ᕉᑎᐅᑉ ᐅᓂᒃᑲᐅᓯᓂᖓ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᕉᑎᐅᑉ ᐅᐃᒃᓴᕐᑖᕐᓂᖓ

¹ ᑭᖑᓂᖓᒍᑦ ᓁᐅᒥᐅᑉ ᐅᑯᐊᓂ ᕉᑎ ᐅᖃᐅᑎᕚ, “ᐅᐃᒃᓴᕐᓂᒃ ᕿᓂᖁᕕᖔ ᓇᖕᒥᓂᖅ ᐊᖏᕐᕋᖃᑦᓯᐊᓕᕐᓂᐊᕋᕕᑦ?

² ᖃᐅᔨᒪᓚᐅᕈᒃ ᑖᓐᓇ ᐳᐊᓯ, ᐱᓇᓱᐊᕐᑎᖏᓐᓂ ᐊᕐᓇᓂ ᐱᓇᓱᐊᖃᑕᐅᕕᒋᔧᑦ, ᐅᐃᒋᓚᐅᕐᑕᒃᑯᑦ ᐃᓚᒋᒐᑦᑎᒃᑯᒃ. ᒫᓐᓇ ᐅᓐᓄᒃ ᓂᐊᖂᔭᒃᓴᓂᒃ ᓴᓃᔧᓗᓂ ᐃᕖᔧᓂᐊᕐᒪᑦ ᐃᒫᒃ ᐱᖁᕙᒋᑦ:

³ ᐅᕐᕙᒡᓗᑎᑦ ᐱᐅᓴᕐᓗᑎᓪᓗ ᐊᓐᓄᕌᑦᓯᐊᖑᓂᕐᐹᓂᒃ ᐊᑎᓗᑎᑦ ᓂᐊᖂᔭᒃᓴᓂᒃ ᐃᕖᔧᕕᖓᓄᐊᕐᓂᐊᕐᐳᑎᑦ; ᖃᐅᔨᑎᑦᑍᓕᓗᒍ ᑕᕝᕙᓃᓐᓂᕐᓂᒃ ᓂᕆᔭᕇᓚᐅᖏᓐᓂᖓᓂ ᐃᒥᕇᓚᐅᖏᓐᓂᖓᓂᓗ.

⁴ ᓇᒧᑦ ᐃᓂᓪᓚᖕᓂᐊᕐᒪᖔᑦ ᖃᐅᔨᒪᓇᓱᐊᕐᓂᐊᕐᐸᑦ, ᓯᓂᓕᕐᐸᓪᓗ ᑭᓗᖓᓄᑦ ᐃᓐᓇᕐᓂᐊᕐᐳᑎᑦ, ᑕᕝᕙᓃᑎᓪᓗᑎᓪᓗ ᖃᐅᔨᒍᓂᑎᑦ ᖃᓄᖅ ᐱᔭᕆᐊᖃᕐᓂᕐᓂᒃ ᐅᖃᐅᑎᓂᐊᕐᐹᑎᑦ.”

⁵ ᕉᑎᓗ ᑭᐅᕗᖅ, “ᐅᕙᓐᓄᑦ ᐅᖃᐅᓯᕆᔭᓕᒫᑎᑦ ᒪᓕᖕᓂᐊᕐᐸᒃᑲ.”

⁶ ᑕᕝᕙ ᕉᑎ ᐳᐊᓯᐅᑉ ᓂᐊᖂᔭᒃᓴᓂᒃ ᐃᕖᔧᕕᖓᓄᐊᕐᐳᖅ ᓴᑭᒥ ᐅᖃᐅᓯᕆᔭᓕᒫᖏᑦ ᒪᓕᒡᓗᒋᑦ.

⁷ ᐳᐊᓯᓕ ᓂᕆᔭᕇᕋᒥ ᐃᒥᕇᕋᒥᓗ ᖁᕕᐊᓱᑦᓯᐊᓕᕐᐳᖅ, ᓂᐊᖂᔭᒃᓮᓪᓗ ᑲᑎᓯᒪᔪᑦ ᐅᖓᓪᓕᕐᐸᖓᓄᑦ ᐃᓂᓪᓚᒃᐳᖅ, ᑕᕝᕙᓂᓗ ᓯᓂᓕᕐᓗᓂ. ᑕᕝᕙ ᕉᑎ ᑐᓵᔭᐅᑦᑍᓕᒪᓪᓗᓂ ᐳᐊᓯᐅᑉ ᑭᓗᐊᓄᑦ ᐃᓐᓇᕐᐳᖅ.

