ᔪᐊᓇᓯᐅᑉ ᑕᑯᑎᑕᐅᓂᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᒃᐱᕐᑑᖃᑎᒌᓄᖅ ᐃᐱᓲᓯᒥᐅᓄᑦ ᐅᖃᐅᓰᑦ

¹ “ᐃᐱᓲᓯᒥᐅᑦ ᐅᒃᐱᕐᑑᖃᑎᒌᖏᑕ ᐂᖏᓖᖓᓐᓄᑦ ᑎᑎᕋᕆᑦ: “‘ᐅᑯᐊ ᐅᖃᐅᓰᑦ ᐅᓪᓗᕆᐊᓂᒃ 7ᓂᒃ ᑕᓕᕐᐱᖕᒥᓄᑦ ᑎᒍᒥᐊᕐᑐᒥᑦ ᐱᕗᑦ, ᖃᐅᒻᒪᖅᑯᑏᓪᓗ ᒎᓗᐃᑦ ᐃᓂᖏᑦᑕ 7 ᐊᑯᕐᖓᑦᑎᒍᑦ ᐱᓱᒃᑐᒥᑦ.

² ᐱᓂᐊᕐᓂᑎᑦ ᖃᐅᔨᒪᕙᒃᑲ, ᐊᒃᓱᕈᕐᓗᑎᑦ ᐱᓇᓱᐊᕐᓯᒪᓃᑦ ᕿᓄᐃᓵᕐᓯᒪᓃᓪᓗ, ᐱᐅᖏᑦᑐᓕᔪᓂᒡᓗ ᓈᒪᒃᓴᓕᕈᓐᓇᖏᓐᓇᕕᑦ ᐋᐴᓯᑕᓕᐅᓂᕋᕐᑐᓪᓗ ᐋᐴᓯᑕᓕᐅᓇᑎᒃ ᖃᐅᔨᓴᕐᓯᒪᒐᕕᒋᑦ, ᖃᐅᔨᓯᒪᓪᓗᒋᓪᓗ ᓱᓕᖏᓐᓂᖏᓐᓂᒃ.

³ ᖃᐅᔨᒪᕙᒋᑦ ᕿᓄᐃᓵᕐᓂᖃᕐᓯᒪᒐᕕᑦ ᐋᓐᓂᐊᑎᑕᐅᓯᒪᕗᑎᓪᓗ ᐊᑎᕋ ᐱᓪᓗᒍ, ᓴᐱᓕᓚᐅᓐᖏᓚᑎᓪᓗ.

⁴ ᐆᒥᖓᓕ ᓈᒻᒪᒃᓴᖏᑦᔪᑎᖃᕐᐳᖓ ᐃᓕᖕᓄᑦ, ᓯᕗᓪᓕᕐᒥᒃ ᓇᒡᓕᖕᓂᕆᓚᐅᕐᑕᕐᑐᑦ ᓇᒡᓕᖕᓂᖃᕈᓐᓃᕋᕕᑦ.

⁵ ᐃᖅᑬᓕᕆᑦ ᓇᑭᑦ ᑲᑕᒃᐸᓪᓕᐊᓕᕐᓂᕐᒪᖔᕐᐱᑦ, ᖃᕿᐊᓕᕐᓗᑎᑦ ᓯᕗᓪᓕᕐᒥᒃ ᐱᓇᓱᐊᕐᐸᓚᐅᕐᑕᑎᑦ ᐱᓇᓱᐊᓕᒃᑭᑦ. ᑍᒤᓐᓂᐊᖏᒃᑯᕕᑦ, ᕾᓗᖓ ᖃᐅᒻᒪᖅᑯᑎᕕᑦ ᐃᓂᖓ ᐲᕆᐊᕐᑐᕈᒫᕐᐸᕋ, ᖃᕿᐊᓕᖏᒃᑯᕕᑦ.

⁶ ᐃᒤᑦᑐᒥᒡᓕ ᓱᓕ ᐱᓯᒪᕗᑎᑦ, ᓂᑯᓔᑎᒥᐅᑦ ᐱᓂᐊᕐᓂᖏᑦ ᐆᒥᒋᒐᕕᒋᑦ, ᐅᕙᖓᑦᑕᐅᖅ ᐆᒥᒋᖕᒥᒐᒃᑭᑦ.

