ᒫᑎᐅᓯᐅᑉ ᐊᒡᓚᖏᑦ 28 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯᐅᑉ ᒪᑭᓐᓂᖓ

¹ ᓴᐸᑎ ᐊᓂᒍᕐᒪᑦ, ᐱᓇᓱᐊᕈᓯᐅᑉ ᓯᕗᓪᓕᕐᐹᖓᑕ ᐅᓪᓛᖓᓂ ᖃᐅᒻᒪᓕᓵᕐᑎᓪᓗᒍ, ᒥᐊᕆ ᒫᒃᑕᓖᓂ ᑖᑦᓱᒪᓗ ᐊᓯᐊ ᒥᐊᕆ ᐃᓗᕕᕐᒥᒃ ᑕᑯᔭᕐᑐᕐᐳᒃ.

² ᑕᑯᒋᑦ, ᓄᓇ ᓴᔪᒃᐱᓪᓚᒃᑐᐊᓘᕗᖅ; ᐊᑕᓂᐅᑉ ᐂᖏᓖᖓ ᕿᓚᖕᒥᑦ ᐊᖅᑲᕐᐳᖅ, ᐃᓗᕕᐅᑉ ᒪᑐᖓ ᐅᔭᕋᒃᔪᐊᖅ ᐊᒃᓴᑲᕐᑎᑉᐹ, ᖃᖓᓄᑦ ᐃᖏᓪᓗᓂ.

³ ᑖᑦᓱᒪ ᓴᖅᑭᓐᓂᖓ ᖃᐅᒻᒪᓚᒃᑎᑐᑦ ᑕᐅᑦᑐᖃᓚᐅᕐᐳᖅ, ᐊᓐᓄᕌᖏᑦ ᐊᐳᑎᑐᑦ ᖃᑯᕐᑎᒋᓪᓗᑎᒃ.

⁴ ᐅᓇᑕᕐᑐᒃᓮᑦ ᖃᐅᔨᒪᓇᓱᐊᕐᑎᑕᐅᔪᑦ ᑲᑉᐱᐊᓱᖕᓂᕐᒧᑦ ᓄᑭᖏᕈᑎᕗᑦ ᑐᖁᖓᔪᑎᑐᑦ ᑍᒤᓕᕐᓗᑎᒃ.

⁵ ᐂᖏᓕ ᐊᕐᓈᖕᓄᑦ ᐅᖃᕐᐳᖅ, “ᑲᑉᐱᐊᓱᖏᓪᓗᓯᒃ; ᖃᐅᔨᒪᕗᖓ ᔩᓱᓯᒥᒃ ᕿᓂᕆᐊᕋᑦᓯᒃ ᑭᑭᐊᒃᑐᕐᑕᐅᓚᐅᕐᑐᒥᒃ.

⁶ ᑕᕝᕙᓃᑦᑐᓐᓃᕐᐳᖅ; ᒪᑭᓯᒪᓕᕐᒪᑦ, ᓲᕐᓗ ᐃᓕᑦᓯᓐᓄᑦ ᐅᖃᓚᐅᕋᒥ. ᐊᑏ ᕾᓗᓯᒃ ᑕᑯᕐᓯᐅᒃ ᓇᓪᓚᖓᕕᒋᓚᐅᕐᑕᖓ.

⁷ ᒫᓐᓇ ᑐᐊᕕᕐᓗᓯᒃ ᐃᓕᓐᓂᐊᕐᑎᖏᑦ ᐅᖃᐅᑎᔭᕐᑐᓕᕐᓯᒃᑯᒃ ᑐᖁᖓᔪᓂᑦ ᒪᑭᓯᒪᓕᕐᒪᑦ, ᑕᑯᒋᑦ, ᓯᕗᓂᑦᓯᓐᓂ ᒐᓕᓕᐊᒧᐊᕐᓂᐊᕐᐳᖅ; ᑍᑲᓂ ᑕᑯᓂᐊᕐᐸᓯ! ᐃᖅᑲᐅᒪᒋᑦᓯ ᑕᒪᒃᑯᓂᖓ ᐅᖃᐅᓯᕆᔭᓐᓂᒃ.”

