ᒨᓯᓯ ᓯᑕᒪᖏᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ

ᒥᕆᐊᒻ ᐊᒻᒪ ᐂᕉᓂᐅᑉ ᓈᒻᒪᒃᓴᖏᓐᓂᖏᒃ ᒨᓯᓯᒥᒃ

¹ ᒥᕆᐊᒻ ᐊᒻᒪ ᐂᕉᓂ ᒨᓯᓯᒥᒃ ᐊᑭᕋᕐᑐᕐᓗᑎᒃ ᐅᖃᓕᓚᐅᕐᐴᒃ ᐊᕐᓇᒥᒃ ᐃᑎᐅᐱᐊᒥᐅᑕᕐᒥᒃ ᓄᓕᐊᖃᕐᓂᖓ ᐱᓪᓗᒍ, ᐊᕐᓇᒥᒃ ᐃᑎᐅᐱᐊᒥᐅᑕᕐᒥᒃ ᓄᓕᐊᓂᓚᐅᕐᒪᑦ.

² ᐅᖃᓚᐅᕐᐴᒃ, “ᐊᑕᓂᖅ ᒨᓯᓯᑯᑦ ᑭᓯᐊᓂ ᐅᖃᖃᑦᑕᕐᐹ? ᐅᕙᑦᑎᒍᓪᓕᑕᐅᖅ ᐅᖃᖃᑦᑕᕐᓯᒪᓐᖏᓛᖅ?” ᑍᒤᓕᐅᕐᑎᓪᓗᒋᒃ ᐊᑕᓂᐅᑉ ᑐᓵᓚᐅᕐᐹᒃ.

³ (ᒨᓯᓯᓕ ᐃᓅᓚᐅᕐᐳᖅ ᒥᑭᒡᓕᑎᕐᓯᒪᔪᕐᔪᐊᖑᓪᓗᓂ ᓄᓇᕐᔪᐊᒦᑦᑐᓕᒫᓂᑦ ᒥᑭᒡᓕᑎᕐᓯᒪᓂᕐᐹᖑᓪᓗᓂ.)

⁴ ᑕᕝᕔᓐᓇᖅ ᐊᑕᓂᖅ ᒨᓯᓯᒧᑦ ᐂᕉᓂᒧᓪᓗ ᒥᕆᐊᒻᒧᓪᓗ ᐅᖃᕐᐳᖅ, “ᐊᓂᓚᐅᕆᑦᓯ ᐱᖓᓲᓗᓯ ᑐᐱᕐᔪᐊᒧᑦ ᑲᑎᒪᕕᖕᒧᑦ ᐂᓗᓯ.” ᑖᒃᑯᐊᓗ ᐱᖓᓲᓪᓗᑎᒃ ᐊᓂᕗᑦ.

⁵ ᐊᑕᓂᖅ ᐊᖅᑲᕐᐳᖅ ᓄᕗᔭᒦᓪᓗᓂ ᓇᐸᔪᒥ ᑐᐱᕐᔪᐊᑉ ᑲᑎᒪᕕᐅᑉ ᐃᑎᕐᑕᕐᕕᖓᓃᓕᕐᓗᓂ, ᕾᖁᓪᓗᒋᒡᓗ ᐂᕉᓂ ᒥᕆᐊᒻᓗ. ᑖᒃᑯᐊᒡᓗ ᓯᕗᒧᐊᒃᐴᒃ.

⁶ ᐅᖃᕐᓗᓂᓗ, “ᐅᖃᐅᓯᒃᑲ ᓈᓚᑦᓯᐊᕐᓯᒋᒃ: ᐅᖃᕐᑕᐅᖁᔭᓐᓂᒃ ᐅᖃᕐᑎᑕᖃᕐᐹ ᐃᓕᑦᓯᓐᓂ, ᐅᕙᖓ ᐊᑕᓂᖅ, ᓇᖕᒥᓂᖅ ᑖᑦᓱᒧᖓ ᖃᐅᔨᑎᑦᓯᕙᒃᐳᖓ ᑕᑯᑎᑦᔪᑎᒃᑯᑦ; ᓯᓐᓇᒃᑑᒪᒃᑯᓪᓗ ᐅᖃᕐᕕᖃᓲᖑᕗᖓ.

⁷ ᒨᓯᓯᒧᓪᓕ ᐱᔨᓐᓄᑦ ᑍᒤᓕᐅᕐᐸᓐᖏᓚᖓ; ᑖᓐᓇ ᓱᖁᓯᔪᐃᑦᑑᖕᒪᑦ ᐃᒡᓗᓐᓂ.

