ᔮᓱᐊᑉ ᐊᒡᓚᖏᑦ 14 - ᐊᒡᓔᑦ ᐃᑦᔪᕐᖕᓁᑦᑐᑦ

ᓄᓇᐅᑉ ᐊᕕᒃᑐᕐᑕᐅᓂᖏᑦ ᔪᐊᕐᑕᓂᐅᑉ ᓯᕿᓂᖓᑕ ᓂᐱᕕᐊᓃᑦᑐᑦ

¹ ᓄᓇᐅᑉ ᐊᕕᒃᑐᕐᑕᐅᓂᖏᑦ ᑭᖑᕐᖑᑎᔭᐅᖁᓪᓗᒋᑦ ᐃᓴᕆᐊᓕᒥᐅᑦ ᐃᓄᖏᓐᓄᑦ ᑬᓇᓂᐅᑉ ᓄᓇᖓᓂ, ᐅᑯᓄᖓ ᐱᓇᓱᐊᕐᑕᐅᓚᐅᕐᐳᑦ ᐃᓕᓯᕆ ᑐᓂᕐᕈᓯᕐᑎᑦᓯᔨᒧᑦ, ᔮᓱᐊᒧᓪᓗ ᓈᓂᐅᑉ ᐃᕐᓂᖓᓄᑦ, ᐃᓚᒌᓪᓗ ᐃᓴᕆᐊᓕᒥᐅᑦ ᓯᕗᓕᕐᑎᖏᓐᓄᑦ ᑖᒃᑯᐊ ᐊᒡᒍᐃᓚᐅᕐᐳᑦ ᐃᓄᐃᑦ ᑭᖑᕚᕇᖑᓂᖏᑦ ᒪᓕᒡᓗᒋᑦ.

² ᐊᑕᓂᖅ ᒨᓯᓯᒃᑯᑦ ᑍᒫᒃ ᑎᓕᓯᓚᐅᕐᒪᑦ, ᑖᒃᑯᐊ ᓄᓇᐅᑉ ᐊᕕᒃᑐᕐᓯᒪᓂᖏᑦ 9ᓄᑦ ᑭᖑᕚᕇᓄᑦ ᑭᖑᕚᕇᓪᓗ ᐊᕝᕙᖏᓐᓄᑦ ᔪᐊᕐᑕᓂᐅᑉ ᓯᕿᓂᖓᑕ ᓂᐱᕕᐊᓃᑦᑐᓄᑦ ᐊᕕᒃᑐᕐᑕᐅᓚᐅᕐᐳᑦ ᓇᓚᐅᑦᑖᕈᑎᒃᑯᑦ.

³ ᒨᓯᓯ ᑐᓂᓯᔭᕇᓚᐅᕐᒪᑦ ᔪᐊᕐᑕᓂᐅᑉ ᓯᕿᓂᖓᑕ ᓄᐃᕕᐊᓃᑦᑐᓄᑦ ᒪᕐᕉᐃᓄᑦ ᑭᖑᕚᕇᓄᑦ ᑭᖑᕚᕇᓪᓗ ᐊᕝᕙᖏᓐᓄᑦ; ᓕᕔᓪᓕ ᑭᖑᕚᖏᑦ ᑭᖑᕐᖑᑎᔭᒃᓴᖏᓐᓂᒃ ᑐᓂᓯᕕᒋᓚᐅᓐᖏᓔᑦ.

⁴ ᔫᓯᐱᐅᑉ ᑭᖑᕚᖏᑦ ᒪᕐᕉᐃᖑᓚᐅᕐᒪᑕ, ᒫᓇᓯᒃᑯᑦ ᐃᕗᕅᒥᒃᑯᓪᓗ; ᒨᓯᓯᓕ ᓄᓇᒥᒃ ᑐᓂᓯᓚᐅᓐᖏᓚᖅ ᓕᕔᑦ ᑭᖑᕚᖏᓐᓄᑦ, ᐃᒡᓗᒐᓴᖕᓂᒡᓕ ᑐᓂᔭᐅᓚᐅᕐᐳᑦ ᓄᓇᖃᕐᕕᒃᓴᖏᓐᓂᒃ ᐆᒪᔪᖁᑎᖏᑕᓗ ᐃᓂᒃᓴᖏᓐᓂᒃ.

⁵ ᐃᓴᕆᐊᓕᒥᐅᑦ ᐃᓄᖏᑦ ᐱᓇᓱᐊᓚᐅᕐᐳᑦ ᐊᑕᓂᐅᑉ ᒨᓯᓯᒃᑯᑦ ᑎᓕᓯᓚᐅᕐᓂᖓ ᒪᓕᒡᓗᒍ; ᓄᓇᒥᒃ ᐊᕕᒃᑐᐃᓚᐅᕐᐳᑦ ᓇᓚᐅᑦᑖᕈᑎᒃᑯᑦ.

