ᒨᓯᓯ ᓯᑕᒪᖏᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦ

ᖄᖏᕐᑕᐅᕕᒃᓯᐅᕐᓂᐅᑉ ᓇᓪᓕᐅᑎᓂᖓᑕ ᐂᑉᐸᖓ

¹ ᐊᑕᓂᐅᓪᓗ ᒨᓯᓯ ᐅᖃᕐᕕᒋᓚᐅᕐᐹ ᐃᓄᖃᖏᑦᑐᒥ ᓮᓁᒥ, ᑕᖅᑭᐅᑉ ᓯᕗᓪᓕᕐᐹᖓᓂ ᐊᕐᕌᒍᑉ ᐂᑉᐸᖓᓂ ᓄᓇᒥᑦ ᐄᑦᔨᑉᑎᒥᑦ ᐊᐅᓪᓚᓚᐅᕐᓂᖓᑦᑕ ᑭᖑᕐᖓᓂ, ᐃᒫ ᐅᖃᕐᓗᓂ:

² “ᐃᓴᕆᐊᓕᐅᑉ ᕿᑐᕐᖓᖏᑦ ᓇᓪᓕᐅᓐᓂᕐᓯᐅᖃᑦᑕᕆᐊᖃᕐᐳᑦ ᓇᓪᓕᐅᑎᔭᕌᖓᑦ.

³ ᐅᓪᓗᐃᑦ 14ᖓᓂ ᑕᖅᑭᒥ ᑕᕝᕙᓂ, ᐅᓪᓛᒃᑯᑦ ᖃᐅᒻᒪᓕᕐᑎᓪᓗᒍ, ᓇᓪᓕᐅᓐᓂᕐᓯᐅᓂᐊᕐᐳᓯ, ᐱᐅᓯᓕᒫᖏᑦ ᑐᒃᓯᐊᕐᓂᖏᓪᓗ ᒪᓕᒋᐊᖃᕐᐸᓯ.”

⁴ ᑍᒫᒃ ᒨᓯᓯᐅᑉ ᐃᓴᕆᐊᓕᐅᑉ ᕿᑐᕐᖓᖏᑦ ᐅᖃᐅᑎᓚᐅᕐᐰᑦ ᖄᖏᕐᑕᐅᕕᒃᓯᐅᒻᒥᒃ ᓇᓪᓕᐅᓐᓂᕐᓯᐅᖁᓪᓗᒋᑦ.

⁵ ᓇᓪᓕᐅᓐᓂᕐᓯᐅᓚᐅᕐᐳᓪᓗ ᐅᓪᓗᐃᑦ 14ᖓᓂ ᑕᖅᑮᑦ ᓯᕗᓪᓕᕐᐹᖓᓂᒃ, ᐅᓪᓛᒃᑯᑦ ᖃᐅᒻᒪᓕᕐᑎᓪᓗᒍ ᐃᓄᖃᖏᑦᑐᒥ ᓮᓁᒥ; ᐊᑕᓂᐅᑉ ᐱᖁᔨᓂᖓ ᒨᓯᓯᒃᑯᑦ ᒪᓕᒡᓗᒍ, ᐃᓴᕆᐊᓕᐅᑉ ᕿᑐᕐᖓᖏᑦ ᑍᒤᓕᐅᓚᐅᕐᐳᑦ.

⁶ ᐱᑕᖃᓚᐅᕆᕗᕐᓕ ᐊᖑᑎᓂᒃ ᓴᓗᒤᓕᓯᒪᔪᓂᒃ ᐃᓄᕕᓂᕐᓂᒃ ᐊᒃᑐᕐᓯᓯᒪᓂᕐᒧᑦ, ᑖᒃᑯᐊ ᐅᓪᓗᒥ ᑍᑦᓱᒪᓂ ᖄᖏᕐᑕᐅᕕᒃᓯᐅᒻᒥᒃ ᓇᓪᓕᐅᓐᓂᕐᓯᐅᖃᑕᐅᔪᓐᓇᖏᓐᓇᒥᒃ; ᐅᓪᓗᒥ ᑍᑦᓱᒪᓂ ᑖᒃᑯᐊ ᒨᓯᓯᒧᑦ ᐂᕉᓂᒧᓪᓗ ᐂᓚᐅᕐᐳᑦ.

