ᐅᐸᑍᐊᑉ ᐊᒡᓚᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐅᑯᐊ ᑕᕝᕙ ᐅᐸᑍᐊᐅᑉ ᑕᑯᑎᑕᐅᑦᔪᑎᖏᑦ. ᐃᒫᒃ ᐊᑕᓂᖅ ᒎᑎ ᐅᖃᕐᐳᖅ ᐄᑐᒥ ᐱᓪᓗᒍ. ᑐᓴᕐᓯᒪᕗᒍᑦ ᐅᖃᐅᓯᕐᒥᒃ ᐊᑕᓂᕐᒥᑦ ᐱᔪᒥᒃ, ᐅᖃᕆᐊᕐᑐᕐᑐᒃᓴᖅ ᑎᓕᔭᐅᕗᖅ ᐃᓅᖃᑎᒌᒡᔪᐊᑦ ᐊᑯᕐᖓᓐᓄᑦ ᐅᖃᐅᑦᔭᐅᓪᓗᓂᓗ: “ᒪᑭᓕᕆᑦᓯ! ᐅᓇᑕᕆᐊᕐᓚᕗᑦ ᐄᑐᒥ!”

ᐊᑕᓂᐅᑉ ᓱᒋᐊᕈᒫᕐᐹ ᐄᑐᒥ

² “ᑕᑯᒋᑦ ᒥᑭᓐᓂᕐᐸᐅᓕᕐᑎᑦᓱᒫᕐᐸᒋᑦ ᐃᓅᖃᑎᒌᒡᔪᐊᑦ ᐊᑯᕐᖓᓐᓂ; ᑕᒤᓐᓄᑦ ᓇᕐᕈᒋᔭᐅᕕᒃᔪᐊᓕᕈᒫᕐᐳᑎᑦ.

³ ᐆᒻᒪᑎᕕᑦ ᐱᐅᔪᕆᓂᖓᑕ ᐅᐃᕕᕆᕚᑎᑦ, ᐃᕝᕕᑦ ᐃᓂᖃᕐᑐᑎᑦ ᕾᕐᑑᑉ ᖁᖕᓇᔪᖏᓐᓂ; ᐳᕐᑐᔪᒥ ᐃᓂᖃᕐᑐᑎᑦ; ᐆᒻᒪᑎᖕᓂ ᐅᖃᕐᑐᑎᑦ: ‘ᑭᐊ ᓄᓇᒧᑦ ᑲᑕᒃᑎᑦᓱᓐᓇᕐᐹᖔ?’

⁴ ᓇᒃᑐᕋᓕᒃᑎᑐᑦ ᖁᒻᒧᐊᒃᑲᓗᐊᕈᕕᑦ, ᐃᕙᕕᖃᕋᓗᐊᕈᕕᓪᓗ ᐅᓪᓗᕆᑦᔭᑦ ᐊᑯᕐᖓᓐᓂ, ᑕᕝᕙᓐᖓᑦ ᑲᑕᒃᑎᑦᓱᒫᕐᐸᒋᑦ,” ᐊᑕᓂᖅ ᐅᖃᕐᐳᖅ.

⁵ “ᑎᒡᓕᒃᑏᑦ ᑎᑭᓐᓂᐊᕐᐹᑎᑦ, ᑎᒡᓕᒐᕐᕕᒋᓗᑎᓪᓗ ᐅᓐᓄᐊᒥ, ᑕᕝᕙ ᓇᑲᑕᐅᔪᒫᕐᐳᑎᑦ! ᑎᒡᓕᒃᑏᑦ ᐱᔪᒪᔭᓕᒫᒥᖕᓂᒃ ᐱᑐᐃᓐᓇᕐᓂᐊᓐᖏᓚᑦ? ᕔᓂᓕᒃᓴᓂᒃ ᑲᑎᕐᓱᐃᔪᑦ ᑎᑭᓐᓇᔭᕐᐹᑎᑦ, ᕔᓂᓕᒃᓴᑦ ᐱᐅᖏᓐᓂᕐᓗᑯᖏᓐᓂᒃ ᐱᒃᓴᓂᒃ ᕿᒤᒐᔭᓐᖏᓛᑦ?

