ᔪᐊᓇᓯᐅᑉ ᑕᑯᑎᑕᐅᓂᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᒃᐱᕐᑑᖃᑎᒌᓄᑦ ᓵᕐᑏᓯᒥᐅᓄᑦ ᐅᖃᐅᓰᑦ

¹ “ᓵᕐᑏᓯᒥᐅᑦ ᐅᒃᐱᕐᑑᖃᑎᒌᖏᑕ ᐂᖏᓖᖓᓐᓄᑦ ᑎᑎᕋᕆᑦ: “‘ᐅᖃᐅᓰᑦ ᐅᑯᐊ ᐱᕗᑦ, ᒎᑎᐅᑉ ᐊᓂᕐᓂᖏᓐᓂᒃ 7ᓂᒃ ᐱᖃᕐᑐᒥᑦ ᐅᓪᓗᕆᐊᓂᒡᓗ 7ᓂᒃ ᐱᖃᕐᑐᒥᑦ. ᐱᓂᐊᕐᓂᑎᑦ ᖃᐅᔨᒪᕙᒃᑲ; ᐅᒃᐱᕐᓂᒃᑯᑦ ᐆᒪᓂᕋᕐᑕᐅᒐᕕᑦ, ᑐᖁᖓᒐᓗᐊᕐᑎᓪᓗᑎᑦ.

² ᑐᐸᓕᕆᑦ, ᓱᓕ ᐱᓯᒪᔧᑦ ᓲᖑᓯᑎᓕᕈᒃ ᑐᖁᑦᓯᐊᒻᒪᕆᓚᐅᖏᓐᓂᖓᓂ, ᖃᐅᔨᒐᒃᑭᑦ ᐱᓇᓱᐊᕐᓂᑎᑦ ᒎᑎᒪ ᓵᖓᓂ ᓱᓕ ᓈᒻᒪᒃᓯᓯᒪᖏᒻᒪᑕ.

³ ᐃᖅᑬᓕᕆᑦ ᐃᓕᖕᓄᑦ ᐊᔪᕆᕐᑑᑕᐅᓯᒪᔪᓂᒃ ᑐᓴᕐᓯᒪᔭᕐᓂᒡᓗ; ᓈᓚᒡᓗᒋᑦ, ᖃᕿᐊᓕᕆᑦ. ᑐᐸᖕᓂᐊᖏᒃᑯᕕᑦ, ᑎᒡᓕᒃᑎᑐᑦ ᑎᑭᓐᓂᐊᕐᐸᒋᑦ, ᖃᐅᔨᒪᓂᐊᓐᖏᓚᑎᓪᓗ ᖃᖓ ᑎᑭᕝᕕᒋᓂᐊᕐᑕᓐᓂᒃ.

⁴ ᓵᕐᑏᓯᒥᐅᓪᓕ ᐃᓚᖏᑦ ᐅᓄᖏᑦᑐᑦ ᐊᓐᓄᕌᒥᖕᓂᒃ ᓴᓗᒪᔪᓐᓃᕐᑎᑦᓯᓯᒪᓐᖏᓚᑦ, ᑖᒃᑯᐊ ᐱᓱᖃᑎᒋᔪᒫᕐᐹᖓ ᖃᖁᕐᑕᒥᒃ ᐊᓐᓄᕌᕐᓯᒪᓗᑎᒃ, ᑍᒤᑦᑐᒥᒃ ᐊᓐᓄᕌᕐᑎᑕᐅᓂᕐᒥᒃ ᐱᔪᓐᓇᕐᓯᖕᒪᑕ.

⁵ ᓵᓚᖃᕐᑐᑦ ᖃᑯᕐᑕᓂᒃ ᐊᓐᓄᕌᕐᑕᐅᔪᒫᕐᒪᑕ, ᐊᑎᖏᓪᓗ ᐲᕐᓂᐊᓐᖏᓚᒃᑲ ᐃᓅᓯᕾᓐᓇᕈᒫᕐᑐᑦ ᐊᑎᖃᕐᕕᖏᓐᓂᑦ; ᐊᑖᑕᒪ ᐂᖏᓖᖁᑎᖏᑕᓗ ᓵᖓᓂ ᐊᑎᖏᑦ ᐅᖃᐅᓯᕆᔪᒪᕙᒃᑲ.