⁷ ᑖᒃᑯᐊᓗ ᐊᖑᑎᑦ ᐅᖃᕐᓗᑎᒃ, “ᓴᓗᒤᓕᓚᐅᕋᑦᑕ ᐃᓄᕕᓂᕐᒥᒃ ᐊᒃᑐᕐᓯᓂᑦᑎᒍᑦ ᓱᖕᒪᑦ ᐊᑕᓂᕐᒧᑦ ᑐᓂᕐᕈᑕᐅᔭᕆᐊᖃᕐᑐᒥᒃ ᑐᓂᓯᖁᔭᐅᓐᖏᓚᒍᑦ ᑐᓂᕐᕈᓯᕕᒃᓴᖅ ᓇᓪᓕᐅᑎᒃᐸᑦ ᐃᓴᕆᐊᓕᐅᑉ ᕿᑐᕐᖓᖏᑦ ᐃᓚᒋᓗᒋᑦ?”

⁸ ᒨᓯᓯᐅᓪᓗ ᐅᖃᐅᑎᕔᑦ, “ᕿᑲᓚᐅᕆᑦᓯ, ᑐᓴᕋᓱᖕᓂᐊᕋᒪ ᖃᓄᖅ ᐊᑕᓂᖅ ᐃᓕᑦᓯᓐᓂᒃ ᐱᖁᔨᖕᒪᖔᑦ.”

⁹ ᑕᕝᕙ ᐊᑕᓂᖅ ᒨᓯᓯᒧᑦ ᐅᖃᕐᐳᖅ, ᐅᖃᕐᓗᓂ,

¹⁰ “ᐃᓴᕆᐊᓕᐅᑉ ᕿᑐᕐᖓᖏᑦ ᐅᖃᐅᑎᒃᑭᑦ: ‘ᓇᓕᕐᓯ ᑭᖑᕚᓯᓘᓐᓃᑦ ᓴᓗᒤᓕᑎᑕᐅᓯᒪᒃᐸᑦ ᑐᖁᖓᔪᒥᒃ ᐊᒃᑐᕐᓯᓯᒪᓂᕐᒧᑦ, ᐅᖓᓯᒃᑐᒦᑉᐸᓪᓘᓐᓃᑦ ᐊᐅᓪᓚᕐᓯᒪᓗᓂ, ᓱᓕ ᓇᓪᓕᐅᓐᓂᕐᓯᐅᕈᓐᓇᕐᐳᖅ ᐊᑕᓂᐅᑉ ᖄᖏᕐᑕᐅᕕᒃᓯᐅᕐᕕᖓᓂᒃ.

¹¹ ᐅᓪᓗᐃᑦ 14ᖓᓂ ᑕᖅᑭᐅᑉ ᐂᑉᐸᖓᓂ, ᐅᓪᓛᑯᑦ ᖃᐅᒻᒪᓕᕐᑎᓪᓗᒍ, ᓇᓪᓕᐅᓐᓂᕐᓯᐅᕆᐊᖃᕐᐳᑦ ᓂᕆᔭᕆᐊᖃᕐᐳᑦ ᖄᖏᕐᑕᐅᕕᒃᓯᐅᒻᒥᒃ ᓂᐊᖂᔭᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᐃᓚᖃᕐᓗᓂ, ᓂᕿᒧᓪᓗ ᐃᓚᐅᕈᑎᓂᒃ ᖃᓯᓕᓇᕐᑐᓂᒃ ᐃᓚᖃᕐᓗᓂ.

¹² ᐅᓪᓛᒧᑦ ᐊᒥᐊᒃᑯᖏᑦᓯᐊᕐᓗᓯ, ᓴᐅᓂᖓᓂᒡᓘᓐᓃᑦ ᓇᑲᑦᓯᔭᕆᐊᖃᓐᖏᓚᓯ. ᖄᖏᕐᑕᐅᕕᐅᑉ ᒪᓕᒐᖏᑦ ᒪᓕᑦᓯᐊᕐᓗᒋᑦ ᓇᓪᓕᐅᓐᓂᕐᓯᐅᕆᐊᖃᕐᐳᓯ.