⁸ ᑕᕝᕙ ᑐᐊᕕᕐᓗᑎᒃ ᐃᓗᕕᕐᒥᑦ ᕿᒪᕉᑎᕘᒃ, ᑲᑉᐱᐊᓱᒃᓗᑎᒃ ᖁᕕᐊᓱᒻᒪᕆᒃᓗᑎᒡᓗ, ᐅᓪᓚᒃᓯᕘᒃ ᐃᓕᓐᓂᐊᕐᑎᖏᓐᓄᑦ ᐅᖃᕆᐊᕐᑐᕐᓗᑎᒃ.

⁹ ᑕᑯᒋᑦ, ᔩᓱᓯᐅᑉ ᑲᑎᕔᑦ ᐅᖃᐅᑎᓪᓗᒋᒃ, “ᓮᒪᓂᐅᑉ ᓇᔪᕐᓕᓯᒃ.” ᑖᒃᑯᐊᒃ ᐅᐸᒍᑎᕘᒃ, ᐃᑎᒐᖏᑦ ᐊᒃᑐᕐᓗᒋᑦ, ᑐᒃᓯᐊᕐᕕᒋᕚᒃ,

¹⁰ ᑕᕝᕙ ᔩᓱᓯᐅᑉ ᐅᖃᐅᑎᕚᒃ, “ᑲᑉᐱᐊᓱᖏᓪᓗᓯᒃ; ᖃᑕᓐᖑᑎᒃᑲ ᐅᖃᐅᑎᔭᕐᑐᕐᓯᒃᑯᒃ ᒐᓕᓕᐊᒧᐊᖁᓗᒋᑦ, ᑕᕝᕙᓂ ᑕᑯᓂᐊᕐᐹᖓ.”

ᐃᓗᕕᕐᒥ ᖃᐅᔨᓴᕐᑐᕕᓃᑦ ᐅᖃᕆᐊᕐᑐᕐᓂᖏᑦ

¹¹ ᐊᕐᓈᒃ ᐃᓚᒥᖕᓄᐊᓕᕐᑎᓪᓗᒋᒃ, ᑕᑯᒋᑦ, ᐅᓇᑕᕐᑐᒃᓮᑦ ᐃᓚᖏᑦ ᖃᐅᔨᒪᓇᓱᐊᕐᑎᐅᓚᐅᕐᑐᑦ ᐃᓗᕕᕐᒥᒃ ᐃᒡᓗᒐᓴᖕᓄᑦ ᐅᑎᕐᐳᑦ ᑐᓂᕐᕈᓯᕐᑎᑦᓯᔨᑦ ᐊᖓᔪᖅᑳᖏᓐᓄᑦ ᐅᓂᒃᑳᕐᓗᑎᒃ ᑕᒤᓐᓂᒃ ᐱᓂᐊᕐᓂᐅᓚᐅᕐᑐᓂᒃ.

¹² ᑐᓂᕐᕈᓯᕐᑎᑦᓯᔩᓪᓕ ᐊᖓᔪᖅᑳᖏᑦ, ᔫᑎᓗ ᐊᖓᔪᖅᑳᖏᑦ ᑲᑎᒪᓪᓗᑎᒃ ᐊᖏᖃᑎᒌᒃᑲᒥᒃ, ᐅᓇᑕᕐᑐᒃᓮᑦ ᑮᓇᐅᔭᓂᒃ ᐊᒥᓱᓂᒃ ᐊᑭᓕᕐᐰᑦ,

¹³ ᐅᖃᕐᓗᑎᒃ, “ᐅᖃᖃᑦᑕᕐᓂᐊᕐᐳᓯ ᐅᓐᓄᐊᒃᑯᑦ ᓯᓂᒃᑎᓪᓗᓯ ᔩᓱᓯᐅᑉ ᑎᒥᖓ ᐃᓕᓐᓂᐊᕐᑎᖏᓐᓄᑦ ᑎᒡᓕᒋᐊᕐᑐᕐᑕᐅᓚᐅᕐᓂᕋᕐᓗᒍ.

