ᒫᑎᐅᓯᐅᑉ ᐊᒡᓚᖏᑦ 18 - ᐊᒡᓔᑦ ᐃᑦᔪᕐᖕᓁᑦᑐᑦ

ᑭᓇ ᐱᓪᓚᕆᐅᓂᕐᐸᐅᕙ?

¹ ᑍᑦᓱᒪᓂ ᐃᓕᓐᓂᐊᕐᑏᑦ ᔩᓱᓯᒧᐊᕐᐳᑦ, ᐅᖃᕐᓗᑎᒃ, “ᑭᓈ ᐱᓪᓚᕆᐅᓂᕐᐸᐅᕙ ᒎᑎᐅᑉ ᐊᑕᓂᐅᕕᖓᓂ?”

² ᔩᓱᓯ ᓱᕈᓯᕐᒥᒃ ᕾᖁᔨᕗᖅ, ᑖᒃᑯᐊ ᓵᖓᓄᑦ ᓂᑯᕕᑎᓪᓗᒍ,

³ ᐅᖃᕐᐳᖅ, “ᓱᓕᔪᒥᒃ ᐅᖃᐅᑎᕙᑦᓯ, ᐱᐅᓯᑦᓯᓐᓂᒃ ᐊᓯᑦᔨᕐᓗᓯ ᑭᓯᐊᓂᐅᕗᖅ ᓱᕈᓯᑯᓗᒃᑐᑦ ᑍᒤᓕᕐᓗᓯ, ᐊᓯᑦᔨᓐᖏᒃᑯᑦᓯ ᒎᑎᐅᑉ ᐊᑕᓂᐅᕕᖓᓄᑦ ᐃᑎᕈᓐᓇᕐᓂᐊᖏᒻᒪᕆᒃᐳᓯ.

⁴ ᐃᒻᒥᓂᒃ ᒥᑭᒡᓕᑎᕐᑐᖅ ᐆᑐᓇᖅ ᓱᕈᓯᑯᓗᒃᑎᑐᓪᓗ ᑍᒤᓕᕐᓗᓂ, ᑖᓐᓇ ᒎᑎᐅᑉ ᐊᑕᓂᐅᕕᖓᓂ ᐱᓪᓚᕆᐅᓂᕐᐸᐅᕗᖅ.

⁵ ᓇᓪᓕᐊᑦ ᓱᕈᓯᑯᓗᒃᑎᑐᑦ ᑍᒤᑦᑐᒥᒃ ᐃᓚᓕᐅᕐᓯᔪᖅ ᐅᕙᖓ ᐱᓪᓗᖓ, ᑖᓐᓇ ᐅᕙᓐᓂᒃ ᐃᓚᓕᐅᕐᓯᕗᖅ.”

ᐱᔪᒥᓵᕐᑕᐅᓂᖅ ᐊᔪᕐᓂᕐᒧᑦ

⁶ “ᓇᓪᓕᐊᑦ ᑍᒤᑦᑐᑯᓗᖕᓂᒃ ᐅᒃᐱᕐᓂᖓᓂᒃ ᐅᕙᓐᓄᑦ ᐊᒡᕕᐊᕐᓯᒃᐸᑦ ᐊᔪᕐᑐᓕᑎᑦᓯᓗᓂ, ᑖᓐᓇ ᐊᑲᐅᓂᕐᓴᐅᒐᔭᕐᐳᖅ ᓂᐊᖂᔭᒃᓴᓂᒃ ᓯᖃᓪᓕᓯᑦᔪᑎᐅᑉ ᐅᔭᕌᓗᖓᓂᒃ ᖁᖓᓯᖓᒍᑦ ᕿᓚᒃᓯᕕᐅᓗᓂ ᐃᒪᕕᖕᒧᑦ ᐃᑎᔪᒧᑦ ᑭᕕᑎᑕᐅᒍᓂ.

