ᔫᐱᐅᑉ ᐊᒡᓚᖏᑦ 37 - ᐊᒡᓔᑦ ᐃᑦᔪᕐᖕᓁᑦᑐᑦ

¹ “ᑕᒪᑐᒧᖓᑦᑕᐅᖅ ᐆᒻᒪᑎᒐ ᓴᔪᓕᕐᑎᑕᐅᖃᑦᑕᕐᐳᖅ, ᑎᒡᓕᕐᓂᖓᓗ ᐱᐅᓯᕐᒥᓂᑦ ᐊᑦᔨᒋᔪᓐᓁᕐᑎᑕᐅᓪᓗᓂ.

² ᓈᓚᒋᑦᓯ ᑖᑦᓱᒪ ᓂᐱᖓᓂᒃ ᐃᒃᑐᓚᐅᕐᓂᕐᒥᑦ, ᐃᕗᓘᕐᓂᕐᓗ ᑖᑦᓱᒪ ᖃᓂᖓᓂᑦ ᐱᖕᒪᑦ.

³ ᕿᓚᐅᑉ ᐊᑖᒍᑦ ᐊᑕᖐᒪᔪᒥᒃ ᑲᓪᓕᕐᑎᑦᓯᕙᒃᐳᖅ, ᓄᓇᕐᔪᐊᑉ ᐃᓱᐊᓂᑦ ᐃᓱᐊᓄᑦ ᑎᑭᓪᓗᒍ ᖃᐅᒻᒪᓪᓚᒃᑎᑦᓯᕙᒃᐳᖅ.

⁴ ᓂᐱᖓᑕ ᑭᖑᓂᖓᒍᑦ ᐃᕗᓘᒥᓂᖓ ᑐᓴᕐᓴᕈᕐᐳᖅ; ᑭᖑᕐᖓᒍᑦ ᐃᑐᓚᐅᕐᓗᓂ ᓂᐱᕐᔪᐊᖓ ᓂᓪᓕᕆᕗᖅ ᐃᓕᕋᓇᕐᑑᓪᓗᓂ, ᓂᐱᖓ ᑐᓴᕐᓴᐅᑎᓪᓗᒍ ᑕᕝᕙ ᖃᐅᒻᒫᓪᓚᑲᑕᓕᕐᐳᖅ ᓇᐅᒃᑯᑐᐃᓐᓇᖅ.

⁵ ᒎᑎᐅᑉ ᓂᐱᖓᑕ ᐃᒃᑐᓚᐅᕐᓂᖓᒍᑦ ᑲᒪᓇᕐᑐᓂᒃ ᐱᔪᖃᕐᐳᖅ; ᐱᐅᔪᐊᓗᖕᓂᒃ ᐱᓇᓱᐊᕐᐳᖅ ᑐᑭᓯᔪᓐᓇᓐᖏᑕᑦᑎᒍᑦ.

⁶ ᑖᑦᓱᒪ ᐱᖁᔨᓂᖓᒍᑦ ᐊᐳᑦ ᑲᑕᒐᖃᑦᑕᕐᐳᖅ ᓄᓇᒧᑦ; ᓯᓚᓗᒃᑎᑉᐹᑦᑕᐅᖅ ᐃᒥᕐᒥᒡᓗ ᑯᕕᑐᐃᓐᓇᕐᑎᓪᓗᒍ, ᐱᔪᓐᓇᕐᓂᒃᑯᑦ.

⁷ ᑕᕝᕙ ᐃᓄᓕᒫᑦ ᐱᓇᓱᐊᕐᓂᖏᑦ ᓄᖅᑲᕐᑎᖃᑦᑕᕐᐰᑦ; ᐃᓄᓕᒫᑦ ᑐᑭᓯᖁᓪᓗᒋᑦ ᑖᑦᓱᒪ ᐱᓇᓱᐊᕐᓂᖓᓂᒃ.

