ᒫᑎᐅᓯᐅᑉ ᐊᒡᓚᖏᑦ 25 - ᐊᒡᓔᑦ ᐃᑦᔪᕐᖕᓁᑦᑐᑦᐊᕐᓁᑦ ᖁᓕᑦ ᓯᓚᑐᔪᑦ ᓯᓔᑦᑐᓪᓗ 1 “ᒎᑎᐅᑉ ᐊᑕᓂᐅᕕᖓ ᐊᑦᔨᖃᕈᓐᓇᕐᐳᖅ ᐊᕐᓇᓂᒃ ᖁᓕᓂᒃ ᓇᓂᕈᐊᒥᖕᓂᒃ ᓇᒃᓴᕐᓗᑎᒃ ᐅᐃᒃᓴᒥᒃ ᐸᕐᕆᐊᕐᑐᓂᒃ. 2 ᑖᒃᑯᐊ ᑕᓪᓕᒪᑦ ᓯᓔᑦᑑᕗᑦ, ᑕᓪᓕᒪᓪᓗ ᓯᓚᑐᓪᓗᑎᒃ. 3 ᓯᓔᑦᑐᑦ ᓇᓂᕈᐊᒥᖕᓂᒃ ᓇᒃᓴᕐᐳᑦ, ᐅᕐᓱᒃᓴᒡᒋᕋᑎᒃ, 4 ᓯᓚᑐᔪᓪᓕ ᓇᓂᕈᐊᒥᖕᓂᒃ ᐅᕐᓱᒃᓴᒥᖕᓂᒡᓗ ᓇᒃᓴᕐᐳᑦ. 5 ᐅᐃᒃᓴᖅ ᑎᑭᓐᓇᓵᓕᕐᒪᑦ, ᐊᕐᓁᑦ ᓇᔭᖓᖃᑦᑕᓕᕐᐳᑦ ᓯᓂᓕᕐᓗᑎᒃ. 6 “ᐅᓐᓄᐊᖅ ᕿᑎᕋᓕᕐᑎᓪᓗᒍ ᓂᐱᖃᕐᑐᖃᓕᕐᐳᖅ, ‘ᑕᑯᒋᑦ ᐅᐃᒃᓴᖅ ᑎᑭᓕᕐᐳᖅ! ᕾᓕᕆᑦᓯ ᐸᕐᕆᐊᕐᓗᒍ.’ 7 ᐊᕐᓇᓕᒫᑦ ᑐᐸᒃᑲᒥᒃ ᓇᓂᕈᐊᒥᖕᓂᒃ ᐃᑭᑦᓯᕗᑦ. 8 ᓯᓔᑦᑐᑦ ᓯᓚᑐᔪᓄᑦ ᐅᖃᕐᐳᑦ, ‘ᐅᕐᓱᒃᓴᑦᓯᓐᓂᑦ ᑐᓂᓯᕕᒋᑎᒍᑦ, ᓇᓂᕈᐊᕗᑦ ᐸᓕᓕᕐᒪᑕ.’ 9 ᓯᓚᑐᔪᓪᓕ ᑭᐅᕗᑦ, ‘ᐅᕐᓱᒃᓴᕗᑦ ᐊᒥᒐᑐᐃᓐᓇᕆᐊᖃᕐᒪᑕ ᐊᕕᒐᓱᒃᑯᑎᒍ; ᓂᐅᕕᕐᕕᖕᓄᑦ ᐅᕐᓱᒃᓴᑦᓯᓐᓂᖅ ᓇᖕᒥᓂᖅ ᓂᐅᕕᕆᐊᓕᕆᑦᓯ.’ 10 ᐊᕐᓁᑦ ᓯᓔᑦᑐᑦ ᓂᐅᕕᕆᐊᕐᓯᒪᓕᕐᑎᓪᓗᒋᑦ; ᐅᐃᒃᓴᖅ ᑎᑭᑉᐳᖅ, ᐊᕐᓁᑦ ᑕᓪᓕᒪᑦ ᐅᐸᓗᖕᒊᕐᓯᒪᔪᑦ ᑲᑎᑎᑕᐅᔪᑦ ᓂᕆᕕᒃᔪᐊᕐᕕᖓᓄᑦ ᐃᑎᖃᑎᒋᕚᑦ; ᐅᒃᑯᐊᖓᑦ ᑕᕝᕙ ᐅᒃᑯᐊᕐᑕᐅᕗᖅ. 