⁷ “‘ᓯᐅᑎᖃᕐᑑᑉ, ᑐᓴᕐᓕᒋᑦ ᐊᓂᕐᓂᐅᑉ ᐃᑦᔪᕐᓁᑦᑑᑉ ᐅᖃᐅᓯᖏᑦ ᐅᒃᐱᕐᑑᖃᑎᒌᓄᑦ. “‘ᓵᓚᖃᕐᑐᑦ ᓂᕆᔪᓐᓇᕐᑎᓐᓂᐊᕐᐸᒃᑲ ᓇᐹᕐᑐᒥᑦ ᐃᓅᓯᖃᕐᓇᕐᑐᒥᒃ ᐱᕈᕐᑐᓕᖕᒥᑦ, ᒎᑎᐅᑉ ᐸᕋᑍᓯᖓᓂ.’”

ᐅᒃᐱᕐᑑᖃᑎᒌᓄᑦ ᓯᒨᕐᓇᒥᐅᓄᑦ ᐅᖃᐅᓰᑦ

⁸ “ᓯᒨᕐᓇᒥᐅᑦ ᐅᒃᐱᕐᑑᖃᑎᒌᖏᑕ ᐂᖏᓖᖓᓐᓄᑦ ᑎᑎᕋᕆᑦ: “‘ᐅᑯᐊ ᐅᖃᐅᓰᑦ ᐱᕗᑦ, ᓯᕗᓪᓕᕐᐹᖑᔪᒥᑦ ᑭᖑᓪᓕᕐᐹᖑᔪᒥᓪᓗ, ᑐᖁᓚᐅᕐᓗᓂ ᒪᑭᓚᐅᕐᑐᒥᑦ.

⁹ ᐊᒃᓱᕈᕐᓇᕐᑐᒦᓐᓂᕆᔭᓯ ᖃᐅᔨᒪᕙᒃᑲ ᐊᔪᕐᓴᕐᓂᕆᔭᓯᓗ ᑭᓯᐊᓂᓕ ᐊᔪᕐᓴᓐᖏᑲᓗᐊᕐᐳᓯ ᐅᖃᐅᓯᐅᓂᕐᓗᖃᑦᑕᕐᓂᓯᓗ ᖃᐅᔨᒪᕙᒃᑲ ᔫᑎᐅᓂᕋᕐᑐᓄᑦ ᔫᑎᐅᓇᑎᒡᓗ, ᓵᑖᓇᓯᒥᒡᓕ ᐱᔨᑦᓯᕐᑎᐅᕗᑦ.

¹⁰ ᐊᒃᓱᕈᕐᓇᕐᑐᔪᐊᑰᓂᕆᓂᐊᕐᑕᓯ ᓯᕘᕋᒋᑦᑍᓕᓯᐅᒃ. ᑕᑯᒋᑦ, ᓵᑖᓇᓯᐅᑉ ᐆᒃᑐᕐᑕᐅᖁᓪᓗᓯ ᐃᓚᑦᓯ ᐃᓚᖏᓐᓂᒃ ᑎᒍᔭᐅᓯᒪᕕᖕᒧᐊᕐᑕᐅᑎᑦᓯᓂᐊᕐᐳᖅ, ᐊᒃᓱᕈᕐᓇᕐᑐᒃᑰᕐᓂᕆᓂᐊᕐᑕᓯᓗ ᐅᓪᓗᓂᒃ ᖁᓕᓂᒃ ᓯᕕᑐᓂᖃᕐᓂᐊᕐᐳᖅ. ᓱᖁᓯᕐᑍᓕᒋᑦᓯᓕ ᑐᖁ ᑎᑭᓪᓗᒍ, ᑕᕝᕙ ᑐᓂᓯᕕᒋᔪᒫᕐᐸᑦᓯ ᓂᐊᖂᑎᒥᒃ ᐃᓅᓯᖃᕐᓇᕐᑐᒥᒃ.

¹¹ “‘ᓯᐅᑎᖃᕐᑑᑉ, ᑐᓴᕐᓕᒋᑦ ᐊᓂᕐᓂᐅᑉ ᐃᑦᔪᕐᓁᑦᑑᑉ ᐅᖃᐅᓯᖏᑦ, ᐅᒃᐱᕐᑑᖃᑎᒌᓄᑦ. “‘ᓵᓚᖃᕐᑐᑦ ᐋᓐᓂᕐᑕᐅᓂᐊᓐᖏᓚᑦ ᑐᖂᑉ ᐂᑉᐸᖓᓄᑦ.’”

