ᔮᓱᐊᑉ ᐊᒡᓚᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕆᑰᑉ ᑲᑕᖕᓂᖓ

¹ ᔨᕆᑰᓪᓕ ᐅᒃᑯᐊᖏᑦ ᐅᒃᑯᐊᕐᓯᒪᓚᐅᕐᐳᒃ ᐊᓂᕕᖏᑦ ᐃᑎᕐᕕᖏᓪᓗ ᐃᓴᕆᐊᓕᒥᐅᑦ ᐃᑎᖁᓇᒋᑦ; ᐃᑎᕐᑐᖃᕈᓐᓇᓚᐅᓐᖏᓚᕐᓗ ᐊᓂᔪᖃᕈᓐᓇᕋᓂᓗ ᐃᒡᓗᒐᓴᖕᓂᑦ.

² ᐊᑕᓂᕐᓗ ᐅᖃᕐᐳᖅ ᔮᓱᐊᒧᑦ, “ᔨᕆᑯ ᐃᓕᑦᓯᓐᓄᑦ ᑐᓂᓯᒪᕙᕋ, ᐊᖓᔪᖅᑳᕐᔪᐊᖓᓪᓗ ᐅᓇᑕᕐᑐᒃᓴᖁᑎᖏᓪᓗ.

³ ᐅᓇᑕᕐᑐᒃᓴᖁᑎᑎᓪᓗ ᐱᓱᒃᑐᒃᓴᐅᕗᓯ ᐃᒡᓗᒐᓮᑦ ᑬᕙᓪᓚᒡᓗᒋᑦ, ᖃᐅᑕᒫᑦ ᑬᕙᓪᓚᖃᑦᑕᕐᓗᒋᑦ ᐅᓪᓗᓂᒃ ᐱᖓᓲᔪᕐᑐᓂᒃ.

⁴ ᑐᓂᕐᕈᓯᕐᑎᑦᓯᔩᑦ 7 ᐊᑐᓂᑦ ᑎᑦᑐᓚᐅᓯᔭᕐᓗᑎᒃ ᓰᐱᐅᑉ ᐸᖕᓂᖓᑕ ᓇᒡᔪᖏᓐᓂᒃ ᐊᖏᖃᑎᒌᖕᓂᐅᑉ ᐃᒃᓯᕐᕕᖓ ᓯᕗᓂᖓᓃᑦᑐᒃᓴᐅᕗᑦ; ᐅᓪᓗᐃᓪᓕ 7ᖓᓐᓂ ᐅᓇᑕᕐᑐᒃᓴᖁᑎᑎᓪᓗ ᐱᓱᒃᑐᒃᓴᐅᕗᓯ ᐃᒡᓗᒐᓮᑦ ᑬᕙᓪᓚᒡᓗᒋᑦ 7ᐃᕐᓱᕐᓗᒋᑦ, ᑐᓂᕐᕈᓯᕐᑎᑦᓯᔩᑦ ᑎᑦᑐᓚᑎᓂᒃ ᓂᓪᓕᐊᑎᑦᓯᓗᑎᒃ.

⁵ ᑎᑦᑐᓚᐅᒻᒥᒃ ᓂᓪᓕᑯᑖᒃᑎᑦᓯᒃᐸᑕ, ᑐᓴᑐᐊᕈᑦᓯᐅᒃ, ᑕᕝᕙ ᐊᖑᑎᓕᒫᑦ ᓂᐱᖁᕐᑐᓗᑎᒃ ᑬᒐᓛᕐᑐᒃᓴᐅᕗᑦ; ᑕᕝᕙ ᐃᒡᓗᒐᓮᑦ ᐊᕙᓗᕐᔪᐊᖓ ᐅᕐᕈᓂᐊᕐᐳᖅ ᐊᑕᖏᕐᓗᓂ, ᐅᓇᑕᕐᑐᒃᓴᓕᒫᓪᓗ ᐃᑎᕐᑐᒃᓴᐅᕗᑦ ᐃᒡᓗᒐᓴᖕᓄᑦ ᓵᓐᖓᔭᑐᐃᓐᓇᕐᒥᒃᑎᒍᑦ.”