⁶ ᐄᓴᐅᑉ ᐱᖁᑎᖏᑦ ᑎᒡᓕᒐᕐᑕᐅᕗᑦ, ᐱᕕᐊᕐᓇᕐᑐᖁᑎᖏᑦ ᐃᔨᕐᑐᐊᖏᑦ ᓇᓂᔭᐅᕗᑦ.

⁷ ᐊᖏᖃᑎᒋᓚᐅᕐᑕᓕᒫᕕᑦ ᓯᓔᕐᕆᕚᑎᑦ ᓄᓇᐅᑉ ᑭᒡᓕᖓᓄᑦ ᐊᐅᓪᓚᕐᑎᓪᓗᑎᑦ; ᐃᓕᖕᓄᑦ ᐱᑦᓯᐊᓚᐅᕐᑐᑦ ᓵᓚᒋᕚᑎᑦ; ᓂᕆᖃᑎᒋᔭᑎᑦ ᒥᑭᒋᑦᔨᕐᐳᑦ ᐃᓕᖕᓄᑦ; ᓇᓪᓕᐊᓐᓂᒡᓘᓐᓃᑦ ᒪᓗᒍᓱᒃᑐᖃᓐᖏᓚᖅ.”

⁸ ᐊᑕᓂᖅ ᐅᖃᕐᐳᖅ, “ᐅᓪᓗᒥ ᑖᑦᓱᒪᓂ ᐃᓕᓯᒪᔪᑦ ᐲᔭᕐᓂᐊᓐᖏᓚᒃᑳ? ᐄᑐᒥᒥᑦ, ᓯᓚᑐᔪᓪᓗ ᐄᓴᐅᑉ ᖃᖅᑲᖏᓐᓃᑦ?

⁹ ᐱᒃᓴᕐᑐᔪᖁᑎᑎᓪᓗ ᓯᐊᒻᒪᕐᑎᑕᐅᔪᒫᕐᐳᑦ, ᐆ ᑏᒪᓐ, ᑲᑉᐱᐊᓱᒃᑐᐊᓘᔪᒫᕐᐳᑦ, ᑕᒪᕐᒥᒃ ᑐᖁᑕᐅᔪᒫᕐᐳᑦ ᐄᓴᐅᑉ ᖃᖅᑲᖓᓂ, ᐃᓄᐊᕐᑕᐅᓗᑎᒃ.”

ᐄᑐᒥᐅᑉ ᓱᒋᐊᕐᑕᐅᑦᔪᑎᖏᑦ

¹⁰ “ᐊᑲᐅᖏᑦᑐᓕᓂᕆᓚᐅᕐᑕᑎᑦ ᓄᑲᕐᓄᑦ ᔧᑯᒧᑦ ᐱᑦᔪᑎᒋᓪᓗᒋᑦ, ᑲᓐᖑᓱᖕᓂᕐᒧᑦ ᐅᓕᒃᑕᐅᔪᒫᕐᐳᑎᑦ, ᓄᖑᑕᐅᓗᑎᓪᓗ ᐃᓱᖃᖏᑦᑐᒧᑦ.

¹¹ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᕿᒫᑦᑍᓕᓗᑎᑦ ᓇᖏᕈᒫᕐᐳᑎᑦ, ᓄᓇᓕᑐᖃᐅᖏᑦᑐᑦ ᐊᒃᓗᐃᑦᔪᑎᑦᓯᓐᓂᒃ ᐊᐅᓪᓚᕈᑦᔨᔪᒫᕐᒪᑕ, ᓄᓇᓕᑐᖃᐅᖏᑦᑐᓪᓗ ᐃᑎᕈᑎᒃ ᐃᑎᕐᑕᕐᕕᖏᑎᒍᑦ, ᔨᕉᓴᓕᒻᓗ ᐃᒻᒥᕋᐅᑎᒋᔪᒫᕐᐹᑦ ᓇᓚᐅᑦᑖᕈᑎᒃᑯᑦ, ᐃᕝᕕᓪᓗ ᑍᒃᑯᑎᑐᓇᖅ ᑍᒤᖃᑕᐅᔪᒫᕐᐳᑎᑦ.