ᐅᒃᐱᕐᑑᖃᑎᒌᓄᑦ ᐴᕐᒐᒪᒥᐅᓄᑦ ᐅᖃᐅᓰᑦ

¹² “ᐴᕐᒐᒪᒥᐅᑦ ᐅᒃᐱᕐᑑᖃᑎᒌᖏᑕ ᐂᖏᓖᖓᓐᓄᑦ ᑎᑎᕋᕆᑦ: “‘ᐅᑯᐊ ᐅᖃᐅᓰᑦ ᐱᕗᑦ ᐃᒡᓗᒃᑐᑦ ᑮᓇᓕᖕᒥᒃ ᓴᕕᒡᔪᐊᖃᕐᑐᒥᑦ.

¹³ ᐃᓂᒋᔧᑦ ᖃᐅᔨᒪᕙᕋ, ᑕᕝᕙᓂ ᓵᑖᓇᓯ ᐃᒃᓯᕙᐅᑕᕐᔪᐊᖃᕐᐳᖅ; ᐅᕙᓐᓂᒡᓕ ᓱᓕ ᐃᒃᐱᒍᓱᑦᓯᐊᕐᐳᑎᑦ ᐅᒃᐱᕐᓂᕆᔧᓪᓗ ᐅᕙᓐᓄᑦ ᑲᔪᓯᑎᓯᒪᕙᑦ ᐋᓐᑎᐸᔅ ᐃᓅᑎᓪᓗᒍ ᓇᓗᓁᕐᓯᓂᕆᓚᐅᕐᑍᑦ, ᑖᓐᓇ ᓱᖁᓯᔪᐃᑦᑐᖁᑎᒋᓚᐅᕐᑕᕋ, ᐊᑯᓐᓇᑦᓯᓐᓂ ᑐᖁᑕᐅᓚᐅᕐᑐᖅ, ᓵᑖᓇᓯᐅᑉ ᐃᓂᖓᓂ.

¹⁴ ᐅᓄᖏᑦᑑᒐᓗᐊᓂᒡᓕ ᓈᒻᒪᒃᓴᖏᑦᔪᑎᒃᓴᖃᕐᐳᖓ ᐃᓕᖕᓄᑦ: ᓇᔪᕐᑕᕐᓂ ᒪᓕᒃᑐᕐᑕᖃᕐᒪᑦ ᐸᓛᒻᒥᐅᑉ ᐊᔪᕆᕐᑑᓯᖏᓐᓂᒃ, ᑖᓐᓇ ᐹᓚᒃ ᐊᔪᕆᕐᑐᐃᓚᐅᕐᒪᑦ ᐃᓴᕆᐊᓕᒥᐅᓂᒃ ᐊᒡᕕᐊᕈᑎᒃᓴᓕᐅᕆᓪᓗᓂ, ᓂᕆᑎᓪᓗᒋᑦ ᒎᑎᓐᖑᐊᓄᑦ ᑐᓂᕐᕈᑕᐅᔪᕕᓂᕐᓂᒃ ᓄᓕᐊᕐᓂᕐᒥᒡᓗ ᐊᑐᕐᓂᕐᓗᖁᓪᓗᒋᑦ.

¹⁵ ᐊᒻᒪᑦᑕᐅᖅ ᓂᑯᓔᑎᒥᐅᑦ ᐊᔪᕆᕐᑑᓯᖏᓐᓂᒃ ᒪᓕᒃᑐᕐᑕᖃᕆᓪᓗᓯ.

¹⁶ ᖃᕿᐊᓕᓕᕆᑦ. ᖃᕿᐊᓕᖏᒃᑯᕕᑦ, ᒫᓐᓇᒃᑯᑦ ᐅᐸᖕᓂᐊᕐᐸᒋᑦ ᐅᓇᑕᕆᐊᕐᑐᕐᓗᒋᑦ ᓴᕕᒡᔪᐊᕐᒧᑦ ᖃᓂᓐᓃᑦᑐᒧᑦ.