11 “ᑭᖑᓂᖓᒍᓪᓕ ᐊᕐᓁᑦ ᐃᓚᖏᑦ ᑎᑭᑉᐳᑦ, ᐅᖃᕐᓗᑎᒃ, ‘ᐊᑕᓃᖅ! ᐊᑕᓃᖅ! ᐅᒃᑯᐃᕈᑎᑎᒍᑦ.’ 12 ᐅᐃᒃᓴᐅᓪᓕ ᑭᐅᕔᑦ, ‘ᓱᓕᔪᒥᒃ ᐅᖃᐅᑎᕙᑦᓯ, ᑭᓇᒃᑰᖕᒪᖔᑦᓯ ᐃᓕᑕᕆᓐᖏᓚᑦᓯ!’ 13 “ᑍᒤᒻᒪᑦ ᖃᐅᔨᓴᕆᑦᓯ, ᐅᓪᓗᖅ ᐃᑲᕐᕋᕐᓗ ᖃᐅᔨᒪᖏᓐᓇᑦᓯᐅᒃ.” ᐊᑦᔨᐅᔪᑦ ᐱᔩᑦ ᐱᖓᓱᑦ ᓘᑲᓯ 19:11-27 14 “ᒎᑎᐅᑉ ᐊᑕᓂᐅᕕᖓ ᐊᑦᔨᖃᕈᓐᓇᕆᕗᖅ ᐊᖑᒻᒥᒃ ᐊᖏᕐᕋᒥᓂᒃ ᕿᒤᓂᐊᓕᕐᑐᒥᒃ ᐅᖓᓯᒃᑐᒧᑦ ᐊᐅᓪᓚᕐᓂᐊᕐᑐᒥᒃ; ᐱᔨᓂ ᕾᖁᕔᑦ ᐱᖁᑎᓕᒫᒥᓄᑦ ᑲᒪᔨᐅᖁᓪᓗᒋᑦ ᐊᖓᔪᖅᑳᓐᖑᕐᑎᑉᐰᑦ; 15 ᐊᑐᓂ ᐱᔪᓐᓇᕐᑕᖏᓐᓂᒃ ᐱᔭᒃᓴᕐᑖᕐᑎᑉᐰᑦ; ᐃᓚᖓᑦ ᑮᓇᐅᔭᓂᒃ 5,000ᓂᒃ ᑐᓂᓯᕕᒋᕚ, ᐃᓚᖓᓪᓗ 2,000ᓂᒃ, ᐃᓚᖓᓪᓗ 1,000ᓂᒃ ᑐᓂᓯᕕᒋᕚ. ᑕᕝᕙ ᐅᖓᓯᒃᑐᒧᑦ ᐊᐅᓪᓚᕐᐳᖅ. 16 ᐱᔨ ᑮᓇᐅᔭᕐᑖᕐᑎᑕᐅᔪᖅ 5,000ᓂᒃ ᑕᕝᕔᓐᓇᖅ ᐊᑐᕐᑐᐊᕐᑕᐅᑎᑉᐰᑦ; ᑭᖑᓂᖓᒍᓪᓗ ᑮᓇᐅᔭᕐᑖᒃᑲᓐᓂᕐᐳᖅ ᐊᓯᖏᓐᓂᒃ 5,000ᓂᒃ. 17 ᑍᒫᑦᓮᓐᓇᖅ ᐱᔨ ᑮᓇᐅᔭᕐᑖᓚᐅᕐᑐᖅ 2,000ᓂᒃ ᑮᓇᐅᔭᕐᑖᒃᑲᓐᓂᕆᕗᖅ ᐊᓯᖏᓐᓂ 2,000ᓂᒃ. 18 ᐱᔨᓕ ᑮᓇᐅᔭᕐᑖᕐᑎᑕᐅᓚᐅᕐᑐᖅ 1,000ᓂᒃ, ᓄᓇᒥᒃ ᐃᑎᕐᓴᓕᐅᕆᓪᓗᓂ ᐊᖓᔪᖅᑳᖓᑕ ᑮᓇᐅᔭᖏᑦ ᐃᔨᕐᐰᑦ. 19 “ᑕᒪᑐᒪ ᑭᖑᓂᖓᒍᑦ ᐊᑯᓂ ᓂᐸᒪᓚᐅᕐᓗᓂ ᐱᔩᑦ ᐊᖓᔪᖅᑳᖓᑦ ᐅᑎᕐᐳᖅ, ᑮᓇᐅᔭᖏᓐᓂᒃ ᖃᐅᔨᓴᖃᑎᒋᓕᕐᐰᑦ. 