⁶ ᑕᕝᕙ ᔮᓱᐊᑉ ᓈᓂᐅᑉ ᐃᕐᓂᖓ ᑐᓂᕐᕈᓯᕐᑎᑦᓯᔩᑦ ᕾᖁᕐᓗᒋᑦ ᐅᖃᐅᑎᕔᑦ, “ᐊᑕᓂᐅᑉ ᐊᖏᖃᑎᒌᖕᓂᖓᑕ ᐃᒃᓯᕐᕕᖓ ᐊᒡᔭᕐᓗᒍ, ᓯᕗᓕᖃᕐᑐᒃᓴᐅᕗᓯ 7ᓂᒃ ᑐᓂᕐᕈᓯᕐᑎᑦᓯᔨᓂᒃ ᑎᑦᑐᓚᐅᓯᔭᕐᑐᓂᒃ.”

⁷ ᐃᓄᐃᓪᓗ ᐅᖃᐅᑎᕔᑦ, “ᐱᓱᒃᑐᒃᓴᐅᕗᓯ; ᐃᒡᓗᒐᓮᑦ ᑬᕙᓪᓚᒡᓗᒋᑦ, ᐊᖑᑏᑦ ᐅᓇᑕᐅᑎᓖᑦ ᓯᕗᓪᓕᐅᓗᑎᒃ, ᐊᑕᓂᐅᑉ ᐊᖏᖃᑎᒌᒍᑎᖓᑕ ᐃᒃᓯᕐᕕᖓ ᑭᖑᓪᓕᐅᓗᓂ.”

⁸ ᑍᒫᒃ ᔮᓱᐊᑉ ᐅᖃᐅᓯᖏᑦ ᒪᓕᒡᓗᒋᑦ ᐃᓄᐃᑦ ᐱᓇᓱᐊᓚᐅᕐᐳᑦ, ᑐᓂᕐᕈᓯᕐᑎᑦᓯᔩᑦ 7 ᐊᑐᓂᑦ ᑎᑦᑐᓚᐅᓯᔭᕐᑐᑦ ᓯᕗᓪᓕᐅᕗᑦ ᐊᑕᓂᐅᑉ ᓵᖓᓂ, ᑎᑦᑐᓚᐅᑎᒥᖕᓂᒃ ᓂᓪᓕᐊᑎᑦᓯᓪᓗᑎᒃ, ᐊᑕᓂᐅᓪᓗ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓᓂᒃ ᐊᒡᔭᕐᓯᔪᑦ ᑖᒃᑯᓂᖓ ᒪᓕᒡᓗᑎᒃ.

⁹ ᐅᓇᑕᕐᑐᒃᓮᓪᓕ ᓯᕗᓪᓕᐅᕗᑦ ᑐᓂᕐᕈᓯᕐᑎᑦᓯᔨᓂᑦ ᑎᑦᑐᓚᐅᓯᔭᕐᑐᓂᑦ, ᑭᖑᓪᓕᕐᐸᐅᓪᓗᑎᒃ ᖃᐅᔨᓴᕐᑏᑦ ᐊᑕᓂᐅᑉ ᐃᒃᓯᕐᕕᖓᑕ ᑭᖑᓂᐊᓂ, ᑐᓂᕐᕈᓯᕐᑎᑦᓯᔩᓪᓗ ᑎᑦᑐᓚᐅᑎᒥᖕᓂᒃ ᓂᓪᓕᐊᑎᑦᓰᓐᓇᓚᐅᕐᐳᑦ.

¹⁰ ᔮᓱᐊᓪᓕ ᐃᓄᐃᑦ ᐅᖃᐅᑎᓚᐅᕐᐰᑦ, “ᕾᒐᓛᕐᓂᐊᕋᓯ, ᓂᓪᓕᕐᓂᐊᕋᓯᓗ, ᐅᖃᓪᓚᖕᓂᐊᕋᓯᓘᓐᓃᑦ, ᐅᓪᓗᖅ ᓇᓪᓕᐅᑎᖅᑳᕐᑎᓐᓇᒍ ᕾᒐᓛᖁᔨᓂᒃᓴᕋ; ᑕᕝᕙ ᕾᒐᓛᕆᐊᖃᓕᕈᒫᕐᐳᓯ.”

¹¹ ᐊᖑᑏᑦ ᑎᓕᓚᐅᕐᐰᑦ ᐊᑕᓂᐅᑉ ᐊᖏᖃᑎᒌᒍᑎᖓᑕ ᐃᒃᓯᕐᕕᖓ ᐃᒡᓗᒐᓴᖕᓂᒃ ᑬᕙᓪᓚᐅᑦᔭᐅᖁᓪᓗᒍ ᐊᑕᐅᓯᐊᕐᓗᓂ; ᐅᑎᕐᒪᑕᓗ ᑕᖕᒫᕐᓯᒪᕕᖕᒥᖕᓄᑦ, ᐅᓐᓄᖕᒪᑦ ᓯᓂᒃᑕᓕᓚᐅᕐᐳᑦ ᑕᕝᕙᓂ.

