ᓲᓗᒨᓂᐅᑉ ᐅᖃᓪᓚᖕᓂᖏᑦ 26 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐊᐅᔭᒃᑯᑦ ᖃᓐᓂᕐᑐᑐᑦ ᓯᓚᓗᒃᑐᑐᓪᓗ ᐱᕈᕐᑐᓂᒃ ᑲᑎᕐᓱᐃᕕᖕᒥ, ᑍᒫᒃ ᓈᒻᒪᖏᓐᓂᕗᖅ ᓯᓔᑦᑑᑉ ᐅᐱᒋᔭᐅᓂᖓ.

² ᓲᕐᓗ ᖁᐸᓄᐊᑉ ᓴᐹᕉᑉ ᓱᒃᑲᓕᓪᓗᓂ ᑎᖏᓯᒪᓂᖓᑐᑦ, ᖁᐸᓄᐊᓪᓗ ᓱᐊᓘᑉ ᐸᐱᑯᑖᓕᐅᑉ ᖃᖓᑕᓂᖓᑐᑦ, ᐃᓱᒪᓂᕐᓗᒡᕕᐅᓂᒃᑯᑦ ᐃᓅᓯᕐᑖᕐᑎᑕᐅᓂᖅ ᐲᕈᓐᓇᖏᓐᓂᕗᖅ.

³ ᕿᒧᒃᓯᐅᑎᒧᑦ ᑏᒐᕈᑎ, ᓯᐅᑎᖅᑯᕐᑐᔪᒧᓪᓗ ᑕᓯᒍᐊᕈᑎ, ᐊᓇᐅᑕᕐᓗ ᓯᓔᑦᑐᑉ ᖁᓖᖓᓄᑦ.

⁴ ᓯᓔᑦᑐᖅ ᑭᐅᓂᐊᕐᓇᒍ ᓯᓔᑦᑐᒥᒃ ᐅᖃᐅᓯᖃᕐᓂᖓ ᒪᓕᒡᓗᒍ, ᐊᑦᔨᒋᓕᑐᐃᓐᓇᕆᐊᖃᕋᕕᐅᒃ.

⁵ ᓯᓔᑦᑑᑉ ᓯᓔᓐᓂᖓ ᒪᓕᒡᓗᒍ ᑭᐅᒍᒃ, ᐃᒻᒥᓂᒃ ᓯᓚᑐᓇᓱᒋᓕᖁᓇᒍ.

⁶ ᓯᓔᑦᑐᒥᒃ ᑎᓕᓯᔪᖅ ᑐᓴᒐᒃᓴᖁᑎᒥᓂᒃ ᐋᑦᓯᖁᓪᓗᒍ, ᓲᕐᓗ ᓇᖕᒥᓂᖅ ᐃᑎᒐᒥᓂᒃ ᓇᑲᑦᓯᔪᑐᑦ ᐅᕝᕙᓘᓐᓃᑦ ᑲᑉᐱᐊᓱᒃᑎᑕᐅᓂᕐᒥᒃ ᐋᖓᔮᕐᑐᒧᑦ ᑍᒤᑉᐳᖅ.

⁷ ᐱᓱᒍᓐᓇᖏᑦᑑᑉ ᓂᐅᖏᒃᑎᑐᑦ ᓂᕕᖓᑐᐃᓐᓇᕐᑐᑎᑐᑦ ᑍᒤᑉᐳᖅ, ᐅᖃᐅᓯᖅ ᓯᓚᑐᔪᖅ ᓯᓔᑦᑐᒥᑦ ᐅᖃᐅᓯᐅᑎᓪᓗᒍ.

⁸ ᐅᔭᕋᒃ ᐃᓪᓘᖕᓄᑦ ᕿᓚᒃᓯᒪᔪᑐᑦ ᑍᒤᑉᐳᖅ, ᓯᓔᑦᑐᖅ ᐅᐱᒋᔭᐅᑎᓪᓗᒍ.

⁹ ᐅᕐᐱᒊᑦ ᑲᑭᓪᓚᕐᓇᕐᑐᑦ ᐋᖓᔮᕐᑎᐅᑉ ᐊᒡᒐᖏᓐᓄᑦ ᑲᑉᐳᑎᔪᑐᑦ ᑍᒤᑉᐳᖅ, ᐅᖃᐅᓯᖅ ᓯᓚᑐᔪᖅ ᐅᖃᐅᓯᐅᑎᓪᓗᒍ ᓯᓔᑦᑐᒧᑦ.