20 5,000ᓂᒃ ᑮᓇᐅᔭᕐᑖᓚᐅᕐᑐᖅ ᕾᕗᖅ, ᐊᓯᖏᓐᓂᒃ 5,000ᑲᓐᓂᕐᓂᒃ ᑐᓂᓯᕗᖅ, ᐅᖃᕐᓗᓂ, ‘ᐊᖓᔪᖅᑳᒃ, ᑮᓇᐅᔭᓂᒃ 5,000ᓂᒃ ᑐᓂᓯᕕᒋᓚᐅᕋᕕᖓ, ᑕᑯᒋᑦ, 5,000ᓂᒃ ᐃᓚᒃᑲᓐᓂᓚᐅᕐᐸᒃᑲ.’ 21 ᐊᖓᔪᖅᑳᖓᑕ ᐅᖃᐅᑎᕚ, ‘ᓈᒻᒪᒋᕙᒋᑦ ᐱᔨᐅᓪᓗᑎᑦ ᐱᓇᓱᐊᑦᓯᐊᕐᑐᑎᑦ ᓱᖁᓯᔪᐃᑦᑑᒐᕕᑦ; ᑮᓇᐅᔭᓂᒃ ᒥᑭᔪᓂᒃ ᓱᖁᓯᔪᐃᑦᑑᓪᓗᑎᑦ ᑲᒪᑦᓯᐊᓚᐅᕋᕕᑦ, ᒫᓐᓇ ᑮᓇᐅᔭᓂᒃ ᐊᖏᓂᕐᓴᓂᒃ ᑲᒪᔨᓐᖑᕐᑎᓐᓂᐊᕐᐸᒋᑦ; ᕾᓗᑎᑦ ᐊᖓᔪᖅᑳᑦ ᖁᕕᐊᓱᖃᑎᒋᓕᕈᒃ.’ 22 ᑕᕝᕙ ᐱᔨ ᑮᓇᐅᔭᓂᒃ 2,000ᓂᒃ ᑐᓂᓯᕕᐅᓯᒪᔪᖅ ᕾᒋᕗᖅ ᐅᖃᕐᓗᓂ, ‘ᐊᖓᔪᖅᑳ, ᑮᓇᐅᔭᓂᒃ 2,000ᓂᒃ ᑐᓂᓯᕕᒋᓚᐅᕋᕕᖓ; ᑕᑯᒋᑦ 2,000ᑲᓐᓂᕐᓂᒃ ᐃᓚᒃᑲᓐᓂᓚᐅᕐᐸᒃᑲ.’ 23 ᐊᖓᔪᖅᑳᖓᑕ ᐅᖃᐅᑎᕚ, ‘ᓈᒻᒪᒋᕙᒋᑦ ᐱᔨᐅᓪᓗᑎᑦ ᐱᓇᓱᐊᑦᓯᐊᕐᑐᑎᑦ ᓱᖁᓯᔪᐃᑦᑑᒐᕕᑦ; ᑮᓇᐅᔭᓂᒃ ᒥᑭᔪᓂᒃ ᓱᖁᓯᔪᐃᑦᑑᓪᓗᑎᑦ ᑲᒪᑦᓯᐊᓚᐅᕋᕕᑦ, ᒫᓐᓇ ᑮᓇᐅᔭᓂᒃ ᐊᖏᓂᕐᓴᓂᒃ ᑲᒪᔨᓐᖑᕐᑎᓐᓂᐊᕐᐸᒋᑦ. ᕾᓗᑎᑦ ᐊᖓᔪᖅᑳᑦ ᖁᕕᐊᓱᖃᑎᒋᓕᕈᒃ.’ 24 ᑕᕝᕙ ᐱᔨ ᑮᓇᐅᔭᕐᑖᓚᐅᕐᑐᖅ 1,000ᓂᒃ ᕾᒋᕗᖅ, ᐅᖃᕐᓗᓂ; ‘ᐊᖓᔪᖅᑳᒃ, ᖃᐅᔨᒪᒐᒃᑭᑦ ᐃᓕᕋᓇᕐᑐᑎᑦ; ᐱᕈᕐᑐᓂᒃ ᑲᑎᕐᓱᐃᕙᒃᑲᕕᑦ ᑲᓐᖓᕐᓱᓚᐅᓐᖏᑕᕐᓂᒃ, ᓂᐊᖂᔭᒃᓴᓂᒡᓗ ᑲᑎᕐᓱᐃᕙᒃᓗᑎᑦ ᑲᓐᖓᕐᓲᑎᒋᓚᐅᓐᖏᑕᕐᓂᒃ. 