ᐃᓐᖏᕈᑎᑦ 56 - ᐊᒡᓔᑦ ᐃᑦᔪᕐᖕᓁᑦᑐᑦᑐᒃᓯᐊᕐᓂᖅ ᐃᓱᒪᔮᕐᑎᑦᓯᔪᓂᑦ ᓴᐳᑎᔭᐅᔪᒪᓂᕐᒧᑦ ᑍᕕᑎᐅᑉ ᐃᓐᖏᕈᑖ, ᐱᓕᔅᑍᓂᓂᑦ ᑎᒍᔭᐅᒐᒥ ᒑᑎᒥ 1 ᓂᑲᒋᓚᐅᓐᖓ, ᒎᑏ, ᐃᓄᐃᑦ ᐊᒃᓱᕈᕐᓗᑎᒃ ᐱᓇᓱᐊᕐᒪᖓ; ᐅᓇᑕᕈᒪᓪᓗᑎᒃ ᐅᓪᓗᖅ ᓈᓪᓗᒍ ᐃᓱᒪᔮᕐᑎᑉᐹᖓ. 2 ᐊᑭᕋᒪ ᕿᓂᕐᐹᖓ ᐅᓪᓗᖅ ᓈᓪᓗᒍ, ᐅᓄᕐᑐᑦ ᐅᕙᓐᓄᑦ ᐅᓇᑕᕈᒪᖕᒪᑕ. 3 ᖃᖓᓕᒫᖅ ᓯᕘᕋᓕᕌᖓᒪ, ᑕᑎᒋᖃᑦᑕᕐᓂᐊᕐᐸᒋᑦ. 4 ᒎᑎᐅᑉ, ᑖᑦᓱᒪ ᐅᖃᐅᓯᖓ ᓂᕐᑐᕐᐸᕋ, ᒎᑎ ᑕᑎᒋᒐᒃᑯ ᑲᑉᐱᐊᓱᖕᓂᐊᓐᖏᓚᖓ. ᐃᓅᑉ ᑎᒥᖃᕐᑑᑉ ᖃᓄᐃᓕᐅᕈᓐᓇᕐᐹᖓ? 5 ᐅᓪᓗᖅ ᓈᓪᓗᒍ ᐅᖃᐅᓯᒃᑲ ᐃᒡᓗᐊᓄᑦ ᒧᒥᒃᑎᑉᐰᑦ, ᐃᓱᒪᒃᓴᕐᓯᐅᕐᐳᑦ ᐊᑭᕋᕐᑐᕈᒪᓪᓗᖓ ᐱᐅᖏᑦᑐᒧᑦ. 6 ᑲᑎᒪᕗᑦ ᐃᓱᒪᓕᐅᕐᓗᑎᒃ, ᐃᔨᕐᓯᒪᓪᓗᑎᒃ ᖃᐅᔨᓴᕐᐳᑦ, ᓇᒧᓐᖓᐅᓂᓕᒫᒃᑲᓗ ᖃᐅᔨᒪᓇᓱᐊᕐᐰᑦ, ᐅᑕᖅᑭᕗᓪᓗ ᑐᖁᑦᓱᒪᓪᓗᖓ. 7 ᐱᐅᖏᑦᑐᓕᓂᖏᑦ ᐱᓪᓗᒋᑦ ᓱᒋᐊᓚᐅᒃᑭᑦ; ᒎᑏ, ᓂᓐᖓᐅᒪᓂᕐᓄᑦ ᐃᓄᐃᑦ ᑲᑕᒃᑎᒃᑭᑦ! 8 ᕿᒫᖃᑦᑕᕐᓂᕐᒪ ᖃᑦᓯᐅᓂᖏᓐᓂᒃ ᖃᐅᔨᒪᕗᑎᑦ; ᖁᕝᕕᒃᑲ ᐊᓕᒍᖁᑎᖕᓄᑦ ᐴᒃᑭᑦ; ᐊᒡᓚᖁᑎᖕᓂ ᑎᑎᕋᕐᓯᒪᓐᖏᓛᑦ? 9 ᐃᓕᖕᓄᑦ ᓂᓪᓕᐊᓕᕈᒪ ᐊᑭᕋᕐᑐᕐᑎᒃᑲ ᑕᕝᕙ ᐅᑎᕆᐊᕐᓂᐊᕐᐳᑦ; ᑕᒪᓐᓇ ᖃᐅᔨᑦᔪᑎᒋᓂᐊᕐᐸᕋ ᒎᑎᐅᑉ ᐃᓚᒋᖕᒪᖓ. 10 ᒎᑎᒥ, ᑖᑦᓱᒪ ᐅᖃᐅᓯᖓ ᓂᕐᑐᕐᓂᐊᕐᐸᕋ, ᐊᑕᓂᕐᒥᓗ, ᐅᖃᐅᓯᖓ ᓂᕐᑐᕐᓂᐊᕐᐸᕋ, 11 ᒎᑎᒥᒃ ᑕᑎᖃᕋᒪ ᓱᓇᒥᒃ ᐃᕐᓯᓂᐊᓐᖏᓚᖓ. ᐃᓅᑉ ᖃᓄᖅ ᐱᓂᐊᕐᕕᒋᔪᓐᓇᕐᐹᖓ? 12 ᐊᖏᕈᑎᒋᓯᒪᔭᒃᑲ ᐃᓕᖕᓄᑦ ᐊᑐᕐᓗᒋᑦ ᑭᓯᐊᓂᐅᕗᖅ, ᒎᑏ; ᐃᓕᖕᓄᑦ ᑐᓂᕐᕈᓯᓂᐊᕐᐳᖓ ᖁᔭᓕᑦᔪᑎᓐᓂᒃ. 13 ᑕᕐᓂᕋ ᓴᐳᑎᓯᒪᒐᕕᐅᒃ ᑐᖁᒥᑦ, ᐄᓛᒃ, ᐃᑎᒐᒃᑲ ᐅᕐᕈᑦᔧᕐᓯᒪᑎᑉᐸᑎᑦ ᒎᑎᐅᑉ ᓵᖓᓂ ᐱᓱᒍᓐᓇᖁᓪᓗᖓ ᐃᓅᓯᐅᑉ ᖃᐅᒪᓂᖓᓂ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society