¹³ ᐊᖑᓪᓕ ᓴᓗᒤᓕᓯᒪᖏᑦᑐᖅ ᐊᐅᓪᓚᕐᓯᒪᓇᓂᓗ, ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᖏᑦᑐᖅ, ᑖᓐᓇ ᐃᓅᖃᑎᒌᒡᔪᐊᓂᑦ ᐃᓅᖃᑎᒥᓂᑦ ᐃᓚᒋᔭᐅᔪᓐᓃᕆᐊᖃᕐᐳᖅ, ᐊᑕᓂᕐᒧᑦ ᑐᓂᕐᕈᓯᕆᐊᕐᑐᓚᐅᖏᒻᒪᑦ ᑐᓂᕐᕈᓯᕆᐊᕐᑐᕐᕕᒃ ᓇᓪᓕᐅᑎᓯᒪᑎᓪᓗᒍ; ᑖᓐᓇ ᐊᖑᑦ ᐊᔪᕐᓂᕐᒥᓂᒃ ᐊᒡᔭᕐᓯᓂᐊᕐᐳᖅ.

¹⁴ “‘ᐃᓅᖃᑎᒋᓐᖏᑕᓯᓕ ᐃᓂᖃᕐᑐᖅ ᐊᑯᓐᓇᑦᓯᓐᓂ, ᐊᑕᓂᐅᑉ ᖄᖏᕐᑕᐅᕕᒃᓯᐅᑎᖓᓂᒃ ᓇᓪᓕᐅᓐᓂᕐᓯᐅᕈᒪᒃᐸᑦ, ᓇᓪᓕᐅᓐᓂᕐᓯᐅᕈᓐᓇᕐᐳᖅ ᖄᖏᕐᑕᐅᕕᐅᑉ ᐱᐅᓯᖏᑦ ᒪᓕᒡᓗᒋᑦ ᑐᒃᓯᐊᕐᓂᒃᑯᓪᓗ ᐱᐅᓯᖏᑦ ᒪᓕᒡᓗᒋᑦ; ᐊᑕᐅᓯᕐᒥᒃ ᒪᓕᒐᖃᕆᐊᖃᕐᐳᓯ, ᓂᐅᕐᕈᐊᓄᓪᓗ ᓄᓇᖃᕐᑐᑐᖃᕐᓄᓪᓗ.’”

ᓄᕗᔭ ᐊᒻᒪᓗ ᐃᑯᒪ

¹⁵ ᐅᓪᓗᒥ ᑐᐱᕐᔪᐊᑉ ᓇᑉᐸᕐᑕᐅᕕᖓᓂ, ᓄᕗᔭᐅᑉ ᑐᐱᕐᔪᐊᖅ ᐅᓕᓚᐅᕐᐹ, ᑐᐱᖅ ᐊᖏᕈᑎᑕᓕᒃ; ᐅᓐᓄᖕᒥᑦ ᐅᓪᓛᒧᑦ ᑎᑭᓪᓗᒍ ᑐᐱᕐᔪᐊᑉ ᖁᓛᓃᓚᐅᕐᐳᖅ ᑕᐅᑦᑐᖃᕐᓗᓂ ᐃᑯᒪᑎᑐᑦ.

¹⁶ ᑍᒤᖏᓐᓇᓚᐅᕐᐳᖅ: ᐅᓪᓗᒃᑯᑦ ᓄᕗᔭᐅᑉ ᐅᓕᒃᓯᒪᓚᐅᕐᐹ, ᐃᑯᒪᑐᓪᓗ ᑕᐅᑦᑐᖃᓚᐅᕐᐳᖅ ᐅᓐᓄᐊᒃᑯᑦ.

¹⁷ ᑍᒪᓐᖓᓪᓗ ᓄᕗᔭ ᖁᒻᒧᐊᓕᕌᖓᑦ ᐃᓴᕆᐊᓕᐅᑉ ᕿᑐᕐᖓᖏᑦ ᐃᖏᕐᕋᔭᕆᐊᖃᓚᐅᕐᐳᑦ; ᓄᕗᔭᓗ ᓄᖅᑲᕌᖓᑦ ᑕᕝᕙᓂ ᐃᓴᕆᐊᓕᐅᑉ ᕿᑐᕐᖓᖏᑦ ᑐᐱᕆᐊᖃᖃᑦᑕᓚᐅᕐᐳᑦ.