25 ᓯᕘᕋᓕᕋᒪ, ᑮᓇᐅᔧᑦ ᐃᔨᕆᐊᕐᑐᓚᐅᕐᐸᕋ ᓄᓇᒧᑦ. ᑕᑯᒋᑦ, ᑕᕝᕙ ᐱᖁᑎᑎᑦ ᐱᓕᒃᑭᑦ.’ 26 ᐊᖓᔪᖅᑳᖓᑕ ᐅᖃᐅᑎᕚ, ‘ᐱᔨᑦᓯᐊᕙᐅᖏᑦᑐᑎᑦ ᐃᕿᐊᓱᒃᑐᑎᑦ! ᖃᐅᔨᒐᕕᖓ ᐱᕈᕐᑐᓂᒃ ᑲᑎᕐᓱᐃᕙᒃᑲᒪ ᑲᓐᖓᕐᓱᓚᐅᓐᖏᑕᓐᓂᒃ, ᓂᐊᖂᔭᒃᓴᓂᒡᓗ ᑲᑎᕐᓱᐃᒐᒪ ᑲᓐᖓᕐᓲᑎᒋᓚᐅᓐᖏᑕᓐᓃᒃ? 27 ᑍᒪᓕ ᑮᓇᐅᔭᖁᑎᒃᑲ ᑮᓇᐅᔭᒃᑯᕕᖕᒧᑦ ᐃᓕᒐᔭᓚᐅᕋᓗᐊᕐᐸᑎᑦ ᕿᑐᕐᖏᐅᕐᑐᒃᓴᓕᐊᕆᓗᒋᑦ, ᑎᑭᒃᑯᒪᓗ ᓇᖕᒥᓂᒃᑲ ᑎᒍᓕᕋᔭᕐᐸᒃᑲ ᐃᓚᖃᓕᕐᑎᓪᓗᒋᑦ. 28 ᑍᒤᒻᒪᑦ ᑮᓇᐅᔧᑦ ᐱᓯᒪᔭᖏᑦ ᑎᒍᔭᐅᓕᕐᓕᑦ, ᑐᓂᔭᐅᓗᑎᑦ 10,000ᓂᒃ ᑮᓇᐅᔭᖃᕐᑐᒧᑦ. 29 ᐱᖃᕐᑐᑦ ᑐᓂᓯᕕᐅᒃᑲᓐᓂᕐᓂᐊᕐᐳᑦ, ᐱᖃᓗᐊᓕᖁᓪᓗᒋᑦ; ᐱᖃᖏᑦᑐᓪᓕ, ᐊᕐᓵᕐᑕᐅᓂᐊᕐᐳᑦ ᒥᑭᔪᒥᒃ ᐱᓯᒪᒐᓗᐊᕐᐸᑕ. 30 ᑖᓐᓇ ᐱᔨ ᐊᑑᑎᒃᓴᖃᖏᑦᑐᖅ ᐃᒋᑕᐅᓕᕐᓕ ᓯᓚᒧᑦ ᑖᕐᑐᕐᔪᐊᕐᒧᑦ; ᑕᕝᕙᓂ ᕿᐊᓂᖃᕈᒫᕐᐳᑦ ᐊᒡᓕᕈᓛᕐᓗᑎᒃᓗ.’” ᐃᖅᑲᕐᑐᕐᑕᐅᓂᖅ ᑭᖑᓪᓕᕐᐹᖅ 31 “ᐃᓅᑉ ᐃᕐᓂᖓ ᐊᖓᔪᖅᑳᕐᔪᐊᖑᓗᓂ ᑎᑭᒃᑯᓂ, ᐂᖏᓕᓕᒫᑦ ᐃᓚᒋᓗᒋᑦ, ᐃᒃᓯᕙᐅᑕᕐᔪᐊᕐᒥᓄᑦ ᐱᓐᓇᕐᓇᕐᑐᕐᔪᐊᕐᒧᑦ ᐃᖏᑦᓱᒫᕐᐳᖅ. 