ᐃᓐᖏᕈᑎᑦ 20 - ᐊᒡᓔᑦ ᐃᑦᔪᕐᖕᓁᑦᑐᑦᑐᒃᓯᐊᕐᓂᖅ ᓵᓚᑲᕐᑎᑕᐅᔪᒪᓂᕐᒧᑦ ᐃᓐᖏᕐᑏᑦ ᑲᒪᔨᖓᓐᓄᑦ ᑍᕕᑎᐅᑉ ᐃᓐᖏᕈᑖ 1 ᐊᑕᓂᐅᑉ ᑐᓴᕐᓕᑎᑦ ᐅᖁᒤᑦᑐᒥᒃ ᐅᓪᓗᖃᕐᑎᓪᓗᑎᑦ; ᔧᑰᓪᓗ ᒎᑎᖓᑕ ᐊᑎᖓᑕ ᓴᐳᑎᓯᒪᓕᑎᑦ! 2 ᐃᑲᔪᕐᑎᒃᓴᒥᒡᓗ ᑎᓕᓯᕕᒋᓕᑎᑦ ᐃᑦᔪᕐᓁᑦᑐᕕᖁᑎᒥᓂᑦ, ᐱᔪᓐᓇᕐᓂᖃᕐᑎᓪᓕᑎᓪᓗ ᓮᐅᓂᒥᑦ ᐱᔪᒥᒃ. 3 ᑐᓂᕐᕈᑎᑎᑦᑐᖅ ᑕᒪᕐᒥᒃ ᐃᖅᑲᐅᒪᓕᒋᑦ ᑐᓂᕐᕈᑎᑎᓪᓗ ᐆᑕᒃᓮᑦ ᐃᓚᓕᐅᕐᓕᒋᑦ. ᓰᓚ 4 ᑐᓂᓯᕕᒋᓕᑎᓪᓗ ᐆᒻᒪᑎᕕᑦ ᐱᔪᒪᔭᖏᓐᓂᒃ ᖃᓄᐃᓕᐅᕈᒪᔭᑎᓪᓗ ᑲᔪᓯᑎᑦᓯᐊᕐᓕᒋᑦ. 5 ᖁᕕᐊᓱᖕᓂᕐᒥᒃ ᓂᓪᓕᐊᔪᒫᕐᐳᒍᑦ ᓵᓚᖃᕐᓂᕐᓂᒃ, ᒎᑎᑦᑕᓗ ᐊᑎᖓᓂ ᓮᒻᒪᑎᕗᑦ ᓇᑉᐸᕐᑎᑦᓱᒪᕙᕗᑦ! ᐊᑕᓂᐅᑦᑐᖅ ᕿᓄᐊᕆᔭᓕᒫᕐᓂᒃ ᑐᓂᓯᕕᒋᓕᑎᑦ. 6 ᒫᓐᓇᓕ ᖃᐅᔨᒪᕗᖓ ᐊᑕᓂᐅᑉ ᐅᕐᓱᕐᑎᕐᓯᒪᔭᓂ ᐃᑲᔪᕐᓂᐊᕐᒪᒋᑦ; ᑐᓴᕐᓂᐊᕐᐹᓗ ᕿᓚᖕᒥᑦ ᐃᑦᔪᕐᓁᑦᑐᒥᑦ ᐱᐅᓕᕐᓯᓂᕐᒥᓄᑦ ᓴᓐᖏᔪᒧᑦ ᑕᓕᕐᐱᖕᒥᓄᑦ. 7 ᐃᓚᖏᑦ ᑕᑎᖃᕐᐳᑦ ᐊᒃᓴᓗᐊᓕᖕᓂᒃ ᐃᑭᒪᕕᖕᓂᒃ, ᐃᓚᖏᓪᓗ ᑕᑎᖃᕐᐳᑦ ᕿᒧᒃᓯᐅᑎᓂᒃ; ᐅᕙᒍᓪᓕ ᐃᖅᑲᐅᒪᔪᒪᕗᒍᑦ ᐊᑕᓂᐅᑉ ᒎᑎᑦᑕ ᐊᑎᖓᓂᒃ. 8 ᑍᒃᑯᐊᓕ ᐅᕐᕈᐃᓐᓇᕐᐳᑦ ᐅᕐᕈᖓᓕᕐᓗᑎᒃ; ᐅᕙᒍᓪᓕ ᒪᑭᑕᕗᒍᑦ ᓇᐸᓪᓗᑕᓗ ᓇᖏᕐᐳᒍᑦ. 9 ᐱᐅᓕᕐᓯᓚᐅᕆᑦ ᐊᑕᓃᖅ! ᐊᖓᔪᖅᑳᕐᔪᐊᑉ ᑭᐅᓕᑎᒍᑦ ᓂᓪᓕᐊᔭᕌᖓᑦᑕ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society