ᔪᐊᓇᓯᐅᑉ ᐊᒡᓚᖏᑦ 13 - Aglait Ijjurnaittut

Jiisusiup Ilinniaqtimi Itiganginnik Uasarninga

¹ Qaangiqtauvingmik nalliunniqsiurviksaup sivuningani, Jiisusi qaujimagami Ataataminut aullarviksanga silarjuarmit nalliutilirmat, nangminiq inuqutini nagligigamigit silarjuarmiittut, isulittivigijani tikillugu nalligiinnalauqpait.

² Unnugummitaqatigiiktillugit, Saataanasi isumataaqtitsisimaliriirmat Juutasi Iskariatimik, Saimuuniup irninganik, Jiisusimik pijaukkaiqullugu,

³ Jiisusi, qaujimagami Ataataup sunalimaanik tunisivigingmagu, Guutimillu pilaurami Guutimullu ainiarami.

⁴ Nirivingmit nikuvinnami, annuraani silalliit piirlugit, allarutimik qitirminut qilaksilluni.

⁵ Uasarvingmut imirmik kuvisilluni, ilinniaqtit itiganginnik uasaliqpuq, allarutimut qitirmiutarijaminut allaqtirlugit.

⁶ Tavva Saimuuni Piitturuusimut tikiutingmat; Piitturuusiup uqautivaa: “Ataniq itigakka uasarniaqpigit?”

⁷ Jiisusiup kiuvaa, “Maanna tukisinngikkaluaqputit sungmat taimailiurmangaarma, kingurngagulli tukisijumaaqputit.”

⁸ Piitturuusiup uqautivaa, “Itigannik uasalauqsimanianngilatit.” Jiisusiup kiuvaa, “Itigatit uasarnianngigukkit, ilagijunniirniaqparma.”

⁹ Tavva Saimuuni Piitturuusiup uqautivaa, “Ataniq, itigakkali taakkutuunngittut aggakkali niaquralu uasaqasiutilikkit!”

¹⁰ Jiisusiup uqautivaa, “Nalliat timiminik iluunnaannik uasaqsimajuq salumalirami uasakkanniriaqanngilaq, itigangituaq uasarialituuvut, tamassi salumavusi atausirli ilagijasi salummaqsariaqaqtutuuvuq.”

¹¹ Jiisusi qaujimalaurmat nalliatta pijautinniarmangaagu; taimaimmat uqaqpuq, “Ilasili salummaqsariaqaqtutuuvuq.”

¹² Itigangit uasariiramigit, annuraani silalliit Atigivait, utirluni inigijaminut, uqautillugit, “Tukisivisi qanuiliurmangaarma ilissinnut?

¹³ Ajuriqtuijimik Atanirmiglu taivassinnga; nalaagut uqaqpusi, taannaugama.

¹⁴ Uvanga tavva Atanisi Ajuriqtuijisilu, itigassinnik uasaqpunga, ilissittauq itigassinnik uasaqattautijuksaugivusi.

¹⁵ Maligaksassinnik pinasuarvigivassi, taimailiuqullusi suurlu pinasuarvigigassi.

¹⁶ Sulijumik uqautivassi, piji anginiqsaunngilaq angajuqqaaminit; tilijausimajurlu anginiqsaunnginnivuq tilijiminit.

¹⁷ Tamanna qaujigassiuk, saimanaqtumiilirajaqpusi atulirussiuk.

¹⁸ “Tamatuminga uqautijainnarinngilassi; qaujimagakkit niruaqsimajakka; aglailli nalautsijariaqarmata uqaqtut: ‘Niriqatigijama akiraqtuliqpaanga.’

¹⁹ Maanna tamatuminga uqautivassi, suli pijuqalauqtinnagu, tamanna atuliqpat uvannut ukpiliqullusi, ‘Uvanga Taannaugama.’

²⁰ Sulijumik uqautivassi, tilijannik ilaliuqsijuq taanna uvannik ilaliuqsigivuq; uvannigli ilaliuqsijuq tilijinnik ilaliuqsigivuq.”