¹⁷ “‘ᓯᐅᑎᖃᕐᑑᑉ ᑐᓴᕐᓕᒋᑦ ᐊᓂᕐᓂᐅᑉ ᐃᑦᔪᕐᓁᑦᑑᑉ ᐅᖃᐅᓯᖏᑦ ᐅᒃᐱᕐᑑᖃᑎᒌᓄᑦ. “‘ᓵᓚᖃᕐᑐᑦ ᑐᓂᓯᕕᒋᓂᐊᕐᐸᒃᑲ ᓂᕿᒃᓴᒥᒃ ᒫᓇᒥᒃ ᐃᔨᕐᓯᒪᔪᒥᒃ, ᑐᓂᓯᕕᒋᓗᒋᓪᓗ ᐅᔭᕋᖕᒥᒃ ᖃᑯᕐᑕᒥᒃ, ᑕᕝᕙᓂ ᐊᑎᖏᑦ ᓄᑖᑦ ᑎᑎᕋᕐᓯᒪᓂᐊᕐᐳᑦ ᐊᓯᖏᓐᓄᑦ ᖃᐅᔨᒪᔭᐅᖏᑦᑐᑦ ᑐᓂᓯᕕᐅᔫᑉ ᑭᓯᒥ ᖃᐅᔨᒪᓂᐊᕐᐰᑦ.’”

ᐅᒃᐱᕐᑑᖃᑎᒌᓄᑦ ᑍᐊᑍᕋᒥᐅᓄᑦ ᐅᖃᐅᓰᑦ

¹⁸ “ᑍᐊᑍᕋᒥᐅᑦ ᐅᒃᐱᕐᑑᖃᑎᒌᖏᑕ ᐂᖏᓖᖓᓄᑦ ᑎᑎᕋᕆᑦ: “‘ᐅᖃᐅᓰᑦ ᐅᑯᐊ ᐱᕗᑦ ᒎᑎᐅᑉ ᐃᕐᓂᖓᓂᑦ, ᐃᔨᖅᑲᕐᑑᑉ ᐃᑯᒪᔪᑎᑐᑦ ᑍᒤᑦᑑᖕᓂᒃ, ᐃᑎᒐᖃᕐᑑᓪᓗ ᑲᓐᓄᔭᑎᑐᑦ ᕿᓪᓚᕆᒃᓴᕐᑕᐅᓯᒪᔪᑎᑐᑦ ᑍᒤᑦᑑᖕᓂᒃ.

¹⁹ ᐱᓂᐊᕐᓂᑎᑦ ᖃᐅᔨᒪᕙᒃᑲ, ᓇᒡᓕᒍᓱᖕᓃᑦ ᓱᖁᓯᔪᐃᑦᑑᓃᑦ ᐱᓇᓱᐊᕐᓃᓪᓗ ᕿᓄᐃᓵᕐᓃᓪᓗ, ᒫᓐᓇᓗ ᐱᓇᓱᐊᕐᓂᕐᓴᐅᓕᕋᕕᑦ ᐱᒋᐊᓕᓵᕐᓂᕆᓚᐅᕐᑕᕐᓂᑦ.

²⁰ ᓈᒻᒪᒃᓴᖏᑦᔪᑎᖃᕐᐳᖓᓕ ᐃᓕᖕᓄᑦ ᐃᒤᑦᑐᒥᒃ, ᐊᕐᓇᖅ ᔨᓴᐱᐊᓕ ᓱᖁᑎᒋᓐᖏᓐᓇᕕᐅᒃ, ᓇᓚᐅᑦᑍᔫᓂᕋᕐᑎᓪᓗᒍ ᐊᔪᕆᕐᑐᐃᓂᕐᒥᒍᑦ ᑕᒻᒪᕐᑎᑦᓯᓕᕐᒪᑦ ᐱᔨᓐᓂᒃ ᓄᓕᐊᕐᓂᕐᒥᒡᓗ ᐊᑐᕐᓂᕐᓗᒃᑎᓪᓗᓂᒋᑦ ᓂᕆᑎᑦᓯᕙᒡᓗᓂᓗ ᒎᑎᓐᖑᐊᓄᑦ ᑐᓂᕐᕈᑕᐅᓯᒪᔪᓂᒃ.

²¹ ᖃᕿᐊᓕᕐᕕᒃᓴᖃᕐᑎᓚᐅᕋᓗᐊᕐᐸᕋ, ᑭᓯᐊᓂᓕ ᓄᓕᐊᕐᓂᒃᑯᑦ ᐊᑐᕐᓂᕐᓗᖕᓂᕐᒥᑦ ᖃᕿᐊᓕᕈᒪᓚᐅᓐᖏᓚᖅ.