¹² ᓄᑬᓪᓗ ᖁᕕᐊᓲᑎᒋᔭᒃᓴᕆᓚᐅᓐᖏᓚᑦ ᐱᓂᕐᓗᒃᑕᐅᕕᐊᓂ; ᔫᑕᐅᑉ ᑭᖑᕚᖏᑦ ᖁᕕᐊᓲᑎᒋᓂᐊᕐᓇᒋᑦ ᑲᑉᐱᐊᓱᖕᓂᖏᑕ ᐅᓪᓗᖏᓐᓂ; ᐱᐅᔪᕆᔪᒃᓴᐅᓚᐅᓐᖏᓚᑎᑦ ᐅᓪᓗᖏᑕ ᑲᑉᐱᐊᓱᒃᑎᑕᐅᕕᖏᓐᓂ.

¹³ ᐃᓄᖁᑎᒪ ᐃᑎᕐᑕᕐᕕᖓᓄᑦ ᐃᑎᕐᑐᒃᓴᐅᓚᐅᓐᖏᓚᑎᑦ ᑲᑉᐱᐊᓱᖕᓂᖏᑕ ᐅᓪᓗᖏᓐᓂ, ᐃᓛᒃ ᑲᑉᐱᐊᓱᖕᓂᖏᓐᓂᒃ ᒥᑕᐅᑎᒃᓴᖃᑕᐅᔪᒃᓴᐅᓚᐅᓐᖏᓚᑎᑦ ᑲᑉᐱᐊᓱᖕᓂᖏᑕ ᐅᓪᓗᖏᓐᓂ, ᐱᖁᑎᖏᓐᓂᒡᓗ ᐱᓇᓱᒃᑐᒃᓴᐅᓚᐅᓐᖏᓚᑎᑦ ᑲᑉᐱᐊᓱᖕᓂᖏᑕ ᐅᓪᓗᖏᓐᓂ.

¹⁴ ᓇᖏᕐᓂᐊᕐᓇᒃ ᐊᖅᑯᓯᓂᕐᓂ ᑭᐳᓐᖓᔫᖕᓂ ᕿᒫᔪᑦ ᑭᐱᔪᒪᓗᒋᑦ; ᑎᒍᔭᐅᑎᓐᓂᐊᕐᓇᒋᓪᓗ ᑖᒃᑯᐊ ᐊᒥᐊᒃᑯᒋᔭᖏᑦ ᑲᑉᐱᐊᓱᖕᓂᖏᑕ ᐅᓪᓗᖏᓐᓂ.”

ᒎᑎᐅᑉ ᐃᓅᖃᑎᒌᒡᔪᐊᓕᒫᑦ ᐃᖅᑲᕐᑐᕈᒫᕐᐰᑦ

¹⁵ “ᐊᑕᓂᐅᑉ ᐅᓪᓗᖓ ᖃᒡᓕᖕᒪᑦ ᐃᓅᖃᑎᒌᒡᔪᐊᓕᒫᓄᑦ; ᐃᕝᕕᑦ ᐱᓂᐊᓚᐅᕋᕕᑦ, ᑍᒫᒃ ᐱᓂᐊᕐᕕᐅᔪᒫᕐᐳᑎᑦ; ᐱᓂᐊᕐᓂᑎᑦ ᐅᑎᕈᒫᕐᐳᑦ ᓂᐊᖁᕐᓄᑦ.

¹⁶ ᐃᒥᓚᐅᕋᕕᑦ ᖃᖅᑲᖁᑎᓐᓂᑦ ᐃᑦᔪᕐᓁᑦᑐᒥᑦ, ᑍᒫᒃ ᐃᓅᖃᑎᒌᒡᔪᐊᓕᒫᑦ ᐊᕙᑎᑦᓯᓐᓃᑦᑐᑦ ᐃᒥᕈᒫᕆᕗᑦ; ᐃᓛᒃ ᐃᒥᕈᒫᕐᐳᑦ ᑐᐊᕕᕐᓗᑎᒃ ᐄᓗᒍᓗ, ᑍᒤᓚᐅᕐᓯᒪᖏᑦᑐᑎᑐᓪᓗ ᐃᓕᖓᔪᒫᕐᐳᑦ.”