¹⁰ ᐱᓯᒃᑖᕐᑐᑐᑦ ᑭᓇᒃᑯᑐᐃᓐᓇᕐᓂᒃ ᐃᑭᓕᕐᑐᐃᔪᑐᑦ ᑍᒤᑉᐳᖅ, ᓯᓔᑦᑐᒥᒃ ᐃᖅᑲᓁᔭᕐᑎᓯᔪᑐᑦ ᐱᐅᖏᑦᑐᓕᔪᒥᒃᓗ ᐊᑭᓕᕐᑐᐃᔪᑐᑦ.

¹¹ ᕿᒻᒥᕐᑕᐅᖅ ᓇᖕᒥᓂᖅ ᒥᕆᐊᒥᓄᑦ ᐅᑎᕐᒪᑦ, ᑍᒤᓐᓂᕗᖅ ᓯᓔᑦᑐᖅ ᓯᓔᓐᓂᕐᒥᓄᑦ ᐅᑎᕐᑕᕆᕗᖅ.

¹² ᖃᐅᔨᒪᕖᑦ ᐊᖑᒻᒥᒃ ᐃᒻᒥᓂᒃ ᓯᓚᑐᓇᓱᒋᔪᒥᒃ? ᓯᓔᑦᑐᖅ ᐃᓱᒪᓇᕐᓂᕐᓴᐅᕗᖅ ᑖᑦᓱᒪᓐᖓᑦ.

¹³ ᐊᖑᑦ ᐃᕿᐊᓱᒃᑐᖅ ᐅᖃᕐᒪᑦ, “ᐊᖅᑯᑎᕐᒥ ᓛᔭᑕᖃᕐᑐᖅ! ᓛᔭ ᐃᕐᓯᓇᕐᑐᖅ ᐊᖅᑯᑎᑦᑎᓐᓃᒻᒪᑦ!”

¹⁴ ᐅᒃᑯᐊᖅ ᕿᕕᕐᑕᐅᑎᒥᒍᑦ ᐊᐅᓚᖕᒪᑦ, ᐊᖑᑦᑕᐅᖅ ᐃᕿᐊᓱᒃᑐᖅ ᓯᓂᒡᕕᖕᒥᓂ ᐃᒡᓗᐊᓄᑦ ᓵᖃᑦᑕᑐᐃᓐᓇᕆᕗᖅ.

¹⁵ ᐃᕿᐊᓱᒃᑑᑉ ᐊᒡᒐᓂ ᐃᓕᕔᑦ ᐴᒍᑕᐅᑉ ᐃᓗᐊᓄᑦ; ᐃᕿᐊᒋᕔᓪᓗ ᖃᓂᕐᒥᓄᑦ ᐅᑎᕐᑎᒋᐊᖏᓐᓂᒃ.

¹⁶ ᐃᕿᐊᑦᑕᖅ ᓯᓚᑐᓂᕐᓴᐅᓇᓱᒋᕗᖅ ᓇᖕᒥᓂᖅ ᖃᐅᔨᒪᔭᒥᒍᑦ, ᐊᖑᑎᓂᑦ 7ᓂᑦ ᑐᑭᖃᕐᑐᒥᒃ ᑭᐅᔪᓐᓇᕐᑐᓂᑦ.

¹⁷ ᓇᓪᓕᐊᑦ ᐊᖅᑯᓵᕐᑐᖅ ᐂᕙᓕᕐᓗᓂ ᓇᖕᒥᓂᖅ ᐱᒋᐊᕐᑎᓐᖏᑕᒥᓂᒃ, ᐊᑦᔨᖃᕐᐳᖅ ᑎᒍᓯᔪᒥᒃ ᕿᒻᒥᒥᒃ ᓴᓂᖅᑯᑦᑐᒥᒃ ᓯᐅᑎᖏᒃᑎᒍᑦ.

¹⁸ ᐊᖑᑎᑐᑦ ᑐᑮᕈᑎᓯᒪᔪᑐᑦ ᐃᒋᐅᖅᑬᔪᑐᑦ ᕿᔪᖕᓂᒃ ᐃᑯᒪᔪᓂᒃ, ᖃᕐᔪᓂᒡᓗ, ᑐᖁᒥᒡᓗ,

¹⁹ ᑍᒤᑉᐳᖅ ᐊᖑᑦ ᐃᓅᖃᑎᒥᓂᒃ ᐅᐃᕕᕆᒃᓯᔪᖅ, ᐅᖃᕐᓗᓂᓗ, “ᖁᖓᓐᓈᕿᓇᓱᑐᐃᓐᓇᕐᑐᖓ!”

