ᒨᓯᓯ ᓯᑕᒪᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᖁᔭᖅ ᓈᓴᕅᑎᐅᓂᕐᒧᑦ

¹ ᐊᑕᓂᖅ ᒨᓯᓯᒧᑦ ᐅᖃᕐᐳᖅ, ᐃᒤᓕᓪᓗᓂ,

² “ᐃᓴᕆᐊᓕᐅᑉ ᕿᑐᕐᖓᖏᑦ ᐅᖃᐅᑎᒃᑭᑦ, ᐊᖑᑦ ᐊᕐᓇᕐᓘᓐᓃᑦ ᑐᓂᕐᕈᓯᕐᐸᑦ ᐊᖏᒻᒪᕆᒍᒪᓗᓂ ᓈᓴᕅᑎᐅᓂᕐᒧᑦ, ᐃᒻᒥᓂᒃ ᓴᓂᕐᕙᒃᑎᑦᓱᒪᓗᓂ ᐊᑕᓂᕐᒧᑦ,

³ ᐃᒻᒥᓂᒃ ᐊᕕᑎᑦᓴᕆᐊᖃᓕᕐᐳᖅ, ᕔᓂᑐᕈᓐᓃᕐᓗᓂ, ᑍᒤᑦᑐᒥᒡᓘᓐᓃᑦ ᐊᑦᔨᖓᓂᒃ ᐃᒥᕐᐸᒍᓐᓃᕐᓗᓂ ᕕᓂᒐᕐᒥᒡᓘᓐᓃᑦ ᕔᓂᒥᑦ ᓴᓇᓯᒪᔪᒥᒃ, ᕕᓂᒐᕐᒥᒡᓘᓐᓃᑦ ᑍᒤᑦᑑᑉ ᐊᑦᔨᖓᓂᑦ ᓴᓇᓯᒪᔪᒥᒃ; ᐸᐅᕐᖎᑦ ᐃᑦᑎᖓᓂᒡᓘᓐᓃᑦ ᐃᒥᕆᐊᖃᓐᖏᓚᖅ, ᐸᐅᕐᖓᓂᒡᓗ ᒍᕅᑉᓯᓂᒃ ᐸᐅᕐᖓᐅᔭᓂᒡᓘᓐᓃᑦ ᓂᕆᔭᕆᐊᖃᓐᖏᓚᖅ.

⁴ ᑍᒫᒃ ᐃᒻᒥᓂᒃ ᓴᓂᕐᕙᒃᑎᓯᒪᓂᓕᒫᒥᓂ ᐸᐅᕐᒊᑦ ᒍᕅᑉᓯᓂᒃ ᐊᑎᓖᑦ ᐱᕈᕐᕕᖏᓐᓂᑦ ᐱᓯᒪᔪᓂᒃ ᓂᕆᔭᕆᐊᖃᓐᖏᓚᖅ, ᐸᐅᕐᒊᑦ ᒍᕅᑉᓰᑦ ᕔᓂᒃᓮᑦ ᐱᕈᕐᓯᐊᒃᓴᑯᓗᐊᓂᑦ ᐸᐅᕐᖓᖓᑕ ᐊᒥᖓᓄᑦ ᑎᑭᓪᓗᒍ.

⁵ “ᑍᒪᓐᖓᑦ ᐊᖏᕈᑎᒥᒍᑦ ᐅᓪᓗᓂ ᑍᒃᑯᓇᓂ ᐃᒻᒥᓂᒃ ᓴᓂᕐᕙᒃᑎᓯᒪᓂᕐᒥᓂ ᓄᔭᖏᑦ ᑭᐱᔭᐅᔭᕆᐊᖃᓐᖏᓚᑦ, ᑭᓯᐊᓂ ᑍᒃᑯᐊ ᐅᓪᓗᐃᑦ ᐃᓱᓕᑉᐸᑕ ᐃᒻᒥᓂᒃ ᓴᓂᕐᕙᒍᑎᒋᓯᒪᔭᖏᑦ ᐊᑕᓂᕐᒧᑦ, ᑖᒃᑯᓇᓂ ᐃᑦᔪᕐᓁᑦᑑᓂᐊᕐᐳᖅ. ᑖᑦᓱᒪ ᑕᕝᕙ ᓄᔭᓂ ᐱᕈᑎᑦᓴᕆᐊᖃᕐᐰᑦ.