¹⁸ ᐊᑕᓂᐅᑉ ᐱᖁᔨᓂᖓᒍᑦ ᐃᓴᕆᐊᓕᐅᑉ ᕿᑐᕐᖓᖏᑦ ᐃᖏᕐᕋᖃᑦᑕᓚᐅᕐᐳᑦ, ᐊᑕᓂᐅᓪᓗ ᐱᖁᔨᓂᖓᒍᑦ ᑕᖕᒫᕐᐸᒃᓗᑎᒃ; ᓄᕗᔭ ᑐᐱᕐᔪᐊᑉ ᖁᓛᓃᑎᓪᓗᒍ ᐃᓴᕆᐊᓕᐅᑉ ᕿᑐᕐᖓᖏᑦ ᓄᖅᑲᖓᖃᑦᑕᓚᐅᕐᐳᑦ.

¹⁹ ᓄᕗᔭᓗ ᐊᑯᓂ ᑐᐱᕐᔪᐊᑉ ᖁᓛᓃᑎᓪᓗᒍ, ᐃᓴᕆᐊᓕᐅᑉ ᕿᑐᕐᖓᖏᑦ ᐊᑕᓂᐅᑉ ᐱᖁᔭᖓᓂᒃ ᓈᓚᓚᐅᕐᐳᑦ ᓄᖅᑲᖓᓪᓗᑎᒃ.

²⁰ ᐃᒤᓚᐅᕐᐳᖅ, ᐅᓪᓗᓂᒃ ᐅᓄᕐᑐᓂᒃ ᓄᕗᔭ ᑐᐱᕐᔪᐊᑉ ᖁᓛᓃᑦᓴᕌᖓᑦ; ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ ᑕᖕᒫᕐᓯᒪᖃᑦᑕᓚᐅᕐᐳᑦ, ᐊᑕᓂᐅᓪᓗ ᐱᖁᔨᓂᖓ ᒪᓕᒡᓗᒍ ᐃᖏᕐᕋᖃᑦᑕᓚᐅᕆᓪᓗᑎᒃ.

²¹ ᐊᒻᒪᓗᑦᑕᐅᖅ, ᓄᕗᔭ ᓄᖅᑲᖓᑎᓪᓗᒍ ᐅᓐᓄᖕᒥᑦ ᐅᓪᓛᒧᑦ; ᓄᕗᔭ ᖁᒻᒧᐊᓕᕌᖓᑦ ᐃᖏᕐᕋᓯᖃᑦᑕᓚᐅᕐᐳᑦ ᐅᓪᓗᒃᑯᓪᓘᓐᓃᑦ ᐅᓐᓄᐊᒃᑯᓪᓘᓐᓃᑦ, ᓄᕗᔭ ᑍᒪᓐᖓᑦ ᖁᒻᒧᐊᓕᕌᖓᑦ ᐃᖏᕐᕋᔭᕆᐊᖃᖃᕐᑕᓚᐅᕐᐳᑦ.

²² ᐅᓪᓘᒃ ᒪᕐᕉᒃᐸᑎᒡᓘᓐᓃᑦ, ᑕᖅᑭᓕᒫᕐᓘᓐᓃᑦ, ᐊᕐᕌᒍᓕᒫᕐᓘᓐᓃᑦ ᓄᕗᔭ ᑐᐱᕐᔪᐊᑉ ᖁᓛᓃᑉᐸᑦ ᐃᓴᕆᐊᓕᐅᑉ ᕿᑐᕐᖓᖏᑦ ᑕᖕᒫᕐᓯᒪᕙᓚᐅᕐᐳᑦ ᐃᖏᕐᕋᓇᑎᒡᓗ; ᖁᒻᒧᐊᒑᖓᓪᓕ ᐃᖏᕐᕋᖃᕐᑕᓚᐅᕐᐳᑦ.

²³ ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ ᑕᖕᒫᕐᓯᒪᖃᑦᑕᓚᐅᕐᐳᑦ, ᐊᑕᓂᐅᓪᓗ ᐱᖁᔨᓂᖓ ᒪᓕᒡᓗᒍ ᐃᖏᕐᕋᖃᑦᑕᕐᓗᑎᒃ; ᐊᑕᓂᐅᑉ ᐱᖁᔨᓂᖓ ᓈᓚᓚᐅᕐᐹᑦ, ᐊᑕᓂᖅ ᐱᖁᔨᖃᑦᑕᓚᐅᕐᒪᑦ ᒨᓯᓯᑯᑦ.