ᔮᓱᐊᑉ ᐊᒡᓚᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᔭᕅᑦ ᐃᖅᑲᐅᒪᑦᔪᑏᑦ ᐋᖅᑭᒃᑕᐅᓂᖏᑦ

¹ ᐃᓅᖃᑎᒌᒡᔪᐊᓕᒫᑦ ᐃᑳᕇᕐᒪᑕ ᔪᐊᕐᑕᓂᐅᑉ ᑰᖓᓂᒃ, ᐊᑕᓂᖅ ᐅᖃᕐᐳᖅ ᔮᓱᐊᒧᑦ,

² “ᓂᕈᐊᓕᕆᑦ ᐊᖑᑎᓂᒃ 12ᓂᒃ ᑭᖑᕚᕇᓕᒫᓂᑦ ᐊᑐᓂᑦ ᐱᓯᒪᔪᓂᒃ,

³ ᐱᖁᒃᑭᑦ ᑎᒍᓯᖁᓗᒋᑦ ᐅᔭᕋᖕᓂᒃ 12ᓂᒃ ᐊᑕᐅᓯᕐᒥᒃ ᐊᑐᓂᑦ ᔪᐊᕐᑕᓂᐅᑉ ᑰᖓᓂᑦ ᐱᔪᓂᒃ, ᑐᓂᕐᕈᓯᕐᑎᑦᓯᔩᑦ ᑰᖕᒥᑦ ᓇᖏᕐᕕᒋᔭᖓᓐᓂᑦ, ᑖᒃᑯᐊᓗ ᐅᔭᕅᑦ ᓇᒃᓴᕐᑕᐅᖁᓪᓗᒋᑦ ᐃᓕᔭᐅᓗᑎᒡᓗ ᐅᓐᓄᒃ ᑕᖕᒫᕐᓯᒪᕕᒋᓂᐊᕐᑕᖏᓐᓄᑦ.”

⁴ ᑕᕝᕙ ᔮᓱᐊ ᕾᖁᔨᓚᐅᕐᐳᖅ ᐊᖑᑎᓂᒃ 12ᓂᒃ ᓂᕈᐊᕐᑕᒥᓂᒃ ᑭᖑᕚᕇᓂᑦ ᐊᑐᓂᑦ ᐱᓯᒪᔪᓂᒃ;

⁵ ᔮᓱᐊᓪᓗ ᐅᖃᐅᑎᕔᑦ, “ᔪᐊᕐᑕᓂᐅᑉ ᑰᖓᑕ ᕿᑎᐊᓄᐊᕆᑦᓯ ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓᑕ ᓯᕗᓂᖓᓄᐊᕐᓗᓯ ᐊᑕᓂᐅᑉ ᒎᑎᓯ ᐱᖓᑕ, ᐊᑐᓂᓪᓗ ᐅᔭᕋᖕᓂᒃ ᑎᒍᓯᓕᕆᑦᓯ ᐃᕐᓱᒡᓗᓯ ᐊᑕᐅᓯᕐᒥᒃ ᐃᓴᕆᐊᓕᒥᐅᑦ ᑭᖑᕚᖏᑕ ᐅᓄᕐᓂᖏᑦ ᒪᓕᒡᓗᒋᑦ.

⁶ ᑖᒃᑯᐊ ᐅᔭᕅᑦ ᓇᓗᓁᒃᑯᑕᐅᔪᒫᕐᒪᑕ ᐃᓄᖕᓄᑦ ᐊᑕᓂᐅᑉ ᐱᓂᐊᕐᓂᕆᓚᐅᕐᑕᖓᓂᒃ, ᕿᑐᕐᖓᑦᓯᓐᓄᑦ ᐊᐱᕆᔭᐅᒍᑦᓯ ᖃᓄᖅ ᑖᒃᑯᐊ ᐅᔭᕅᑦ ᑐᑭᖃᕐᒪᖔᑕ,