⁶ “‘ᓯᐅᑎᖃᕐᑑᑉ ᑐᓴᕐᓕᒋᑦ ᐊᓂᕐᓂᐅᑉ ᐃᑦᔪᕐᓁᑦᑑᑉ ᐅᖃᐅᓯᖏᑦ ᐅᒃᐱᕐᑑᖃᑎᒌᓄᑦ.’”

ᐅᒃᐱᕐᑑᖃᑎᒌᓄᑦ ᐱᓚᑕᐅᓪᕕᐊᒥᐅᓄᑦ ᐅᖃᐅᓰᑦ

⁷ “ᐱᓚᑕᐅᓪᕕᐊᒥᐅᑦ ᐅᒃᐱᕐᑑᖃᑎᒌᖏᑕ ᐂᖏᓖᖓᓄᑦ ᑎᑎᕋᕆᑦ: “‘ᐅᖃᐅᓰᑦ ᐅᑯᐊ ᐱᕗᑦ ᐃᑦᔪᕐᓁᑦᑑᔪᒥᑦ, ᓱᓕᔪᒥᑦ, ᐅᒃᑯᐃᕈᑎᒥᒃ ᐱᓯᒪᔪᒥᑦ ᑍᕕᑎᐅᑉ ᐅᒃᑯᐃᕈᑎᖓᓂᒃ, ᐅᒃᑯᐊᖅ ᐅᒃᑯᐃᕐᐸᒍ ᑭᓇᒧᓪᓘᓐᓃᑦ ᐅᑯᐊᕐᑕᐅᓂᐊᓐᖏᓚᖅ, ᐅᒃᑯᐊᕐᐸᒍ ᑭᓇᒧᓪᓘᓐᓃᑦ ᐅᒃᑯᐃᕐᑕᐅᓂᐊᓐᖏᓚᖅ.

⁸ ᐱᓂᐊᕐᓂᑎᑦ ᖃᐅᔨᒪᕙᒃᑲ. ᑕᑯᒋᑦ, ᓯᕗᓂᕐᓃᑦᑐᒥᒃ ᐅᒃᑯᐊᒥᒃ ᐅᒃᑯᐃᕈᑎᓚᐅᕐᐸᒋᑦ, ᑭᓇᒧᓪᓘᓐᓃᑦ ᐅᒃᑯᐊᕐᑕᐅᓂᐊᖏᑦᑐᒥᒃ; ᖃᐅᔨᒪᕙᒋᑦ ᒥᑭᔪᒥᒃ ᐱᔪᓐᓇᕐᓂᖃᕋᕕᑦ, ᐅᖃᐅᓯᕋᓗ ᐱᓯᒤᓐᓇᕐᐸᑦ ᐊᑎᕋᓗ ᒥᓯᐊᕈᑎᒋᓯᒪᓇᒍ.

⁹ ᑕᑯᒋᑦ, ᑍᒃᑯᐊ ᓵᑖᓇᓯᐅᑉ ᑲᑎᒪᕕᖁᑎᖓᓃᑦᑐᑦ ᔫᑎᐅᓂᕋᕐᑐᑦ ᔫᑎᐅᓇᑎᒡᓗ, ᓴᒡᓗᔪᑦ ᑕᑯᒋᑦ, ᐃᓕᖕᓄᑦ ᐱᑎᓐᓂᐊᕐᐸᒃᑲ ᓵᖕᓄᓪᓗ ᐹᒻᒪᒃᑎᓪᓗᒋᑦ, ᖃᐅᔨᑎᓪᓗᒋᑦ ᓇᒡᓕᒋᒐᒃᑭᑦ.

¹⁰ ᐅᖃᐅᓯᒃᑲ ᒪᓕᒡᓗᒋᑦ ᕿᓄᐃᓵᓚᐅᕋᕕᑦ, ᓴᐳᑎᓯᒪᓂᐊᕐᐸᒋᑦ ᐆᒃᑐᕐᑕᐅᓇᕐᑐᓂᑦ ᓯᓚᕐᔪᐊᕐᒥᐅᓕᒫᓄᑦ ᑎᑭᑦᓱᒫᕐᑐᓂᑦ, ᐆᒃᑐᕐᑕᐅᖁᓪᓗᒋᑦ ᓄᓇᕐᔪᐊᕐᒦᑦᑐᑦ.