⁶ ᐅᓪᓗᐃᑦ ᓴᓂᕐᕙᒃᓯᒪᔭᓂ ᐊᑕᓂᕐᒧᑦ ᐊᑐᕐᑎᓪᓗᒋᑦ, ᑖᓐᓇ ᑎᒥᐅᑉ ᑐᖁᖓᔫᑉ ᓴᓂᐊᓄᐊᕆᐊᖃᓐᖏᓚᖅ.

⁷ ᑖᓐᓇ ᐃᒻᒥᓂᒃ ᓴᓗᒤᓕᑎᑦᓴᕆᐊᖃᓐᖏᓚᖅ ᓇᖕᒥᓂᖅ ᐊᑖᑕᖓ ᐊᓈᓇᖓᓘᓐᓃᑦ ᖃᑕᓐᖑᑎᖓᓘᓐᓃᑦ ᐊᖑᑦ ᐊᕐᓇᕐᓘᓐᓃᑦ ᓇᓪᓕᐊᑦ ᑐᖁᒐᓗᐊᕐᐸᑦ, ᑖᑦᓱᒪ ᐃᒻᒥᓂᒃ ᒎᑎᒥᑦ ᓴᓂᕐᕙᒃᑎᓯᒪᓂᖓ ᓂᐊᖁᖓᓃᒻᒪᑦ.

⁸ ᐅᓪᓗᓂ ᑍᒃᑯᓇᓂ ᐃᒻᒥᓂᒃ ᓴᓂᕐᕙᒃᑎᓯᒪᓂᕐᒥᓂ ᑖᓐᓇ ᐃᑦᔪᕐᓁᑦᑑᖕᒪᑦ ᐊᑕᓂᕐᒧᑦ.

⁹ “ᑐᖁᑳᓪᓚᒃᑐᖃᕐᐸᑦ ᓴᓂᐊᓃᑦᑐᒥᒃ, ᑕᕝᕙ ᑖᑦᓱᒪ ᓂᐊᖁᐊ ᐃᑦᔪᕐᓁᑦᓱᓃᕐᐳᖅ, ᑭᖑᓂᖓᒍᓪᓗ ᓂᐊᖁᓂ ᓴᓕᔭᕆᐊᖃᓕᕐᐹ ᓴᓗᒻᒪᕐᓴᕐᑕᐅᕕᒃᓴᖓ ᓇᓪᓕᐅᑎᒃᐸᑦ; ᐅᓪᓗᐃᓪᓗ 7ᖓᓂ ᑕᕝᕙ ᓂᐊᖁᓂ ᓴᓕᔭᕆᐊᖃᕐᐹ.

¹⁰ ᐅᓪᓗᐃᓪᓕ 8ᖓᓂ ᑎᖕᒥᐊᖕᓂᒃ ᒪᕐᕉᖕᓂᒃ ᑑᕕᓂᒃ ᐊᑎᖃᕐᑐᓂᒃ ᐅᕝᕙᓘᓐᓃᑦ ᑎᖕᒥᐊᖕᓂᒃ ᒪᕐᕉᖕᓂᒃ ᐱᑦᔨᓐᓯᓂᒃ ᐊᑎᖃᕐᑐᓂᒃ ᑐᓂᕐᕈᓯᕐᑎᑦᓯᔨᒧᑦ ᑐᓂᓯᔪᒃᓴᐅᕗᖅ, ᑐᐱᕐᔪᐊᑉ ᑲᑎᒪᕕᐅᑉ ᐅᒃᑯᐊᖓᓂ;

¹¹ ᑕᕝᕙ ᑐᓂᕐᕈᓯᕐᑎᑦᓯᔨ ᐊᑕᐅᓯᕐᒥᒃ ᑐᓂᕐᕈᓯᕆᐊᖃᕐᐳᖅ ᐊᔪᕐᓂᖅ ᐱᑦᔪᑎᒋᓪᓗᒍ, ᐂᑉᐸᖓᓗ ᐆᑕᒃᓴᒧᑦ ᑐᓂᕐᕈᑎᒋᓗᒍ, ᑖᑦᓱᒪ ᐃᓱᒪᒋᔪᓐᓁᕐᕕᐅᓂᖓᓄᑦ ᑐᓂᕐᕈᑎᒋᓗᒋᑦ, ᑎᒥ ᑐᖁᖓᔪᖅ ᐱᓪᓗᒍ ᐊᔪᕐᑐᓕᓚᐅᕐᒪᑦ; ᐅᓪᓗᒥᓗ ᑍᑦᓱᒪᓂ ᓂᐊᖁᓂ ᐃᑦᔪᕐᓁᓕᑎᑦᓴᕆᐊᖃᕐᐹ.