Jiisusiup Nalunaiqsininga Pijaukkaqtauniarnirminik

²¹ Jiisusili tamakkuninga uqariirami, anirnikkut qiksaangnirmut angijumut tikitauvuq, nalunaiqsiliqpuq, “Sulijumik uqautivassi, ilassi ilangatta pijautinniaqpaanga.”

²² Ilinniaqtiit immingnut takusaqattautivut, nalullutik nalliannik uqausiqarmangaat.

²³ Ilinniaqtingitali ilangat, Jiisusiup nagligijanga, iksivavuq Jiisusiup kiglingani;

²⁴ Saimuuni Piitturuusiup ijimminut nalunaiqsivigilluniuk uqautivaa, “Apirilauruk nalliannik uqausiqarmangaat.”

²⁵ Taassuma ilinniaqtiup Jiisusi iigarvigilluniuk uqautivaa, “Ataniq kinauva?”

²⁶ Jiisusiup kiuvaa, “Niaquujamik misuksilunga tunisivigijara taannauniaqpuq.” Tavva Jiisusi niaquujamik aviksilluni misukpaa, tunillugu Juutasimut, Saimuuniup Iskariatiup irninganut.

²⁷ Juutasiup niaquujaq tigungmagu, Saataanasiup itirvigivaa. Jiisusiup uqautivaa, “Tuavirlutit pijariaqaqtait, pinasualiruk.”

²⁸ Nirivingmiiqatigijangilli tukisijuqanngilat sungmat Jiisusiup taimaak uqautingmangaagu.

²⁹ Juutasi kamajigijaungmat kiinaujaqautingannik ikpiarjungmik; ilinniaqtiit ilangit isumavut Jiisusi niuviriaqujinasugillugu aturiaqaqtanginnik nalliunniqsiulirutik; uvvaluunniit tunisijaqtuqujaunasugivaat ajuqsaqtunut.

³⁰ Juutasiup niaquujaq iigamiuk tavvainnaq anivuq; unnuanguvurlu.

Piqujaq Nutaaq

³¹ Juutasi aningmat, Jiisusi uqaqpuq, “Maanna Inuup Irninga niqturnaqtitauvuq, Guuti taassumuuna niqturnaqtitaugivuq;

³² Guuti niqturnaqtitaukpat taassumuuna, tavva Inuup Irninga Guutiup niqturnaqtinniarivaa immigut, niqturnaqtikautiginiaqpaalu.

³³ Qiturngakka, akuniunngittuq najuliqpassi. Qinirumaaqpassinnga; suurlu Juutinut uqalaurama, taimaaktauq ilissinnut maanna uqaqpunga, ‘Upangniaqtannut aijunnannginnassi.’

³⁴ Piqujamik nutaamik tunisivigivassi, nagliktigiiqullusi; suurlu nagligilaurassi, taimaaktauq ilissinnut nagliktigiiktuksaugivusi.

³⁵ Ilissinnut nagliktigiigussi, tamatumuuna inulimaat tukisijumaaqput uvannut ilinniaqtiunissinnik.”

Jiisusiup Nalunaiqsininga Piitturuusiup Qaujimannginnirarniarninganik

³⁶ Tavva Saimuuni Piitturuusiup uqautivaa, “Ataniq namunngarniaqpit?” Jiisusiup kiuvaa, “Upangniaqtannut maanna maligunnanngilarma; kingurngagulli maligumaaqparma.”

³⁷ Piitturuusiup uqautivaa, “Ataniq sungmat maanna maligunnanngilagit? Ilingnik tuqutaujjutiqaraluaruma qanuiksanngilanga.”

³⁸ Jiisusiup kiuvaa, “Tuqutaunirmut atuinnauliqpit pijjutigilunga? Sulijumik uqautivagit, angutiviaq nilliqqaaqtinnagu, pingasuiqturlutit uvannik qaujimannginnirarniaqputit.”