ᓂᕼᐃᒤᐊᐅᑉ ᐊᒡᓚᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦᓂᕼᐃᒤᐊᐅᑉ ᐃᓱᒫᓘᑎᖃᕐᓂᖓ ᔨᕉᓴᓕᒥᒃ 1 ᐅᑯᐊ ᓂᕼᐃᒤᐊᐅᑉ ᐅᖃᐅᓯᕆᓚᐅᕐᐰᑦ ᕼᐊᑲᓔᐊᐅᑉ ᐃᕐᓂᖓᑕ. ᑕᒪᓐᓇ ᐊᑐᓚᐅᕐᐳᖅ ᑕᖅᑭᖅ ᑭᓯᓕᕝ ᐊᑐᓕᕐᑎᓪᓗᒍ, ᐊᕐᕌᒎᑉ 12ᒋᓕᕐᑕᖓᓂ ᐊᖓᔪᖅᑳᒃᑯᕕᖕᒦᓐᓂᕐᒪ ᓄᓇᒥ ᓲᓴᒥ. 2 ᕼᐊᓇᓁ ᖃᑕᓐᖑᑎᒪ ᐃᓚᖓᑦ, ᐊᖑᑎᓂᒃ ᐃᓚᖃᕐᓗᓂ ᔫᑕᒥᑦ ᑎᑭᒻᒪᑕ; ᐊᐱᕆᓚᐅᕐᐸᒃᑲ ᔫᑎᑦ ᐅᑎᕐᓯᒪᓕᕐᑐᑦ ᖃᓄᐃᒻᒪᖔᑕ ᐹᐱᓘᓂᒧᑦ ᐊᐅᓪᓚᕈᑦᔭᐅᓯᒪᓚᐅᕐᑐᑦ, ᔨᕉᓴᓕᒻᓗ ᖃᓄᐃᒻᒪᖔᑦ. 3 ᑖᒃᑯᐊ ᐅᖃᐅᑎᕚᖓ, “ᑖᒃᑯᐊ ᐅᑎᕐᓯᒪᓕᕐᑐᑦ ᑕᕝᕗᖓ ᐊᐅᓪᓚᕈᑦᔭᐅᓯᒪᓚᐅᕐᑐᓂᑦ ᐅᑯᒤᒃᓴᕐᑐᒻᒪᕆᐊᓘᕗᑦ ᑲᓐᖑᓇᕐᑐᒦᓪᓗᑎᒡᓗ; ᔨᕉᓴᓕᐅᓪᓗ ᐊᕙᓗᕐᔪᐊᖓ ᓱᕋᒃᓯᒪᓪᓗᓂ, ᐃᑎᕐᑕᕐᕕᖏᓪᓗ ᐃᑯᒪᒧᑦ ᓄᖑᑕᐅᓯᒪᕗᑦ.” 4 ᑕᒪᒃᑯᐊ ᐅᖃᐅᓰᑦ ᑐᓴᕋᒃᑭᑦ, ᐃᖏᓪᓗᖓ ᕿᐊᓕᓚᐅᕐᐳᖓ. ᐅᓪᓗᓂᒃ ᐅᓄᕐᑐᓂᒃ ᕿᒃᓵᕕᒡᔪᐊᕈᑎᒋᓚᐅᕐᐸᕋ; ᓂᕆᑦᑍᓕᓪᓗᖓ ᑐᒃᓯᐊᓚᐅᕐᐳᖓ ᒎᑎᒧᑦ ᕿᓚᖕᒦᑦᑐᒧᑦ. 5 ᐅᖃᕐᓗᖓᓗ, “ᐊᑕᓃᖅ ᒎᑏ ᕿᓚᖕᒦᑦᑐᑎᑦ, ᐊᖏᔪᕐᔪᐊᖑᔪᑎᑦ ᐃᓕᕋᓇᕐᑑᓪᓗᑎᓪᓗ ᒎᑎᐅᔪᑎᑦ, ᐊᖏᖃᑎᒌᒍᑎᒋᓯᒪᔭᕐᓂᒃ ᓇᒡᓕᒍᓱᖕᓂᕐᓂᒡᓗ ᑲᔪᓯᑎᑦᓯᖃᑦᑕᕐᑐᑎᑦ ᐃᓕᖕᓂᒃ ᐅᖓᒋᔭᖃᕐᑐᓄᑦ ᐱᖁᔭᕐᓂᒡᓗ ᒪᓕᒃᑐᓄᑦ. 