⁷ ᑲᑉᐱᐊᓇᒻᒪᕆᒃᐳᖅ ᓯᓚᕐᔪᐊᕐᒥᐅᓄᑦ ᑲᑕᒍᑕᐅᔪᓐᓇᕐᑐᓂᒃ ᐊᔪᕐᑐᓕᓂᕐᒧᑦ ᐱᓇᓱᐊᕐᐸᒃᑐᑦ! ᑍᒤᓕᐅᕐᑐᖃᑦᓮᓐᓇᕐᓂᐊᕋᓗᐊᕐᐳᖅ; ᑲᑉᐱᐊᓐᓇᒦᒡᓕ ᐃᓄᒃ ᑲᑕᒍᑕᐅᔪᓐᓇᕐᑐᓂᒃ ᐊᖅᑯᑎᒋᔭᐅᔪᖅ!

⁸ “ᐊᒡᒐᒃᐱᑦ ᐃᑎᒐᒃᐱᓪᓘᓐᓃᑦ ᐊᔪᕐᑐᓕᑎᑉᐸᑎᑦ, ᓇᑲᒃᑭᑦ ᐃᒋᓪᓗᒋᑦ; ᐃᓕᖕᓄᑦ ᐱᐅᓂᕐᓴᐅᒐᔭᕐᐳᖅ ᐃᓅᓯᕐᒧᑦ ᐃᑎᕈᕕᑦ ᐃᒡᓗᐃᓐᓇᕐᒥ ᐊᒡᒐᖃᕐᓗᑎᑦ, ᐃᒡᓗᐃᓐᓇᕐᒥᒡᓘᓐᓃᑦ ᐃᑎᒐᖃᕐᓗᑎᑦ ᑐᓯᐊᓪᓗᑎᓪᓗ. ᐃᒡᓗᒃᑐᑦ ᐊᒡᒐᖃᕐᓗᑎᑦ, ᐃᒡᓗᒃᑐᓪᓗ ᐃᑎᒐᖃᕐᓗᑎᑦ ᐃᒋᑕᐅᑐᐃᓐᓇᕋᔭᕐᓂᕐᓂᑦ ᐃᑯᒪᕐᔪᐊᕐᒧᑦ ᓄᖑᓱᐃᑦᑐᒧᑦ.

⁹ ᐃᔨᕕᑦ ᐊᔪᕐᑐᓕᑎᑉᐸᑎᑦ, ᐲᓚᐅᕈᒃ ᐃᒋᓪᓗᒍᓗ; ᐃᓕᖕᓄᑦ ᐱᐅᓂᕐᓴᐅᒐᔭᕐᐳᖅ ᐃᓅᓯᕐᒧᑦ ᐃᑎᕈᕕᑦ ᐃᒡᓗᐃᓐᓇᕐᒥᒃ ᐃᔨᖃᕐᓗᑎᑦ, ᐃᒡᓗᒃᑐᑦ ᐃᔨᖃᕋᓗᐊᕈᕕᑦ ᐃᒋᑕᐅᑐᐃᓐᓇᕋᔭᕐᓂᕐᓂᑦ ᐃᑯᒪᕐᔪᐊᕐᒧᑦ ᑲᑉᐱᐊᓇᕐᑐᕕᖕᒧᑦ.”

ᐊᑦᔨᐅᔪᖅ ᓰᐱ ᐊᓯᐅᓯᒪᔪᖅ

¹⁰ “ᖃᐅᔨᓕᕆᑦᓯ ᑕᒪᒃᑯᐊᑯᓗᐃᑦ ᓇᕐᕈᒋᔭᕆᐊᖃᖏᓐᓇᑦᓯᐅᒃ; ᓱᓕᓪᓗᖓ ᐅᖃᕐᐳᖓ ᑖᒃᑯᐊ ᐂᖏᓖᖁᑎᖏᑕ ᐊᑖᑕᒪ ᕿᓚᖕᒦᑦᑑᑉ ᑮᓇᖓ ᑕᑯᐃᓐᓇᖃᑦᑕᕐᐹᑦ.