⁷ ᑭᐅᔪᒫᕋᑦᓯᐅᒃ ᔪᐊᕐᑕᓂᐅᑉ ᑰᖓ ᑰᒍᓐᓃᓚᐅᕐᓯᒪᓂᖓᓂᒃ ᐊᑕᓂᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓ ᐃᑳᕈᑦᔭᐅᓕᕐᑎᓪᓗᒍ ᑰᖕᒥᒃ ᔪᐊᕐᑕᓂᒥᒃ, ᔪᐊᕐᑕᓂᐅᑉ ᑰᖓ ᓄᖅᑲᖓᑎᑕᐅᓚᐅᕐᒪᑦ. ᑖᒃᑯᐊ ᐅᔭᕅᑦ ᐃᓴᕆᐊᓕᒥᐅᓄᑦ ᖃᓄᖅ ᐱᔪᖃᓚᐅᕐᓯᒪᖕᒪᖔᑦ ᐃᖅᑲᐅᒪᑦᔪᑎᒃᓴᐅᓂᐊᕐᐳᑦ ᐃᓱᖃᖏᑦᑐᒧᑦ.”

⁸ ᐊᖑᑏᑦ ᐱᓇᓱᐊᓚᐅᕐᐳᑦ ᔮᓱᐊᑉ ᑎᓕᓯᑦᔪᑎᖓᓂᒃ, ᐅᕋᔭᖕᓂᒃ ᑎᒍᓯᓚᐅᕐᐳᑦ 12ᓂᒃ ᔪᐊᕐᑕᓂᐅᑉ ᑰᖓᓂᑦ, ᐃᓴᕆᐊᓕᒥᐅᑦ ᑭᖑᕚᖏᑕ ᐊᕕᒃᑐᕐᓯᒪᓂᖏᑦ ᐊᑐᓂᑦ ᒪᓕᒡᓗᒋᑦ, ᑍᒫᒃ ᐊᑕᓂᐅᑉ ᑎᓕᓚᐅᕐᒪᒍ ᔮᓱᐊ; ᐅᔭᕅᓪᓗ ᐊᒡᔭᕐᑕᐅᓚᐅᕐᐳᑦ ᑕᖕᒫᕐᓯᒪᕕᖕᒥᖕᓄᐊᕈᑦᔭᐅᓪᓗᑎᒃ.

⁹ ᔮᓱᐊᓗᑕᐅᖅ ᐃᓕᓯᓚᐅᕆᕗᖅ ᐅᔭᕋᖕᓂᒃ 12ᓂᒃ ᔪᐊᕐᑕᓂᐅᑉ ᑰᖓᑕ ᕿᑎᐊᓄᑦ, ᑐᓂᕐᕈᓯᕐᑎᑦᓯᔩᑦ ᐊᖏᖃᑎᒌᖕᓂᐅᑉ ᐃᒃᓯᕐᕕᖓᓂᒃ ᐊᒡᔭᕐᓯᔪᑦ ᓇᖏᕐᕕᒋᓚᐅᕐᑕᖏᓐᓄᑦ; ᑖᒃᑯᐊᓗ ᐅᓪᓗᒥ ᓱᓕ ᐅᔭᕅᑦ ᑍᑲᓃᑉᐳᑦ.

¹⁰ ᑐᓂᕐᕈᓯᕐᑎᑦᓯᔩᑦ ᓇᖏᓚᐅᕐᐳᑦ ᔪᐊᕐᑕᓂᒥ ᑰᑉ ᕿᑎᐊᓂ ᐱᔭᕇᓚᐅᖅᑳᕐᑎᓐᓇᒋᑦ ᐊᑕᓂᐅᑉ ᑎᓕᑦᔪᑎᒋᓚᐅᕐᑕᖓᓂᒃ ᔮᓱᐊᒧᑦ, ᑕᒪᓐᓇ ᒨᓯᓯᐅᑉ ᑎᓕᓯᑦᔪᑎᒋᓚᐅᕐᒪᒍ ᔮᓱᐊᒧᑦ. ᐃᓄᐃᑦ ᑐᐊᕕᓚᐅᕐᐳᑦ ᑰᖕᒥᒃ ᐃᑳᕐᓗᑎᑦ.