¹² ᑖᒃᑯᐊᓗ ᐅᓪᓗᐃᑦ ᓴᓂᕐᕙᒃᓯᒪᔭᓂ ᑐᓂᔭᕆᐊᖃᕐᐰᑦ ᐊᑕᓂᕐᒧᑦ, ᑐᓂᕐᕈᓯᕆᐊᕐᑐᕐᓗᓂᓗ ᓰᐱᐅᑉ ᓄᕐᕋᖓᓂᒃ ᐊᖑᒻᒥᒃ ᐊᕐᕌᒍᓕᖕᒥᒃ ᐊᑕᐅᓯᕐᒥᒃ ᐸᓯᔭᒃᓴᐅᓂᕐᒧᑦ ᐊᑭᓕᐅᑎᒃᓴᒥᒃ; ᐅᓪᓗᐃᓪᓕ ᓯᕘᓪᓖᑦ ᐊᑐᕈᓐᓃᕐᓂᐊᕐᐳᑦ, ᐃᒻᒥᓂᒃ ᓴᓂᕐᕙᒃᓯᒪᓂᖓᑕ ᐃᑦᔪᕐᓇᕐᓯᑎᑕᐅᓚᐅᕐᓂᖓᓄᑦ.

¹³ “ᐃᒫᒃ ᑕᕝᕙ ᓈᓴᕅᑎ ᐱᖁᔭᖃᕐᐳᖅ: ᐅᓪᓗᐃᑦ ᓴᓂᕐᕙᓯᒪᓂᖏᑦ ᐃᓱᓕᑉᐸᑕ, ᑖᓐᓇ ᓈᓴᕅᑎ ᑐᐱᕐᔪᐊᑉ ᑲᑎᒪᕕᐅᑉ ᐃᑎᕐᑕᕐᕕᖓᓄᑦ ᐱᑎᑕᐅᔭᕆᐊᖃᕐᐳᖅ.

¹⁴ ᑖᓐᓈ ᐊᑕᓂᕐᒧᑦ ᑐᓂᕐᕈᓯᕐᑐᒃᓴᐅᕗᖅ: ᓰᐱᐅᑉ ᓄᕐᕋᖓᓂᒃ ᐊᖑᒻᒥᒃ ᐊᑕᐅᓯᕐᒥᒃ ᐊᕐᕌᒍᖃᕐᑐᒥᒃ, ᓴᓗᒤᓐᓂᖃᖏᑦᑐᒥᒃ, ᐆᑕᒃᓴᒧᑦ ᑐᓂᕐᕈᑎᒋᓗᒍ, ᓰᐱᐅᓪᓗ ᓄᕐᕋᖓᓂᒃ ᐊᕐᓇᒥᒃ ᐊᑕᐅᓯᕐᒥᒃ ᐊᕐᕌᒍᖃᕐᑐᒥᒃ, ᓴᓗᒤᓐᓂᖃᖏᑦᑐᒥᒃ, ᐊᔪᕐᓂᖅ ᐱᓪᓗᒍ ᑐᓂᕐᕈᓯᕐᓗᓂ, ᓰᐱᒥᒡᓗ ᐊᖑᓴᓪᓗᕐᒥᒃ ᓴᓗᒤᓐᓂᖃᖏᑦᑐᒥᒃ ᐃᓅᖃᑎᒌᑦᓯᐊᕐᓂᖅ ᐱᓪᓗᒍ ᑐᓂᕐᕈᓯᕐᓗᓂ.

¹⁵ ᐃᕕᐅᔭᕐᒧᓪᓗ ᐴᕐᓯᒪᔪᓂᒃ ᓂᐊᖂᔭᓂᒃ ᐳᕙᓪᓚᕐᓴᐅᑎᖃᖏᑦᑐᓂᒃ, ᐊᒻᒪᓗ ᓂᐊᖂᔭᒃᓴᖅ ᒥᑭᔪᑎᐅᓂᕐᐹᖅ ᐅᕐᓱᒧᑦ ᐊᑯᓯᒪᓗᓂ ᓵᑦᑐᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᓴᓇᓯᒪᔪᖅ, ᐅᕐᓱᒧᓪᓗ ᒥᖑᐊᕐᓯᒪᓗᓂ, ᐃᓚᖃᕐᓗᓂᓗ ᓂᐊᖂᔭᒃᓴᓂᒃ ᑐᓂᕐᕈᑎᒃᓴᓂᒃ ᐃᒥᕐᓂᒡᓗ ᑐᓂᕐᕈᑎᒃᓴᓂᒃ ᐃᓚᖃᕐᓗᒋᑦ.