¹¹ ᐃᓅᑉ ᐃᕐᓂᖓ ᑎᑭᓯᒪᖕᒪᑦ ᐊᓯᐅᓯᒪᔪᑦ ᕿᓂᕆᐊᕐᓗᒋᑦ.

¹² “ᖃᓄᕐᓕ ᐃᓱᒪᕕᓰ ᐊᖑᑦ 100ᓂᒃ ᓰᐱᖁᑎᓕᒃ, ᑖᒃᑯᐊ ᐃᓚᖓᑦ ᐊᑕᐅᓯᖅ ᐊᓯᐅᒃᐸᑦ, ᑖᒃᑯᐊ ᓰᐲᑦ 99 ᕿᒪᒃᑲᔭᓐᖏᓔᑦ ᖃᖅᑲᒧᑦ ᕿᓂᕆᐊᕐᓗᓂ ᓰᐱᒥᒃ ᐊᓯᐅᓯᒪᔪᒥᒃ?

¹³ ᓱᓕᓪᓗᖓ ᐅᖃᐅᑎᕙᑦᓯ, ᓇᓂᒍᓂᐅᒡᓗ, ᖁᕕᐊᓲᑎᒋᓂᕐᓴᕆᓂᐊᕐᐹ ᓰᐱᓂᑦ 99ᓂᑦ ᐊᓯᐅᓯᒪᖏᑦᑐᓂᑦ.

¹⁴ ᑍᒫᑦᓮᓐᓇᕐᑕᐅᖅ, ᐊᑖᑕᓯ ᕿᓚᖕᒦᑦᑐᖅ ᑕᒪᒃᑯᓂᖓᑯᓗᒃ ᐊᓯᐅᖁᔨᓐᖏᓚᖅ.”

ᐃᓅᖃᑏᑦ ᐊᔪᕐᑐᓕᔪᖅ

¹⁵ “ᐅᒃᐱᕐᑑᖃᑎᕕᓪᓕ ᐊᔪᕐᑐᓕᕕᒋᒃᐸᑎᑦ, ᐅᐸᒍᒃ ᑕᒻᒪᕐᓂᖓᓂᒃ ᐅᖃᐅᑎᓗᒍ, ᐃᓄᑑᖃᑎᒋᓗᒍ ᐅᖃᖃᑎᒋᒍᒃ. ᑕᕝᕙ ᑖᑦᓱᒪ ᓈᓚᒃᑯᓂᑎᑦ, ᑕᕝᕙ ᐅᒃᐱᕐᑑᖃᑏᑦ ᐅᑎᕐᑎᓐᓂᐊᕐᐸᑦ.

¹⁶ ᑖᑦᓱᒪᓕ ᓈᓚᖏᑉᐸᑎᑦ, ᐊᑕᐅᓯᕐᒥᒃ ᒪᕐᕉᖕᓂᒡᓘᓐᓃᑦ ᐃᓚᖃᕐᓗᑎᑦ, ‘ᒪᕐᕉᒃᐸᑎᒃ ᖃᐅᔨᓯᒪᔫᒃ ᐱᖓᓱᓪᓘᓐᓃᑦ, ᐸᓯᔭᒃᓴᓐᖑᕐᑎᑦᓯᔪᓐᓇᕐᐳᑦ.’ ᑍᒫᒃ ᒎᑎᐅᑉ ᐅᖃᐅᓯᖏᓐᓂ ᐅᖃᕐᓯᒪᖕᒪᑕ.

