ᐃᓐᖏᕈᑎᑦ 112 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓱᐊᕐᑐᓕᔫᑉ ᓮᒻᒪᕐᑕᐅᑦᔪᑎᒃᓴᖃᕐᓂᖓ

¹ ᐊᑕᓂᖅ ᓂᕐᑐᕐᑕᐅᓕ! ᑐᓱᓐᓇᕐᐳᖅ ᐃᓄᒃ ᐊᑕᓂᕐᒥᒃ ᓯᕘᕋᔪᖅ, ᑖᑦᓱᒪᓗ ᐱᖁᔭᖏᓐᓂᒃ ᖁᕕᐊᒋᔭᖃᕐᑐᖅ.

² ᑖᑦᓱᒪ ᑭᖑᕚᖏᑦ ᐊᔪᖏᑦᑐᕐᔪᐊᖑᓂᐊᕐᐳᑦ ᓄᓇᒥ; ᑭᖑᕚᕇᒃᐸᓪᓕᐊᔪᖁᑎᖏᓪᓗ ᓮᒻᒪᕐᑎᑕᐅᓯᒪᓂᐊᕐᓱᑎᒃ.

³ ᐃᓚᒌᑦ ᐱᖁᑎᖃᑦᓯᐊᕐᓂᐊᕐᐳᑦ ᐊᔪᕐᓴᖏᑦᑑᓗᑎᒡᓗ, ᐃᓅᑦᓯᐊᕐᓂᖓᓗ ᒪᑭᑕᓂᐊᕐᓗᓂ ᐃᓱᖃᖏᑦᑐᒧᑦ.

⁴ ᐃᓄᑦᓯᐊᕙᐅᔪᖅ ᖃᐅᒪᕕᐅᕙᒃᐳᖅ ᑖᕐᑐᒦᑎᓪᓗᒍ, ᓂᑲᒍᓱᖕᓂᖃᕐᑐᖅ, ᐱᑦᓯᐊᕐᑐᕐᓗ, ᐊᑲᐅᔪᓕᔪᕐᓗ.

⁵ ᐱᓪᓗᕆᒃᐳᖅ ᐊᓐᓂᕈᓱᖃᖏᑦᑐᖅ ᐊᑦᑕᑐᕐᑎᑦᓯᖃᑦᑕᕐᑐᕐᓗ; ᑖᑦᓱᒪ ᒪᑭᒪᐅᑎᒃᓴᓂ ᓯᓔᕐᕆᒃᓯᓂᖃᖏᑦᑐᒃᑯᑦ ᐋᖅᑭᒃᓯᒪᑎᓐᓂᐊᕐᒪᒋᑦ.

⁶ ᑖᑦᓱᒪᓗ ᐱᓇᓱᐊᕐᓂᖓ ᐊᐅᓚᑎᑕᐅᓂᐊᓐᖏᓚᖅ; ᐃᓱᐊᕐᑐᓕᔪᖅ ᐃᖅᑲᐅᒪᔭᐅᓂᐊᕐᐳᖅ ᐃᓱᖃᖏᑦᑐᒧᑦ.

⁷ ᐱᐅᖏᑦᑐᓂᒃ ᑐᓴᕐᑎᑕᐅᒐᓗᐊᕈᓂ ᓯᕘᕋᓂᐊᓐᖏᓚᖅ; ᑖᑦᓱᒪ ᐆᒻᒪᑎᖓ ᐊᐅᓚᖏᑦᑐᒦᒻᒪᑦ, ᐊᑕᓂᕐᒥᒃ ᑕᑎᖃᕐᓗᓂ.

⁸ ᑖᑦᓱᒪ ᐆᒻᒪᑎᖓ ᐋᖅᑭᒌᕐᓯᒪᖕᒪᑦ, ᓯᕘᕋᓂᐊᓐᖏᓚᖅ, ᑕᑯᓚᐅᖅᑳᕋᓂ ᐆᒥᒋᔨᖏᑕ ᓵᓚᒋᔭᐅᓂᖏᓐᓂᒃ.

⁹ ᐂᑦᑐᕐᑐᐃᖃᑦᑕᕐᑐᖅ ᐊᓐᓂᕈᓱᒐᓂ, ᑐᓂᓯᖃᑦᑕᕐᑐᕐᓗ ᐃᑲᔪᕐᑕᐅᔭᕆᐊᓕᖕᓄᑦ; ᑖᑦᓱᒪ ᓇᓛᒎᕐᓂᖓ ᐃᓱᖃᖏᑦᑐᒧᑦ ᐃᓕᖓᕗᖅ; ᑖᑦᓱᒪ ᐱᔪᓐᓇᕐᓂᖓ ᐊᖏᒡᓕᑎᑕᐅᓂᐊᕐᐳᖅ ᐅᐱᒋᔭᐅᓗᓂᓗ.

¹⁰ ᐱᐅᖏᑦᑑᑉ ᑕᒪᓐᓇ ᑕᑯᓂᐊᕐᐹ ᓂᓐᖓᒍᑎᒋᓂᐊᕐᐹᓗ; ᐆᒥᓱᖕᓂᕐᒧᑦ ᑮᑦᔫᒥᓗᑎᒃ ᑮᓇᕐᓕᕐᓗᑎᒃ ᕿᒪᕉᑎᓂᐊᕐᐳᑦ; ᐱᐅᖏᑦᑑᑉ ᐱᔪᒪᔭᖓ ᐊᓯᐅᖕᒪᑦ.