32 ᐃᓅᖃᑎᒌᒡᔪᐊᓂᑦ ᑕᒤᓐᓂᑦ ᐱᓯᒪᔪᑦ ᓵᖓᓄᑦ ᑲᑎᕐᓱᕐᑕᐅᔪᒫᕐᐳᑦ, ᑕᕝᕙᓂ ᐊᕕᑎᑦᓱᒫᕐᐰᑦ ᒪᕐᕈᐃᓕᓗᒋᑦ ᓲᕐᓗ ᓰᐱᓕᕆᔨ ᐊᕕᑎᑦᓯᕙᖕᒪᑦ ᓰᐱᓂᒃ ᒎᑦᓯᓂᒡᓗ. 33 ᓰᐲᑦ ᑕᓕᕐᐱᖕᒥᓄᐊᕈᒫᕐᐰᑦ, ᒎᑦᓰᓪᓕ ᓴᐅᒥᖕᒥᓄᐊᕐᑎᓪᓗᒋᑦ. 34 ᑕᕝᕙ ᐊᖓᔪᖅᑳᕐᔪᐊᖅ ᑕᓕᕐᐱᖕᒥᓃᑦᑐᓄᑦ ᐅᖃᕈᒫᕐᐳᖅ, ‘ᕾᒋᑦᓯ, ᐊᑖᑕᒪ ᓇᒡᓕᒃᑕᖏᑦ, ᐊᑕᓂᐅᕕᒃ ᑭᖑᕐᖑᑎᓕᕐᓯᐅᒃ ᐅᐸᓗᖕᒊᔭᕐᑕᐅᓯᒪᔪᖅ ᐃᓕᑦᓯᓐᓄᑦ ᓄᓇᕐᔪᐊᑉ ᐱᓐᖑᕐᑎᑕᐅᓕᕐᓂᖓᓂᑦ; 35 ᑳᒃᑎᓪᓗᖓ ᓂᕆᑎᓚᐅᕋᑦᓯᓐᖓ, ᐃᒥᕈᒃᑎᓪᓗᖓ ᐃᒥᕐᑎᓚᐅᕋᑦᓯᓐᖓ, ᓂᐅᕐᕈᐊᖑᑎᓪᓗᖓ ᑐᓐᖓᓱᒃᑎᓚᐅᕋᑦᓯᓐᖓ. 36 ᐊᓐᓄᕌᖃᓐᖏᑎᓪᓗᖓ ᐊᓐᓄᕌᕐᑎᓚᐅᕋᑦᓯᓐᖓ, ᖃᓂᒪᑎᓪᓗᖓ ᐳᓛᕆᐊᓚᐅᕋᑦᓯᓐᖓ, ᑎᒍᔭᐅᓯᒪᕕᖕᒦᑎᓪᓗᖓ ᐅᐸᓚᐅᕋᑦᓯᓐᖓ.’ 37 ᑕᕝᕙ ᐃᓗᐊᕐᑐᑦ ᑭᐅᔪᒫᕐᐹᑦ, ‘ᐊᑕᓃᖅ, ᖃᖓ ᑳᒃᑎᓪᓗᑎᑦ ᓂᕆᑎᓚᐅᕐᐸᑦᑎᒌᑦ ᖃᖓᓗ ᐃᒥᕈᒃᑎᓪᓗᑎᑦ ᐃᒥᕐᑎᓚᐅᕐᐸᑦᑎᒌᑦ? 38 ᖃᖓᓗ ᓂᐅᕐᕈᐊᖑᑎᓪᓗᑎᑦ ᑐᓐᖓᓱᒃᑎᓚᐅᕐᐸᑦᑎᒌᑦ, ᖃᖓᓗ ᐊᓐᓄᕌᖃᕐᑎᓐᓇᒃ ᐊᓐᓄᕌᕐᑎᓚᐅᕐᐸᑦᑎᒌᑦ? 39 ᖃᖓᓘᓐᓃᑦ ᖃᓂᒪᑎᓪᓗᑎᑦ ᑎᒍᔭᐅᓯᒪᕕᖕᒦᑎᓪᓗᑎᓪᓘᓐᓃᑦ ᑕᑯᓚᐅᕐᐸᑦᑎᒌᑦ ᐳᓛᓚᐅᕐᐸᑦᑎᒋᓪᓘ?’ 