¹⁷ ᓱᓕᓕ ᑖᒃᑯᐊᖑᑎᓪᓗᓯ ᓈᓚᒍᒪᖏᑉᐸᑦ, ᑕᕝᕙ ᐅᖃᐅᑎᒋᓕᕐᓯᐅᒃ ᐅᒃᐱᕐᑑᖃᑎᒌᓄᑦ ᐃᓚᒌᒃᑐᓄᑦ; ᑖᒃᑯᓂᖓᓕ ᐃᓚᒌᒃᑐᓂᒃ ᓱᓕ ᓈᓚᒍᒪᖏᑉᐸᑦ, ᑕᕝᕙ ᐅᒃᐱᖏᑦᑐᑎᑐᑦ ᑍᒤᑦᑑᑎᓕᕈᒃ, ᐅᕝᕙᓗ ᕉᒪᒥᐅᑦ ᑮᓇᐅᔧᕐᑎᑦᓯᔨᖁᑎᖏᑎᑐᑦ.”

ᕿᓚᒃᓱᕐᑕᐅᔪᑦ ᕿᓚᕈᑦᔮᕐᑕᐅᔪᓪᓗ

¹⁸ “ᓱᓕᔪᒥᒃ ᐅᖃᐅᑎᕙᑦᓯ, ᓄᓇᕐᔪᐊᕐᒥ ᕿᓚᒃᓱᕐᑕᓯ ᑖᒃᑯᐊ ᕿᓚᖕᒥ ᕿᓚᒃᓱᕐᓯᒪᔪᒫᕆᕗᑦ, ᕿᓚᕈᑦᔮᕐᑕᓯᓗ ᓄᓇᕐᔪᐊᕐᒥ ᑖᒃᑯᐊᑦᑕᐅᖅ ᕿᓚᕈᑦᔮᕐᓯᒪᔪᒫᕆᕗᑦ ᕿᓚᖕᒥ.

¹⁹ “ᓱᓕ ᐅᖃᐅᑎᒃᑲᓐᓂᕐᐸᑦᓯ, ᓄᓇᕐᔪᐊᕐᒥ ᒪᕐᕉᓗᓯᒃ ᐊᖏᖃᑎᒌᒃᑯᑦᓯᒃ ᓱᓇᑐᐃᓐᓇᕐᒥᒃ ᑐᒃᓯᐊᕈᑎᖃᕈᒪᓗᓯᒃ, ᑕᒪᑐᒥᖓ ᑕᕝᕙ ᑐᓂᓯᕕᐅᓂᐊᕐᐳᓯᒃ ᐊᑖᑕᓐᓄᑦ ᕿᓚᖕᒦᑦᑐᒧᑦ.

²⁰ ᒪᕐᕉᒃ ᐱᖓᓱᓪᓘᓐᓃᑦ ᑲᑎᓐᖓᓕᕐᐸᑕ ᐊᑎᓐᓂ, ᑕᕝᕙᓃᓐᓂᐊᕐᐳᖓ ᐃᓚᒋᓗᒋᑦ.”

ᐊᑦᔨᐅᔪᖅ ᐱᔨ ᓮᒻᒪᐅᑦᔨᓗᓂ ᐃᓱᒪᒋᔪᓐᓁᕐᕕᖃᕈᒪᖏᑦᑐᖅ

²¹ ᑕᕝᕙ ᐲᑦᑐᕉᓯ ᔩᓱᓯᒧᐊᕐᐳᖅ ᐅᖃᕐᓗᓂ, “ᐊᑕᓃᖅ, ᐅᒃᐱᕐᑑᖃᑎᒪ ᐊᔪᕐᑐᓕᕕᒋᖃᑦᑕᕐᐸᖓ, ᖃᑦᓰᕐᑐᕐᓗᖓ ᐃᓱᒪᒋᔪᓐᓁᕐᕕᒋᔭᒃᓴᕆᕙᕌ? 7ᐃᕐᓱᕐᓗᖔ ᓈᒻᒪᒃᐸ?”

