ᒫᑎᐅᓯᐅᑉ ᐊᒡᓚᖏᑦ 2 - Aglait Ijjurnaittut

Ullurianik Ilisimajut Takujaqturningat Jiisusimik

¹ Jiisusi irniangungmat Pitliami Juutiamiittumi, Iruutasi angajuqqaarjuangutillugu, takugit, angutiit ullurianik ilisimajut siqiniup nuiviata nalaanit pijut, Jiruusalimmut tikipput.

² Apirillutiglu, “Juutit angajuqqaarjuaksangat irniangusimajuq naniippaa? Taassuma ullurianga saqqilaurmat siqiniup nuiviata nalaanit, tikippugut upigijaqturlugu.”

³ Iruutasi tamatuminga tusarami, quaqsaaqpuq, Jiruusalimmiullu tamarmik;

⁴ Iruutasiulli tunirrusiqtitsijit angajuqqaalimaangit piqujaniglu ilisaijit qaiqullugit apiqsuqpait, “Nani Christuusi irnianguniarniraqtausimava?”

⁵ Taakkua kiuvaat, “Pitliami Juutiamiittumi; imaak nalauttaijuq titiraqsimangmat:

⁶ ‘Ivvit Pitliam, nunami Juutamiittutit, Mikinniqpaunngilatit iglugasagjuanit anginiqpaujunit Juutami; Ilingnit aulatsijiksaq pijumaarmat Taassuma inuqutikka Isarialimiut tasiurumaarmagit.’”

⁷ Tavva Iruutasiup ullurianik ilisimajut ijiraqturluni katimaqatigillugit, tukisivigivait qangallarik ulluriaq saqqilaurmangaat.

⁸ Kinguningagut Pitliamut tilivait, uqautillugit, “Nutaraq naniimmangaat qinitsiaqsiuk, nanigussiuglu, qaujitinniaqpassinnga, uvangattauq upigijaqturumagakku.”

⁹ Angajuqqaarjuaq taimaak uqariirmat, taakkua tavvanngat aullaqput, ingirraliqtillugit ulluriaq takulauqtatik takugivaat.

¹⁰ Takugamijjuk quviasummarikput, ulluriaq sivulirivaat, nutarakuluup najuqtangata qulaanuarami nuqqaqpuq.

¹¹ Iglumut itiramik, nutarakuluk anaanangalu Miari takugamijjuk, saanganut siiqqurlutik tuksiarvigivaat. Tunirrutimingnik saqqititsillutik tunisivigivaat, guulumik, tipitsiariksaumiglu vurangkinsinsimik, tipitsiariksaummiglu murmik.

¹² Kinguningagut nunamingnut utiqput aqqutigilauqtami asiagut, Guutiup sinnaktuumakkut iniqtilaurmagit Iruutasimut utiqunagit.

Jiisusiup Qimaujjauninga Iijjiptimut

¹³ Aullarmata, takugit, Ataniup aingilingata Juusipi saqqivvigivaa sinnaktuumakkut, uqarluni, “Iruutasi nutarakulungmik qinirnialirmat tuqutsijumaluni. Taimaimmat makilirit, nutarakuluk anaanangalu naksarlugik qimaalirit Iijjiptimut, taikaniinniaqputit uvannut nuuqujaulilaunnginnirni.”

¹⁴ Juusipi makinnami, nutarakuluk anaanangalu naksarlugik, unnuangutillugu aullaqput, Iijjiptimut qimaallutik,

¹⁵ tavvaniilauqput Iruutasi tuqulaunnginningani; tamanna piniarniulauqpuq Ataniup uqausirisimajangit nalauttaijuqut nalautsiqullugit, imailijut: “Irnira kaiqulauqpara Iijjiptimit.”

Nutarait Tuquraqtauningit

¹⁶ Iruutasi qaujilirami ullurianik ilisimajunut sagluqitaunirminik, ninngavigjuaqpuq, piqujiliqpuq nutarait nukappiangukpata Pitliamiittut qanigijaaniittullu tamarmik tuquraqtauqullugit, marruungnik arraagulit nukaqtlillu, taimailiulauqpuq taakkua ullurianganik takulauqtut tukisivigitsialauramigit qangautillugu saqqilaurmangaat.

¹⁷ Taimailiuqtillugit nalauttaijuup Jirimaiaup uqausingit nalautsilauqput imailijut:

¹⁸ “Raamami nipi tusaqsauvuq, Qianiq ugguavigjuarnirlu, Raigiliup qiturngani qiajjutigivait; Saimmaqsaqtaujumanngilaq qiturngangit nungutaungmata.”

Juusipikkut Naasariitimut Utirningat Iijjiptimit

¹⁹ Iruutasi tuqungmat, takugit, Ataniup aingilingata Juusipi saqqivvigivaa sinnaktuumakkut Iijjiptimiitillugu suli, uqautillugu,

²⁰ “Makillutit, nutarakuluk anaanangalu naksarlugik, utilirissi Isarialiup nunanganut, nutarakulungmik tuqutsinasulauqtut tuqungmata.”

²¹ Juusipi makinnami, nutarakuluk anaanangalu naksarlugik, Isarialiup nunanganut utiqput.

²² Juusipi tusarami Aakilausiup angajuqqaarjuangulirninganik Juutiami, ataataminik Iruutasimik inangiilluni, tavvunngariaksaq sivuuraliqpuq, sinnaktuumakkulli Guutiup uqautingmingmagu, nunamut Galiliamut sanguvuq,

²³ iglugasangnut Naasariitimik atilingnut tikinnami, tavvani nunaqaliqpuq, nalauttaijuut uqausirisimajangit nalautsiliqput imailijut: “Naasariitimiutarmik taijaujumaaqpuq.”