²² ᑕᑯᒋᑦ, ᐃᒡᓕᕐᒥᑦ ᒪᑭᔪᐃᑦᑐᓐᖑᕐᑎᓐᓂᐊᕐᐸᕋ, ᐊᓯᓐᓂᐊᖃᑎᒋᕙᒃᑕᖏᓪᓗ ᐱᖃᓯᐅᑎᓗᒋᑦ ᐊᖏᔪᒥᒃ ᐋᓐᓂᐊᑎᑦᓱᒫᕐᐸᒃᑲ, ᖃᕿᐊᓕᕐᓂᐊᓐᖏᑐᐊᕐᐸᑦ ᐱᓂᐊᕐᓂᕆᕙᒃᑕᒥᓂᑦ ᐱᐅᖏᑦᑐᓂᑦ;

²³ ᕿᑐᕐᖓᖏᓪᓗ ᑐᖁᖃᓯᐅᑎᓂᐊᕐᐸᒃᑲ. ᐅᒃᐱᕐᑑᖃᑎᒌᓕᒫᑦ ᖃᐅᔨᖁᓪᓗᒋᑦ ᐅᕙᖓᐅᒐᒪ ᖃᐅᔨᒪᔪᑐᐊᖅ ᐃᓄᐃᑦ ᐃᓱᒪᖏᓐᓂᒃ ᐆᒻᒪᒻᒥᐅᑕᖏᓐᓂᒡᓗ, ᐊᑐᓂᓪᓗ ᐱᓂᐊᕐᕕᒋᔪᒫᕐᐸᑦᓯ ᐱᓂᐊᕐᓂᓯ ᒪᓕᒡᓗᒋᑦ.

²⁴ “‘ᑍᐊᑍᕋᒥᐅᑕᐅᔪᓯᓕ, ᐊᔪᕆᕐᑐᐃᓂᕐᓗᖕᓂᕐᒥᒃ ᑕᒪᑐᒥᖓ ᒪᓕᓐᖏᓚᓯ, ᖃᐅᔨᓚᐅᖏᑦᑐᓯᓗ ᓵᑖᓇᓯᐅᑉ ᐃᔨᕐᓯᒪᓪᓚᕆᒃᑐᒃᑯᑦ ᐱᓇᓱᐊᕐᓂᖓᓂᒃ, ᐃᓕᑦᓯᓐᓄᑦ ᐅᖁᒤᑦᑐᒋᐊᓪᓚᖕᒥᒃ ᐱᑎᑦᓯᓂᐊᓐᖏᓚᖓ;

²⁵ ᑎᑭᓚᐅᖏᓐᓂᓐᓂ, ᐱᓯᒪᔭᑦᓯᓐᓂᒃ ᓴᑯᐃᑦᑍᓕᒋᑦᓯ.

²⁶ ᓵᓚᖃᕐᑐᖅ ᐱᓇᓱᐊᕐᑕᐅᖁᔭᓐᓂᒡᓗ ᐱᓇᓱᐊᖏᓐᓇᕐᓗᓂ ᐃᓱᓕᑦᑎᔪᖅ, ᐱᔪᓐᓇᕐᓂᕐᑖᕐᑎᑦᓱᒪᕙᕋ ᐃᓅᖃᑎᒌᒡᔪᐊᓄᑦ,

²⁷ ᐊᐅᓚᑦᓯᓂᐊᕐᐳᕐᓗ ᓴᕕᕋᔭᖕᒥᒃ ᐊᔭᐅᑉᐱᐊᖃᕐᓗᓂ, ᓯᖁᒥᑦᓯᔪᓐᓇᕐᓗᓂ ᒪᕐᕋᓕᐅᕐᑎᐅᓪᓗ ᐃᓗᓕᖁᑎᖏᑎᑐᑦ ᓯᖁᒥᑦᓱᒫᕐᐰᑦ, ᐅᕙᖓᑦᑕᐅᖅ ᐊᑖᑕᓐᓂᑦ ᐱᔪᓐᓇᕐᓂᕐᑖᕐᑎᑕᐅᓯᒪᓂᑦᑐᑦ;

²⁸ ᑐᓂᓯᕕᒋᓂᐊᕐᐸᕋᓗ ᐅᓪᓗᕆᐊᒥᒃ ᖃᐅᓕᕐᑐᕐᓯᐅᒻᒥᒃ.

²⁹ “‘ᓯᐅᑎᖃᕐᑑᑉ ᑐᓴᓕᕐᒋᑦ ᐊᓂᕐᓂᐅᑉ ᐃᑦᔪᕐᓁᑦᑑᑉ ᐅᖃᐅᓯᖏᑦ ᐅᒃᐱᕐᑑᖃᑎᒌᓄᑦ.’”