¹² ᖃᐅᑎᓪᓗᒍ ᔮᓱᐊ ᐅᓪᓛᒻᒪᕆᒃᑯᑦ ᒪᑭᑉᐳᖅ, ᑐᓂᕐᕈᓯᕐᑎᑦᓯᔩᓪᓗ ᐊᒡᔭᕐᓯᓕᓚᐅᕐᐳᑦ ᐊᑕᓂᐅᑉ ᐊᖏᖃᑎᒌᒍᑎᖓᑕ ᐃᒃᓯᕐᕕᖓᓂᒃ.

¹³ ᑐᓂᕐᕈᓯᕐᑎᑦᓯᔩᑦ 7 ᑎᑦᑐᓚᐅᓯᔭᕐᑐᑦ ᐊᑕᓂᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓᑕ ᓯᕗᓂᖓᓂ ᑲᔪᓯᕗᑦ ᑎᑦᑐᓚᐅᑎᒥᖕᓂᒃ ᓂᓪᓕᐊᑎᑦᓯᓪᓗᑎᒃ; ᐅᓇᑕᕐᑐᒃᓮᓪᓗ ᓯᕗᓪᓕᐅᕗᑦ ᑖᒃᑯᓇᓐᖓᑦ, ᐊᑕᓂᐅᓪᓗ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓᑕ ᑭᖑᓂᐊᓃᑉᐳᑦ ᖃᐅᔨᓴᕐᑏᑦ, ᑐᓂᕐᕈᓯᕐᑎᑦᓯᔩᑦ ᑎᑦᑐᓚᐅᑎᒥᖕᓂᒃ ᓂᓪᓕᐊᑎᑦᓰᓐᓇᕐᑎᓪᓗᒋᑦ.

¹⁴ ᑕᕝᕙᓂ ᐅᓪᓘᑉ ᐂᑉᐸᖓᓂ ᐱᓱᓚᐅᕐᐳᑦ ᐃᒡᓗᒐᓮᑦ ᑬᕙᓪᓚᒡᓗᒋᑦ ᐊᑕᐅᓯᐊᕐᓗᑎᒃ, ᐅᑎᕐᓗᑎᒡᓗ ᑕᖕᒫᕐᓯᒪᕕᖕᒥᖕᓄᑦ. ᑖᒃᑯᐊᓗ ᑍᒤᓕᐅᓚᐅᕐᐳᑦ ᐅᓪᓗᓂᒃ ᐱᖓᓲᔪᕐᑐᓂᒃ.

¹⁵ ᐅᓪᓘᑉ 7ᖓᓐᓂ ᒪᑭᓚᐅᕐᐳᑦ ᖃᐅᒻᒪᒃᐸᓪᓕᐊᓕᕐᑎᓪᓗᒍ, ᐱᓱᓚᐅᕐᐳᓪᓗ 7ᐂᕐᓱᕐᓗᑎᒃ ᐃᒡᓗᒐᓮᑦ ᑬᕙᓪᓚᒡᓗᒋᑦ ᑍᒫᑦᓮᓐᓇᖅ ᐱᓂᐊᕐᓂᕆᓚᐅᕐᑕᒥᒃᑎᑐᑦ: ᑕᕝᕙᓂ ᑭᓯᐊᓂ ᐅᓪᓗᒥ 7ᐂᕐᓱᕐᓗᑎᒃ ᐃᒡᓗᒐᓴᖕᓂᒃ ᑬᕙᓪᓔᓚᐅᕐᐳᑦ.

¹⁶ 7ᖓᓐᓂ ᑬᕙᓪᓔᔭᕇᕐᒪᑕ, ᑐᓂᕐᕈᓯᕐᑎᑦᓯᔩᑦ ᑎᑦᑐᓚᐅᑎᒥᖕᓂᒃ ᓂᓪᓕᕐᑎᑦᓯᕗᑦ, ᑕᕝᕙ ᔮᓱᐊᑉ ᐊᖑᑏᑦ ᐅᖃᐅᑎᕔᑦ, “ᕾᒐᓛᓕᕆᑦᓯ; ᐊᑕᓂᐅᑉ ᐃᒡᓗᒐᓴᖕᓂᒃ ᑐᓂᕚᓯ!