²² ᔩᓱᓯᐅᑉ ᑭᐅᕚ, “7ᐃᕐᑐᑐᐃᓐᓇᖁᓗᑎᑦ ᐅᖃᐅᑎᓐᖏᓚᒋᑦ, 70ᓪᓕ 7ᐃᕐᑐᕐᓗᒋᑦ,

²³ ᑍᒤᒻᒪᑦ ᒎᑎᐅᑉ ᐊᑕᓂᐅᕕᖓ ᐃᒫᒃ ᐊᑦᔨᖃᕈᓐᓇᕐᐳᖅ; ᑍᑦᓱᒪᓂ ᐊᖓᔪᖅᑳᕐᔪᐊᕐᑕᖃᓚᐅᕐᐳᖅ, ᑖᓐᓇ ᐃᓱᒪᑖᓚᐅᕐᐳᖅ ᐱᔨᓂ ᐊᑭᓕᒃᓴᖏᓐᓂᒃ ᐋᖅᑮᖃᑎᒋᔪᒪᓪᓗᒋᑦ.

²⁴ ᑲᒪᓇᓱᐊᓯᒋᐊᕐᑎᓪᓗᒍ ᐱᔨᖓᑦᑕ ᐃᓚᖓᑦ ᐃᓯᕐᑎᑕᐅᕗᖅ ᐊᖓᔪᖅᑳᕐᔪᐊᕐᒧᑦ ᐊᑭᓕᒃᓴᓕᒃ ᑮᓇᐅᔭᓂᒃ ᑖᓕᓐᑎᓂᒃ 10ᑕᐅᓴᓂᒃ.

²⁵ ᐱᔨ ᐊᑭᓕᐅᑎᒃᓴᖃᖏᒻᒪᑦ, ᑕᕝᕙ ᐊᖓᔪᖅᑳᕐᔪᐊᑉ ᓂᐅᕕᐊᖑᖁᓕᕐᐹ ᐱᖁᑎᑎᑐᑦ ᐱᑖᕆᔭᐅᖁᓪᓗᒍ, ᓄᓕᐊᖓᓗ ᕿᑐᕐᖓᖏᓪᓗ ᐱᖁᑎᓕᒫᖏᓪᓗ, ᐊᑭᓕᒃᓴᖏᑦ ᐊᑭᓕᕐᑕᐅᖁᓪᓗᒋᑦ.

²⁶ ᐱᔨ ᐊᖓᔪᖅᑳᕐᔪᐊᑉ ᓵᖓᓄᑦ ᓰᖅᑯᕐᐳᖅ, ᕿᓄᓪᓗᓂ ᐅᖃᕐᐳᖅ, ‘ᐊᖓᔪᖅᑳᒃ, ᕿᓄᐃᓵᕐᕕᒋᓚᐅᓐᖓ, ᐊᑭᓕᓛᕐᐸᒋᑦ ᐃᓘᓐᓇᖏᓐᓂᒃ.’

²⁷ ᐊᖓᔪᖅᑳᕐᔪᐊᖅ ᑖᑦᓱᒥᖓ ᐃᓚᑦᓱᒍᓱᓕᕋᒥ, ᐃᓱᒪᒋᔪᓐᓁᕐᕕᒋᕚ ᐊᑭᓕᒃᓴᓕᒫᖏᓐᓂᒃ; ᐊᓂᖁᓕᕐᓗᒍᓗ.

²⁸ “ᑖᓐᓇ ᐊᖑᑦ ᑕᕝᕙᓐᖓᑦ ᐊᓂᒐᒥ ᐱᔨᐅᖃᑎᒥᓂᒃ ᑲᑎᓯᕗᖅ ᐊᑭᓕᒃᓴᖃᕐᕕᒋᔨᒥᓂᒃ ᑮᓇᐅᔭᓂᒃ ᐅᓄᖏᑦᑐᓂᒃ; ᐅᐸᒃᓗᒍ ᑐᖅᑯᔮᒃᓯᕚ ᐅᖃᐅᑎᓪᓗᒍ, ‘ᐊᑭᓖᓚᐅᕆᑦ ᐅᕙᓐᓄᑦ ᐊᑭᓕᒃᓴᕆᔭᕐᓂᒃ.’