¹¹ ᐊᑭᐊᓃᑦᑐᐃᓐᓇᐅᓕᕐᒪᑕᓗ, ᑐᓂᕐᕈᓯᕐᑎᑦᓯᔩᑦ ᐊᒡᔭᕐᓯᔪᑦ ᐊᑕᓂᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓᓂᒃ ᐃᑳᓕᓚᐅᕐᐳᑦ ᐃᓄᐃᑦ ᑕᑯᓐᓇᕐᑎᓪᓗᒋᑦ.

¹² ᕉᐱᓂᐅᑉ ᑭᖑᕚᖏᑦ, ᒑᓪᓗ ᑭᖑᕚᖏᑦ ᒫᓇᓯᐅᓪᓗ ᑭᖑᕚᖏᑦᑕ ᐊᕝᕙᖏᑦ ᑖᒃᑯᐊ ᐅᓇᑕᐅᑎᓖᑦ ᐃᑳᖅᑳᓚᐅᕐᐳᑦ ᐊᑐᐃᓐᓇᐅᓪᓗᑎᒃ ᐅᓇᑕᕐᓂᕐᒧᑦ, ᒨᓯᓯᐅᑉ ᑍᒫᒃ ᐅᖃᐅᑎᓚᐅᕐᓯᒪᖕᒪᒋᑦ.

¹³ ᐊᑕᓂᐅᑉ ᓵᖓᓂ ᐊᖑᑏᑦ 40,000ᓮᑦ ᐅᓇᑕᕐᓂᕐᒧᑦ ᐊᑐᐃᓐᓇᐅᓚᐅᕐᐳᑦ ᐃᑳᕐᓗᑎᒡᓗ ᓇᑎᕐᓇᒧᑦ ᔨᕆᑰᑉ ᖃᓂᒋᔮᓄᑦ.

¹⁴ ᐅᓪᓗᒥ ᑍᑦᓱᒪᓂ ᐊᑕᓂᐅᑉ ᐅᐱᓐᓇᕐᓯᑎᓚᐅᕐᐹ ᔮᓱᐊ ᐃᓴᕆᐊᓕᒥᐅᑦ ᑕᑯᓐᓇᕐᑎᓪᓗᒋᑦ; ᐃᒃᐱᒋᔭᐅᑦᓯᐊᓚᐅᕐᐳᕐᓗ ᐃᓅᓯᖓᑕ ᐃᓱᐊ ᑎᑭᓪᓗᒍ, ᑍᒫᑦᓮᓐᓇᖅ ᒨᓯᓯᒥᒃ ᐃᒃᐱᒍᓱᑦᓯᐊᓚᐅᕐᓂᕐᒥᑐᑦ.

¹⁵ ᐊᑕᓂᐅᓪᓗ ᐅᖃᐅᑎᕚ ᔮᓱᐊ ᐅᖃᕐᓗᓂ,

¹⁶ “ᑐᓂᕐᕈᓯᕐᑎᑦᓯᔩᑦ ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓᓂᒃ ᐊᒃᔭᕐᓯᔪᑦ ᔪᐊᕐᑕᓂᒥᑦ ᒪᔪᖁᓕᒃᑭᑦ.”

¹⁷ ᑍᒤᒻᒪᑦ ᔮᓱᐊᑉ ᑐᓂᕐᕈᓯᕐᑎᑦᓯᔩᑦ ᐅᖃᐅᑎᕔᑦ ᐅᖃᕐᓗᓂ, “ᔪᐊᕐᑕᓂᐅᑉ ᑰᖓᓂᑦ ᒪᔪᓕᕆᑦᓯ.”

¹⁸ ᑐᓂᕐᕈᓯᕐᑎᑦᓯᔩᓪᓗ ᐊᑕᓂᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓᓂᒃ ᐊᒡᔭᕐᓯᔪᑦ ᔪᐊᕐᑕᓂᒥᑦ ᑰᖕᒥᑦ ᒪᔪᕐᒪᑕ, ᐃᑎᒐᖏᑦ ᑰᑉ ᑭᒡᓕᖓᓄᑦ ᐸᓂᕐᑐᒧᑦ ᑐᑎᑐᐊᕐᒪᑕ, ᔪᐊᕐᑕᓂᐅᑉ ᑰᖓ ᐅᑎᓚᐅᕐᐳᖅ ᑰᓕᕐᓗᓂᓗ ᑰᖕᓂᕆᓚᐅᕐᑕᒥᑐᑦ.

