ᒨᓯᓯ ᐱᖓᔪᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᓂᕐᕈᓯᕐᓂᖅ ᐱᕈᕐᑐᓂᒃ ᓂᐊᖂᔭᒃᓴᓂᒃ

¹ “‘ᑐᓂᕐᕈᓯᕆᐊᕐᑐᕐᑐᖃᕐᐸᑦ ᓂᐊᖂᔭᒃᓴᓂᒃ ᐱᕈᕐᑐᓂᒃ ᐊᑕᓂᕐᒧᑦ ᑐᓂᕐᕈᑎᒃᓴᖓ ᓂᐊᖂᔭᒃᓴᐅᔭᕆᐊᖃᕐᐳᖅ ᓯᖃᓪᓕᓯᒪᑦᓯᐊᕐᓗᓂ, ᐅᕐᓱᒥᒃ ᑯᕝᕕᕆᓗᓂᐅᒃ ᐃᓯᕐᓗᐊᕐᓂᑎᑕᒃᓴᒥᒃ ᐃᓐᓯᓐᓯᒥᒃ ᐃᓚᓗᓂᐅᒃ,

² ᐂᕉᓂᐅᑉ ᐃᕐᓂᖏᓐᓄᑦ ᑐᓂᕐᕈᓯᕐᑎᑦᓯᔨᓄᑦ ᑐᓂᔭᒃᓴᕆᕚ. ᑐᓂᕐᕈᓯᕐᑎᑦᓯᔨᐅᑉ ᓂᐊᖂᔭᒃᓴᒥᒃ ᐅᕐᓱᓕᕐᓯᒪᔪᒥᒃ ᐃᓯᕐᓗᐊᕐᓂᑎᑕᒃᓴᒥᒡᓗ ᐃᓚᓕᖕᒥᒃ ᐊᒡᒐᒥᓄᑦ ᑎᒍᓯᔪᒃᓴᐅᕗᖅ ᐃᑯᒪᔪᒧᓪᓗ ᐃᓕᓗᒍ ᐃᖅᑲᐅᒪᑦᔪᑎᒃᓴᐅᖁᓪᓗᒍ ᑐᓂᕐᕈᓯᕐᕕᖕᒥ ᐃᑯᐊᓚᑦᓯᓂᒃᑯᑦ ᑐᓂᔭᐅᖕᒪᑦ, ᑎᐱᖓᓗ ᐊᑕᓂᐅᑉ ᒪᒪᕆᕚ.

³ ᑖᑦᓱᒪᓕ ᑐᓂᕐᕈᑎᐅᑉ ᐊᒥᐊᒃᑯᖓ ᐂᕉᓂᐅᑉ ᐃᕐᓂᖏᑕᓗ ᐱᑖᕆᓂᐊᕐᐹᑦ, ᑖᓐᓇᓗ ᐃᑦᔪᕐᓁᓐᓂᕐᐹᖑᕗᖅ ᑐᓂᕐᕈᑎ ᐊᑕᓂᕐᒧᑦ ᑐᓂᕐᕈᑎᒋᔭᐅᔪᖅ ᐃᑯᒪᒃᑯᑦ.

⁴ “‘ᑐᓂᕐᕈᓯᕈᕕᓪᓗ ᓂᐊᖂᔭᒃᓴᒥᒃ ᐆᓯᒪᔪᒥᒃ, ᓂᐊᖂᔭᖃᕆᐊᖃᕐᐳᖅ ᓯᖃᓪᓕᓯᒪᑦᓯᐊᕐᑐᒥᒃ: ᓂᐊᖂᔭᓕᐊᕆᓯᒪᔪᖅ ᐳᕙᓪᓚᕐᓴᐅᑎᖃᖏᓪᓗᓂ ᐅᕐᓱᒥᒡᓗ ᐃᓚᓯᒪᓗᓂ; ᐅᕝᕙᓘᓐᓃᑦ ᓯᕙᓕᐊᕆᓯᒪᓗᑎᒃ ᐳᕙᓪᓚᕐᓴᐅᑎᖃᖏᓪᓗᓂ, ᐅᕐᓱᒥᒃ ᒥᖑᐊᕐᓯᒪᓗᑎᒃ.