ᕼᐃᐸᕋᓂᐅᑉ ᑐᓂᔭᐅᓂᖓ ᑬᓚᐱᒧᑦ

⁶ ᐅᓪᓗᐃᑦ ᐃᓚᖓᓂ ᔫᑕᐅᑉ ᐃᓄᖏᑕ ᐃᓚᖏᑦ ᐂᕗᑦ ᔮᓱᐊᒧᑦ ᒋᐅᓪᒐᐅᓪᒧᑦ; ᑬᓚᐱᐅᓪᓗ ᔨᐳᓂᐊᐅᑉ ᐃᕐᓂᖓᑕ ᑭᓂᔧᑦᒥᒃ ᑍᔭᐅᔫᑉ, ᔮᓱᐊ ᐅᖃᐅᑎᕚ, “ᖃᐅᔨᒪᕗᑎᑦ ᐊᑕᓂᐅᑉ ᐅᖃᐅᓯᕆᓚᐅᕐᑕᖓᓂᒃ ᒨᓯᓯᒧᑦ ᒎᑎᐅᑉ ᐃᓄᖁᑎᖓᓄᑦ ᑲᑎᓯ-ᐸᕐᓂᐊᒥ ᐃᓕᖕᓂᒃ ᐅᕙᓐᓂᒡᓗ ᐱᑦᔪᑎᖃᕐᓗᓂ.

⁷ ᑍᑦᓱᒪᓂ 40ᓂᒃ ᐊᕐᕌᒍᖃᓚᐅᕐᐳᖓ ᐊᑕᓂᐅᑉ ᐱᔨᖓᑕ ᒨᓯᓯᐅᑉ ᑎᓕᖕᒪᖓ ᑲᑎᓯ-ᐸᕐᓂᐊᒥᑦ ᖃᐅᔨᔭᐅᑦᑍᓕᓗᖓ ᖃᐅᔨᓴᕆᐊᖁᓪᓗᓂᖓ ᓄᓇᒥᒃ; ᓱᓕᑦᓯᐊᕐᑐᒥᒡᓗ ᐅᖃᐅᑎᓚᐅᕐᐸᕋ ᐆᒻᒪᑎᒥᐅᑕᕆᔭᓐᓂᒃ.

⁸ ᐊᖑᑏᓪᓕ ᑍᒃᑯᐊ ᐱᖃᑎᒋᓚᐅᕐᑕᒃᑲ ᑲᑉᐱᐊᓱᓕᕐᑎᑦᓯᓚᐅᕐᐳᑦ ᐃᓄᖕᓂᒃ; ᐅᕙᖓᓕ ᓈᓚᑦᓯᐊᓚᐅᕐᐳᖓ ᐊᑕᓂᕐᒥᒃ ᒎᑎᓐᓂᒃ.

⁹ ᑍᒤᓚᐅᕐᓂᓐᓄᑦ ᒨᓯᓯᐅᑉ ᐊᖏᕐᕕᒋᓚᐅᕐᐹᖓ ᐅᓪᓗᒥ ᑍᑲᓂ, ᐅᖃᕐᓗᓂ, ‘ᓱᓕᑦᓯᐊᕐᑐᒥᒃ ᓄᓇ ᐱᓱᒃᕕᒋᓚᐅᕐᑍᑦ ᕿᑐᕐᖓᑎᓪᓗ ᑭᖑᕐᖑᑎᔪᒫᓕᕐᐸᓯ ᐃᓱᖃᖏᑦᑐᒧᑦ, ᐊᑕᓂᕐᒥᒃ ᒎᑎᖕᓂᒃ ᓱᓕᑦᓯᐊᕐᓗᑎᑦ ᒪᓕᑦᓯᐊᓚᐅᕋᕕᑦ.’

¹⁰ ᒫᓐᓇᓕ ᑕᑯᓕᕆᑦ, ᐊᕐᕌᒍᑦ 45 ᐊᓂᒍᕐᓯᒪᓕᕐᐳᑦ ᐊᑕᓂᖅ ᑍᒫᒃ ᐅᖃᓚᐅᕐᓯᒪᖕᒪᑦ ᒨᓯᓯᒧᑦ, ᑍᑦᓱᒪᓂ ᐃᓴᕆᐊᓕᒥᐅᑦ ᐃᓄᖃᔪᐃᑦᑐᒃᑰᕐᑎᓪᓗᒋᑦ ᐊᑕᓂᖅ ᐊᖏᓚᐅᕐᓯᒪᕗᖅ, ᐃᓅᑎᒻᒪᖓ ᑍᒪᓐᖓᒥᑦ; ᒫᓐᓇᓕ ᑕᑯᓕᓐᖓ, 85ᓂᒃ ᐊᕐᕌᒍᖃᓕᕐᑐᖓ.