⁸ ᑕᕝᕙ ᐆᒪᔪᑦ ᓴᕐᓕᐊᕐᕕᖕᒥᖕᓄᑦ ᐃᑎᕐᐳᑦ, ᑕᕝᕙᓃᖏᓐᓇᓕᕐᓗᑎᒡᓗ ᓯᑎᒥᖕᓂ.

⁹ ᐅᓚᔪᔭᖅ ᑎᑭᑉᐳᖅ ᑖᑦᓱᒪ ᐃᓂᖓᓂᑦ, ᓂᒡᓕᓇᕐᑐᕐᓗ ᓯᐊᒻᒪᖓᔪᓂᑦ ᐊᓄᕆᓂᑦ ᑎᑭᑉᐳᖅ.

¹⁰ ᒎᑎᐅᑉ ᐊᓂᕐᓂᖓᓂᑦ ᐃᒪᖅ ᖁᐊᕐᑎᑕᐅᕗᖅ, ᐃᒪᕐᔪᐊᕐᓗ ᖁᐊᑦᓴᐅᑎᒋᕗᖅ ᓂᓚᓪᓚᕆᐅᓕᕐᓗᓂ.

¹¹ ᓄᕗᔭᑦ ᕿᕐᓈᖓᔪᑦ ᐃᓗᓪᓕᕐᓯᒪᖃᑦᑕᕐᐰᑦ ᖃᐅᓯᕐᑐᒥᒃ; ᓄᕗᔭᓂᑦ ᑕᕝᕙ ᖃᐅᒻᒪᓪᓔᑦ ᓯᐊᒻᒪᖃᑦᑕᕐᐳᑦ.

¹² ᑖᑦᓱᒪ ᑕᓯᐅᕐᓯᓂᖓᓄᑦ ᓄᕗᔭᑦ ᑬᕕᖃᑦᑕᕐᐳᑦ, ᖃᓄᑐᐃᓐᓇᖅ ᐱᖁᑐᐊᕐᒪᒋᑦ ᐱᕙᓪᓕᐊᖃᑦᑕᕐᐳᑦ ᓇᓂᓕᒫᑦᓯᐊᖅ ᓄᓇᕐᔪᐊᕐᒥ ᓇᔪᕐᑕᐅᔪᒥ.

¹³ ᓯᓚᓗᖕᒥᒃ ᑎᑭᑎᑦᓯᖃᑦᑕᕐᐳᖅ ᓱᒋᐊᕐᓯᑦᔪᑎᒋᓪᓗᒋᑦ, ᐅᕝᕙᓗ ᓄᓇᒥᒃ ᖃᐅᓯᕐᑎᑦᓯᔪᒪᓪᓗᓂ, ᐅᕝᕙᓗ ᓇᒡᓕᖕᓂᕐᒥᓂᒃ ᓴᖅᑭᑎᑦᓯᔪᒪᓪᓗᓂ.

¹⁴ ᔫᐲ ᐅᓇ ᓈᓚᒍᒃ; ᕿᑲᕐᓯᓗᑎᑦ ᐃᒃᐱᒍᓱᑦᓯᐊᕆᑦ ᒎᑎᐅᑉ ᐱᓇᓱᐊᕐᑕᖏᓐᓂᒃ ᑲᒪᓇᕐᑐᓂᒃ.

¹⁵ ᖃᐅᔨᒪᕖᑦ ᖃᓄᖅ ᒎᑎᐅᑉ ᓄᕗᔭᑦ ᑎᓕᖃᑦᑕᕐᒪᖔᒋᑦ, ᖃᖓᓗ ᖃᐅᒻᒫᓪᓚᖁᖃᑦᑕᕐᒪᖔᒋᑦ ᓄᕗᔭᓂᑦ?

¹⁶ ᓄᕗᔭᑦ ᖃᓄᖅ ᖃᖓᑕᔪᓐᓇᕐᒪᖔᑕ ᖃᐅᔨᒪᕖᑦ? ᑖᑦᓱᒪ ᐱᓇᓱᐊᕐᓂᖓ ᑲᒪᓇᕐᐳᖅ ᖃᐅᔨᒪᔪᓪᓚᕆᐊᓘᖕᒪᑦ,

¹⁷ ᐆᓐᓂᐅᔭᓕᖃᑦᑕᕐᐳᑎᑦ ᓯᓚ ᐅᖅᑰᓯᑎᑐᐊᕐᒪᒍ ᓯᕿᓂᐅᑉ ᓇᓛᓂᑦ ᓄᓇ ᐊᓄᕌᓕᑐᐊᕌᖓᑦ.