¹⁷ ᐃᒡᓗᒐᓴᖕᓃᑦᑐᓕᒫᑦ ᐊᓯᕈᕐᑕᐅᓂᐊᕐᐳᑦ ᑐᓂᕐᕈᑕᐅᔪᑎᑐᑦ ᐊᑕᓂᕐᒧᑦ; ᕅᕼᐊᐱᑐᐊᖅ ᐊᖑᓐᓂᐊᕐᑎ ᐃᒡᓗᒥᐅᖃᑎᖏᓪᓗ ᐱᐅᓕᔭᐅᔪᒃᓴᐅᕗᑦ, ᑖᓐᓇ ᐃᔨᕐᓯᓯᒪᓚᐅᕐᒪᑦ ᖃᐅᔨᓴᕆᐊᕐᑎᑕᑦᑎᓐᓂᒃ.

¹⁸ ᐃᓕᑦᓯᓕ ᑎᒍᓯᔪᒃᓴᐅᓐᖏᓚᓯ ᐊᓯᕈᕐᑕᐅᔪᒃᓴᓂᒃ, ᑎᒍᓯᑐᐊᕈᑦᓯ ᐱᐅᖏᑦᑐᒥᒃ ᐊᓯᕈᕐᑕᐅᓇᕐᑐᒥᒡᓗ ᐱᑎᑦᓯᓂᐊᕐᐳᓯ ᐃᓴᕆᐊᓕᒥᐅᓄᑦ.

¹⁹ ᓯᐅᓪᕕᕆᓕᒫᑦ ᒎᓗᐃᓪᓗ, ᑲᓐᓄᔧᓪᓗ ᓴᕕᕋᔧᓪᓘᓐᓃᑦ, ᓴᓂᕐᕙᒃᑕᐅᔪᒃᓴᐅᕗᑦ ᐊᑕᓂᕐᒧᑦ; ᐃᓕᔭᐅᔪᒃᓴᐅᕗᓪᓗ ᐊᑕᓂᐅᑉ ᓄᐊᑦᓯᕕᖁᑎᖓᓄᑦ.”

²⁰ ᑕᕝᕙ ᑐᓂᕐᕈᓯᕐᑎᑦᓯᔩᑦ ᑎᑦᑐᓚᐅᑎᒥᖕᓂᒃ ᓂᓪᓕᕐᑎᑦᓯᑐᐊᕐᒪᑕ, ᐊᖑᑏᑦ ᓂᐱᖅᑯᕐᑐᓪᓗᑎᒃ ᕾᒐᓛᓕᓚᐅᕐᐳᑦ. ᔨᕆᑰᓪᓗ ᐊᕙᓗᕐᔪᐊᖏᑦ ᐅᕐᕈᕗᑦ, ᐃᓄᓕᒫᓪᓗ ᓵᓐᖓᔭᒥᒃᑎᒍᑦ ᑐᕅᓐᓇᕐᓗᑎᒃ ᐃᑎᕐᐳᑦ ᐃᒡᓗᒐᓴᖕᓄᑦ, ᐃᒡᓗᒐᓮᓪᓗ ᓵᓚᒋᓪᓗᒋᑦ.

²¹ ᓴᕕᒡᔪᐊᒥᖕᓄᓪᓗ ᑐᖁᕅᕗᑦ ᐃᒡᓗᒐᓴᐅᑉ ᐃᓗᐊᓃᑦᑐᓂᒃ, ᐊᖑᑎᓂᒃ, ᐊᕐᓇᓂᒃ, ᐅᕕᒃᑲᓂᒃ ᐃᓄᑐᖃᕐᓂᒡᓗ, ᐃᒻᒧᒃᓯᐅᒐᕐᓂᒃ, ᓰᐱᓂᒃ ᓯᐅᑎᖅᑯᕐᑐᔪᓂᒡᓗ ᑐᖁᕅᓚᐅᕐᐳᑦ.