¹⁴ ᐊᐅᓚᑦᓯᔨᐅᔪᖅ ᓄᓇᑦᑎᓐᓂᒃ ᑕᒪᑐᒥᖓ ᑐᓴᕐᑎᑕᐅᒃᐸᑦ, ᐅᖃᐅᑎᓂᐊᕐᐸᕗᑦ ᐸᓯᔭᒃᓴᐅᖏᓐᓂᑦᓯᓐᓂᒃ ᑕᒪᑐᒧᖓ, ᑕᒪᑐᒥᖓ ᐃᓱᒪᔮᕈᑎᖃᕆᐊᖃᕐᓂᐊᖏᓚᓯ.”

¹⁵ ᑕᕝᕙ ᐃᓗᕕᕐᒥ ᖃᐅᔨᓴᓚᐅᕐᑐᑦ ᑮᓇᐅᔧᑦ ᑎᒍᕔᑦ ᐱᓂᐊᖁᔭᐅᓂᕆᔭᒥᑐᑦ ᐱᓇᓱᐊᓕᕐᓗᑎᒃ; ᑕᒪᓐᓇ ᐅᖃᐅᓯᐅᓚᐅᕐᑐᖅ ᓱᓕ ᔫᑎᓂᑦ ᐅᖃᐅᓯᐅᖃᑦᑕᕐᐳᖅ, ᐅᓪᓗᒥᒧᑦ ᑎᑭᓪᓗᒍ.

ᔩᓱᓯᐅᑉ ᓴᖅᑭᓐᓂᖓ ᐃᓕᓐᓂᐊᕐᑎᒥᓄᑦ

¹⁶ ᑕᕝᕙ ᐃᓕᓐᓂᐊᕐᑎᑦ 11 ᒐᓕᓕᐊᒧᐊᕐᐳᑦ, ᖃᖅᑲᒧᐊᓗᑎᒃ ᔩᓱᓯᐅᑉ ᐅᐸᒃᑕᐅᖁᓚᐅᕐᑕᖓᓄᑦ.

¹⁷ ᔩᓱᓯ ᑕᑯᒐᒥᑦᔪᑦ ᐹᒻᒪᒃᑎᕐᕕᒋᕚᑦ; ᐃᓚᖏᓪᓕ ᖁᓚᕐᐳᑦ.

¹⁸ ᔩᓱᓯᐅᑉ ᐅᐸᒃᓗᒋᑦ ᐅᖃᐅᑎᕔᑦ, “ᐱᔪᓐᓇᕐᓂᕐᓂᒃ ᑕᒤᓐᓂᒃ ᑐᓂᓯᕕᐅᕗᖓ ᕿᓚᖕᒥ ᓄᓇᕐᔪᐊᒥᓗ.

¹⁹ ᑍᒤᒻᒪᑦ ᐃᓅᖃᑎᒌᒡᔪᐊᓄᑦ ᐂᓕᕆᑦᓯ, ᐃᓕᓐᓂᐊᕐᑎᓐᖑᕐᑎᑦᓯᒋᐊᕐᑐᕐᓗᓯ: ᐹᑉᑎᓪᓗᒋᓪᓗ ᐊᑖᑕᐅᑉ ᐃᕐᓂᐅᓪᓗ ᐊᓂᕐᓂᐅᓪᓗ ᐃᑦᔪᕐᓁᑦᑑᑉ ᐊᑎᖓᓂ,

²⁰ ᐊᔪᕆᕐᑐᕐᓗᒋᓪᓗ ᒪᓕᖁᓪᓗᒋᑦ ᐃᓕᑦᓯᓐᓄᑦ ᐱᖁᔨᓂᕆᓚᐅᕐᑕᓐᓂᒃ ᑕᒤᓐᓂᒃ; ᑕᑯᒋᑦ ᑍᒪᓐᖓᓕᒫᖅ ᐃᓚᒋᓂᐊᕐᐸᑦᓯ, ᓯᓚᕐᔪᐊᑉ ᓇᒡᒐᑖ ᑎᑭᓪᓗᒍ.”