¹⁹ ᐃᓄᐃᑦ ᐃᑳᓚᐅᕐᐳᑦ ᑰᖕᒥᒃ ᔪᐊᕐᑕᓂᒥᒃ ᑕᖅᑭᐅᑉ ᓯᕗᓪᓕᕐᐹᖓᑕ ᐅᓪᓗᖓᑕ 10ᖓᓂ, ᑕᖕᒫᕐᓗᑎᒡᓗ ᒋᐅᓪᒐᐅᓪᒧᑦ ᔨᕆᑰᑉ ᓄᓇᖓᑕ ᑭᒡᓕᖓᓄᑦ ᓯᕿᓂᖓᑕ ᓄᐃᕕᐊᑕ ᓇᓛᓃᑦᑐᒧᑦ.

²⁰ ᑕᕝᕙᓂᓗ ᔮᓱᐊᑉ ᐅᔭᕅᑦ 12 ᔪᐊᕐᑕᓂᒥᑦ ᐱᔭᐅᔪᕕᓃᑦ, ᐋᖅᑭᒃᓱᓚᐅᕐᐰᑦ ᒋᐅᓪᒐᐅᓪᒥ.

²¹ ᐅᖃᐅᑎᓪᓗᒋᓪᓗ ᐃᓴᕆᐊᓕᒥᐅᑦ, “ᕿᑐᕐᖓᑦᓯᓐᓂᑦ ᐊᐱᕆᔭᐅᒍᑦᓯ ᓯᕗᓂᑦᑎᓐᓂ, ᖃᓄᖅ ᑖᒃᑯᐊ ᐅᔭᕅᑦ ᑐᑭᖃᕐᒪᖔᑕ,

²² ᐅᖃᐅᑎᔪᒫᕐᐸᓯ, ‘ᐃᓴᕆᐊᓕᒥᐅᑦ ᐃᑳᓚᐅᕐᓯᒪᖕᒪᑕ ᔪᐊᕐᑕᓂᐅᑉ ᑰᖓᒍᑦ ᓄᓇᒃᑯᑦ ᓴᓗᐊᒪᔪᒃᑯᑦ.’

²³ ᐊᑕᓂᐅᑉ ᒎᑎᑦᓯ ᔪᐊᕐᑕᓂᐅᑉ ᐃᒪᖓ ᓴᓗᐊᕐᑎᓚᐅᕐᒪᒍ ᐃᑳᕇᓚᐅᖅᑳᕐᑎᓐᓇᓯ ᔪᐊᕐᑕᓂᐅᑉ ᑰᖓᓂᒃ, ᑍᒫᑦᓮᓐᓇᖅ ᐊᑕᓂᐅᑉ ᒎᑎᑦᓯ ᐃᒪᖅ ᐊᐅᐸᓗᒃᑕᖅ ᓴᓗᐊᕐᑎᓚᐅᕐᒪᒍ ᐃᑳᕐᑐᐃᓐᓇᐅᓛᐅᖅᑳᕐᑎᓐᓇᑕ.

²⁴ ᐃᓄᓕᒫᑦ ᓄᓇᕐᔪᐊᕐᒥᐅᑦ ᖃᐅᔨᖁᓪᓗᒋᑦ ᐊᑕᓂᐅᑉ ᐱᔪᓐᓇᕐᓂᕐᔪᐊᖓᓂᒃ; ᐃᓕᑦᓯᓗ ᐃᓕᕋᓱᐃᓐᓇᕐᓂᐊᕋᑦᓯ ᐊᑕᓂᕐᒥᒃ ᒎᑎᑦᓯᓐᓂᒃ ᐃᓱᖃᖏᑦᑐᒧᑦ.”