⁸ ᐅᖃᕐᕕᒋᕙᒃᐸᕋ ᖃᓂᕐᒥᑦ ᖃᓂᕐᒧᑦ, ᑐᑭᓯᓇᑦᓯᐊᕐᑐᓂ ᐃᔨᕐᓯᒪᖏᑦᑐᓂᒡᓗ; ᐊᑕᓂᐅᓪᓗ ᐊᒡᓛᑦ ᑐᓄᖓᓂᒃ ᑕᑯᓯᒪᕗᖅ. ᓱᖕᒪᑦ ᑲᑉᐱᐊᓱᓐᖏᓚᓰᒃ ᒨᓯᓯᒥᒃ ᐱᔨᒋᔭᓐᓂᒃ ᐊᑭᕋᕐᑐᕐᓗᓯᒃ?”

⁹ ᐊᑕᓂᐅᓪᓗ ᓂᓐᖓᐅᒪᓂᖓ ᑖᒃᑯᖕᓄᖓ ᐃᑯᐊᓚᕗᖅ, ᕿᒪᒡᓗᒋᒡᓗ.

¹⁰ ᓄᕗᔭᓗ ᑐᐱᕐᔪᐊᒥᑦ ᖁᒻᒧᐊᖕᒪᑦ, ᑕᕝᕔᓐᓇᖅ ᒥᕆᐊᒻ ᐸᕐᑎᕐᑐᓐᒍᓚᐅᕐᐳᖅ, ᐊᐳᑎᑐᑦ ᖃᑯᕐᓯᓪᓗᓂ. ᐂᕉᓂᐅᓪᓗ ᒥᕆᐊᒻ ᕿᕕᐊᕋᒥᐅᒃ, ᑕᑯᕚ ᐸᕐᑎᓕᕐᑐᖅ.

¹¹ ᐂᕉᓂ ᐅᖃᕐᐳᖅ ᒨᓯᓯᒧᑦ, “ᐊᖓᔪᖅᑳᒃ! ᐊᔪᕐᑐᓕᓂᕐᒧᑦ ᑕᒪᑐᒧᖓ ᐸᓯᑦᑍᓕᑎᒍᑦ, ᓯᓔᓐᓂᕐᒧᑦ ᐱᐅᖏᑦᑐᓕᓂᕆᓚᐅᕐᑕᑦᑎᓐᓂᑦ.

¹² ᐅᓇ ᑐᖁᖓᓗᓂ ᐃᕐᓂᐊᖑᔪᑐᑦ ᑍᒤᑎᓐᓂᐊᕐᓇᒍ, ᑎᒥᖓ ᐃᓚᑰᓗᓂ ᐊᓈᓇᒥ ᐃᒡᓕᐊᖓᓂᑦ ᐊᓂᔪᑐᑦ.”

¹³ ᒨᓯᓯᓗ ᐊᑕᓂᕐᒧᑦ ᓂᓪᓕᐊᓪᓗᓂ, ᐅᖃᕐᐳᖅ, “ᒎᑏ, ᐅᓇ ᐱᔪᓐᓁᕐᑎᓚᐅᕈᒃ, ᑐᒃᓯᐊᕐᐳᖓ ᐃᓕᖕᓄᑦ!”

¹⁴ ᐊᑕᓂᐅᓪᓗ ᒨᓯᓯ ᐅᖃᐅᑎᕚ, “ᐊᑖᑕᖓᑕ ᑮᓇᖓᓄᑦ ᐅᕆᐊᕐᕕᒋᓚᐅᕐᐸᒍ, ᑲᓐᖑᓇᕐᑐᒦᒐᔭᓚᐅᓐᖏᓛ ᐅᓪᓗᓂᒃ 7ᓂᒃ? ᓄᓇᓕᖕᓂᑦ ᐊᐅᓚᕐᑎᑕᐅᓯᒪᔭᕆᐊᖃᕐᐳᖅ ᐅᓪᓗᓂᒃ 7ᓂᒃ, ᑭᖑᓂᖓᒍᑦ ᑕᕝᕙ ᐅᑎᕐᑎᑕᐅᔪᓐᓇᕐᓂᐊᕆᕗᖅ.”

¹⁵ ᑍᒤᒻᒪᑦ ᒥᕆᐊᒻ ᑕᖕᒫᕐᓯᒪᕕᖕᒥᑦ ᐊᐅᓪᓚᕐᑎᑕᐅᓯᒪᓚᐅᕐᐳᖅ ᐅᓪᓗᓂᒃ 7ᓂᒃ, ᐃᓄᐃᓪᓗ ᐊᐅᓪᓚᓚᐅᓐᖏᓚᑦ ᒥᕆᐊᒻ ᐅᑎᕐᑎᑕᐅᓚᐅᖏᓐᓂᖓᓂ.

¹⁶ ᑭᖑᓂᖓᓂ ᐃᓄᐃᑦ ᐊᐅᓪᓚᓕᓚᐅᕐᐳᑦ ᕼᐊᔨᕌᑎᒥᑦ ᑕᖕᒫᕐᓗᑎᒡᓗ ᐃᓄᖃᖏᑦᑐᒥ ᐸᕌᓐᒥ.