¹¹ ᑍᒫᒃᓱᓕᓕ ᐅᓪᓗᒥ ᓴᓐᖏᑎᒋᕗᖓ ᑍᑦᓱᒪᓂ ᒨᓯᓯ ᐅᕙᓐᓂᒃ ᑎᓕᓯᓚᐅᕐᓯᒪᓂᖓᑐᑦ; ᐅᓇᑕᕆᐊᕈᓐᓇᑦᓯᐊᕐᐳᖓ ᓴᓐᖏᔫᑦᓯᐊᕐᓗᖓᓗ, ᖃᓄᑐᐃᓐᓇᕐᓘᓐᓃᑦ ᓱᓕ ᐱᓇᓱᐊᕈᓐᓇᑦᓯᐊᕐᐳᖓ.

¹² ᒫᓐᓇᓕ ᓄᓇᒥᒃ ᑐᓂᓯᕕᒋᓚᐅᓐᖓ ᖃᖅᑲᓕᖕᓂᒃ ᐊᑕᓂᐅᑉ ᐊᖏᕈᑎᒋᓚᐅᕐᑕᖓᓂᒃ ᐅᓪᓗᒥ ᑍᑦᓱᒪᓂ; ᐊᖑᑏᓪᓗ ᑍᒃᑯᐊ ᐅᓂᒃᑳᕐᑎᓪᓗᑕ ᑐᓵᖃᑕᐅᓚᐅᕐᓯᒪᒐᕕᑦ, ᐅᖃᓚᐅᕐᓯᒪᕗᒍᑦ ᐃᓄᒃᐸᒃᑕᖃᓚᐅᕐᒪᑦ ᑭᖑᕚᕇᓂᒃ ᑍᔭᐅᔪᓂᒃ ᐊᓇᑭᒻᓂᒃ ᐊᕙᓗᕐᔪᐊᓕᖕᓂᒃ ᐃᒡᓗᒐᓴᕐᔪᐊᖃᕐᑐᓂᒃ: ᐃᒻᒪᖄᓕ ᐊᑕᓂᐅᑉ ᐃᓚᒋᓂᐊᕐᐹᖓ, ᓯᖏᑦᓯᖁᓪᓗᖓ ᑖᒃᑯᓂᖓ ᐊᑕᓂᖅ ᑍᒫᒃ ᐅᖃᕐᓯᒪᖕᒪᑦ.”

¹³ ᑕᕝᕙ ᔮᓱᐊᑉ ᓮᒻᒪᕐᑎᑉᐹ ᑬᓚᐱ ᔨᐳᓂᐊᐅᑉ ᐃᕐᓂᖓ; ᑐᓂᕚᓗ ᐃᒡᓗᒐᓴᖕᓂᒃ ᕼᐃᐸᕋᓐᒥᒃ ᓄᓇᑖᖁᓪᓗᒍ ᑭᖑᕐᖑᑎᓕᕐᓗᒍᓗ.

¹⁴ ᕼᐃᐸᕋᓐᓗ ᓱᓕ ᐅᓪᓗᒥ ᓄᓇᒋᔭᐅᕗᖅ ᑬᓚᐱᐅᑉ ᑭᖑᕚᖏᓐᓄᑦ ᔨᐳᓂᐊᐅᑉ ᐃᕐᓂᖓᓄᑦ ᑍᔭᐅᔪᖅ ᑭᓂᔧᑦᒥᒃ ᑖᒃᑯᓄᖓ ᑭᖑᕐᖑᑎᔭᐅᖁᓪᓗᒍ, ᓱᓕᑦᓯᐊᕐᑐᒥᒃ ᓈᓚᓚᐅᕐᓂᖓᓄᑦ ᐊᑕᓂᕐᒥᒃ, ᐃᓴᕆᐊᓕᒥᐅᑦ ᒎᑎᖓᓂᒃ.

¹⁵ ᑍᑦᓱᒪ ᕼᐃᐸᕋᓐ ᑍᔭᐅᓚᐅᕐᐳᖅ ᑭᕆᐊᑦ-ᐊᕋᐸᐅᑉ ᐃᒡᓗᒐᓴᖏᓐᓂᒃ; ᑖᓐᓇ ᐋᕐᐸ ᐱᔪᓐᓇᕐᓂᕐᐹᖑᓚᐅᕐᑐᖅ ᐊᓇᑭᒥᐅᓂᑦ. ᑭᖑᓂᖓᒍᑦ ᑕᒪᓐᓇ ᓄᓇ ᐅᓇᑕᕐᕕᐅᖏᑦᓯᐊᓕᓚᐅᕐᐳᖅ.