¹¹ “‘ᐊᑯᓂᐅᖏᑦᑐᖅ ᑎᑭᓐᓂᐊᕐᐳᖓ; ᐱᒋᔧᑦ ᐱᓯᒪᑦᓯᐊᕈᒃ, ᐋᑕᐅᖁᓇᒃ ᓵᓚᖃᐅᑎᒃᓴᕐᓂᒃ ᓂᐊᖂᑎᒥᒃ.

¹² ᓵᓚᖃᕐᑐᖅ, ᓱᑲᓐᖑᕐᑎᑦᓱᒪᕙᕋ ᒎᑎᒪ ᑐᒃᓯᐊᕐᕕᒡᔪᐊᖁᑎᖓᓂ; ᑖᑦᓱᒪᓗ ᕿᒪᓚᐅᕐᓯᒪᓂᐊᓐᖏᓛ, ᐊᑎᓕᐅᕐᕕᒋᓂᐊᕐᐸᕋᓗ ᒎᑎᒪ ᐊᑎᖓᓂᒃ, ᒎᑎᒪᓗ ᐃᒡᓗᒐᓴᒡᔪᐊᖁᑎᖏᓐᓂᒃ, ᔨᕉᓴᓕᒥᒃ ᓄᑖᒥᒃ ᕿᓚᖕᒥᑦ ᐊᖅᑲᕈᒫᕐᑐᒥᒃ ᒎᑎᓐᓂᑦ ᐱᔪᒥᒃ, ᐊᑎᓕᐅᕐᕕᒋᓂᐊᕆᕙᕋᓗ ᐊᑎᓐᓂᒃ ᓄᑖᒥᒃ.

¹³ “‘ᓯᐅᑎᖃᕐᑑᑉ ᑐᓴᕐᓕᒋᑦ ᐊᓂᕐᓂᐅᑉ ᐃᑦᔪᕐᓁᑦᑑᑉ ᐅᖃᐅᓯᖏᑦ ᐅᒃᐱᕐᑑᖃᑎᒌᓄᑦ.’”

ᐅᒃᐱᕐᑑᖃᑎᒌᓄᑦ ᓚᐅᑏᓯᐊᒥᐅᓄᑦ ᐅᖃᐅᓰᑦ

¹⁴ “ᓚᐅᑏᓯᐊᒥᐅᑦ ᐅᒃᐱᕐᑑᖃᑎᒌᖏᑕ ᐂᖏᓖᖓᓐᓄᑦ ᑎᑎᕋᕆᑦ: “‘ᐅᖃᐅᓰᑦ ᐅᑯᐊ ᐂᒦᓐᖑᔪᒥᑦ ᐱᕗᑦ, ᓱᖁᓯᔪᐃᑦᑑᓪᓗᓂ ᓱᓕᔪᒥᒃ ᓇᓗᓁᕐᓯᔨᒥᑦ, ᐱᒋᐊᕐᓂᐅᔪᒥᑦ ᒎᑎᐅᑉ ᐱᓐᖑᕐᑎᓯᒪᔭᖏᓐᓂᑦ.

¹⁵ ᐱᓂᐊᕐᓂᑎᑦ ᖃᐅᔨᒪᕙᒃᑲ; ᓂᒡᓕᓇᕐᓇᒡᓗ ᐆᓇᕐᓇᒡᓗ ᑍᒤᑦᑑᒐᕕᑦ. ᐋᖅᑭᒋᐊᖁᕙᒋᑦ ᓇᓪᓕᐊᓐᓄᑐᐃᓐᓇᖅ ᓂᒡᓕᓗᑎᑦ ᐆᓇᕐᓯᓗᑎᓪᓘᓐᓃᑦ!

¹⁶ ᓂᕈᒥᑐᐃᓐᓇᕋᕕᓪᓕ, ᓂᒡᓕᓇᕐᓇᒡᓗ ᐆᓇᕐᓇᒡᓗ, ᖃᓂᓐᓂᑦ ᐅᕆᐊᕈᒫᕐᐸᒋᑦ!