⁸ ᐳᐊᓯᓕ ᐅᓐᓄᐊᖑᑎᓪᓗᒍ ᐃᖅᑯᒻᒪᕐᐳᖅ, ᐃᖏᓐᓇᒥᓗ ᖁᐊᕐᓵᕐᐳᖅ ᑕᑯᓕᕋᒥ ᐊᕐᓇᒥᒃ ᑭᓗᒥᓃᑦᑐᒥᒃ.

⁹ ᐊᐱᕆᕚᓗ, “ᑭᓇᐅᕖᑦ?” ᕉᑎᓗ ᓇᓗᖁᑎᓪᓗᓂ ᑭᐅᕗᖅ, “ᕉᑎᐅᕗᖓ ᐅᐃᒋᓚᐅᕐᑕᒃᑯᑦ ᐃᓚᒋᒐᒃᑭᑦ, ᐅᕙᓐᓂᒃ ᐰᕆᒃᓯᒋᐊᖃᕋᕕᑦ, ᐅᐃᒋᓚᐅᕐᑕᕋ ᐱᑦᔪᑎᒋᓪᓗᒍ ᐃᓚᒌᓪᓚᕆᒃᐳᒍᒃ.”

¹⁰ ᐳᐊᓯ ᐅᖃᕐᐳᖅ, “ᑐᒃᓯᐊᕐᐳᖓ ᐊᑕᓂᕐᒧᑦ ᓮᒻᒪᕐᑕᐅᖁᓪᓗᑎᑦ, ᐃᓚᒌᑦ ᐱᐅᓯᕆᔭᕆᐊᖃᕐᑕᖏᓐᓂᒃ ᐃᒃᐱᒍᓱᑦᓯᐊᕐᓂᕐᓂᒃ ᓴᖅᑭᑎᑦᓯᒋᐊᓪᓚᒃᐳᑎᑦ ᒫᓐᓇ, ᓴᑭᖕᓄᑦ ᐱᓂᐊᕐᓂᕆᓚᐅᕐᑕᕐᓂᑦ, ᐊᖑᒻᒥᒃ ᐅᕕᒃᑲᒥᒃ ᖃᓄᐃᑦᑐᑐᐃᓐᓇᕐᒥᒡᓘᓃᑦ ᐅᐃᑖᕋᓱᐊᖏᓐᓃᑦ ᐱᑦᔪᑎᒋᓪᓗᒍ.

¹¹ ᐃᓕᕋᓱᒃᑍᓕᒋᑦ ᕉᑏ, ᑕᒪᓐᓇ ᐃᓚᒌᑦ ᐊᑐᕆᐊᖃᕐᑕᖏᓐᓂᒃ ᑲᔪᓯᔪᒪᓃᑦ ᐱᓇᓱᐊᕐᓂᐊᕐᐸᕋ; ᐃᓅᖃᑎᓕᒫᑦᑎᓐᓂᑦ ᖃᐅᔨᒪᔭᐅᓕᕋᕕᑦ ᐃᓄᑦᓯᐊᕙᐅᓂᕐᓂᒃ.

¹² ᐃᓛᒃ ᓱᓕᔪᑎᑦ ᐅᐃᒋᓚᐅᕐᑕᒃᑯᑦ ᐃᓚᒋᒐᕕᖓ, ᐃᓚᒌᓪᓗ ᐱᐅᓯᕆᔭᕆᐊᖃᕐᑕᖏᑎᒍᑦ ᑲᒪᑦᓯᐊᕆᐊᖃᕋᒪ ᐃᓕᖕᓂᒃ, ᑭᓯᐊᓂ ᐅᐃᒋᓚᐅᕐᑕᒃᑯᑦ ᐃᓚᒋᓂᕐᓴᕐᓂᒃ ᐅᕙᓐᓂᑦ ᑕᒫᓃᑦᑐᖃᕐᒥᖕᒪᑦ.