¹⁶ “ᑕᕝᕙ ᑐᓂᕐᕈᓯᕐᑎᑦᓯᔨᐅᑉ ᑖᒃᑯᐊᓕᒫᑦ ᐊᑕᓂᐅᑉ ᓵᖓᓄᑦ ᐱᑎᑕᒃᓴᕆᕔᑦ, ᑐᓂᕐᕈᓯᕐᓗᓂᓗ ᑐᓂᕐᕈᓯᕆᐊᕐᑐᑑᑉ ᐊᔪᕐᓂᖏᑦ ᐱᓪᓗᒋᑦ, ᑐᓂᕐᕈᓯᕐᒥᓗᓂᓗ ᐆᑕᒃᓮᑦ ᐱᑦᔪᑎᒋᓗᒋᑦ.

¹⁷ ᓰᐱᓗ ᐊᖑᓴᓪᓗᖅ ᑐᓂᕐᕈᑎᒋᔭᒃᓴᕆᕚ ᐊᑕᓂᕐᒧᑦ ᐃᓅᖃᑎᒌᑦᓯᐊᕐᓂᖅ ᐱᑦᔪᑎᒋᓪᓗᒍ, ᐃᓚᖃᕐᓗᓂ ᓂᐊᖂᔭᓂᒃ ᑐᓂᕐᕈᑎᒃᓴᓂᒃ ᐃᒥᕐᓂᒡᓗ ᑐᓂᕐᕈᑎᒃᓴᓂᒃ, ᑐᓂᕈᓯᕐᑎᑦᓯᔨ ᑐᓂᕐᕈᓯᕐᑎᑦᓯᔪᒃᓴᐅᕗᖅ ᑐᓂᕐᕈᓯᕆᐊᕐᑐᑐᖅ ᐱᑦᔪᑎᒋᓪᓗᒍ.

¹⁸ ᑕᕝᕙ ᓈᓴᕅᑎᐅᑉ ᓂᐊᖁᓂ ᐃᑦᔪᕐᓁᓕᑎᑕᐅᔪᖅ ᓴᓕᔭᒃᓴᕆᕚ ᑐᐱᕐᔪᐊᑉ ᑲᑎᒪᕕᐅᑉ ᐃᑎᕐᑕᕐᕕᖓᓂ, ᓂᐊᖁᖓᓂᑦ ᓄᔧᑦ ᓴᓕᓂᑯᐃᑦ ᐃᓕᔭᒃᓴᕆᕔᑦ ᐃᑯᒪᒧᑦ ᐃᓅᖃᑎᒌᑦᓯᐊᕐᓂᕐᒧᑦ ᑐᓂᕐᕈᑎᐅᑉ ᐊᑖᓂ ᐃᑯᐊᓚᔪᒧᑦ.

¹⁹ “ᑐᓂᕐᕈᓯᕐᑎᑦᓯᔨᐅᑉ ᑕᕝᕙ ᓰᐱᐅᑉ ᐊᖑᓴᓪᓘᑉ ᑭᐊᓯᖓ ᐃᒥᕐᒧᑦ ᐆᓯᒪᔪᖅ, ᓂᐊᖂᔭᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᐆᓯᒪᔪᒥᒃ ᐊᑕᐅᓯᕐᒥᒃ ᐃᓚᓗᒍ, ᐊᑕᐅᓯᕐᒥᒡᓗ ᓴᓇᓯᒪᔪᒥᒃ ᓂᐊᖂᔭᒥᒃ ᓵᑦᑐᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᐃᓚᒃᑲᓐᓂᕐᓗᒍ, ᑖᒃᑯᐊ ᐃᓕᔭᒃᓴᕆᕔᑦ ᓈᓴᕅᑎᐅᑉ ᐊᒡᒐᖏᓐᓄᑦ, ᑖᓐᓇ ᓂᐊᖁᓂ ᐃᑦᔪᕐᓁᓕᑎᑕᐅᓂᕐᒧᑦ ᓴᓕᔭᕇᕐᐸᒍ.