⁵ “‘ᑐᓂᕐᕈᑎᒃᓮᑦ ᓂᐊᖂᔭᖑᒃᐸᑦ ᓵᑦᑑᔭᐅᑎᒧᑦ ᐆᓯᒪᓗᓂ, ᓂᐊᖂᔭᒃᓴᐅᔭᕆᐊᖃᕐᐳᖅ ᓯᖃᓪᓕᓯᒪᑦᓯᐊᕐᓗᓂ ᐅᕐᓱᒥᒃ ᐃᓚᓯᒪᓗᓂ, ᐳᕙᓪᓚᕐᓴᐅᑎᖃᖏᓪᓗᓂᓗ.

⁶ ᓯᖁᒥᓪᓗᒍ ᐅᕐᓱᒥᒃ ᐃᓚᓗᒍ, ᑐᓂᕐᕈᑎᒃᓴᐅᖕᒪᑦ ᓂᐊᖂᔭᖅ.

⁷ “‘ᑐᓂᕐᕈᑎᒃᓮᑦ ᓂᐊᖂᔭᖅ ᐆᑦᑎᓯᒧᑦ ᐆᓯᒪᒃᐸᑦ ᓂᐊᖂᔭᖃᕆᐊᖃᕐᐳᖅ ᓂᐊᖂᔭᒃᓴᒥᒃ ᓯᖃᓪᓕᓯᒪᑦᓯᐊᕐᑐᒥᒃ ᐅᕐᓱᒥᒡᓗ ᐃᓚᓯᒪᓗᓂ.

⁸ ᑐᓂᕐᕈᑎᒃᓴᑎᑦ ᓂᐊᖂᔭᑦ ᑍᒤᑦᑐᑦ ᐊᑕᓂᕐᒧᑦ ᑐᓂᒃᑭᑦ; ᑐᓂᕐᕈᓯᕐᑎᑦᓯᔨᒧᑦ ᑐᓂᓗᒋᑦ; ᑖᑦᓱᒪᓗ ᑐᓂᕐᕈᓯᕐᕕᖕᒧᑦ ᐃᓕᓂᐊᕐᐰᑦ.

⁹ ᑐᓂᕐᕈᑕᐅᓂᖏᑕ ᓇᓗᓁᒃᑯᑕᖓᓂᒃ ᐃᖅᑲᐅᒪᑦᔪᑎᒃᓴᒥᒃ ᐲᕐᓯᔭᕆᐊᖃᕐᐳᖅ ᓂᐊᖂᔭᒥᒃ ᐃᑯᐊᓪᓚᒡᓗᒍᓗ ᑐᓂᕐᕈᓯᕐᕕᖕᒥ ᑐᓂᕐᕈᓯᕐᓂᐅᓗᓂ ᐃᑯᒪᒃᑯᑦ, ᑎᐱᖓᓗ ᐊᑕᓂᐅᑉ ᒪᒪᕆᕚ.

¹⁰ ᑐᓂᕐᕈᑎᐅᑉ ᐊᒥᐊᒃᑯᖓ ᓂᐊᖂᔭᖅ ᐂᕉᓂᐅᑉ ᐃᕐᓂᖏᑕᓗ ᐱᒋᕚᑦ; ᑖᓐᓇᓗ ᐃᑦᔪᕐᓁᓐᓂᕐᐹᖑᕗᖅ ᑖᑦᓱᒪᓂ ᑐᓂᕐᕈᑎᒥ ᐊᑕᓂᕐᒧᑦ ᑐᓂᔭᐅᔪᓂᑦ ᐃᑯᒪᒃᑯᑦ.

¹¹ “‘ᑐᓂᕐᕈᑎᒃᓮᑦ ᓂᐊᖂᔭᑦ ᐊᑕᓂᕐᒧᑦ ᑐᓂᔭᓯ ᓴᓇᓯᒪᔭᕆᐊᖃᕐᐳᑦ ᐳᕙᓪᓚᕐᓴᐅᑎᖃᖏᓪᓗᑎᒃ, ᐳᕙᓪᓚᕐᓴᐅᑏᑦ ᐊᒻᒪᓗ ᕼᐊᓃᑦ ᑐᓂᕐᕈᑎᒃᓴᒧᑦ ᐃᓚᒋᔭᐅᑎᓪᓗᒋᑦ ᐃᑭᑕᐅᔭᕆᐊᖃᖏᒻᒪᑎᒃ ᐊᑕᓂᕐᒧᑦ ᑐᓂᕐᕈᑎᒋᔭᐅᔪᒥ ᐃᑯᒪᒧᑦ.