ᐃᓴᕆᐊᓕᒥᐅᑦ ᓵᓚᖃᕐᓂᖓ

¹⁷ “ᖃᖅᑲᒥ ᓮᐅᓂᒥ ᕿᒫᓯᒪᔪᖃᕈᒫᕐᐳᖅ, ᐃᑦᔪᕐᓁᑦᑑᔪᒫᕐᐳᕐᓗ ᑖᓐᓇ ᖃᖅᑲᖅ; ᔧᑰᓪᓗ ᑭᖑᕚᖏᑕ ᓄᓇᒋᓚᐅᕐᑕᑎᒃ ᐅᑎᕐᑎᑦᓱᒫᕆᕔᑦ.

¹⁸ ᔧᑰᑉ ᑭᖑᕚᖏᑦ ᐃᑯᐊᓚᔪᒫᕐᐳᑦ, ᔫᓯᐱᐅᓪᓗ ᑭᖑᕚᖏᑦ ᐃᑯᒪᐅᔪᒫᕐᓗᑎᒃ; ᐄᓴᐅᓪᓗ ᑭᖑᕚᖏᑦ ᑭᑉᐸᑯᑎᑐᑦ ᑍᒤᑦᓱᒫᕐᐳᑦ; ᐊᒥᐊᒃᑯᖃᕈᒫᓐᖏᓚᓪᓗ ᐄᓴᐅᑉ ᑭᖑᕚᖏᑦ; ᐊᑕᓂᖅ ᑍᒫᒃ ᐅᖃᕐᒪᑦ.

¹⁹ ᔫᑕᐅᑉ ᓯᕿᓂᖓᑕ ᓇᓛᓂᒥᐅᑦ ᐄᓴᐅᑉ ᖃᖅᑲᖓ ᐱᑖᕆᔪᒫᕐᐹᑦ, ᐱᓕᔅᑍᓂᒥᐅᓪᓗ ᐱᑖᕆᔭᐅᔪᒫᕐᐳᖅ ᓯᕿᓂᐅᑉ ᓂᐱᕕᐊᑕ ᓇᓛᓂᒥᐅᑕᕐᓄᑦ; ᐃᓴᕆᐊᓕᒃᑯᓪᓗ ᓄᓇᑖᕈᒫᕐᐳᑦ ᐃᕗᕅᒥᒃ ᓴᒥᐊᕆᐊᒥᒡᓗ; ᐱᓐᔭᒥᓂᑯᑦ ᐃᓄᖏᑕ ᓄᓇᑖᕆᔪᒫᕐᐹᑦ ᒋᓕᐊᑎ.

²⁰ ᕼᐋᓚᒧᑦ ᐊᐅᓪᓚᕈᑦᔭᐅᓯᒪᔪᑦ ᐃᓴᕆᐊᓕᐅᑉ ᑭᖑᕚᖏᑦ ᓄᓇᑖᕈᒫᕐᐳᑦ ᑬᓇᓂᒥᐅᑦ ᐊᑯᕐᖓᓐᓃᑦᑐᓂᒃ ᔨᕆᐸᑦ ᑎᑭᓪᓗᒍ, ᔨᕉᓴᓕᒥᓪᓗ ᐊᐅᓪᓚᕈᑦᔭᐅᓯᒪᔪᑦ ᓯᑉᕼᐊᕋᒦᑦᑐᑦ ᓄᓇᑖᕈᒫᕐᐳᑦ ᐃᒡᓗᒐᓴᖕᓂᒃ ᓯᕿᓂᐅᑉ ᓇᓛᓃᑦᑐᓂᒃ ᓂᒋᑉᒥ.

²¹ ᓴᐳᑦᔨᔨᒃᓴᑦ ᒪᔪᐊᕈᒫᕐᐳᑦ ᓮᐅᓂᐅᑉ ᖃᖅᑲᖓᓄᑦ ᐄᓴᐅᑉ ᖃᖅᑲᖓᓃᑦᑐᑦ ᐊᐅᓚᓐᓂᐊᕐᓗᒋᑦ, ᐊᑕᓂᐅᕕᒡᓗ ᑖᓐᓇ ᐊᑕᓂᐅᑉ ᐱᒋᔪᒫᕐᐹ.”