¹³ ᑕᕝᕙᓃᑐᐃᓐᓇᓕᕆᑦ ᒫᓐᓇ ᐅᓐᓄᒃ, ᐅᓪᓚᒃᑯᑦ ᖃᐅᔨᒋᐊᕐᓂᐊᕐᐳᒍᒃ ᑍᓐᓇ ᐃᓚᒋᓂᕐᓴᕆᔧᑦ ᐅᐃᒋᓚᐅᕐᑕᒃᑯᑦ ᑲᔪᓯᔪᒪᖕᒪᖔᑦ ᐃᓕᖕᓄᑦ, ᑲᔪᓯᓂᐊᑐᐊᕐᐸᑦ ᓈᒻᒪᖕᓂᐊᕐᐳᖅ. ᑭᓯᐊᓂᓕ ᑲᔪᓯᔪᓐᓇᖏᑉᐸᑦ, ᐊᑕᓂᖅ ᐃᓅᖕᒪᑦ, ᓱᓕᑦᓯᐊᕐᓗᖓ ᑲᔪᓯᓂᐊᓪᓚᕆᒃᐳᖓ ᒎᑎᐅᑉ ᒎᑎᓪᓚᕆᑐᐊᖑᔫᑉ ᖃᐅᔨᒪᓂᐊᕐᐸᖓ, ᒫᓐᓇᓕ ᑕᕝᕙᓂ ᓯᓂᑐᐃᓐᓇᓕᕆᑦ ᐅᓪᓚᓐᖑᓚᐅᖏᓐᓂᖓᓂ.”

¹⁴ ᕉᑎᓕ ᐳᐊᓯᐅᑉ ᑭᓗᐊᓂ ᓯᓂᓚᐅᕐᐳᖅ ᐅᓪᓛᓐᖑᓚᐅᖏᓐᓂᖓᓂ, ᒪᑭᓪᓗᓂᓗ ᓱᓕ ᖃᐅᒻᒪᓚᐅᕐᑎᓐᓇᒍ ᐳᐊᓯᐅᑉ ᖃᐅᔨᔭᐅᖁᓚᐅᖏᒻᒪᒍ ᐃᕖᔧᕕᖕᒥ ᐊᕐᓇᒥᒃ ᓯᓂᒃᑐᖃᓚᐅᕐᒪᖔᑦ.

¹⁵ ᐅᑎᕐᓂᐊᓕᕐᒪᑦ ᐳᐊᓯᐅᑉ ᐅᖃᐅᑎᕚ, “ᐅᓕᑲᐹᑦ ᐃᓯᕕᓚᐅᕈᒃ ᒪᐅᖓ.” ᐃᓯᕕᒻᒪᒍ ᐳᐊᓯᐅᑉ ᓈᕕᑦᓯᕕᒋᕚ ᓂᐊᖂᔭᒃᓴᒥᒃ 50ᐸᐅᒥᒃ ᐅᖁᒤᓐᓂᖃᐸᓗᒃᑐᒥᒃ, ᐃᑲᔪᕐᓗᒍᓗ ᐃᕐᓲᑦᔨᑎᑉᐹ, ᕉᑎᐅᓪᓗ ᑖᓐᓇ ᐃᕐᓱᒡᓗᒍ ᐊᖏᕐᕋᕐᐳᖅ.

¹⁶ ᐊᖏᕐᕋᕐᒪᑦ ᓴᑭᖓᑕ ᐊᐱᕆᕚ, “ᑖᓐᓇᐅᕖᑦ ᐸᓂᒐ?” ᑕᕝᕙ ᕉᑎᐅᑉ ᐅᓂᒃᑲᐅᑎᓕᕐᐹ ᑕᒤᓐᓂᒃ ᐳᐊᓯᐅᑉ ᖃᓄᐃᓕᐅᕐᓂᕆᖅᑲᐅᔭᖓᓂᒃ.

¹⁷ ᐅᖃᕐᓗᓂᓗ, “ᐳᐊᓯᐅᑉ ᐊᖏᕐᕋᐅᑦᔨᖏᓪᓗᖓ ᐊᖏᕐᕋᑐᐃᓐᓇᖁᖅᑲᐅᖏᒻᒪᖓ, ᑍᒫᒃ ᐊᖏᑎᒋᔪᒥᒃ ᐆᒥᖓ ᓂᐊᖂᔭᒃᓴᒥᒃ ᐊᖏᕐᕋᐅᑦᔨᑎᑉᐹᖓ.”

¹⁸ ᓁᐅᒥᐅᑉ ᑭᐅᕚ, “ᐅᑕᖅᑭᑐᐃᓐᓇᑲᓚᐅᕆᑦ ᖃᓄᖅ ᐱᔪᒪᓂᐊᕐᒪᖔᑦ, ᓇᓗᓇᓐᖏᓚᖅ ᐳᐊᓯ ᓄᖅᑲᐅᑦᔨᑐᐃᓐᓇᑦᔮᔪᓐᓃᕐᑐᖅ ᐅᓪᓗᒥ ᑕᒪᑐᒥᖓ ᐋᖅᑭᒃᓯᓚᐅᖅᑳᕋᓂ.”