40 ᑕᕝᕙ ᐊᖓᔪᖅᑳᕐᔪᐊᑉ ᑭᐅᔪᒫᕐᐰᑦ, ‘ᓱᓕᔪᒥᒃ ᐅᖃᐅᑎᕙᑦᓯ, ᖃᑕᓐᖑᑎᒪ ᒥᑭᓐᓂᕐᐹᕆᔭᖏᓐᓄᑦ ᐱᓇᓱᐊᕐᕕᖃᕌᖓᑦᓯ, ᑕᒪᑐᒥᖓ ᐱᓇᓱᐊᕐᕕᒋᓚᐅᕐᐸᑦᓯᓐᖓ!’ 41 “ᑕᕝᕙ ᓴᐅᒥᖕᒥᓃᑦᑐᓄᑦ ᐅᖃᕈᒫᕆᕗᖅ, ‘ᑕᒫᓃᓐᖏᓚᐅᕆᑦᓯ ᒎᑎᒧᑦ ᓇᕐᕈᓇᕐᑐᓯ, ᐃᑯᒪᕐᔪᐊᕐᒧᑦ ᓄᖑᓱᐃᑦᑐᒧᐊᕆᑦᓯ ᐅᐸᓗᖕᒊᕈᑕᐅᓯᒪᔪᒧᑦ ᓵᑖᓇᓯᒧᑦ ᐂᖏᓖᖁᑎᖏᓐᓄᓪᓗ; 42 ᑳᒃᑎᓪᓗᖓ ᓂᕆᑎᓚᐅᖏᓐᓇᑦᓯᓐᖓ, ᐃᒥᕈᒃᑎᓪᓗᖓ ᐃᒥᕐᑎᓚᐅᖏᓐᓇᑦᓯᓐᖓ; 43 ᓂᐅᕐᕈᐊᖑᑎᓪᓗᖓ ᑐᓐᖓᓱᒃᑎᓚᐅᖏᓐᓇᑦᓯᓐᖓ, ᐊᓐᓄᕌᖃᕐᑎᓐᓇᖓ ᐊᓐᓄᕌᕐᑎᓚᐅᖏᓐᓇᑦᓯᓐᖓ; ᖃᓂᒪᑎᓪᓗᖓ ᑎᒍᔭᐅᓯᒪᕕᖕᒦᑎᓪᓗᖓ ᐳᓛᕆᐊᓚᐅᖏᓐᓇᑦᓯᓐᖓ.’ 44 ᑕᕝᕙ ᑖᒃᑯᐊ ᑭᐅᔪᒫᕆᕚᑦ, ‘ᐊᑕᓃᖅ, ᖃᖓ ᑕᑯᓚᐅᕐᐸᑦᑎᒌᑦ ᑳᒃᑎᓪᓗᑎᑦ ᐃᒥᕈᒃᑎᓪᓗᑎᓪᓗ ᓂᐅᕐᕈᐊᖑᑎᓪᓗᑎᑦ ᐊᓐᓄᕌᖃᓐᖏᑎᓪᓗᑎᓪᓗ ᖃᓂᒪᑎᓪᓗᑎᑦ ᑎᒍᔭᐅᓯᒪᕕᖕᒦᑎᓪᓗᑎᓪᓘᓐᓃᑦ, ᐃᑲᔪᓚᐅᓐᖏᓚᑦᑎᒋᑦ?’ 45 ᑕᕝᕙ ᑭᐅᔪᒫᕐᐰᑦ, ‘ᓱᓕᔪᒥᒃ ᐅᖃᐅᑎᕙᑦᓯ, ᒥᑭᓐᓂᕐᐸᐅᔪᑦ ᐱᓇᓱᐊᕐᕕᒋᖏᓐᓇᑦᓯᐅᒃ, ᑕᕝᕙ ᐅᕙᓐᓂᒃ ᐱᓇᓱᐊᕐᕕᖃᓚᐅᓐᖏᓚᓯ.’ 46 ᑖᒃᑯᐊ ᓱᒋᐊᕐᑕᐅᕕᖕᒧᑦ ᓄᖑᓱᐃᑦᑐᒧᑦ ᐱᑎᑕᐅᔪᒫᕐᐳᑦ, ᐃᓗᐊᕐᑐᓪᓕ ᐃᓅᓯᕐᒧᑦ ᓄᖑᓱᐃᑦᑐᒧᑦ ᐱᑎᑕᐅᓕᕐᑎᓪᓗᒋᑦ.” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society