²⁰ ᑐᓂᕐᕈᓯᕐᑎᑦᓯᔨᐅᑉ ᑖᒃᑯᐊ ᐃᓵᒃᑕᕐᓂᕐᒧᑦ ᑐᓂᕐᕈᑎᒋᔭᒃᓴᕆᕔᑦ ᐊᑕᓂᐅᑉ ᓵᖓᓂ, ᐃᓚᖃᕐᓗᑎᒃ ᓰᐱᐅᑉ ᓴᑭᐊᖏᓐᓂᒃ ᐃᓵᒃᑕᕐᓂᕐᒧᑦ ᑐᓂᕐᕈᑕᐅᓗᑎᒃ ᓰᐱᐅᓪᓗ ᐊᖑᓴᓪᓘᑉ ᒥᒥᖓ ᑭᕕᖃᑦᑕᕐᓗᒍ ᑐᓂᕐᕈᑕᐅᓗᓂ, ᑖᒃᑯᐊ ᑕᕝᕙ ᐃᑦᔪᕐᓁᓕᔪᑦ ᑐᓂᕐᕈᓯᕐᑎᑦᓯᔨᐅᑉ ᓂᕿᒃᓴᖏᑦ, ᐱᔭᕇᕐᐸᑦ ᑕᕝᕙ ᓈᓴᕅᑎ ᕔᓂᒥᒃ ᐃᒥᕈᓐᓇᕐᓯᓂᐊᕐᐳᖅ.

²¹ “ᑍᒫᒃ ᑕᕝᕙ ᓈᓴᕅᑎᐅᓂᐊᕐᑐᖅ ᐱᖁᔭᖃᕐᐳᖅ ᐃᒻᒥᓂᒃ ᓴᓂᕐᕙᒃᓯᒪᓂᐊᕈᓂ ᐊᖏᕈᑎᖃᕐᓂᐊᕈᓂᓗ ᐊᑕᓂᕐᒧᑦ, ᑭᓱᒥᒡᓘᓐᓃᑦ ᓇᖕᒥᓂᖅ ᐊᔪᓐᖏᑕᒥᓂᒃ ᐱᔭᕆᐊᖃᕐᐳᖅ; ᐊᖏᕈᑎᒋᔭᓂ ᒪᓕᒡᓗᒍ, ᑕᒪᓐᓇ ᐃᒻᒥᓂᒃ ᓴᓂᕐᕙᒃᑎᓯᒪᓂᓂ ᐱᖁᔭᖏᑦ ᒪᓕᒡᓗᒋᑦ.”

ᑐᓂᕐᕈᓯᕐᑎᑦᓯᔨᑦ ᐊᖓᔪᖅᑳᖓᑦᑕ ᓮᒻᒪᕐᑎᑦᓯᓂᖓ

²² ᐊᑕᓂᐅᓪᓗ ᒨᓯᓯ ᐅᖃᕐᕕᒋᕚ, ᐅᖃᕐᓗᓂ:

²³ “ᐂᕉᓂ ᐃᕐᓂᖏᓪᓗ ᐅᖃᐅᑎᒃᑭᑦ, ᐃᒫᒃ, ‘ᐃᓴᕆᐊᓕᐅᑉ ᕿᑐᕐᖓᖏᑦ ᓮᒻᒪᕐᑎᓕᕈᑦᓯᐅᒃ, ᐃᒫᒃ ᐅᖃᖃᑦᑕᕆᑦᓯ:

²⁴ ᐊᑕᓂᐅᑉ ᓮᒻᒪᕐᑎᓪᓕᓯ ᓴᐳᑎᓕᓯᓗ;

²⁵ ᐊᑕᓂᐅᑉ ᑮᓇᕐᒥᓄᑦ ᖃᐅᒪᒃᓴᕐᓕᓯ ᐱᑦᓯᐊᕐᕕᒋᓕᓯᓗ;

²⁶ ᐊᑕᓂᐅᑉ ᑮᓇᕐᒥᓄᑦ ᓵᕝᕕᒋᓕᓯ ᓮᒪᓂᕐᒥᓂᒡᓗ ᑐᓂᓯᕕᒋᓕᓯ.’”

²⁷ “ᑍᒫᒃ ᑕᕝᕙ ᐊᑎᕋ ᐃᓴᕆᐊᓕᒥᐅᓄᑦ ᐃᓕᓯᒪᓂᐊᕐᐹᑦ, ᐅᕙᖓᓗ ᓮᒻᒪᕐᑎᓐᓂᐊᕐᐸᒃᑲ.”