ᐃᓐᖏᕈᑎᑦ 108 - ᐊᒡᓔᑦ ᐃᑦᔪᕐᖕᓁᑦᑐᑦᑐᒃᓯᐊᕐᓂᖅ ᐃᑲᔪᕐᑕᐅᔪᒪᓂᕐᒧᑦ ᐊᑭᕋᕐᑐᑏᑦ ᐱᓪᓗᒋᑦ ᐃᓐᖏᕈᑦ 57:7-11 ; 60:5-12 ᑍᕕᑎᐅᑉ ᐃᓐᖏᕈᑖ 1 ᒎᑏ, ᐆᒻᒪᑎᒐ ᐃᓕᖕᓄᑦ ᐊᑐᐃᓐᓇᕈᕐᓯᒪᕗᖅ; ᐃᓐᖏᕐᓂᐊᕐᐳᖓ ᓂᕐᑐᕐᓗᑎᑦ! ᐱᔪᓐᓇᕐᓂᓕᒫᑦᓯᐊᓐᓄᑦ! ᑕᕐᓃᒃ ᑐᐸᓕᕆᑦ! 2 ᑯᑭᑦᑕᐸᐅᑎᐅᔧᑦ ᑐᐸᓕᕆᑦᓯ ᕼᐋᕐᐲᑦ ᓔᕇᓪᓗ! ᐅᓪᓛᒻᒪᕆᒃᑯᑦ ᖃᐅᒻᒪᓕᓵᕐᑎᓪᓗᒍ ᒪᑭᓐᓂᐊᕐᐳᖓ. 3 ᐊᑕᓃᖅ ᖁᔭᒋᓂᐊᕐᐸᒋᑦ, ᐃᓄᐃᑦ ᐊᑯᕐᖓᓐᓂ: ᐃᓐᖏᕐᓂᐊᕐᐳᖓ ᐃᓕᖕᓄᑦ ᐃᓅᖃᑎᒌᒡᔪᐊᑦ ᐊᑯᕐᖓᓐᓂ. 4 ᓇᒡᓕᖕᓃᑦ ᓱᖁᓯᔪᐃᑦᑐᖅ ᖁᑦᓯᖕᓂᕐᓴᐅᖕᒪᑦ ᕿᓚᖕᒥᑦ, ᓱᕐᕋᔪᐃᑦᑑᓃᓪᓗ ᓄᕗᔭᓄᑦ ᑎᑭᐅᒪᓪᓗᓂ. 5 ᐊᖏᔪᕈᕐᑎᑕᐅᒋᑦ ᒎᑏ, ᕿᓚᖕᒥᑦ ᖁᕝᕙᓯᖕᓂᕐᓴᒥᒃ, ᓂᕐᑐᕐᓇᕐᓃᓪᓗ ᓄᓇᕐᔪᐊᕐᒥᑦ ᐊᖏᓂᕐᓴᐅᓗᓂ. 6 ᓇᒡᓕᒋᔧᑦ ᓴᐳᑎᔭᐅᔪᓐᓇᖁᓪᓗᒍ, ᐱᐅᓕᔭᐅᖁᓪᓗᒍᓗ ᑕᓕᕐᐱᖕᓄᑦ, ᑭᐅᔭᐅᓗᖓᓗ! 7 ᒎᑎ ᐅᖃᓚᐅᕐᐳᖅ ᐃᑦᔪᕐᓁᑦᑐᕕᖁᑎᒥᓂᑦ, “ᖁᕕᐊᓱᒻᒪᕆᒡᓗᖓ ᓯᑭᒻ ᐊᕕᒃᑕᐅᑎᓐᓂᐊᕐᐸᕋ, ᓴᑰᑎᐅᓪᓗ ᓇᕐᓴᖓ ᐊᕕᒃᑕᐅᑎᓪᓗᒍ ᓄᓇᑖᕆᔭᐅᑎᓐᓂᐊᕐᐸᕋ. 8 ᒋᓕᐊᑎ ᐱᒋᕙᕋ; ᒫᓇᓯᓗ ᐱᒋᕙᕋ; ᐃᕗᕅᒻ ᓇᓴᕆᕙᕋ; ᔫᑕ ᐱᖁᔭᓂᒃ ᑐᓂᓯᔨᒋᓪᓗᒍ; 9 ᒧᐊᐱ ᐅᐊᓴᕐᕕᒋᕙᕋ; ᐄᑐᒥᒧᑦ ᐃᑎᒐᒍᑎᒐ ᐃᒋᓐᓂᐊᕐᐸᕋ; ᐱᓕᔅᑎᐊᒧᑦ ᕾᒐᓛᕐᓂᐊᕐᐳᖓ ᓵᓚᖃᕐᓂᕐᒥᒃ.” 10 ᑭᐊ ᐃᒡᓗᒐᓴᒡᔪᐊᓄᐊᕈᑎᓂᐊᕐᐹᖓ ᓴᐴᓗᑕᓕᖕᓄᑦ? ᑭᐊ ᑕᓯᐅᕐᓂᐊᕐᐹᖓ ᐄᑐᒥᒧᑦ? 11 ᒎᑏ, ᐅᕙᑦᑎᓐᓂᒃ ᖁᔭᓈᕐᓯᕖᑦ? ᒎᑏ, ᐃᓚᒋᓂᐊᓐᖏᓚᑦᑎᒎᑦ ᐊᑭᕋᑦᑎᓐᓄᐊᓕᕐᑎᓪᓗᑕ? 12 ᐃᑲᔪᓚᐅᕐᑎᒍᑦ ᐊᑭᕋᕐᑐᕐᑎᑦᑎᓐᓂᑦ: ᐃᓄᑐᐃᓐᓁᑦ ᐃᑲᔪᕐᓂᖓᑦ ᓱᓇᐅᖏᒻᒪᑦ. 13 ᒎᑎ ᐃᓚᒋᓗᒍ ᐱᓇᓱᐊᕈᑦᑕ ᓵᓚᖃᕐᓂᐊᕐᐳᒍᑦ: ᑖᑦᓱᒪ ᐊᑭᕋᕐᑐᕐᑎᕗᑦ ᑐᓪᓕᕐᓂᐊᕐᐰᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society