit iqqaqtuijinginnuaqtauniaqpuq, inuuqatiminiglu sunaksaunginniraijuq, taanna ikumarjuarmut pititaksauvuq.

²³ Taimaimmat tunirrusirvingmi tunirrusirnialirlutit Guutimut, tavvani iqqaiguvit inuuqatingnut saimmarviusimanginnirnik,

²⁴ tunirrutiginiaqtait tunirrusirviup saanganut qimaglugu; qatanngutiit upaglugu saimmaqatigiliruk, kinguningagut tunirrusirvingmut utirlutit, tunirrutiksait tuniliruk Guutimut.

²⁵ “Nalliannut iqqaqtugaksalianguguvit iqqaqtuivingmuaqqaaqtinnasik saimmaqsalauruk. Iqqaqtuivingmut kajusigussik taassuma iqqaqtuijimuaqtinniarmatit, iqqaqtuijiup puliisimuaqtikkajarmatit, puliisiullu tigujausimavingmuaqtillunitit.

²⁶ Sulitsiarlunga, uqautivagit, tavvaniilirajaravit, akiliriaqaqtalimaarnik akiliilaunginnirni.”

Jiisusiup Ajuriqtuininga Asinniariaqanginnirmik

²⁷ “Tusaumavusi uqausiuvaktumik, ‘Nuliariingnirmik asiruriijuksaunngilatit.’

²⁸ Maannali uqautivassi: nalliat arnamik takunnaarluni iksiguktuq, taanna nuliariingnirmik asiruijariiqpuq uummatimigut.

²⁹ Taimaimmat ijivit taliqpiup ajuqtulitippatit, piiruk igillugulu! Ilingnut piuniqsauvuq timiit ilakuukpat, timilimaavit igitaugajarninganit ikumarjuarmut.

³⁰ Aggakpillu taliqpiup ajuqtulitippatit, nakakkit igillugit! Ilingnut piuniqsauvuq avativit ilanganik ilakuuliruvit, timilimaavit igitaugajarninganit ikumarjuarmut.”

Jiisusiup Ajuriqtuininga Nuliariingnut Avillariktuungnut

³¹ “Uqaqtuqaqpalaurivuq, ‘Nalliat nuliaminik avitsillariktuq, avitsillaringninganik nalunaiqsisimajunik titiqqanik tunisivigijaksarivaa.’

³² Maannali uqautivassi: angutiup nuliani avillarikpagu asinniarnirmuungitillugu, taanna pasijaksauliqpuq nuliariingnirmik asiruinirmut; taassumingalu arnamik avitaullariksimajumik nulianiktuq asiruigivuq.”

Jiisusiup Ajuriqtuininga Angimmaringnirmik

³³ “Tusalaurivusi inuit uqaujjauvalaurmata, ‘Angimmariktuksaunngilatit sulinngillutit, angimmarikkuvit Ataniup saangani atugaksarivatit aturniarniraqsimajatit.’

³⁴ Maannali uqautivassi: sunatuinnarmik taisiqasiujjilusi angimmariktuksaunngilasi, qilagluunniit taiqasiutilugu, Guutiup iksivautarjuaringmagu.

³⁵ Nunarjuarluunniit taiqasiutilugu, itigangita ikurraringmagu; Jiruusalimluunniit taiqasiutilugu, taanna Angajuqqaarjuanguniqpaap iglugasagjuaqutigingmagu.

³⁶ Angimmariktuksaunnginnivusi niaqusi taiqasiutilugu, nujarmik atausirmigluunniit qakuqsititsijunnannginnassi qirniqsititsijunnarasilu.

³⁷ Imaagli uqaqattalirissi, angirussi angirlusi, anginngikkussi anginngillusi! Taakkua asianik uqakkannirasukkussi tamanna piunngittualungmit pivuq.”

Jiisusiup Ajuriqtuininga Akiniariaqannginnirmik

³⁸ “Tusaumavusi uqausiuvaktumik, ‘Iji ijimik, kigut kigutimik akiqariaqaqpuq.’

³⁹ Maannali uqautivassi: akiniarasuktuksaunngilasi pitsiaqtiginngitassinnut. Uluakkut patiktauguvit, uluavit igluattauq maniliruk.

⁴⁰ Nalliannut iqqaqtuivingmuaqtitauguvit uviniruit pijumalugu, annuraattauq silalliq pitaarilaurliuk.

⁴¹ Unataqtuksamut agjaqsiqujauguvit 1-mailimik ungasingnilingmut, agjaqsilaurit 2-mailimik.

⁴² Nalliannut pijumaviuguvit tunisivigilauruk: sunatuinnarmik aturviujumaguvit atuqtilauruk.”

Akiraqtuqtimik Nagligusungniq

⁴³ “Tusaumavusi uqausiuvaktumik, ‘Inuuqatisi nagligisigik, akiraqtuqtisilu uumigilugit.’

⁴⁴ Maannali uqautivassi: akiraqtuqtisi nagligisigik, ilissinnik uqausiqarluktut saimmatitauqusigik, akiraqturnirmut uqumaiksaqtitsijut tuksiutisigik,

⁴⁵ qiturngarijauliqullusi Ataatasinnut qilangmiittumut; taassuma siqinini qaummaktimmagu pitsiaqtunut pitsianngittunullu, silaluktitsivaglunilu akaujulijunut akaunngittulijunullu.

⁴⁶ Ilissinnik nagligusuktut kisimi nagligijatuarigussigik, sunamik akiliqtaujjutiksaqaqpisi? Ruumamiut kiinaujaiqtitsijiqutingit aglaat taimailiuqpakkivut!

⁴⁷ Ilannaarijasi kisimi tunngasuktiqattarussigik, qanuq asitsinnit pitsiarniqsaugajaqpisi? Ukpinngittut aglaat taimailiuqpakkivut!

⁴⁸ Taimaimmat naammatsiaqtumik iliqqusiqaqtuksauvusi, suurlu Ataatasi qilangmiittuq naammatsiaqtumik iliqqusiqarmat.”