²² ᔮᓱᐊᓕ ᐅᖃᕐᐳᖅ ᐊᖑᑏᖕᓄᑦ ᒪᕐᕉᖕᓄᑦ ᓄᓇᒥᒃ ᖃᐅᔨᓴᕆᐊᓚᐅᕐᑑᖕᓄᑦ, “ᐂᓕᕆᑦᓯᒃ ᐊᖑᓐᓂᐊᕐᑎᐅᑉ ᐃᒡᓗᖓᓄᑦ, ᑕᒪᐅᓐᖓᐅᑎᓗᒍᓗ ᐃᓚᓕᒫᖏᓪᓗ, ᑍᒫᒃ ᐊᖏᕐᕕᒋᓚᐅᕋᑦᓯᐅᒃ.”

²³ ᑍᒤᒻᒪᑦ ᐃᓅᓱᒃᑑᒃ ᓄᓇᒥᒃ ᖃᐅᔨᓴᕆᐊᓚᐅᕐᑑᒃ ᐂᒃᓯᓚᐅᕐᐴᒃ ᕅᕼᐊᐱᒥᒃ, ᐊᑖᑕᖓᓂᒃ ᐊᓈᓇᖓᓂᒃ ᐊᓂᖏᓪᓗ ᐃᓚᓕᒫᖏᓪᓗ; ᐱᔨᑲᑖᖏᓪᓗ ᐂᑎᓚᐅᕐᐰᑦ ᐃᓴᕆᐊᓕᒥᐅᑦ ᑕᖕᒫᕐᓯᒪᕕᖓᑕ ᓴᓂᐊᓄᑦ.

²⁴ ᑕᕝᕙ ᐃᒡᓗᒐᓮᑦ ᐃᑯᐊᓪᓚᒃᐰᑦ, ᓱᓇᓕᒫᑦ ᐃᓗᐊᓃᑦᑐᑦ ᓄᖑᓪᓗᒋᑦ; ᐊᒥᐊᒃᑯᑐᐊᖃᓚᐅᕐᐳᑦ ᒎᓗᓂᒃ, ᓯᐅᓪᕕᕆᓂᒃ, ᑲᓐᓄᔭᓂᒃ ᓴᕕᕋᔭᖕᓂᒡᓗ, ᑖᒃᑯᐊᓗ ᐊᑕᓂᐅᑉ ᓄᐊᑦᓯᕕᖁᑎᖓᓄᐊᕐᑕᐅᓚᐅᕐᐳᑦ.

²⁵ ᔮᓱᐊᓪᓕ ᕅᕼᐊᐱ ᐊᑖᑕᖓᑕᓗ ᐃᓚᓕᒫᖏᑦ ᐃᓅᑎᓚᐅᕐᐰᑦ; ᖃᐅᔨᓴᕆᐊᕐᑐᓂᒃ ᔨᕆᑯᒧᑦ ᐃᔨᕐᓯᓚᐅᕐᒪᑦ. ᑖᑦᓱᒪᓗ ᑭᖑᕚᖏᑦ ᐅᓪᓗᒥᒧᑦ ᓱᓕ ᐃᓅᕗᑦ ᐃᓴᕆᐊᓕᒥ.

²⁶ ᑍᑦᓱᒪᓂᐅᑎᓪᓗᒍ ᔮᓱᐊ ᐃᓂᕐᑎᕐᓯᕆᕗᖅ, “ᓇᓪᓕᐊᑦ ᓴᓇᓇᓱᒃᑐᖅ ᐃᒡᓗᒐᓴᖕᓂᒃ ᔨᕆᑯᒥᒃ ᐊᑕᓂᐅᑉ ᓂᓐᖓᐅᓯᖓᓃᓐᓂᐊᕐᐳᖅ. ᓇᓪᓕᐊᓪᓗ ᑐᓐᖓᕕᖓᓂᒃ ᐋᖅᑭᒃᓯᓇᓱᒃᑐᖅ ᐊᖓᔪᒃᓯᕐᐹᖁᑎᒥᓂᒃ ᐊᓯᐅᔨᔪᒫᕐᐳᖅ, ᐃᑎᕐᑕᕐᕕᖓᓂᒡᓗ ᐋᖅᑭᒃᓯᓇᓱᒃᑐᖅ ᓄᑲᕐᓯᕐᐹᖁᑎᒥᓂᒃ ᐊᓯᐅᔨᔪᒫᕐᐳᖅ.”

²⁷ ᑍᒤᒻᒪᑦ ᐊᑕᓂᖅ ᔮᓱᐊᒦᓚᐅᕐᐳᖅ; ᖁᕕᐊᒋᔭᐅᒻᒪᕆᓕᕐᓗᓂᓗ ᓄᓇᓕᓕᒫᓄᑦ.