²⁰ ᕿᔪᖃᖏᓐᓂᕐᒧᑦ, ᐃᑯᒪ ᖃᒥᑉᐳᖅ; ᐃᓅᖃᑎᒥᓂᒃ ᐅᖃᐅᓯᒃᓴᕐᓂᖅ ᐱᑕᖃᕐᑎᓐᓇᒍ, ᐂᕙᓂᖅ ᓄᖅᑲᕐᐳᖅ.

²¹ ᕿᔪᒃᓴᖅ ᐊᑐᕐᒪᑦ ᐊᐅᒪᒧᑦ ᐃᑯᒪᔪᒧᑦ, ᕿᔪᒡᓗ ᐃᑯᒪᒧᑦ, ᐊᖑᑦᑕᐅᖅ ᐂᕙᔪᒪᔪᖅ ᐃᑯᐊᓪᓚᒃᑎᑦᓯᕗᖅ ᐊᑭᕋᕐᑐᕐᓂᕐᒥᒃ.

²² ᐃᓅᖃᑎᒥᓂᒃ ᐅᖃᐅᓯᖃᕐᑑᑉ ᐅᖃᐅᓯᖓ ᐊᑦᔨᖃᕐᐳᖅ ᑕᒧᐊᒃᓴᒥᒃ ᒪᒪᕐᑐᒥᒃ, ᑕᒪᕐᒥᒃ ᐃᓅᑉ ᑎᒥᖓᑕ ᐃᓗᐊᓄᑦ ᐃᑎᕐᐳᑦ.

²³ ᖃᓂᖅ ᐅᖃᕐᓴᕅᑦᑐᖅ ᐱᐅᖏᑦᑐᒥᒃ ᐆᒻᒪᑎᓕᖕᒥᑦ, ᐊᑦᔨᖃᕐᐳᖅ ᒪᕋᖅ ᐃᓗᓕᖁᑎ ᓯᐅᓪᕕᕆᒥᒃ ᐊᒥᐊᕐᓯᒪᔪᑐᑦ ᑍᒤᑉᐳᖅ.

²⁴ ᓇᓪᓕᐊᑦ ᐆᒥᓱᒃᑐᖅ, ᐃᔨᕐᓯᒪᑎᑉᐹ ᖃᓂᕐᒥᓄᑦ, ᐅᐃᕕᕆᒃᓯᓂᕐᓗ ᐃᓗᒥᓃᑎᓪᓗᒍ.

²⁵ ᐱᑦᓯᐊᕐᓗᓂ ᐅᖃᕐᐸᑦ, ᐅᒃᐱᕆᓂᐊᕐᓇᒍ, ᐆᒻᒪᑎᒥᒍᑦ ᐃᔨᕐᓯᓯᒪᖕᒪᑦ 7ᓂᒃ ᐊᑭᕋᕐᑐᕐᓂᕐᔪᐊᓂᒃ.

²⁶ ᐆᒥᓱᖕᓂᓂ ᐃᔨᕐᓯᒪᔭᕋᓗᐊᖓ ᐅᐃᕕᕆᒃᓯᓂᕐᒥᒃ, ᐱᐅᖏᑦᑐᐊᓘᓂᓂ ᓴᖅᑭᑎᓐᓂᐊᕐᐹ ᐃᓄᒋᐊᒃᑐᑦ ᓵᖓᓂ.

²⁷ ᓇᓪᓕᐊᑦ ᐃᑎᕐᓴᓕᐅᕐᑐᖅ ᑕᕝᕗᖓ ᑲᑕᖕᓂᐊᕐᐳᖅ, ᐅᔭᕋᒡᔪᐊᒥᒡᓗ ᐊᒃᓴᑳᑎᑦᓯᔪᖅ ᐊᒃᓴᑲᕐᕕᐅᓂᐊᕆᓪᓗᓂ.

²⁸ ᐅᖃᖅ ᓴᒡᓗᔪᖅ ᓵᓚᐅᓂᕐᒥᒃ ᐆᒥᓱᒃᐳᖅ, ᖃᓂᕐᓗ ᓄᖅᑲᔪᐃᑦᑐᖅ ᓯᖁᒥᒍᑎᒃᓴᒥᓂᒃ ᓴᓇᕗᖅ.