²⁹ ᐱᔨᐅᖃᑎᖓᓗ ᑖᓐᓇ ᓰᖅᑯᕐᓗᓂ ᓵᖓᓄᑦ ᕿᓄᕕᒋᕚ, ‘ᕿᓄᐃᓵᕐᕕᒋᓚᐅᓐᖓ, ᐊᑭᓕᓛᕐᐸᒋᑦ.’

³⁰ ᑖᓐᓇ ᐊᖏᓐᖏᓚᖅ ᑎᒍᔭᐅᓯᒪᕕᖕᒧᓪᓗ ᐱᑎᑉᐹ ᐊᑭᓕᒃᓴᒥᓂᒃ ᐊᑭᓖᓚᐅᖏᓐᓂᖓᓂ.

³¹ ᐱᔨᐅᖃᑎᖏᑕ ᑕᒪᓐᓇ ᑕᑯᒐᒥᑦᔪᒃ, ᖁᕕᐊᓱᖏᑦᔪᑎᒋᒻᒪᕆᓕᕐᐹᑦ, ᐊᖓᔪᖅᑳᒥᖕᓄᑦ ᐅᐸᒍᑎᓪᓗᑎᒃ ᐅᖃᐅᑎᒋᕚᑦ ᐱᓂᐊᕐᓂᕆᔭᐅᔪᓕᒫᓂᒃ.

³² ᑕᕝᕙ ᐊᖓᔪᖅᑳᕐᔪᐊᑉ ᐱᔨᓂ ᐃᑎᕐᑎᑕᐅᖁᓕᕐᐹ; ᐃᑎᕐᒪᑦ ᐅᖃᐅᑎᕚ, ‘ᐱᐅᖏᑦᑐᐊᓘᔪᑎᑦ! ᐃᓱᒪᒋᔪᓐᓁᕐᕕᒋᓚᐅᕐᐸᒋᑦ ᕿᓄᕕᒋᒐᕕᖓ ᐃᓘᓐᓇᓕᒫᖏᓐᓂᒃ ᐅᕙᓐᓄᑦ ᐊᑭᓕᒃᓴᕆᔭᕐᓂᒃ.

³³ ᓂᑲᒍᓱᒃᑐᒃᓴᐅᓚᐅᕋᓗᐊᕐᐳᑎᑦ ᐱᔨᐅᖃᑎᖕᓄᑦ, ᓲᕐᓗᑦᑕᐅᖅ ᓂᑲᒋᓚᐅᕋᒃᑭᑦ.’

³⁴ ᐊᖓᔪᖅᑳᕐᔪᐊᖅ ᑕᕝᕙ ᓂᓐᖓᒃᑐᐊᓘᕗᖅ, ᑖᓐᓇ ᑎᒍᔭᐅᓯᒪᕕᖕᒧᐊᕐᑕᐅᑎᑉᐹ, ᓱᒋᐊᕐᑕᐅᖁᓪᓗᒍ ᐊᑭᓕᒃᓴᕆᔭᒥᓂᒃ ᐃᓘᓐᓇᖏᓐᓂᒃ ᐊᑭᓖᓚᐅᖏᓐᓂᓕᒫᖓᓂ.

³⁵ “ᑍᒫᒃᑕᐅᖅ ᐊᑖᑕᒪ ᕿᓚᖕᒦᑦᑑᑉ ᐱᓂᐊᕐᕕᒋᒐᔭᕆᕚᓯ ᐅᒃᐱᕐᑑᖃᑎᑦᓯᓐᓂᒃ ᐃᓱᒪᒋᔪᓐᓁᕐᕕᖃᕐᓂᐊᖏᒃᑯᑦᓯ, ᐆᒻᒪᑎᑦᓯᓐᓂᑦ ᐱᔪᒥᒃ.”