¹⁷ ᐅᖃᕐᐳᑎᑦ, ᐊᔪᕐᓴᓐᖏᑑᕗᖓ, ᐱᖁᑎᖃᑦᓯᐊᕐᓗᖓ, ᑭᓐᖒᒪᔭᖃᕈᓐᓃᕐᓗᖓᓗ; ᖃᐅᔨᒪᓐᖏᓚᑎᓪᓕ ᐊᔪᕐᓴᕐᓂᕐᓂᒃ, ᑕᑯᑦᓱᓇᕐᑐᐊᓘᓂᕐᓂᒃ, ᐊᔪᕐᓴᕐᐳᑎᑦ, ᑕᐅᑐᖏᑦᑑᓪᓗᑎᑦ, ᐊᓐᓄᕌᖃᕐᓇᒡᓗ.

¹⁸ ᑍᒤᒻᒪᑦ ᐅᖃᐅᑎᕙᒋᑦ, ᓂᐅᕕᖁᓪᓗᑎᑦ ᒎᓗᒥᒃ ᐅᕙᓐᓂᑦ ᒎᓗᓪᓚᕆᖕᒥᒃ ᐃᑯᒪᒧᑦ ᐱᐅᖏᓐᓃᔭᕐᑕᐅᓯᒪᔪᒥᒃ, ᐊᔪᕐᓴᕈᓐᓃᖁᓪᓗᑎᑦ, ᐊᓐᓄᕌᕐᓗᑎᓪᓗ ᖃᑯᕐᑕᒥᒃ ᐊᓐᓄᕌᖃᖏᓐᓂᕐᒧᑦ ᑲᓐᖑᓇᕐᓃᑦ ᓴᖅᑭᔮᕈᓐᓃᖁᓪᓗᒍ, ᐃᔨᓯᐅᒻᒧᓪᓗ ᐃᔩᒃᑭᒃ ᒥᖑᐊᕐᓗᒋᒃ, ᑕᐅᑐᓕᕐᓂᐊᕋᕕᑦ.

¹⁹ ᓇᒡᓕᒋᔭᒃᑲ ᐃᓂᕐᑎᕐᓗᒋᑦ ᓱᒋᐊᖃᑦᑕᕐᐸᒃᑲ; ᑍᒤᒻᒪᑦ ᑲᑦᓱᖕᒊᓪᓗᑎᑦ ᖃᕿᐊᓕᕆᑦ.

²⁰ ᑕᑯᒋᑦ, ᒪᑐᒦᑉᐳᖓ ᑎᒡᓗᒃᑐᕐᓗᖓᓗ, ᓂᐱᓐᓂᒃ ᑐᓴᕐᑐᖃᕐᐸᑦ ᒪᑐᐃᕈᑦᔭᐅᒍᒪ, ᑕᑦᓱᒧᖓ ᐃᑎᕐᓂᐊᕐᐳᖓ ᓂᕆᖃᑎᒋᓂᐊᕐᐸᕋ, ᑖᑦᓱᒪᓗ ᓂᕆᖃᑎᒋᓗᓂᖓ.

²¹ ᓵᓚᖃᕐᑐᖅ, ᐃᒃᓯᕙᖃᑎᒋᔪᒫᕐᐸᕋ ᐃᒃᓯᕙᐅᑕᕐᔪᐊᓐᓂ, ᓵᓚᖃᕐᓯᒪᒐᒪᑦᑕᐅᑦ ᐊᑖᑕᒐ ᐃᒃᓯᕙᖃᑎᒋᓕᕋᒃᑯ ᐃᒃᓯᕙᐅᑕᕐᔪᐊᖓᓂ.

²² “‘ᓯᐅᑎᖃᕐᑑᑉ ᑐᓴᕐᓕᒋᑦ ᐊᓂᕐᓂᐅᑉ ᐃᑦᔪᕐᓁᑦᑑᑉ ᐅᖃᐅᓯᖏᑦ ᐅᒃᐱᕐᑑᖃᑎᒌᓄᑦ.’”