6 ᓯᐅᑏᒃᑭᒃ ᑐᓵᓚᐅᕐᓕᒃ, ᐃᔩᒃᑭᒡᓗ ᐅᐃᑕᓗᑎᒃ, ᑐᓴᕈᓐᓇᖁᓪᓗᑎᑦ ᐱᔨᕕᑦ ᑐᒃᓯᐊᕐᓂᖓᓂ ᒫᓐᓇ ᐃᓕᖕᓄᑦ ᑐᒃᓯᐊᕈᑎᒋᔭᓐᓂᒃ ᐅᓪᓗᒃᑯᑦ ᐅᓐᓄᐊᒃᑯᓪᓗ ᐱᔨᑎᑦ ᐃᓴᕆᐊᓕᑎᑦ ᐱᓪᓗᒋᑦ, ᐃᓕᖕᓄᑦ ᐊᔪᕐᑐᓕᓯᒪᒐᑦᑕ ᖃᕿᐊᓕᕐᐳᒍᑦ, ᐅᕙᖓᓗ ᐊᑖᑕᒪᓗ ᐃᒡᓗᒥᐅᖃᑎᖏᑦ ᐊᔪᕐᑐᓕᓯᒪᖓᑦᑕ. 7 ᐃᓕᖕᓄᑦ ᐱᐅᖏᑦᑐᐊᓗᖕᓂᒃ ᐱᓇᓱᐊᕐᓯᒪᒐᑦᑕ, ᐱᖁᔭᕐᓂᒃ ᒪᓕᓚᐅᖏᓐᓇᑦᑕ, ᐊᑐᕐᑕᐅᖁᔭᑎᓪᓗ ᐊᑐᓚᐅᕐᓇᒋᑦ, ᐱᖁᔭᓕᐊᕆᓚᐅᕐᑕᑎᓪᓗ ᒨᓯᓯᒃᑯᑦ ᒪᓕᓚᐅᓐᖏᓚᕗᑦ. 8 ᐃᖅᑬᓚᐅᕆᑦ ᑐᒃᓯᐊᕐᐳᖓ, ᐅᖃᐅᓰᑦ ᐱᖁᔨᑦᔪᑎᒋᓚᐅᕐᑕᑎᑦ ᐱᔨᖕᓄᑦ ᒨᓯᓯᒧᑦ, ᐅᖃᕐᓗᑎᑦ, ‘ᐱᖁᔭᓐᓂᒃ ᒪᓕᖕᓂᐊᖏᒃᑯᑦᓯ, ᓄᓇᓖᑦ ᐊᓯᖏᓐᓄᑦ ᐊᐅᓪᓚᕐᑎᓪᓗᓯ ᓯᐊᒻᒪᕐᑎᑦᓱᒫᕐᐸᑦᓯ; 9 ᐅᕙᓐᓄᓪᓕ ᐅᑎᕈᑦᓯ ᐱᖁᔭᒃᑲᓗ ᒪᓕᒡᓗᒋᑦ ᐊᑐᓕᕈᑦᓯᒋᒃ, ᐅᖓᓯᒃᑐᐊᓗᖕᒧᑦ ᐊᐅᓪᓚᕈᑦᔭᐅᓯᒪᓕᕋᓗᐊᕈᑦᓯ, ᑕᕝᕙ ᓇᑭᑐᐃᓐᓇᖅ ᑲᑎᕐᓱᕈᒫᕐᐸᑦᓯ, ᐱᑎᓪᓗᓯᓗ ᑕᕝᕗᖓ ᓂᕈᐊᕐᓯᒪᔭᓐᓄᑦ, ᑕᕝᕙᓂ ᐊᑎᕋ ᑕᕝᕙᓃᖁᓪᓗᒍ.’ 10 “ᑖᒃᑯᐊ ᐱᔨᒋᒐᕕᒋᑦ ᐃᓄᖁᑎᒋᓪᓗᒋᓪᓗ, ᐱᔪᓐᓇᕐᓂᕐᔪᐊᕐᓄᑦ ᐱᐅᓕᓚᐅᕋᕕᒋᑦ, ᓴᓐᖏᓂᕐᔪᐊᕐᓄᓪᓗ. 11 ᐊᑕᓃᖅ, ᑐᒃᓯᐊᕐᐳᖓ, ᓯᐅᑏᒃᑭᒃ ᓈᓚᓚᐅᕐᓕᒃ ᐱᔨᕕᑦ ᑐᒃᓯᐊᕐᓂᖓᓂᒃ, ᐱᔨᕕᓪᓗ ᑐᒃᓯᐊᕐᓂᓕᒫᖏᓐᓄᑦ ᐃᓕᖕᓂᒃ ᐅᐱᓐᓇᕐᓯᑎᑦᓯᔪᒪᔪᓄᑦ; ᐅᓪᓗᒥᓗ ᐱᔩᑦ ᐊᖏᕐᑕᐅᔪᓐᓇᕐᑎᓚᐅᕈᒃ, ᓂᑲᒋᔭᐅᖁᓪᓗᒍᓗ ᐊᖓᔪᖅᑳᕐᔪᐊᕐᒧᑦ.” ᑍᑦᓱᒪᓂᐅᑎᓪᓗᒍ ᐊᖓᔪᖅᑳᕐᔪᐊᕐᒧᑦ ᕔᓂᑐᕐᑎᑦᓯᔨᒋᔭᐅᓚᐅᕋᒪ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society