¹² ᐊᑕᓂᕐᒧᑦ ᑐᓂᕐᕈᑎᓄᑦ ᐃᓚᐅᔪᓐᓇᕋᓗᐊᕐᐳᑦ ᑐᓂᕐᕈᓯᕈᕕᑦ ᐱᕈᕐᑎᑕᕕᑦ ᓯᕗᓪᓖᕐᐹᖏᓐᓄᑦ ᐃᓚᓕᐅᑎᓗᒋᑦ, ᑭᓯᐊᓂ ᑐᓂᕐᕈᑎᓄᑦ ᐃᑯᐊᓚᑎᑕᒃᓴᓄᑦ ᑐᓂᕐᕈᑎᒃᓴᐅᓐᖏᓚᑦ ᑐᓂᕐᕈᓯᕐᕕᖕᒥ, ᖁᕕᐊᒋᔭᐅᓗᑎᒃ ᑎᐱᑦᓯᐊᕆᒃᑑᖏᒻᒪᑕ.

¹³ ᓂᐊᖂᔭᑦ ᑐᓂᕐᕈᑎᑎᑦ ᒪᒪᕐᓯᑎᑦᓴᕆᐊᖃᕐᐸᑎᑦ ᑕᕆᐅᕐᒧᑦ, ᑕᕆᐅᖃᖏᑦᑐᓕᐅᕐᓂᐊᕐᓇᒃ ᒎᑎᕕᑦ ᐊᖏᖃᑎᒌᒍᑎᖓᓂ ᑐᓂᕐᕈᑎᒃᓴᕐᓂᑦ ᓂᐊᖂᔭᒃᓴᒥᑦ; ᑐᓂᕐᕈᑎᓕᒫᑎᑦ ᑕᕆᐅᓕᕆᐊᖃᕐᐸᑎᑦ.

¹⁴ ᓂᐊᖂᔭᓂᒃ ᑐᓂᕐᕈᓯᕈᕕᑦ ᐱᕈᕐᑎᑕᕕᑦ ᓯᕗᓪᓕᕐᐹᖏᓐᓂᒃ, ᐊᑕᓂᕐᒧᑦ ᑐᓂᓯᔪᒃᓴᐅᕗᑎᑦ ᓂᐊᖂᔭᒃᓮᑦ ᓂᐊᖁᖏᓐᓂᒃ ᓯᖁᒥᓯᒪᔪᓂᒃ ᐅᓄᖏᑦᑐᓂᒃ ᐃᑯᒪᒧᑦ ᐆᓯᒪᔪᓂᒃ.

¹⁵ ᐅᕐᓱᒥᒃ ᐃᓚᓗᒋᑦ ᐃᓯᕐᓗᐊᕐᓂᑎᑕᒃᓴᒥᒡᓗ ᐃᓐᓴᓐᓯᒥᒃ ᐃᓚᓗᒋᑦ.

¹⁶ ᑐᓂᕐᕈᓯᕐᑎᑦᓯᔨ ᐃᑯᐊᓚᑎᑦᓯᔪᒃᓴᐅᕗᖅ ᑐᓂᕐᕈᑕᐅᓯᒪᔪᑦ ᐃᓚᖓᓐᓂᒃ ᓇᓗᓁᒃᑯᑕᐅᓗᓂ ᐃᖅᑲᐅᒪᑦᔪᑎᒃᓴᒥᒃ ᑖᒃᑯᐊ ᑐᓂᕐᕈᑕᐅᓯᒪᓂᖏᓐᓂᒃ, ᓯᖁᒥᓯᒪᔪᓂᒃ ᓂᐊᖂᔭᒃᓮᑦ ᓂᐊᖁᖏᓐᓂᒃ, ᐅᕐᓱᒥᒃ ᐃᓚᓯᒪᔪᓂᒃ, ᐃᓯᕐᓗᐊᕐᓂᑎᑕᒃᓴᒥᒡᓗ ᐃᓐᓴᓐᓯᒥᒃ ᐃᓚᓯᒪᔪᓂᒃ, ᓇᓗᓁᒃᑯᑕᐅᖁᓪᓗᒋᑦ ᑖᒃᑯᐊ ᑐᓂᕐᕈᑕᐅᓯᒪᖕᒪᑕ ᐃᑯᒪᒃᑯᑦ ᐊᑕᓂᕐᒧᑦ.’”