ᔪᐊᓇᓯᐅᑉ ᐊᒡᓚᖏᑦ 1 - Aglait Ijjurnaittut

Uqausiq Inuusiujuq

¹ Pigiarnirmi Uqausiq tavvaniilauqpuq, Uqausirlu Guutimiilauqpuq, Uqausirlu Guutiuvuq.

² Taanna pigiarnirmit Guutimiilauqpuq;

³ sunalimaatsiat taassumuuna pinnguqtitaulauqsimavut; taassumalu asiagut pinnguqtitausimajuqanngilaq pinnguqtitausimajunik.

⁴ Inuusiq taassumaniilauqpuq, inuusirlu inungnut tamainnut qaummaqqutaulauqpuq.

⁵ Qaumajuq qaummaivuq taaqtumik, taaqtuullu qamilaunngilaa.

⁶ Guuti tilisilauqpuq inungmik, Juanasimik atilingmik,

⁷ taanna tikilauqpuq uqausiqariaqturluni, qaumajumik nalunaiqsijaqturluni, iluunnatik taassumuuna ukpiliqtitauqullugit.

⁸ Nangminirli Juanasi qaumajuunngilaq, tikilauqpurli nalunaiqsijaqtuqtluni qaumajumik.

⁹ Sulijumigli qaumajuuvuq taanna silarjuarmut tikittulimaanik inungnik qaumaksaijuq.

¹⁰ Qaumajuq silarjuarmiilauqpuq, silarjuarlu taassumuuna pinnguqtitausimavuq, silarjuarmiulli qaujimanngilaat.

¹¹ Nunaminut nangminirminut tikippuq, inuqutingitali nangminingita ilaliunngilaat.

¹² Taassumingali ilaliurijulimaat, ukpilirlutiglu taassuma atinganut, taakkua qiturngataarijaujunnaqsitippait Guutimut;

¹³ taakkua irnianguvut, angummit pinatik timiulluunniit pijumajanganit, inuullu pijumajanganit pingminatik, Guutimilli irnianguvut.

¹⁴ Uqausiq timitaalauqpuq inuuqatigililauqpavullu, niqturnarnirjuanga takulauqpavut, niqturnarnirjuaq Ataatamit pisimajanga Irnituangunirminut; pitsiarningata pijunnaqtitsininganik sulitsiarnirmiglu tatattuq.

¹⁵ Juanasiup nipiqquqtulluni nalunailauqpaa uqarluni, “Taannauvuq uqausirilauqtara, ‘Kingunikkut qainiaqpuq uvannit ajunnginniqsaujuq, inuulilauqtinnanga inuusimajuq.’”

¹⁶ Taassuma pitsiarningata pijunnaqsititsininga angijuunikunganut saimmaqtitausimajumik inuusiqaqtippaatigut pitsiarviunirmut saimmaqtitauvallianginnarlutalu.

¹⁷ Piqujat Muusisikkut tunijaulauqput; pitsiarviunirli sulitsiarnirlu Jiisusi Christuusikkut pivuuk.

¹⁸ Guutimik takusimajuqanngilaq; Irnitualli Ataataup sarliaqtangata, taassuma Guuti qaujijautippaa.

Juanasi Paaptitsirijiup Ajuriqtuininga

¹⁹ Juutit angajuqqaangit Jiruusalimmiittut tunirrusiqtitsijinik Livaitiniglu Juanasimik apirijaqtuqujivut, imaak “Kinauvit?”

²⁰ Juanasili saglunani, imminik uqausirivuq, uqarluni, “Christuusiunngilanga.”

²¹ Taakkua apirivaat, “Kinaugavilli? Ilaijjauvit?” Kiuvuq, “Tainnaunngilanga.” “Nalauttaijuuvit?” Kiuvait, “Aakka.”

²² Taakkua uqaqput, “Kinauvit? Kiulauqtigut uvattinnik tilisijunut uqarunnaqulluta. Qanuq ilingnik uqausirijunnaqpit?”

²³ Juanasiup kiuvait, “Tainnauvunga, ‘Nipi qaigalaaqtuq tusaqsaujuq inuqanngittumi; Ataniup aqqutiksanga tukiliaqsitisiuk,’ Nalauttaijup Aisaiasiup uqausirisimajanga.”

²⁴ Taakkua Paarisikkunnit tilijausimalauqput,

²⁵ apirilirivut, “Sungmalli paaptitsiqattaqpit? Christuusiunak, Ilaijjaunaglu, Nalauttaijuunaglu.”

²⁶ Juanasiup kiuvait, “Imarmut paaptitsivunga; akunnassinnili nangiqtuqaqpuq qaujimanngitassinnik,

²⁷ taanna kingunikkut qainiaqtuq, naluqqutivunga aglaat itigagutinginnik singiijjaaqsijariaksaq.”

²⁸ Tamanna piniarniulauqpuq Pitanimi Kuup Juartaniup taliqpiani, Juanasiup paaptitsivingani.