¹⁸ ᑖᑦᓱᑐᓇᖅ ᕿᓚᒃ ᐃᓯᕕᑎᑦᓱᓐᓇᕐᐱᐅᒃ? ᓯᑎᔫᓕᕐᑎᓪᓗᒍ ᐊᐅᒃᑎᓯᒪᔪᑎᑐᑦ ᑕᕐᕋᕐᑑᑎᑎᑐᑦ?

¹⁹ ᐊᔪᕆᕐᑐᓚᐅᕐᑎᒍᑦ ᖃᓄᖅ ᒎᑎᒧᑦ ᐅᖃᕐᑐᒃᓴᐅᖕᒪᖔᑦᑕ; ᐃᓱᒪᑖᕈᓐᓇᖏᓐᓇᑦᑕ ᖃᓄᐃᓕᔭᕆᐊᒃᓴᖅ ᑖᕐᑐᒦᓐᓂᑦᑎᓐᓄᑦ.

²⁰ ᐅᖃᐅᑦᔭᐅᔭᕆᐊᖃᕐᐹ ᐅᖃᕈᒪᓂᕋᕐᑕᐅᓗᖓ ᑖᑦᓱᒧᖓ? ᐃᓄᒃ ᑐᖁᑕᐅᔪᒪᓗᓂ ᑖᑦᓱᒧᖓ ᐱᕕᒃᓴᖃᕐᑎᑦᓯᔪᓐᓇᕐᐹ?

²¹ ᒫᓐᓇᓗ ᐃᓄᒃ ᖃᐅᒪᔪᒧᑦ ᑕᑯᓴᕈᓐᓇᓐᖏᓚᖅ, ᖃᐅᒪᓗᐊᕐᒪᑦ ᑕᑯᔭᕆᐊᖓ ᕿᓚᖕᒦᑦᑑᑉ ᖃᐅᒪᓂᖓ, ᐊᓄᕆᒧᑦ ᓴᓗᒻᒪᕐᓴᕐᑕᐅᒐᒥ ᐊᓪᓚᕿᓕᕐᒪᑦ.

²² ᐅᓐᓄᐊᑉ ᓇᓛᓂᑦ ᒎᓗᑎᑐᑦ ᑕᑯᒥᓇᕐᓂᓕᒃ ᓴᖅᑭᑉᐳᖅ, ᒎᑎ ᐊᓐᓄᕌᕐᓯᒪᖕᒪᑦ ᓂᕐᑐᕐᓇᕐᓂᕐᔪᐊᕐᒥᒃ ᐊᖏᔪᒥᒃ.

²³ ᐊᔪᒐᖃᖏᑦᑐᖅ ᐊᖏᓗᐊᕐᒪᑦ ᓇᒡᕚᕈᓐᓇᓐᖏᓚᕗᑦ; ᐱᔪᓐᓇᕐᓂᕐᔪᐊᖃᕐᐳᖅ ᓈᒻᒪᓈᕆᑦᓯᐊᕐᐸᒡᓗᓂᓗ, ᓇᓛᒎᑦᓮᓐᓇᕐᓂᖓᓗ ᐃᓄᖕᓂᒃ ᐅᖁᒤᒃᓴᕐᑎᑦᓯᓂᐊᓐᖏᓚᖅ.

²⁴ ᑍᒤᒻᒪᑦ ᐃᓄᐃᑦ ᑖᓐᓇ ᓯᕘᕋᒋᕚᑦ; ᓯᓚᑐᔫᔪᕆᔫᒐᓗᐊᓪᓗ ᓇᓪᓕᐊᑦ ᐃᒃᐱᒋᓐᖏᓔᑦ.”