ᐃᓐᖏᕈᑎᑦ 84 - ᐊᒡᓔᑦ ᐃᑦᔪᕐᖕᓁᑦᑐᑦᒎᑎᐅᑉ ᐃᒡᓗᖓᓃᑦᓱᒥᓇᕐᓂᖓ ᑰᕋᐅᑉ ᐃᕐᓂᖏᑕ ᐃᓐᖏᕈᑖ 1 ᑐᐱᖅ ᐃᓂᒋᔧᑦ ᑕᑯᒥᓇᕐᑐᕐᔪᐊᖑᕗᖅ, ᕿᓚᖕᒥᐅᒐᓴᕐᔪᐃᑦ ᐊᑕᓂᖓᑦ! 2 ᑕᕐᓂᕐᒪ ᐅᖓᒋᕚ, ᐄᓛᒃ, ᐃᓗᓐᓂᑦ ᐱᔪᒧᑦ ᐃᓂᒋᔭᖓᓃᑦᓱᒪᕗᖓ; ᐆᒻᒪᑎᒪ ᑎᒥᒪᓗ ᖁᕕᐊᓱᖕᓂᕐᒧᑦ ᐃᓐᖏᕐᕕᒋᕚ ᒎᑎ ᐆᒪᑦᓮᓐᓇᕐᑐᖅ. 3 ᐊᒡᓛᑦ ᖁᐸᓄᐊᑦ ᐊᖏᕐᕋᒃᓴᒥᖕᓂᒃ ᓇᒡᕚᕐᐳᑦ ᑕᕝᕙᓂ, ᖁᐸᓄᐊᓪᓗ ᐸᐱᑯᑖᓖᑦ ᑕᕝᕙᓂ ᐅᓪᓗᓕᐅᕐᓯᒪᓪᓗᑎᒃ, ᕿᑐᕐᖓᒥᓂᒃ ᐃᕙᕕᖃᕈᒪᓪᓗᓂ, ᑐᓂᕐᕈᓯᕐᕕᖁᑎᕕᑦ ᓴᓂᐊᓂ, ᕿᓚᖕᒥᐅᒐᓴᕐᔪᐃᑦ ᐊᑕᓂᖓᑦ, ᐊᖓᔪᖅᑳᕐᔪᐊᕆᔭᕋ ᒎᑎᒐᓗ. 4 ᖁᕕᐊᓱᒍᑎᒃᓴᖃᕐᐳᑦ ᐃᒡᓗᖕᓂ ᐊᖏᕐᕋᖃᕐᑐᑦ; ᑕᕝᕙᓂ ᓂᕐᑐᐃᑦᓮᓐᓇᕐᑐᑦ ᐃᓕᖕᓂᒃ! ᓰᓚ 5 ᖁᕕᐊᓱᒍᑎᒃᓴᖃᕐᐳᖅ ᐃᓄᒃ ᐃᓕᖕᓂᒃ ᐱᔪᓐᓇᐅᑎᖃᕐᑐᖅ, ᑖᑦᓱᒪ ᐆᒻᒪᑎᖓ ᑲᔪᓯᑦᓯᐊᕐᐳᖅ ᓮᐅᓂᒧᑦ. 6 ᓇᕐᓴᒃᑰᓕᕈᑎᒃ ᐸᓂᕐᑐᒃᑯᑦ ᐹᑲᒥᒃ ᐊᑎᓕᒃᑯᑦ, ᑕᕝᕙ ᐃᒥᕐᒧᑦ ᑰᒡᕕᐅᓕᕐᐳᑦ; ᓯᓚᓗᖕᒧᓪᓗ ᐅᑭᐊᒃᓵᕐᓯᐅᒻᒧᑦ ᓄᓇ ᐃᒪᖃᓕᕐᑎᑕᐅᕗᖅ. 7 ᐃᖏᕐᕋᕗᑦ ᐱᔪᓐᓇᕐᓂᕐᒥᑦ ᐱᔪᓐᓇᕐᓂᕐᒧᑦ; ᐊᑐᓂᓪᓗ ᑕᒤᓐᓄᑦ ᒎᑎᐅᔪᒧᑦ ᐅᐸᒍᑎᕗᑦ ᓮᐅᓂᒧᑦ. 8 ᐊᑕᓃᖅ ᕿᓚᖕᒥᐅᒐᓴᒡᔪᐃᑦ ᒎᑎᖓᑦ, ᑐᒃᓯᐊᕐᓂᕋ ᑐᓴᕈᒃ; ᑐᓵᓚᐅᓐᖓ, ᔧᑰᑉ ᒎᑎᖓ! ᓰᓚ 9 ᒎᑏ ᓴᐴᓗᑕᕆᔭᕗᑦ, ᐅᕐᓱᕐᑎᕐᓯᒪᔭᕐᐱᑦ ᑮᓇᖓ ᑕᑯᓴᓚᐅᕈᒃ. 10 ᐅᓪᓗᒥᒃ ᐊᑕᐅᓯᕐᒥᒃ ᑐᒃᓯᐊᕐᕕᒡᔪᐊᑉ ᑐᕐᓲᖓᓃᓪᓗᓂ ᐱᐅᓂᕐᓴᐅᕗᖅ ᐅᓪᓗᓂᒃ 1,000ᓂᒃ ᓇᓂᑐᐃᓐᓈᕋᔭᕐᓂᕐᒥᑦ. ᒎᑎᒪ ᐃᒡᓗᖓᑕ ᐃᑎᕐᑕᕐᕕᖓᓂ ᑲᒪᔨᐅᖔᕈᒪᒐᔭᕐᐳᖓ; ᐱᐅᖏᑦᑐᑦ ᐊᖏᕐᕋᖏᓐᓂ ᐊᑯᓂ ᐃᓂᖃᕋᔭᕐᓂᕐᒥᑦ. 11 ᐊᑕᓂᖅ ᒎᑎ ᓯᕿᓂᐅᖕᒪᑦ ᓴᐴᓗᑕᐅᓪᓗᓂᓗ; ᐊᑕᓂᖅ ᖁᕕᐊᒋᔭᐅᓂᕐᒥᒃ ᓂᕐᑐᕐᓇᕐᓂᕐᒥᒡᓗ ᑐᓂᓯᕗᖅ; ᐃᓅᑦᓯᐊᕋᓱᐊᕐᑐᑦ ᐊᑕᓂᐅᑉ ᐱᐅᔪᒥᒃ ᐊᔪᕐᓴᖁᓂᐊᓐᖏᓔᑦ. 12 ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ, ᖁᕕᐊᓱᒍᑎᒃᓴᖃᕐᐳᖅ ᐃᓄᒃ ᐃᓕᖕᓂᒃ ᑕᑎᖃᕐᑐᖅ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society