Guutiup Nurraujaqutinga

²⁹ Qautillugu Juanasiup Jiisusi miksimut qailiqtuq takugamiuk, uqaqpuq, “Takugit, tavva Guutiup Nurraujaqutinga, nunarjuarmiut ajurninginnik piijaijuq!

³⁰ Tavva uqausirilauqtara uqaqtillunga, ‘Angut kingunikkut qainiaqpuq uvannit ajunnginniqsaujuq, inuulauqtinnanga inuusimagami.’

³¹ Nangminirli qaujimalaunngilara; taimaimmat imarmut paaptitsirijaqtulauqpunga, ilitarijauliqullugu Isarialimiunut.”

³² Juanasi nalunaiqsilauqpuq imaak, “Anirniq qilangmit aqqaqtuq takulauqpara tingmiatut tuuvitut, taassumaniilirluni.

³³ Uvangali nangminiq qaujimalaunngilara; tilijimali imarmut paaptitsirijaqtuqullunga uqautilauqpaanga, ‘Angummut Anirnirmik aqqaqtumik takuguvit tavvaniiliqtumik, taannauvuq Anirnirmut Ijjurnaittumut paaptitsiriji.’

³⁴ Uvangalu nangminiq takulauqpara, uqautivassi taannauvuq tavva Guutiup Irninga.”

Jiisusiup Ilinniaqtitaangit Sivulliqpaat

³⁵ Qautillugu Juanasi nangiqatiqalauqpuq ilinniaqtiminik marruungnik;

³⁶ Jiisusi tauvuna pisuktuq takunaaramiuk, uqaqpuq, “Takugit, tavva Guutiup Nurraujaqutinga!”

³⁷ Ilinniaqtingiktali taimaak uqaqtuq tusaramikkuk, Jiisusi maliliqpaak.

³⁸ Jiisusi qiviarami, takuvuq maliktuungnik, uqautivaak, “Sunamik qiniqpisik?” Kiuvuuk, “Raappai (tukiqaqpuq Ilisaiji), naniiqattaqpit?”

³⁹ Jiisusiup uqautivaak, “Qailusik takujaqturissik.” Tavva maliliqpaak qaujillutiglu nanimiutaungmangaat; ullumi tavvani najuutivuuk, unnusaulilaurmat immaqaa 4-qanigijaani.

⁴⁰ Taakkuak Juanasi uqaqtillugu tusalauqtuuk, Jiisusimik maliksalauqtuq aippanga Aanturuunguvuq Saimuuni Piitturuusiup nukanga.

⁴¹ Sivulliqpaamik angajuminuaqpuq Saimuunimut, uqautillugu, “Misaia nanivavut.” (Tukiqaqpuq “Christuusi.”)

⁴² Anturuup Saimuuni Jiisusimuarutivaa. Jiisusiup takugamiuk, uqautivaa, “Saimuuniuvit Juanasiup irninga? Siipasimik atiqarnialiqputit.” (Siipasi tukiqaqpuq Piitturuusi uvvalu “Qaiqtuq.”)

Jiisusiup Qaiqujininga Pilippuusimik Naatanaimiglu

⁴³ Qautillugu Jiisusi Galiliamuarumaliqpuq. Katisigami Pilippuusimik uqautivaa, “Malinnga.”

⁴⁴ Pilippuusili Pitsaitamiutauvuq, Aanturuukkuk Piitturuusikkuk nunanganit.

⁴⁵ Pilippuusiup Naatanai katigamiuk uqautivaa, “Katisivugut Muusisiup piqujanginni nalauttaijullu titirausirilauqtanganik, Jiisusi Naasariitimiumik, Juusipiup irninganik.”

⁴⁶ Naatanaip apirivaa, “Naasariitimit piujumik saqqittuqarunnaqpa?” Pilippuusiup kiuvaa, “Qailutit takujaqturit.”

⁴⁷ Jiisusiulli Naatanai miksimut qailiqtuq takugamiuk, uqausirivaa, “Takugit, tavva Isarialimiutallarik, taassumanilu sulinginniqtaqanngilaq!”

⁴⁸ Naatanaip apirivaa, “Qanuq qaujimavinga?” Jiisusiup kiuvaa, “Pilippuusimut qaiqujaulauqaaqtinnak, napaaqtuup paurngaliksaup ataani iksivatillutit takulauqpagit.”

⁴⁹ Naatanaip kiuvaa, “Raappai, Guutiup Irnirivaatit! Isarialimiut Angajuqqaarjuangat!”

⁵⁰ Jiisusiup kiuvaa, “Ukpiliqpit uqaqqaunira pillugu takulaurnirarlutit napaaqtuup paurngaliksaup ataaniitillutit? Takuqattarniaqputit tamatumanngat anginiqsanik.”

⁵¹ Uqautillugillu, “Sulitsiaqtumik uqautivassi, qilak angmaqtuq takujumaaqpasi, Guutiullu aingilingit majuraqtut aqqaqtiqtullu Inuup Irninganut.”